Loron ida, iha Jeruzalein, Jesus koʼalia kona-ba ninia Aman Jeová no fó sai katak ulun-naʼin relijiaun mak bosok-teen. (João 8:12-30) Ninia liafuan bele ajuda ita buka-hatene se buat neʼebé ita fiar kona-ba Maromak mak loos ka lae. Jesus hatete: “Se imi sempre halo tuir haʼu-nia liafuan, imi mak haʼu-nia dixípulu duni, no imi sei hatene lia-loos, no lia-loos sei halo imi livre.”​—João 8:31, 32.

Iha eskritura neʼe, Jesus hatudu oinsá ita bele buka-hatene se hanorin ruma mak loos ka lae. Bainhira Ita rona tiha hanorin ruma, husu ba Ita-nia an: ‘Jesus nia liafuan no Bíblia apoia ida-neʼe ka lae?’ Banati-tuir ema neʼebé rona apóstolu Paulo nia hanorin, ‘loroloron sira buka-hatene didiʼak Eskritura atu haree se buat neʼebé sira aprende loos ka lae’.​—Apóstolu 17:11.

Marco, Rosa no Ramona, neʼebé temi ona ohin, buka-hatene didiʼak kona-ba sira-nia fiar hodi estuda Bíblia ho Testemuña ba Jeová. Sira sente oinsá kona-ba buat neʼebé sira aprende?

Marco: “Ami-nia mestre Bíblia uza Bíblia atu hatán haʼu no haʼu-nia feen nia pergunta hotu. Ami-nia domin ba Jeová komesa buras, no ami-nia relasaun nuʼudar feen-laʼen mós sai metin liután.”

Rosa: “Foufoun, haʼu hanoin katak Bíblia mak livru ida neʼebé fó sai ema nia hanoin kona-ba Maromak. Maibé neineik-neineik, haʼu hetan resposta ba haʼu-nia pergunta sira husi Bíblia. Agora haʼu koñese didiʼak Jeová. No haʼu bele tau fiar ba nia.”

Ramona: “Haʼu halo orasaun ba Maromak hodi husu ajuda atu aprende kona-ba nia. Lakleur depois neʼe, haʼu no haʼu-nia laʼen komesa estuda Bíblia. Ikusmai ami aprende lia-loos kona-ba Jeová. Ami kontente tebes atu koñese didiʼak Maromak.”

Bíblia hatudu sai lia-bosok neʼebé ema fó sai kona-ba Maromak. Bíblia mós hanorin ita lia-loos kona-ba Maromak, katak nia mak domin no hatudu laran-diʼak. Maromak dirije ema atu hakerek Bíblia no Bíblia ajuda ita atu “hatene buat sira neʼebé Maromak haraik ona mai ita ho laran-diʼak”. (1 Korinto 2:12) Se Ita estuda Bíblia Ita sei aprende tanbasá Maromak kria ema no mundu, no Ita-nia futuru sei sai oinsá. Ita bele hetan resposta ba pergunta sira-neʼe husi www.pr418.com/tdt. Loke parte “Bíblia nia hanorin > Pergunta kona-ba Bíblia”. Ita mós bele husu Testemuña ba Jeová ida atu estuda Bíblia ho Ita, ka prenxe formuláriu iha website neʼe hodi husu Testemuña ida atu estuda Bíblia ho Ita. Ami fiar katak se Ita halo nuneʼe, Ita sei aprende katak fasil tebes atu hadomi Maromak.