1, 2. 1) ¿Kunatsa ‘oración jan jaytas lurañasajj’ wakisipuni? 2) ¿Kuna jisktʼanaksa mayisiñ toqet jisktʼasiñasa?

“NIYA willjtaniñampïski ukhajj wali chʼamaw uñnaqaskakiñajja” sasaw arumanak irnaqerïkäna uka jaqejj arsu. Ukat khitinakatï arum paqar uñnaqapki ukanakas ukhamarakwa amuyapjjpacha. Jichha tiempon Diosan servirinakapajj ukhamarakiw jan walin uñjastanjja, kunattejj Supayan aka ñanqha chʼamak pachapajj niyaw tukusiñampïski (Rom. 13:12). ¡Ukhaman uñjasisajj janipuniw Jehová Diosar yupaychañ toqet ikjañasajj walïkaspati! “Wali amuytʼampi” sarnaqañasaw wakisi, ukhamarak kuntï Diosan Arupajj “oracionsa jan jaytas lurapjjañama[wa]” sasin ewjjtʼki uksa istʼaskakiñasa (1 Ped. 4:7).

² Niyakejjay Supayan apnaqat akapachajj niya tukusiñampïskchejja, akham sasaw jisktʼasiñasa: “¿Diosar mayisiñ wali askitti uñjasktjja? ¿Kunayman toqetti mayisisktjja? ¿Diosat mayisipuntti? ¿Yaqhanakatakejj mayirapipuntti jan ukajj kuntï nayajj munkta ukakcha maytjja? Ukat ¿qhespiyasiñajatakejj qawqha wakiskiris mayisiñajja?”.

3. ¿Kuna toqenakatsa Diosar mayissna?

³ Apóstol Pablojj Éfeso markankirinakar ‘kunayman toqet mayisipjjam’ sasaw carta qellqäna (Efe. 6:18, NM). Ukat ¿kunatï jakañasatak munaski uk katoqañatakisa ukat jan waltʼäwinakar saykatañatakis Jehová Diosan yanapap mayisipuntanjjaya? Cheqans ‘mayisitanakar istʼirejj’ wali munasiñampiw mayisitanakas istʼi (Sal. 65:2). Ukampisa, janiw uka toqenakatak mayisiñasäkiti, jan ukasti oracionanakasan Jehová Diosaruw jachʼañchañasa, yuspärañasa ukat wal ruwtʼasiñasa jan ukajj achiktʼasiñasa.

4. ¿Kunatsa mayisitanakasan sapa kuti Jehová Diosar jachʼañchañasajj wakisi?

 ⁴ Jehová Diosar oracionan mayiskasajj Jupar jachʼañchkir arunakamp mayisiñasajj walja toqenakat utjistu. Kunapachatï “wali muspharkañ luratanakapat” ukat “muspharkañ jachʼa kankañapat” lupʼktan ukhajja, Jupar jachʼañchañ wal muntanjja (Salmo 150:1-6 liytʼasiñapawa). Salmo 150 jaljan sojjta jiskʼa tʼaqanakapan 13 kutiw Jehová Diosar jachʼañchañasatak chʼamañchtʼistu. Salmo qellqerinakat yaqhajj akham sasaw qʼochüna: “Jan qarjasisaw [‘urunjj paqallq kuti’, NM] sapür jachʼañchsma, cheqap kamachit arunakamata” (Sal. 119:164). Cheqansa Jehová Diosajj jachʼañchatäñapaw wakisi. Ukhamasti ¿janit ‘urunjj paqallq kuti’, mä arunjj sapa kuti, Jupar jachʼañchañasajj wakiskaspa?

5. ¿Kunjamsa mayisitanakasan yuspärasirïñajj jarkʼaqestu?

⁵ Oracionan mayiskasajj yuspärasirïñajj wali wakiskirirakiwa. Pablojj Filipos markankir cristianonakarojj akham sänwa: “Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim” (Fili. 4:6). Oración mayiskasajj taqe chuyma yuspärasirïñajj jarkʼaqestuwa. ¿Kunatsa? Kunattejj ‘qhepa urunakan’ ‘jan yäqasir’ jaqenak taypinwa jaktanjja (2 Tim. 3:1, 2). Ukanakat jan amuyaskañäni ukhajja, jupanakjamarakiw sarnaqjjsna. Mayiskasin Jehová Diosar yuspärañasajj kunatï utjkistu ukanakamp kusisitäñataki ukat jan ‘quejasiri ukhamarak kʼumisirïñasatakiw’ yanaptʼistu (Jud. 16). Familia pʼeqtʼirinakajj warmiparu ukat wawanakaparuw oracionan mayiskasajj yuspärasirïpjjañapatak yanaptʼapjjaspa.

