Jenaj qʼiij, reʼ Jesús xqʼorik chi riij i Rajaaw, Jehová, ar Jerusalén, eh xuyeew chi nabʼjik taqeh chukuj qʼorik xkiqʼor taqeh kʼamal bʼeeh chupaam taqeh i qʼiij reʼ reʼ (Juan 8:​12-30). Reʼ xuqʼor i reh irukʼuhtaaj qeh nikʼwach ne inqatzʼir riij chi riij i inkiqʼor chi riij i Dios yuʼnaak. Reʼ Jesús xuqʼor: «Wilaʼ maʼ xakanaaʼ taq chik runimjiik i nuqʼoral, naa taq akahniik chi manlik waj tahqaneel. Eh naa taq anabʼeem i korik, reʼ i korik naa taq resaniik chaaweh pan qʼabiʼ inchopwik taq anaah» (Juan 8:​31, 32).

Noq re’ Jesús xuqʼor: «Wilaʼ maʼ xakanaaʼ taq chik runimjiik i nuqʼoral» xraaj chi ne inqakoj rehtaal mi reʼ taqeh inqanimaj korik oon maʼ korik ta. Jeʼ rukabʼ mi inkiqʼor jenoʼ qʼorik aweh chi riij i Dios, chapahqaaj: «¿Jenaj na wach ruukʼ i xuqʼor i Jesús eh ruukʼ chuʼnchel iruqʼor i ruqʼorbʼal i Dios?». Chabʼan jeʼ rukabʼ i xibʼirinik reh i apóstol Pablo: chatzʼir riij iruqʼor i Santo Laj Huuj ehtʼalbʼal reh mi korik inkiqʼor (Hechos 17:11).

Reʼreʼ xkibʼan i Marco, i Rosa eh i Raimunda­, reʼ xqaqʼor pan rutohqʼiik. Xitijinik ruukʼ taqeh testigo reh Jehová. ¿Chajariik xkilow?

Reʼ Marco iruqʼor: «Reʼ Testigo reʼ iruyeew naq qatijinik irukoj naq i Santo Laj Huuj reh qʼorik chi riij taqeh pahqanik inqabʼan ruchʼihiil i wehkʼeen. Chi qʼun qʼun xooj kʼihoq i qakʼaxooj chi riij i Jehová eh xkowjik i qakaxarohiil».

Reʼ Rosa iruqʼor: «Inukapaaj naq chi reʼ Santo Laj Huuj jenaj naq huuj rukapebʼaal winaq i wilik chupaam. Xa reʼ laʼ chi qʼun qʼun xooj nureq chi riij taqeh nupahqanik. Yuʼnaak i Jehová jenaj kʼacharel korik chi weh. Wilik chik nukʼux ruukʼ».

Reʼ Raimunda iruqʼor: «Xnupahqaaj reh i Dios chi ne kirutobʼeej runabʼjiik wach. Maʼ najt ta xikʼik xqatoqʼaaʼ tijinik ruchʼihiil i nubʼahiil. ¡Xqatijej i korik chi riij i Jehová! Qʼeʼ naq suq qakʼux runabʼjiik chi riij i Dios».

Reʼ Santo Laj Huuj irukʼuhtaaj qeh taqeh chukuj qʼorik inqʼorarik chi riij i Dios. Irubʼan woʼ «chi neeqareq chi riij taqe i runaʼojbʼal i Dios reʼ xuyeew qeh chi naabʼjik» (1 Corintios 2:12). ¿Inawaaj na anabʼeem i hat chi riij i Dios, chi riij iraaj rubʼanam eh chi riij i kʼacharik iraaj naruyeʼem qeh jeʼ rukabʼ iruqʼor i Santo Laj Huuj? Ne irubʼan chi ne inareq kʼisinoq chik chi riij i wilih pan www.pr418.com/poh ahaʼ wiiʼ iruqʼor «Kʼuhtanik chi riij i Santo Laj Huuj > Taqeh pahqanik chi riij i Santo Laj Huuj». Ne woʼ irubʼan chi ne inapahqaaj jenoʼ atijinik ruukʼ jenoʼ testigo reh Jehová. Mi xabʼan ne inakoj rehtaal chi maʼ kʼaxik ta runabʼjiik eh rukʼaxariik i Dios.