Junpʼéel kʼiin tu kaajil Jerusaleneʼ, Jesuseʼ tʼaanaj yoʼolal Jéeoba, u Taata, yéetel tu yaʼalaj chéen táan u tuus le fariseoʼoboʼ (Juan 8:12-30). Le baʼax tu yaʼalaj Jesusoʼ ku yeʼesik bix jeʼel k-ilik wa jaaj le baʼax ku yaʼalaʼal yoʼolal Dios bejlaʼoʼ. Jesuseʼ tu yaʼalaj: «Wa ku pʼáatal ta puksiʼikʼaleʼex baʼax kin waʼalikeʼ jach tu jaajil in discípuloʼex. Teʼexeʼ yaan a kʼaj óoltikeʼex le jaajoʼ, le jaaj túunoʼ yaan u jáalkʼabtikeʼex» (Juan 8:31, 32).

Le ka tu yaʼalaj «u pʼáatal ta puksiʼikʼaleʼex baʼax kin waʼalik[oʼ]», Jesuseʼ tu yeʼesaj baʼax unaj k-beetik utiaʼal ka k-il wa «jaaj» le baʼaxoʼob ku kaʼansaʼaloʼ. Ken aʼalaʼak wa baʼax yoʼolal Dioseʼ, tukle: «¿Bey wa tu kaʼansilak Jesusoʼ? ¿Bey wa u yaʼalik le Bibliaoʼ?». Beet jeʼex le máaxoʼob uʼuy u kaʼansaj apóstol Pablo, yéetel «sáamsamal kaʼach ku xakʼalxoktikoʼob tubeel u Tʼaan Dios utiaʼal u yilkoʼob wa jaaj le baʼaxoʼob» kaʼansaʼabtiʼoboʼ (Hechos 17:11).

Marco, Rosa yéetel Raimunda, máaxoʼob tsʼoʼok k-aʼalik teʼ yáax xookoʼ, áantaʼaboʼob tumen u j-jaajkunajoʼob Jéeoba utiaʼal u xakʼaltikoʼob le Bibliaoʼ. ¿Bix tu yuʼubilubaʼob yoʼolal le baʼax tu kanoʼoboʼ?

Marco: «Le máax tsʼáatoʼon xookoʼ yéetel le Biblia tu núukaj le kʼáatchiʼob anchaj tiʼ teen yéetel tiʼ in watanoʼ. Káaj k-yaabiltik Jéeoba, yéetel joʼopʼ in biskinba maas maʼalob yéetel in watan».

Rosa: «Tu káajbaleʼ kin tuklikeʼ le Bibliaoʼ chéen junpʼéel u libroil filosofía ku wéej tsolik bix Dios tiʼ junpʼéel bix jeʼel u naʼatik wíinikoʼ. Baʼaleʼ jujunpʼíitileʼ tin kanaj teʼ Biblia le baʼaxoʼob taak in wojéeltik kaʼachoʼ. Bejlaʼeʼ kin creertikeʼ jach tu jaajil yaan Jéeoba. In wojel jeʼel u páajtal in kʼubik in wóol tiʼeʼ».

Raimunda: «Tin kʼáat óoltaj tiʼ Dios ka u yáanten in kan máax letiʼ. Maʼ úuch tiʼ leloʼ, teen yéetel in wíichameʼ káaj k-xokik le Bibliaoʼ. ¡Kʼuch u kʼiinil k-kanik u jaajil yoʼolal Jéeoba! Jach táaj kiʼimakchaj k-óol le ka t-ojéeltaj bix u modos Diosoʼ».

Le Bibliaoʼ maʼ chéen ku yeʼesik máakalmáak le tuusoʼob ku yaʼalaʼal yoʼolal Diosoʼ, baʼaxeʼ ku kaʼansik xan le jatsʼuts modos yaantiʼoʼ. Le Bibliaoʼ u Tʼaan Dios; ku yáantkoʼon «k-kʼaj óolt le baʼaxoʼob tu tsʼáajtoʼon Dios tu yoʼolal u yutsiloʼ» (1 Corintios 2:12). ¿Maʼ wa uts ta tʼaan ka a kan teʼ Biblia u jaajil yoʼolal Dios yéetel baʼax u tukultmaj u beetkoʼ? Teʼ kúuchil ich Internet www.pr418.com/yua, jeʼel u páajtal a kʼáatik ka tsʼaʼabaktech xook yéetel le Bibliaoʼ; jeʼel xan u páajtal a kʼáatik tiʼ juntúul u j-jaajkunaj Jéeobaeʼ. Wa ka beetkeʼ yaan a tsʼáaik cuentaeʼ jach tu jaajil jeʼel u páajtal a yaabiltik Dioseʼ.