6, 7. ¿Kunas ruwtʼasiñajja, ukat kuna toqetsa Jehová Diosarojj ruwtʼassna?

⁶ Ruwtʼasiñajj jan ukajj achiktʼasiñajj chuymatpacha Diosar mayisiñawa. ¿Kunjaman uñjasisas Jehová Diosar ruwtʼassna? Kunapachatï arknaqata jan ukajj sinti usuntata uñjasktan ukhaw ukham mayissna. Ukhamanakan uñjasisaw taqe chuym ruwtʼasirïtas uñachtʼaysna. Ukampis ¿ukhamanakan uñjasisakit Diosar ruwtʼassna?

⁷ Jesusajj mayisiñ toqet yatichkäna uka mayisïwit amuytʼañäni, ukat Diosan sutipata, Diosan Reinopata ukat Diosan munañapat kamsänsa uk uñjarakiñäni (Mateo 6:9, 10 liytʼasiñapawa). Akapachajj jan walinakamp phoqhantatawa ukat apnaqerinakapas janiw jaqenakarojj kunatï jakañatak wakiski uks churirjamäpkiti. Ukatwa Diosarojj sutip jachʼañchañapataki ukat Jupan Reinopampi Supayan apnaqat akapachar qhespiyañapatak mayiñasa. Ukatsti, kunjamtï alajjpachan munañapajj luraski ukham aka Oraqen lurasiñapatakiw mayiñasaraki. Ukhamajj janiw ikjañasajj wakiskiti ukat kunayman toqetwa Diosar mayisiñasa.

8, 9. Pedroru ukat mayni apostolonakar Getsemaní cheqan ikjapjjatapatjja, ¿kunatsa jan jankʼak juchañchañasäkaspa?

⁸ Apóstol Pedrojj ‘oracionanakam jan jaytas lurapjjam’ sasins cristianonakarojj chʼamañchkchïnjja, mä kutejj janiw ukarjam lurkänti. Kunapachatï Jesusajj Getsemaní cheqan Diosar mayisiskäna ukhaw Pedrojj mayni arkirinakjam ikjarakïna. Jesusajj akham sasaw jupanakar satayna: “Jan ikipjjamti, jan ukasti Diosatjja mayisipjjamaya” sasa. Ukampis janiw ukar istʼapkänti (Mateo 26:40-45 liytʼasiñapawa).

⁹ ¿Ukham ikjapjjatapat jankʼakit Pedroru ukat mayni apostolonakar juchañchañasäspa? Cheqans uru jurnalpach irnaqtʼasajj wali qaritaw uñjasipjjpachäna. Kunattejj Pascua fiesta amtañatakiw wakichapjjäna. Ukat Jesusajj Santa Cena uttʼayäna, ukhamat jiwäwip  jutïrinakan amtapjjañapataki (1 Cor. 11:23-25). “Qʼochu qʼochtʼatatsti Olivos sat qolluruw sarjjapjjäna”, uka cheqarojj Jerusalenan kʼullkʼu thakipnamaw jay sarapjjäna (Mat. 26:30, 36). Ukhajj inas chika arum pasäjjchïna. Jiwasatï uka arumajj Getsemaní cheqankasnäna ukhajja, inas jupjam ikjarakchisnäna. Qarirat apostolonakar juchañchañat sipansa, Jesusajj munasiñampiw akham säna: “Ajayojj lurañatakejj jankʼakiwa, ukampis janchejj tʼukhawa” sasa.

10, 11. 1) ¿Kuns Getsemaní cheqan ikjatapat Pedrojj yateqäna? 2) ¿Kuns Pedron sarnaqäwipat yateqtanjja?

¹⁰ Apóstol Pedrojj Getsemaní cheqan ikjatapat chuym ustʼayasisaw wakiskir yatichäw yateqäna. Uka nayraw Jesusajj akham säna: “Taqe jumanakawa jichha jaypʼojja nayat wali mayjtʼat uñjasipjjäta”. Ukjjarojj Pedrojj akham sänwa: “Taqpachanis jupanakajj jumarojj jaytanukupkätam ukasa, nayajj janipuniw jaytanukkämati kunäkipansa”. Kunapachatï Jesusajj kimsa kutiw nayar jan uñtʼirejj tuküta siskäna ukhajja, Pedrojj akham saskakïnwa: “Jumampi chika jiwañajjas wakischinejja, janiw jan uñtʼirejj tukkäti” sasa (Mat. 26:31-35). Kunjamtï Jesusajj siskänjja ukhampuniw Pedrojj jupar jan uñtʼir tuküna. Ukham luratap amuyasisin “wal jachäna” (Luc. 22:60-62).

