“Beni Abalola mu Kupepa”

“Beni aba mano, kabili beni abalola mu kupepa.”—1 PET. 4:7.

KUTI MWAYASUKA SHANI?

Mapepo ya musango nshi ayo mufwile ukulapepa sana?

Mulandu nshi Abena Kristu ba cine balingile ukulapepa no kukanaleka?

Ni bani banonkelamo nga mulepepelako bambi?

1, 2. (a) Mulandu nshi cicindamine ukuba “abalola mu kupepa”? (b) Mepusho nshi ayo tufwile ukuipusha?

UMWAUME umo uwalebomba ubushiku atile: “Inshita iya-afya sana ukulola ni nshita ya macaca.” Na bambi ababomba ubushiku kuti basumina ukuti ifyo alandile fya cine. Abena Kristu nabo e bwafya bakwata pantu icalo ca kwa Satana cili mupepi no konaulwa. Cili kwati tuli pa nshita ya bushiku lilya cafya sana ukulola, kanshi tufwile ukulwisha na maka pa kuti twilaala. (Rom. 13:12) Ala kuti cabipa sana nga twalaala lwa ku mupashi pali ino nshita! Nacicindama ukuti ‘tube aba mano’ kabili tuleumfwila ifyo Amalembo yatucincisha ukuti ‘tube abalola mu kupepa.’—1 Pet. 4:7.

² Apo nomba tuli ku mpela ya cino calo ca kwa Satana, tufwile ukuipusha ukuti: ‘Bushe ndabika amano ku kupepa? Bushe ndapepa umusango onse uwa mapepo, kabili bushe ndapepa lyonse? Bushe ndapepelako bambi, nelyo bushe mpepela fye ifyo ndekabila ne fyo ndefwaya? Bushe ipepo lyalicindama pa kuti nkapusuke?’

MULEPEPA UMUSANGO ONSE UWA MAPEPO

3. Mapepo ya musango nshi twingapepa?

³ Muli kalata umutumwa Paulo alembeele abena Efese, alandile pa “musango onse uwa mapepo.” (Efes. 6:18) Nga tulepepa, nalimo ilingi line tulomba ukuti Yehova atwafwe ukusanga ifyo tulekabila no kucimfya amafya. ‘Komfwa we pepo’ alomfwa ilyo twalomba. (Amalu. 65:2) Lelo ilyo tulepepa, tufwile no kupepa umusango onse uwa mapepo, e kutila ukupepa amapepo ya kulumbanya, ukutootela no kupapaata.

4. Mulandu nshi tufwile ukulalumbanishisha Yehova lyonse ilyo tulepepa?

⁴ Fingi ifyo tufwile ukulumbanishishapo Yehova mu mapepo yesu. Ku ca kumwenako,  tulamulumbanya nga twatontonkanya pa “milimo yakwe iya maka” na pa “bukulu bwakwe.” (Belengeni Amalumbo 150:1-6.) E mulandu wine ifikomo 6 ifya mu Amalumbo 150 filandila pa nshila shalekanalekana 13 isho twingalumbanishishamo Yehova! Na umbi uwalembele Amalumbo alilangile ukuti alicindike sana Yehova, ilyo aimbile ati: “Numbanya imwe imiku 7 mu bushiku bumo pa bupingushi bwenu ubwalungama.” (Amalu. 119:164) Yehova alilinga ukumulumbanya. Kanshi tufwile ukumulumbanya mu mapepo yesu “imiku 7 mu bushiku bumo,” e kutila ukulapepa lyonse!

5. Kuti twacingililwa shani nga tuletasha Lesa ilyo tulepepa?

⁵ Ipepo limbi ilyacindama, lipepo lya kutootela. Paulo acincishe Abena Kristu abaleikala mu Filipi ati: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.” (Fil. 4:6) Tulacingililwa nga tuletasha Yehova ukufuma pa nshi ya mutima. Nacicindama sana ukulamutasha pantu tuleikala mu nshiku sha kulekelesha umo abantu ‘bashitasha.’ (2 Tim. 3:1, 2) Abantu mu calo tabatasha. Na ifwe nga tatucenjele kuti twaba abashitasha. Ukulatasha Lesa mwi pepo kukatwafwa ukuba ne nsansa kabili ‘tatwakaleilishanya pa mikalile yesu.’ (Yuda 16) Na kuba, nga ca kuti imitwe ya ndupwa baletasha Lesa mu mapepo bapepa pamo no lupwa, kuti balenga abena mwabo na bana ukulatasha.

