Usa ka adlaw ha Jerusalem, hi Jesus nag-iistorya mahitungod han iya Amay, hi Jehova, ngan nagbubuhayhag han palso nga mga lider han relihiyon ha iya panahon. (Juan 8:12-30) An iya ginsiring hito nga takna nagtututdo ha aton kon paonan-o uusisahon an komon nga mga katutdoan yana mahitungod ha Dios. Hi Jesus nagsiring: “Kon kamo magpabilin ha akon pulong, kamo an totoo gud nga akon mga tinon-an. Ngan kamo mahibabaro han kamatuoran, ngan an kamatuoran magluluwas ha iyo.”—Juan 8:31, 32, Baraan nga Kasuratan.

“Magpabilin ha akon pulong.” Dinhi iginhahatag ni Jesus an suruklan ha pag-usisa kon an mga katutdoan ba han relihiyon “an kamatuoran.” Kon may nababatian ka mahitungod ha Dios, pakianhi an imo kalugaringon, ‘Uyon ba ini ha mga pulong ni Jesus ngan ha iba nga bahin han Baraan nga Kasuratan?’ Subara an mga tawo nga namati kan apostol Pablo ngan ‘nag-usisa hin maopay han Kasuratan kada adlaw basi masiguro kon totoo gud an ira nabatian.’—Buhat 17:11.

Gin-usisa hin maopay nira Marco, Rosa, ngan Raymonde, nga gin-unabi ha siyahan nga artikulo, an ira gintotoohan pinaagi ha pag-aram ha Biblia ha mga Saksi ni Jehova. Ano an ira hinbaroan?

Marco: “Gin-gamit han nagdudumara han pag-aram ha amon nga mag-asawa an Biblia basi mabaton an amon mga pakiana. Nagtubo an amon gugma kan Jehova, ngan nagin mas duok liwat kami sugad nga mag-asawa.”

Rosa: “Ha tinikangan, kahuna ko nga an Biblia usa la nga libro han pilosopiya han tawo nga nagsasari pagsaysay mahitungod ha Dios. Pero hinay-hinay nga nakita ko ha Biblia an baton ha akon mga pakiana. Yana, tinuod gud hi Jehova ha akon. Makakasarig ako ha Iya.”

Raymonde: “Nag-ampo ako ha Dios nga buligan ako nga mahibaro mahitungod ha iya. Waray pag-iha, nag-aram kami nga mag-asawa han Biblia. Dida hito, nahibaro kami han kamatuoran mahitungod kan Jehova! Nalipay gud kami nga mahibaro kon ano nga klase hin Dios hiya.”

Diri la iginbubuhayhag han Biblia an mga kabuwaan mahitungod ha Dios, iginhahayag liwat hito an mga kamatuoran mahitungod han iya mag-opay nga kalidad. Ito an iya Pulong, ngan nabulig ito nga “hibaroan naton an mga butang nga mahigugmaon nga iginhatag ha aton han Dios.” (1 Corinto 2:12) Kay ano nga diri sarihan nga usisahon an mga baton han Biblia ha komon kondi importante nga mga pakiana mahitungod ha Dios, han iya katuyoan, ngan han aton tidaraon? Basaha an baton ha pipira hini nga mga pakiana ilarom han “Bible Teachings > Bible Questions Answered” “Bible Teachings > Bible Questions Answered” ha www.pr418.com. Puydi ka liwat maghangyo dida hito nga Web site o ha usa han mga Saksi ni Jehova nga dumarahan ka hin pag-aram ha Biblia. Naglalaom kami nga kon bubuhaton mo ito, masasantop mo nga masayon gud hinduro higugmaon an Dios.