მილიონობით ადამიანი იმედოვნებს, რომ სიკვდილის შემდეგ ზეცაში მოხვდება. იესომ თავის ერთგულ მოციქულებს უთხრა, რომ ისინი ზეცაში იცხოვრებდნენ. სიკვდილის წინ იესო თავის მიმდევრებს დაჰპირდა, რომ მათ ადგილს მოუმზადებდა თავის ზეციერ მამასთან (წაიკითხეთ იოანეს 14:2).

რატომ აღდგებიან ადამიანები ზეცაში საცხოვრებლად? რას გააკეთებენ ისინი იქ? იესომ თავის მოციქულებს უთხრა, რომ ისინი მეფეები იქნებოდნენ და დედამიწაზე იმმართველებდნენ (წაიკითხეთ ლუკას 22:28—30; გამოცხადების 5:10).

ძირითადად სახელმწიფოებს რამდენიმე ადამიანი განაგებს. რამდენადაც იესო ადამიანებს ზეცაში საცხოვრებლად იმ მიზნით აღადგენს, რომ მათ დედამიწაზე იმმართველონ, ლოგიკურია დავასკვნათ, რომ ის ამ საქმისთვის ადამიანთა გარკვეულ რაოდენობას აირჩევს (ლუკა 12:32). ბიბლიაში ზუსტად წერია, რამდენი იმმართველებს იესოსთან ერთად (წაიკითხეთ გამოცხადების 14:1).

ჯილდოს მხოლოდ ზეციერი ცხოვრებისთვის აღდგენილები როდი მიიღებენ. ქრისტეს სამეფოს ერთგული ქვეშევრდომები მარადიული სიცოცხლით გაიხარებენ დედამიწაზე აღდგენილ სამოთხეში (იოანე 3:16). მათ შორის იქნებიან ისინი, ვინც ბოროტი ქვეყნიერების განადგურებას გადაურჩებიან და ისინი, ვინც სამოთხეში დედამიწაზე აღდგებიან (წაიკითხეთ ფსალმუნის 37:29; იოანეს 5:28, 29).