Ti dxi guníʼ Jesús de Bixhoze, Jiobá, ora nuu Jerusalén, ne bisihuínnibe cadi dxandíʼ ni runi ca xaíque yuʼduʼ ni guyuu dxiqué (Juan 8:12-30). Ni guniʼbe que ruluiʼni laanu naquiiñeʼ guiduʼyaʼ chaahuinu pa jneza cani runi cré binni de Dios. Laabe guniʼbe sicaríʼ: «Pa qué iree chu tu de lu stiidxa la? zaca xpinne piaʼ laatu. Ne zanna tu ni dxandíʼ, ne zaladi tu ra cá tu yaga purti ma nanna tu ni» (Juan 8:31, 32).

Ora guníʼ Jesús «pa qué iree chu tu de lu stiidxa», cusiidibe laanu guiduʼyaʼ chaahuinu pa dxandíʼ ni rusiidiʼ ca religión ca. Ora gábicabe lii xiixa de Dios, guníʼ ique: «Ñee zacá nga bisiidiʼ Jesús ne xcaadxi diidxaʼ ni zeeda lu Biblia la?». Biʼniʼ casi biʼniʼ ca binni ni bicaadiaga apóstol Pablu: biiyaʼ chaahuiʼ xii nga rusiidiʼ Biblia ti gúʼyaluʼ pa dxandíʼ ni gábicabe lii (Hechos 17:11).

Ngapeʼ nga ni biʼniʼ Marco, Rosa ne Raimunda, ca binni ni bizéʼtenu que: biiyacabe pa dxandíʼ nga cani runi crécabe ora bisiidiʼ ca testigu stiʼ Jiobá laacabe. Xi biziidicabe yaʼ.

Marco: «Testigu ni bisiidiʼ naa que biquiiñebe Biblia para bicábibe cani gunabadiidxaʼ laabe ne cani gunabadiidxaʼ xheelaʼ laabe. Chaahuidugá gunnaxhiidu Jiobá ne jma galán nabánidu».

Rosa: «Naa rabeʼ ni na ique binni nga ni zeeda lu Biblia ne luni racaláʼdxicabe gusiénecabe ximodo nga Dios. Peru chaahuidugá gucané Biblia naa guieneʼ stale cosa ni racalaʼdxeʼ gannaʼ. Yanna maʼ nannaʼ dxandíʼ nuu Jiobá, ne runeʼ cré zacanebe naa».

Raimunda: «Gunabaʼ Dios gacané naa gunebiaʼyaʼ laa. Qué nindaa de ngue naa ne xheelaʼ bidúʼndadu Biblia. ¡Dxiqueruʼ nga binibiáʼ chaahuidu ximódopeʼ nga Jiobá! Nabé nayecheʼ guyuʼdu ora gúnnadu pabiáʼ nachaʼhuiʼ Dios».

Biblia cadi rusihuinni si cadi dxandíʼ guiráʼ ni riníʼ binni de Dios, sínuque rusihuínnini guiráʼ guenda sicarú ni nápabe. Ne laaca racaneni laanu «para ganda guiene nu irá ni ma bidii Dios laanu» (1 Corintios 2:12). Galán gúʼyaluʼ xipeʼ rusiidiʼ Biblia de Dios, xi naguixhe íquebe gúnibe lu Guidxilayú ne xi naguixhe íquebe gúnibe para laanu. Zanda guinábaluʼ lu sitiu www.pr418.com/zai chiguundanécabe lii o zanda guinábaluʼ ti testigu stiʼ Jiobá gusiidiʼ lii de Biblia. Pa guʼnuʼ nga la? zudiiluʼ cuenta zanda gannaxhiiluʼ Dios.