Sha shighe ugen la, Yesu lu ôron ior kwagh u Ter na Yehova ken Yerusalem, shi ponon mbahemenev mba kwaghaôndo er ve tesen ior mimi ga yô. (Yohane 8:12-30) Kwagh u yange ôr la tese se er i gbe u se gbidyen kwar sha akaa a ior ve tesen nyian wuee sha kwagh u Aôndo la yô. Yesu kaa ér: “Aluer ne mba eren sha kwaghôron wam hanma shighe yô, ne mba mbahenen av jim jim, shi ne fa mimi, nahan mimi una pase ne, ne kera lu uikyangen ga.”—Yohane 8:31, 32.

“Eren sha kwaghôron wam hanma shighe.” Heen ne Yesu tese gbenda u a kar ve a fa aluer akaa a ukwaghaôndo ve tesen la ka “mimi” yô. Zum u u ongo or lu tesen kwagh u Aôndo yô, pine iyol you wer, ‘Kwagh ne zua sha mkaanem ma Yesu kua akaa a i nger ken Icighanruamabera la kpa?’ Dondo ikyav i mba yange ve ungwa kwaghôron u apostoli Paulu nahan “ve ver ishima zulee ve lu timen ken Ruamabera ayange ayange sha u vea nenge aluer akaa [a ve lu henen] la aa lu nahan yô” la.—Aerenakaa 17:11.

Marco man Rosa kua Raymonde mba se vande ôron kwagh ve ken ngeren u hiihii la, yange ve ver ishima zulee ve lu timen sha akaa a ve na jighjigh a mi la, sha u henen Bibilo vea Mbashiada mba Yehova. Ve nenge kwagh u ve hen la nena?

Marco: “Hanma mpin u mo vea kwase wam yange sea pine cii yô, a bugh Bibilo a na se ikyar ker jighilii. Sha nahan yô, Yehova hii u doon se ishima, shi mo vea kwase wam cii se seer lun kôôsôô a ayol a ase!”

Rosa: “Sha hiihii la, yange m hen mer Bibilo ka takeda u uumace ve gber, ve pase mbamnenge vev sha kwagh u Aôndo yô. Kpa tegh tegh tsô, m nenge er Bibilo i ne mbamlumun sha mbampin mba m lu a mi la yô. Hegen ne m fa mer Yehova ngu kpôô kpôô. Me fatyô u nan un jighjigh.”

Raymonde: “Yange m er msen hen Aôndo mer a wasem me hen kwagh na. Ica i gbe ga yô, mo vea nomom se hii u henen Bibilo. Nahan se fa mimi sha kwagh u Yehova! Se mba fe or u Aôndo a lu yô, saan se iyol je zua ga.”

Bibilo pon mbaaie mba i we Aôndo iyol la tsô ga, kpa i pase mimi u sha kwagh u aeren a doon tsung a Aôndo a lu a mi la. Bibilo ka Mkaanem ma Aôndo a ne i nger yô, shi ka i wase se u “fan akaa a Aôndo a ne se sha erdoo” na la kpaa. (1 Mbakorinte 2:12) Er nan u tôô shighe u nenge er Bibilo ia fatyô u nan we mlumun sha akaa a a tsume u sha kwagh u Aôndo, er kwagh u awashima na man kwagh u mlu wase u ken hemen la ga? Ôr mbamlumun mba i ne sha mbampin mban mbagenev la, sha itinekwagh i “Atesen a Bibilo > Mbampin mba Bibilo I Ne Mlumun sha Mi La” sha www.pr418.com/tiv. Shi u fatyô u tindin a loho sha ijiir i sha Intanet la wer i va hen Bibilo a we shin ôron Orshiada u Yehova wer nana va hen Bibilo a we. Se mba a vangertiôr ser aluer u er nahan yô, a kera taver we u soon kwagh u Aôndo ga.