Ḽiṅwe ḓuvha musi Yesu e Yerusalema o amba nga ha Khotsi awe Yehova nahone a bvukulula mazwifhi e a vha a tshi khou funziwa nga vharangaphanḓa vha vhurereli vha tshifhingani tshawe. (Yohane 8:​12-​30) Zwe a vha a tshi khou amba nga hazwo nga tshenetsho tshifhinga zwi ri funza nḓila ine ra nga ṱolisisa ngayo zwine zwa funzwa nga ha Mudzimu ṋamusi. Yesu o ri: “Arali na tevhedza zwine nda amba, ni vhafunziwa vhanga zwa vhukuma, ni ḓo ḓivha ngoho, hone ngoho i ḓo ni vhofholola.”​—Yohane 8:31, 32.

Musi Yesu a tshi ri “arali na tevhedza zwine nda amba,” o vha a tshi khou ri sumbedza nḓila ine ra nga ṱolisisa ngayo arali zwine zwa funzwa nga vhurereli zwi “ngoho.” Musi ni tshi pfa hu tshi ambiwa zwiṅwe zwithu nga ha Mudzimu, ni ḓivhudzise uri: ‘Naa zwi tshimbidzana na maipfi a Yesu na zwine zwa funzwa nga Bivhili?’ Edzisani vhathu vhe vha pfa Paulo a tshi funza nahone “vha ṱolisisa Maṅwalo ḓuvha ḽiṅwe na ḽiṅwe u itela u vhona arali zwe vha zwi pfa zwi ngoho.”​—Mishumo 17:11.

Marco, Rosa na Raymonde vhe ra amba nga havho kha thero ya u thoma, vho ṱolisisa zwine vha zwi tenda, nga u guda Bivhili na Ṱhanzi dza Yehova. Vho guda mini?

Marco: “Mugudisi washu wa Bivhili o vha a tshi shumisa Bivhili u itela u fhindula mbudziso dzoṱhe dze nṋe na mufumakadzi wanga ra vha ri nadzo. Zwenezwo zwo ita uri ri fune Yehova nga ho engedzeaho na uri nṋe na mufumakadzi wanga ri vhe na vhushaka ha tsini!”

Rosa: “U thomani ndo vha ndi tshi humbula uri Bivhili ndi bugu ine ya lingedza u ṱalutshedza zwine Mudzimu a vha zwone i tshi shumisa mahumbulele a vhathu. Fhedzi nga u ya ha tshifhinga, Bivhili yo fhindula mbudziso dze nda vha ndi nadzo. Zwa zwino, Yehova ndi wa vhukuma kha nṋe nahone ndi nga mu fhulufhela.”

Raymonde: “Ndo humbela Mudzimu uri a nthuse ndi gude nga hae. Nga murahunyana ha zwenezwo, nṋe na munna wanga ra thoma u guda Bivhili. Ra fheleledza ro guda ngoho nga ha Yehova! Ro vha ro takala vhukuma musi ri tshi ḓivha uri Mudzimu ndi muthu-ḓe.”

Bivhili i bvukulula mazwifhi ane a ambiwa nga ha Mudzimu na u amba ngoho nga ha zwine a vha zwone. Ndi Ipfi ḽawe ḽo hevhedzwaho nahone i ita uri ri “ḓivhe zwe Mudzimu a ri ṋea zwone nga vhuthu.” (1 Vhakorinta 2:12) Ḓivhoneleni nḓila ine Bivhili ya fhindula ngayo mbudziso dza ndeme nga ha Mudzimu, tshipikwa tshawe na vhumatshelo hashu. Ni nga wana phindulo dza dziṅwe dza dzenedzi mbudziso kha www.pr418.com/ve fhasi ha tshiteṅwa Pfunzo Dza Bivhili > Phindulo Dza Mbudziso Dza Bivhili. Ni nga dovha na humbela pfunzo ya Bivhili kha yeneyo website kana kha muṅwe wa Ṱhanzi dza Yehova. Ri na vhungoho ha uri arali na ita nga u ralo zwi ḓo ni lelutshela u funa Mudzimu.