Miliyɔ y’anto nongamɛka dia ntshɔ l’olongo l’ɔkɔngɔ wa nyɔi kawɔ. Yeso akate dia apɔstɔlɔ ande wa kɔlamelo wayotɔsɛna l’olongo. La ntondo ka nde mvɔ, Yeso akaalake dia nde ambotshɔ dia taalɔngɔsɔlɛ dihole nde la She ka l’olongo.​—Adia Joani 14:2.

Lande na kayolwama anto amɔtshi oma la nkɛtɛ dia tɔsɛna l’olongo? Kakɔna kayowotosalaka lɛkɔ? Yeso akatɛ apɔstɔlɔ ande ɔnɛ vɔ wayotonga nkumi ya dikanga. Vɔ wayɔlɔmbɔlaka nkɛtɛ.​—Adia Luka 22:28-30; Ɛnyɛlɔ 5:10.

Lo wedja efula, paka anto yema tshitshɛ tsho mbalɔmbɔla. Lam’ele Yeso ekɔ lo mbolola anto amɔtshi dia vɔ ntshɔ tɔsɛna l’olongo l’oyango wa vɔ nɔmbɔlaka nkɛtɛ, dui sɔ mɛnyaka di’anto wakasɔnama asɔ wekɔ yema tshitshɛ. (Luka 12:32) Bible mbutaka lofulo shika l’anto wayɔlɔmbɔla kaamɛ la Yeso.​—Adia Ɛnyɛlɔ 14:1.

Aha anto wayotshɔ l’olongo ato mbayolongola difuto. Ambolami wa Diolelo dia Yeso wele la kɔlamelo wayokondja lɔsɛnɔ laha l’ekomelo lo paradiso ka la nkɛtɛ. (Joani 3:16) Amɔtshi l’atei awɔ wayɔtɔ lo paradiso ɛsɛnyu l’ɔkɔngɔ wa vɔ mpandɔ oma l’elanyelo ka dikongɛ di’akambo dia kɔlɔ nɛ. Akina wayɔtɔ lo paradiso l’ɔkɔngɔ wa vɔ mbolwama.​—Adia Osambu 37:29; Joani 5:28, 29.