Ntsiku inango Yesu ali ku yerusalemu angayankhula va Yahova, yemwe ni ababa wake. Iye adadzudzula atsogoleri wachipembedzo chonyenga omwe enze wogopsa nthawe mweyo. (Yohane 8:12-30) Vomwe adanena pa ntsiku mweyi vichatipfunzisa momwe tinfunikira kuwonera vikhulupiriro vokhudza Mulungu vomwe wanthu azinji achavikhulupirira. Yesu adati: “Mukambasunga mawu yangu nthawe zose ndiye kuti ndimwedi wopfunzira wangu. Mudzadziwe choonadi ndipo chidzakumasuleni.” —Yohane 8:31, 32.

“Pakulewa kuti “ mukambasunga mawu yangu,” Yesu adalewa mpfundo yomwe ingatithandize kuzindikira peno vipfunziso vachipembedzo ni volondola. Munthu munango akambakuwuzani nkhani yokhudza Mulungu muchadekana kudzibvunza kuti, ‘ko vomwe munthu muyu ankunena vinkubverana na vomwe yesu adanena? Ko ni vobverana na vomwe mawu ya Mulungu yachanena?’ Mungachite bwino kutengera chitsanzo cha wanthu womwe angabvesera Paulo ankuyankhula, womwe “angafagafaga malemba mosamala kuti atsimikizire ngati vomwe adabva venzedi chaivo.” —Machitidwe 17:11.

Marco, Rosa, na Raymonde, womwe mawu yawo yali munkhani yoyambirira ire adafagafaga mosamala vomwe angakhulupirira kuti awone peno venze chaivodi. Iwo adachita vimwevi pakupfunzira Baibolo na Mboni za Yahova. Ko wanthu mwawa adapfunzira viponi?

Marco: “M’bale yemwe ambatipfunzisa Baibolo ambadawira mibvunzo yose yomwe inepano na nkazi wangu tenze nayo ndipo angaphatisira basa Baibolo. Tidayamba kukonda Yahova komasoti inepano na nkazi wangu tidayamba kukondana maninge.”

Rosa: “pakuyamba ningaganiza kuti Baibolo ni bukhu yofotokoza va Mulungu yomwe wanthu adanemba pophatisa basa nzeru zawo. Koma pang’onopang’ono nidayamba kugumana midawiro ya mibvunzo yomwe nenze nayo kuchokera m’Baibolo. Manjeuno ninkuwona kuti Yahova ni Mulungudi chayiye, yemwe ningakwanise kumbamuthemba.”

Raymonde: “Nimbakhulupirira Mulungu kuti anithandize kupfunzira va iye. Pakanati papita nthawe, ine na mwamuna wangu tidayamba kupfunzira Baibolo ndipo vimwevi vidatithandiza kudziwa chaivo pakunena va Yahova. Tidakondwa maninge patidazindikira kuti Mulungu ni wachikondi.”

Baibolo indotithandizalini kuzindikira chabe mabodza yonena va Mulungu, koma ifotokoza pomwe va makhalidwe yabwino yomwe Mulunguyo ali nayo. Baibolo ina Mawu yowuziriwa ndipo itithandiza “kuti tidziwe vinthu vomwe mulungu watipasa mokoma moyo.” (1 Akorinto 2:12) Tani imwepombo kupfunzira Baibolo kuti mugumane midawiro ya mibvunzo yodekana maninge yonena va Mulungu, na cholinga chake komasoti madaliso yomwe tidzatambire kutsogolo? Mungalewenge yanango mwa midawiro ya mibvunzo mwaya pa wubusaiti www.pr418.com. ngenani ponembewa kuti “Vomwe Baibolo ichapfunzisa >kudawira mibvunzo ya m’Baibolo” mungakwanise pomwe kukumbira pa webusaiti mweyi kuti wa Mboni za Yahova ambakupfunziseni Baibolo aponeye mungakumbire wa Mboni za Yahova aliyese.tinkudziwa kuti mukachita vimwevi mudzawone kuti ni vokwanisika kukonda Mulungu.