6, 7. Bushe calola mwi ukupapaata, kabili finshi twingapapaata kuli Yehova?

⁶ Ipepo lya kupapaata lifuma pa nshi ya mutima ni cikanga fye umuntu alile no kulila. Finshi ifyo twingapapaata Yehova ilyo tulepepa? Kuti twapapaata Yehova nga baletucusha na lintu tulwele ubulwele ubwabipisha. Nga natukwata amafya ya musango uyu, amapepo tupepa kuli Lesa ukuti atwafwe yaba ya kupapaata. Bushe ni lilya fye tuli na mafya e lyo twingapapaata Yehova?

⁷ Pa kuti twasuke ici cipusho katulande pe pepo lya cilangililo ilyo Yesu apepele, umo alandile pe shina lya kwa Lesa, pa Bufumu bwakwe, e lyo na pa bufwayo bwakwe. (Belengeni Mateo 6:9, 10.) Ububifi mu calo nabufulisha, kabili amabuteko yalafilwa ukupayanishisha abantu ifyo bakabila. Kanshi tufwile ukupepa ukuti ishina lya kwa Shifwe wa mu muulu libe ilya mushilo no kuti Ubufumu bwakwe bwise ku kufumyapo imitekele ya kwa Satana. Ino e nshita twingapapaata Yehova ukuti alenge ukufwaya kwakwe kucitwe pano isonde nga mu muulu. E ico kanshi, natuleba abalola mu kupepa, ukulapepa umusango onse uwa mapepo.

“AKUPEPENI”

8, 9. Mulandu nshi tushilingile ukulandila ifyabipa pali Petro na batumwa bambi filya bafililwe ukulola ilyo bali mwi bala lya Getsemane?

⁸ Nangu ca kutila umutumwa Petro acincishe Abena Kristu ukuba “abalola mu kupepa,” inshita imo ena alifililwe ukucita ifyo. Ali pa basambi abaleele ilyo Yesu alepepa mwi bala lya Getsemane. Nangu ca kuti Yesu alibebele ukuti batwalilile ‘ukulalola no kulapepa,’ balileele.—Belengeni Mateo 26:40-45.

⁹ Mu nshita ya kulalanda ifyabipa pali Petro na batumwa bambi filya bafililwe ukulola, tufwile ukwibukisha ukuti balinakile sana pantu bulya bushiku balibombele imilimo iingi. Balipekenye no kusefya Ica Kucilila cilya cine icungulo bushiku. Kabili pa numa ya kusefya, Yesu atendeke ukusefya Umulaalilo wa kwa Shikulu, ukubalangilila ifyo bakalasefya  Umulaalilo pa numa ya mfwa yakwe. (1 Kor. 11:23-25) “Ilyo baimbile inyimbo sha malumbo, baile ku Lupili lwa Miolife,” kabili pa kufika kulya balyendele intamfu iitali ukupita mu misebo iinono iya mu Yerusalemu. (Mat. 26:30, 36) Pali iyi nshita nalimo ninshi ne nshita naicila pa kati ka bushiku. Na ifwe atuba mwi bala lya Getsemane bulya bushiku, nalimo nga twalileele. Yesu takalipile balya batumwa abanakile lelo atile, “umutima wena ulefwaisha, lelo umubili naunaka.”

10, 11. (a) Finshi Petro asambilileko ku fyo acitile mwi bala lya Getsemane? (b) Finshi mulesambililako ku fyo Petro acitile?

¹⁰ Petro calimubipiile sana ilyo afililwe ukulola mwi bala lya Getsemane lelo alisambilileko isambililo ilyacindama nga nshi. Icungulo bulya bwine bushiku, Yesu abebele ati: “Bonse mulembutuka buno bushiku.” Lelo Petro amwaswike ati: “Nangu aba bambi bonse bamubutuke, ine nshamubutuke nakalya!” Yesu aebele Petro ukuti bulya bwine bushiku ali no kumukaana imiku itatu. Lelo Petro atile: “Nangu ndi no kufwila pamo na imwe, nshamukaane nakalya.” (Mat. 26:31-35) Nangu alandile ifi, Petro alikeene Yesu imiku itatu nga filya fine Yesu amwebele. Ilyo ailwike ifyo acitile, Petro alyumfwile ububi icine cine ica kuti ‘alililile nga nshi.’—Luka 22:60-62.

