Tetai ra i Ierusalema, te tuatua ra a Iesu ki tona Metua ia Iehova, kua akakite pu ua mai aia i te manako kino o te au arataki akonoanga pikikaa o tona tuatau. (Ioane 8:12-30) Tana i akakite i taua atinga ra, te apii maira ia tatou e ka akapeea me makitoro marie i te au irinakianga matauia no runga i te Atua i teia tuatau. Kua akakite a Iesu e: “I tāpu tika kotou i taku tuatua, e pipi tikai kotou naku i reira: Ka kite kotou i te tuatua-mou, e na te tuatua mou kotou e akarangatira.”​—Ioane 8:31, 32.

“Tāpu tika kotou i taku tuatua.” Kua akanoo a Iesu i te turanga no tatou kia akamanako meitaki e me e “tuatua-mou” rai te au apiianga akonoanga. Me rongo koe i tetai tuatua no runga i te Atua, e ui kia koe uaorai e me, ‘Te rotai ra ainei teia ki te au tuatua a Iesu e te katoaanga o te au Tuatua Tapu?’ Aru i te akaraanga a te aronga i akarongo ana i te ako a te apotetoro ko Paulo, e tei ‘kimi marie i te tuatua i tataia ra, i te tau anga oki i taua tuatua ra, kare e rā i tukua.’​—Angaanga 17:11.

Ko Marco, Rosa, e Raymonde, tei taiku pouroaia i roto i te atikara mua, kua makitoro marie ratou i to ratou irinakianga na roto i te apii anga i te Pipiria ma te Au Kite o Iehova. Eaa ta ratou i mou mai?

Marco: “Kua taangaanga to maua puapii Pipiria i te Tuatua a te Atua, ei pau i ta maua au uianga pouroa ko taku vaine. Tupu rava atura to maua inangaro ia Iehova, pera katoa to maua pirianga ki tetai e tetai ei tokorua akaipoipo!”

Rosa: “Te akamataanga, manako au e e puka manako tangata ua te Pipiria no runga i te Atua. Inara, i rauka marie ua mai te pauanga a te Pipiria ki taku au uianga. Teianei, e Atua tika tikai a Iehova kiaku. Ka rauka iaku te irinaki Iaia.”

Raymonde: “Kua pure au ki te Atua kia tauturu mai iaku kia kite no runga iaia. Muri poto ua mai, akamata maua e taku tane i te apii i te Pipiria. E i te openga, kua kite maua i te tuatua mou no runga ia Iehova! Rekareka tikai maua i te kite anga e mei teaa tikai te tu o te Atua.”

Kare ko te au pikikaa ua no runga i te Atua ta te Pipiria e akakite atea ua maira; te akakite katoa maira i te tika no runga i tona au tu memeitaki. E Tuatua akauruia teia nana, e te tauturu maira te reira ia tatou ‘kia kite i te au mea i oronga uaia mai e te Atua no tatou nei.’ (1 Korinetia 2:12) Akara mai e akapeea te Pipiria te pau anga i te au uianga matauia e te puapinga no runga i te Atua, tona akakoroanga, e no te tuatau ki mua. E tatau i te au pauanga no teia au uianga i raro i te “Bible Teachings > Bible Questions Answered” i runga i te www.pr418.com. Ka rauka katoa ia koe te pati i tetai apii Pipiria naau i runga i taua Web site ra, me kore pati atu ki te Au Kite o Iehova. Te irinaki nei matou e me akapera koe, ka kite koe e e mama roa atu ia koe kia inangaro i te Atua.