Milyunmilyun sma e angri fu libi na hemel. Yesus ben taki dati den reti-ati apostel fu en ben o libi drape. Fosi a dede, a pramisi den taki a ben o sreka wan presi gi den na en Papa na hemel.​—Leisi Yohanes 14:2.

Fu san ede sma fu grontapu o kisi wan opobaka fu go libi na hemel? San den o du drape? Yesus ben taigi den apostel taki den ben o tron kownu. Den ben o tiri grontapu.​—Leisi Lukas 22:28-30; Openbaring 5:10.

Na ini furu kondre, soso wan tu sma nomo na tiriman. Fu di Yesus e gi sma wan opobaka fu go libi na hemel so taki den kan tiri grontapu, meki wi kan fruwakti taki a grupu sma dati no o bigi (Lukas 12:32). Bijbel e taki soifri omeni sma o tiri makandra nanga Yesus.​—Leisi Openbaring 14:1.

Den sma di e go na hemel no sa de den wan-enkriwan di o kisi blesi. Den reti-ati borgu fu a Kownukondre fu Yesus o libi fu têgo na ini wan paradijs di seti kon bun baka na grontapu (Yohanes 3:16). Son sma o pasa a pori fu na ogri grontapu disi libilibi, fu go na ini a paradijs. Tra sma o kisi wan opobaka fu libi na ini a paradijs.​—Leisi Psalm 37:29; 72:6.