¹¹ Ukham luratapat Pedrojj jan jupa pachpar sinti confiyasiñwa yateqäna, ukatakejj oración mayisiñaw yanaptʼpachäna. Cheqas ‘oración jan jaytas lurapjjam’ sasin siskäna ukajj jupan ewjjtʼapawa. ¿Jehová Diosan amuytʼayat uka ewjjtʼarjamat sarnaqtanjja? ¿Jehová Diosamp yanaptʼatäñ munatas uñachtʼayañatakejj Jupat jan qheparasat ‘mayisiskaktanjja’? Ukat apóstol Pablon aka ewjjtʼap amtapjjañäni: “Khititejj chʼamanitapa amuyasejja, wal amuytʼaspan ukatarak tinkuskaspan” sasa (1 Cor. 10:12).

12. ¿Kunatsa Nehemiasajj jiwasatak wali yateqaskayajja?

¹² Diosar taqe chuym loqtir Nehemías chachat amuytʼañäni, jupajj 4.000 nayra pacha maranwa persa marka apnaqer Artajerjes reyin coperopjam irnaqäna. Uka chachajj wali yateqaskayawa, kunattejj taqe chuymapuniw Diosar mayisirïna. Jupajj Jerusalén markankir judionakan jan walin uñjasipjjatapatjja, walja urunakaw ‘ayunäna’ ukat ‘alajjpachankir Diosarus mayisirakïna’ (Neh. 1:4). Kunapachatï Artajerjes reyejj Nehemiasarojj kunatsa wali llakitäta ukat kunsa jumatak lurirista sasin jisktʼkäna ukhajja,  jankʼakiw ‘alajjpachankir Diosarojj mayisïna’ (Neh. 2:2-4). Uka mayisitaparojj Jehová Diosajj istʼänwa ukat markaparus yanaptʼarakïnwa (Neh. 2:5, 6). Ukajj ¡kunjak Nehemiasan iyawsäwipar chʼamañchtʼkäna!

13, 14. Supayajj aynachtʼayañs munkchistojja, ¿kunsa iyawsäwisan jan aynachtʼañapatak lurañasa?

¹³ Nehemiasjam Diosar jan inaktʼas mayisiñajj iyawsäwisan chʼollqhëñapatakiw yanaptʼistu. Supayajj wali qhoruwa, ukat aynachtʼatäktan ukhaw yantʼistu. Jiwasatï usuntata jan ukajj llakimp aynachtʼata uñjasisin nayrar mistuñatak chʼamachasiskstan ukhajja, kuntï sapa phajjsejj Diosan arunakap yatiyañatak tiempo apstʼasktan ukjja, Diosajj janis askit uñjkaspa ukham amuyjjsna. Jan ukajj kuna jan walinaktï nayrajj lurawayktan ukanakaw pʼeqer jutistaspa. Janis kunatak askïksna ukham Supayajj amuyayañ munistu ukat ukham jan wali amuyunakampiw iyawsäwis aynachtʼayañ munaraki. Ukampis jiwasatï Diosar ‘oración jan jaytas lurapjjañäni’ ukhajja, iyawsäwisajj chʼollqhëskakiniwa. Ukat ak amtapjjapuniñäni, ‘iyawsäwisajj mä escudjamawa’ ukat ukaw “Supayan aqkir flechanakapat jarkʼaqasiñataki” yanaptʼistu (Efe. 6:16).

¹⁴ Jiwasatï ‘oración jan jaytas lurañäni’ ukhajja, iyawsäwisajj akatjamat Diosar yupaychañan yantʼat uñjasini ukhajj wakichtʼatäñäniwa. ¿Kunanakatï Diosar yupaychäwisan aynachtʼayirjamäki ukhajj kuns lursna? Nehemiasatwa amtasiñasa ukat jankʼakiw Diosar mayisiñasa. Kunattejj Jupan yanapapampikiw yantʼanakar saykatsna ukat aguantaraksna.

