Yajtëˈëwën diˈib yaˈˈatsoojëmbijtp mä Biiblyë
¿Pënaty nëjkxtëp tsäjpotm, ets tiko?
Miyonkˈamë jäˈäy jyanëjkxäˈändë tsäjpotm ko yˈooktët. Jesus jyënany ko ja yˈapostëlëty jamë nety jyukyˈatäˈändë tsäjpotm. Mä nety kyaˈookynyëm, ta tˈanmääy ko yëˈë nëjkx tˈixäˈäny tuˈugë lugäär parë yˈittët jam mëdë Tyeety. (Käjpxë Fwank 14:2.)
¿Tiko näägë jäˈäy pyëdëˈëgäˈändë parë jyukyˈatäˈändë tsäjpotm? ¿Ti jam tyunandëp? Jesus tˈanmääy ja yˈapostëlëty ko yˈitäˈändë reyëty ets tˈanaˈamäˈändë Naxwinyëdë. (Käjpxë Lukʉs 22:28-30 etsë Diˈibʉ Jatanʉp [Apocalipsis] 5:10.)
¿Tëyˈäjtën ko niˈamukë oyjyaˈay nyëjkxtë tsäjpotm?
Duˈun extëm mä tuˈugë paˈis, niwaanë jeˈeyë jäˈäy diˈib anaˈamëdëp, nanduˈun yä Naxwiiny, niwaanë jeˈeyë jäˈäy diˈib anaˈamandëp, yëˈëyë diˈibë Jesus të twinˈixy parë pyëdëˈëktët ets jyukyˈattët tsäjpotm (Lukʉs 12:32). Biiblyë nyigajpxypy nuˈunën wyinëˈattë. (Käjpxë Diˈibʉ Jatanʉp 14:1.)
Jesus të tˈixy tuˈugë lugäär jam tsäjpotm parë pënaty panëjkxëdëp. ¿Mnijäˈäwëp ti jam tyunandëp?
Oy yëˈëyë tyäˈädë jäˈäy nyëjkxtë tsäjpotm, kyaj yëˈëyë tˈaxäjëyäˈändë kumäˈäyën. Pes pënaty mëdoodëp mä yˈaneˈemyë Jesus, jukyˈatandëp winë xëë winë tiempë yä Naxwiiny mä ja it lugäärë tsujpë (Fwank 3:16). Ta diˈib nitsoˈogandëp mä ja kutëgoˈoyën diˈib miimp, etsë wiinkpë, jam jukypyëkandëp. (Käjpxë Salmo 37:29 etsë Fwank 5:28, 29.)
