KUNDAMENU KWAKWIHI NANZAMBI

‘Mukwakusomwena Antu Amukeñakeñaña’

Komana Yehova walemeshaña yuma yakoñañawu antu jindi kulonda amuzañaleshi? Amakwawu akaanaña nawu Nzambi watukeña wanyi. Antu ahoshaña chamuchidiwu amusawulaña hohu Nzambi. Ilaña Izu dindi Bayibolu, yalumbululaña chachiwahi. Yatulejaña nawu Yehova wahamekaña yuma yakoñañawu antu jindi ashinshika. Talenu mazu akapostolu Pawulu adi hamukanda waAheberu 11:6.

Yumanyi yitwatela kwila kulonda tumuzañaleshi Yehova? Pawulu wasonekeli nindi: ‘Chakadi chikuhwelelu hitukutwesha kumutiyisha Nzambi kuwahaku.’ Muniyi vasi, Pawulu nakuhosha wanyi nindi kumuzañalesha Nzambi chakadi chikuhwelelu hichuma chakala. Ilaña, nakuhosha nindi hitukutwesha kumuzañaleshaku. Munjila yikwawu, neyi tunakukeña kumuzañalesha Nzambi twatela kwikala nachikuhwelelu.

Chikuhwelelwinyi chamuzañaleshaña Yehova? Twatela kwila yuma yiyedi. Chatachi, twatela ‘kukuhwelela netu wudi kwoku.’ Tunateli kumuzañalesha ñahi neyi tunakujinoka netu wekala kwoku? Hela chochu, kudi yuma yitwatela kwila kulonda twikali nachikuhwelelu, muloña niandemoni eluka nawu Yehova wudi kwoku. (Yakoba 2:19) Neyi tukuhwelela netu Nzambi wudi kwoku, tukumwekesha chikuhwelelu chetu kuhitila mukwila yuma yamuzañaleshaña muchihandilu chetu.—Yakoba 2:20, 26.

Chamuchiyedi, ‘twatela kukuhwelela netu’ Nzambi ‘himukwakusomwena.’ Muntu wudi nachikuhwelelu chalala weluka chikupu nindi Nzambi wakamusomwena hanyidimu yejima yinakudikitayi. (1 Akorinda 15:58) Tunateli kumuzañalesha ñahi Yehova neyi tunakujinoka netu hanateli kutusomwenaku? (Yakoba 1:17; 1 Petulu 5:7) Muntu wahoshaña nindi Nzambi wakola muchima, wahamekaña wanyi nawa wahanaña wanyi hamwiluka Nzambuku.

Antu amuchidinyi asomwenañawu kudi Yehova? Pawulu nindi: ‘Antu amukeñakeñaña.’ Mukanda wumu wawakwakubalumuna Bayibolu wahosha nawu “kukeñakeña” hikwaya mukwila nawu “kuya nakukeñaku,” ilaña kwatalisha mukwila nawu kuya “nakudifukula” kudi Nzambi. Mukanda wukwawu walumbulula nawu idi izu daChiGriki dahosha nankashi hakudikita chikupu nikushaku maana. Yehova wasomwenaña antu akweti chikuhwelelu chayileñelaña kudifukula kudi yena namuchima wawu wejima nawa neyena.—Matewu 22:37.

Yehova wasomwenaña ñahi antu jindi ashinshika? Wayikana yuma yayiwahi yamwekeshaña nawu wahanaña nawa wukweti kukeña, dikwila nawu wumi wahaya nyaka muParadisa hamaseki. (Chimwekeshu 21:3, 4) Antu amukeñakeñaña Yehova adiluñishaña nkisu yindi nimakonu. Ekalaña nachihandilu chachiwahi muloña Yehova wayikwashaña naspiritu yindi yajila nimaana ekala Mwizu dindi.—Masamu 144:15; Matewu 5:3.

Mwamweni, Yehova hiNzambi wahamekaña hanyidimu yakalakalañawu antu jindi ashinshika. Komana chumichi chinayileñeli mwikali nampwila yakukundama kwakwihi nayena? Neyi mudi nampwila, mwatela kwiluka chimwatela kwikala nachikuhwelelu nikuchimwekesha kulonda Yehova yayisomweni, netu?

Nsona yimwatela kutaña

Titusa 1-3; Fwilemoni 1-25; Aheberu 1-13–Yakoba 1-5

[Mazu ekoku adi hefu 11]

Tunateli kumuzañalesha ñahi Yehova neyi tunakujinoka netu hatela kutusomwenaku?