15. Mayninakatak mayirapiñ toqetjja, ¿kunanaksa jisktʼasiñasa?

¹⁵ Jesusajj Pedron iyawsäwip jan aynachtʼañapatakiw  wal mayïna (Luc. 22:32). Nayrïr patak maranakan taqe chuym Diosar yupaychir Epafras chachajja, Jesusatwa yateqasïna ukat Colosas markankir jilat kullakanakapatakiw Diosat taqe chuyma mayirapirïna, jupanakarojj Pablojj akham sänwa: “Jupasti jumanakatakejj walipuniw Diosatjj mayiski jumanakan sum saytʼasipjjañamataki, ukhamarak Diosan munañap lurañaru suma katuyatäpjjañamataki” sasa (Col. 4:12). Ukatwa akham jisktʼasiñasäspa: “¿Oraqpachankir jilat kullakanakajatak mayirapipuntti? ¿Aka Oraqen jan waltʼäwinakapampi aynachtʼayat uñjasipki ukanakatak mayirapipuntti? ¿Jehová Diosan markapan walja luräwinakanïpki ukanakatak akürunakajj mayirapti? ¿Tamankir jilat kullakanakat jan walin uñjasisipki ukanakatak mayirapti?”.

16. ¿Mayninakatak Diosat mayiñajj yanaptʼaspati?

¹⁶ Jilat kullakanakatak mayiñajj wal jupanakar yanaptʼaspa (2 Corintios 1:11 liytʼasiñapawa). Jehová Diosajj janiw kuntï walja servirinakapajj mä toqet kutin kutin mayipjjatapatak istʼkiti, jan ukasti kunjamsa sapa maynejj taqe chuym yanaptʼasiñ munapjje ukat kunjams llakisipjje ukwa mayisitanakapar janïr jayskasajj uñji. Ukhamajj mayninakatak mayirapiñ wali askit uñjañäni. Kunjamtï Epafras chachajj munasiñata ukat mayninakat llakisis taqe chuym mayirapirïkänjja, ukhamarakwa lurañasa. Ukham lurasaw kusisitäñäni, kunattejj “katoqerit sipansa jukʼamp kusisiñaniw khititï churki ukajja” (Hech. 20:35).

17, 18. ¿Kunjamsa ‘oración jan jaytas lurañajj’ yanaptʼistu?

¹⁷ “Sinti arumäjjewa, urusti niyaw jakʼachasisinki” sasin janïr arskasajja, Pablojj akham sasaw qellqäna: “Kuna urunakantejj jakktan [uk yatipjjtawa, NM], ikit sartasiñajja horasäjjewa. Jiwasan qhespiyasiñasasti sinti jakʼankiwa kunapachatejj suma arunakar iyawskäyätan ukkhat sipansa” (Rom.13:11, 12). Kuntï machaq oraqet Jehová Diosajj arskäna ukajj wali jakʼankjjewa ukat qhespiyäwisajj inas amuyktan ukat sipans wali jakʼankjjchi. Ukhamajj janipun ajay toqet ikjapjjañäniti, ni akapachan utjki ukanakampis tiemp ina chʼusar aptʼasiñäniti. Ukhamatwa Jehová Diosataki ukat Jupar oración mayisiñatak tiemponïñäni. Ukat ‘oración jan jaytas lurañaw’ Jehová Diosan urup suykasajj Jupa ‘chuyma’ ukat “wali katuyasita” sarnaqañasatak yanaptʼistani (2 Ped. 3:11, 12). Ukhamatwa, ajay toqet jan ikjaskatas uñachtʼayañäni ukat akapachan tukusiñapajj wali jakʼankiwa sasin sisktan ukas cheqapunïskatap uñachtʼayañäni. Ukhamajj “jan inaktʼas orapjja[ñäni]” (1 Tes. 5:17). Jesusjamarakiw Jehová Diosar sapak mayisiñatak tiempo apstʼasiñasa. Janiw jankʼak parlañasäkiti. Ukhamatwa Diosar jakʼachasiskakiñäni (Sant. 4:7, 8). ¡Ukham jachʼa bendicionajj janipuniw utjkaspati!

¹⁸ Diosan Arupajj akham siwa: “Kunapachatï Cristojj Oraqen jakaskän ukkhasti, jachʼatwa oracionanaksa wali achiktʼañampi luräna, Diosaru wali jachtʼasisaraki, khititejj jiwañat qhespiyañatakis chʼamanïkäna ukaru; Diosasti istʼänwa Dios chuymätapata” sasa (Heb. 5:7). Jesusajj Awkiparojj wal ruwtʼasïna ukat achiktʼasïna, ukat aka Oraqenkkasajj jiwañkamaw Awkipar jan jitheqtas serviwayi. Ukatwa Jehová Diosajj jiwatat jaktayasin alajjpachan wiñay jakañ churawayi. Ukhamajj jiwasatï, ‘oración jan jaytas lurañäni’ ukhajja, kunayman yantʼanakan uñjasisajj alajjpachankir Awkisat janipuniw jitheqtkañäniti ukat wiñay jakañwa katoqarakiñäni.