Eenen Dach en Jerusalem räd Jesus von sienen Voda, Jehova, un hee wees, daut de Gloowesleidasch lieejen deeden (Johanes 8:12-30). Waut hee dan säd, halpt ons to weeten, aus daut de Woarheit es, waut wie von Gott jleewen. Jesus säd: “Wan jie bie dee Wieed bliewen, waut ekj junt jelieet hab, sent jie woarhauftich miene Jinja. Dan woa jie weeten waut Woarheit es, un de Woarheit woat junt frie moaken” (Johanes 8:31-32, PB).

“Bie dee Wieed bliewen, waut ekj junt jelieet hab”. En dis Varsch wiest Jesus, woo wie weeten kjennen, aus eene Glooweslia “de Woarheit” es. Wan du waut hieescht äwa Gott, dan denkj äwa dit no: Stemt daut met Jesus siene Wieed un met daut äwaje von de Heilje Schreft? Doo daut uk soo aus dee, wua Aposteljeschicht 17:11 (PB) von rät, waut dän Apostel Paulus hieeden: Dee “forschten aule Dach en de Schreft, om to seenen auf daut [waut see lieeden] soo wia, aus see säden”.

Marco, Rosa un Raymonde, wua de ieeschta Artikjel von räd, deeden krakjt daut. Dee unjastunden sikj daut, waut see jleewden doaderch, daut see met Jehova siene Zeijen toop de Schreft studieeden. Waut lieeden dee?

Marco: “Ons Bibelliera wees mie un miene Fru aules met de Schreft, waut wie weeten wullen. Onse Leew fa Jehova funk aun, jrata to woaren un wie aus Lied veeenden ons uk dolla!”

Rosa: “Ieeschtlich docht ekj, daut de Schreft bloos een Buak wia, wua Menschen oppschreewen, woo Gott no äare Meeninj no wia. Oba met de Tiet jeef de Schreft mie Kloarheit äwa Sachen, waut ekj weeten wull. Nu weet ekj, daut et Jehova opp iernst jeft un daut hee wäa es, wäm ekj vetruen kaun.”

Raymonde: “Ekj bäd Gott om Help, daut ekj kunn von am lieren. Boolt no daut fungen ekj un mien Maun aun, de Schreft to studieren. Entlich lieed wie de Woarheit äwa Jehova! Wie freiden ons sea to lieren, waut fa een Gott hee es.”

De Schreft lieet ons de Woarheit äwa Gott un dee wiest ons, daut hee een leeftolja Gott es. De Schreft es Gott sien Wuat un dee halpt ons to vestonen, “waut Gott ons jejäft haft” (1. Korinta 2:12, PB). Wuarom finjst du nich mol selfst ut, waut de Schreft ons aules lieet äwa Gott, äwa sien Väanämen un waut hee fa ons jeplont haft. Välet, waut du weeten west, kaust du opp www.pr418.com noläsen, bie Biblische Lieren > Waut sajcht de Schreft äwa …?. Du kaust opp dise Websied no een Bibelstudium froagen ooda du kaust uk eent von Jehova siene Zeijen doano froagen. Wie sent ons secha, wan du de Schreft studieescht, dan woat diene Leew fa Gott emma jrata un stoakja woaren.