¹¹ Kuli ifi ifyacitike, Petro afwile alisambilileko ukuti talingile ukuicetekela sana. Ukwabula no kutwishika, ipepo e lya-afwile Petro ukuleka ukuicetekela sana. Na kuba, e wafundile Abena Kristu ukuti, “muleba abalola mu kupepa.” Bushe tulomfwila uku kufunda? Kabili bushe ‘tulapepa’ lyonse ukulangilila ukuti twalicetekela Yehova? (Amalu. 85:8) Tuleibukisha na mashiwi umutumwa Paulo atufundile aya kuti: “Uuletila naiminina ndi acenjele epali awa.”—1 Kor. 10:12.

YEHOVA ALYASWIKE AMAPEPO YA KWA NEHEMIA

12. Mulandu nshi Nehemia abela ca kumwenako icisuma kuli ifwe?

¹² Natulande pali Nehemia uwalepeela Artakishashete, Imfumu ya ku Persia ifya kunwa muli ba 400 B.C.E. Nehemia aba ca kumwenako icisuma, alepepa kuli Yehova no mutima wakwe onse. Pa nshiku ishingi, ‘talelya kabili alepepa ku cinso ca kwa Lesa’ pa mafya ayo abaYuda bakwete mu Yerusalemu. (Nehe. 1:4) Ilyo Artakishashete amwipwishe umulandu icinso cakwe cabelele ica bulanda, ‘apo pene Nehemia apepele  kuli Lesa wa mu muulu.’ (Nehe. 2:2-4) Cinshi cafuminemo? Yehova alyaswike amapepo yakwe kabili alengele ifintu ukuwamina abantu bakwe. (Nehe. 2:5, 6) Ifi fyacitike fifwile fyalilengele icitetekelo ca kwa Nehemia ukukosa nga nshi!

13, 14. Finshi tufwile ukulacita pa kuti tutwalilile ne citetekelo icakosa no kukanaleka Satana ukutunenuna?

¹³ Ukulapepa lyonse nga filya Nehemia alecita, kuti kwatwafwa ukuba ne citetekelo cakosa. Satana taba na luse kabili ilingi line atwesha lilya tuli na mafya. Ku ca kumwenako nga tulelwalilila nelyo natusakamikwa sana, kuti twatendeka ukumona kwati inshita tubomba mu mulimo wa kushimikila cila mweshi, Lesa taimona ukuti yalicindama. Bamo nalimo tulacula na matontonkanyo pa mulandu wa fintu twacitile kale. Satana afwaya tuleimona ukuti tuli bacabecabe. Satana afwaya tuletontonkanya ifi pa kuti icitetekelo cesu cinenuke. Lelo nga tuli “abalola mu kupepa,” icitetekelo cesu cikakosa. Ca cine, ‘inkwela iikalamba iya citetekelo, ikalenga tukaleshimya imifwi yonse iya mulilo iya mubifi.’—Efes. 6:16.

¹⁴ Nga tuli “abalola mu kupepa,” tukalailuka bwangu amesho na matunko nga yaisa, tayakaletupumikisha ica kuti twafilwa no kutwalilila aba cishinka kuli Yehova. Nga twatunkwa nelyo twaeshiwa, tuleibukisha ifyo Nehemia acitile, e kutila ukupepa kuli Lesa apo pene fye. Yehova nga atwafwa e lyo twingakaana amatunko no kushipikisha ilyo tule-eshiwa.

MULEPEPELAKO BAMBI

15. Mepusho nshi tufwile ukuipusha pa kupepelako bambi?

¹⁵ Yesu alipepeleko Petro pa kuti icitetekelo  ca kwa Petro cinenuka. (Luka 22:32) Epafra, Umwina Kristu uwaliko mu nshita ya batumwa alipashenye Yesu kabili apepeeleko Abena Kristu banankwe aba mu Kolose. Paulo alembeele abena Kolose ukuti: “Lyonse alamupepelako sana, ukuti mwiminine abapwililila kabili abashininkisha bwino bwino muli conse ico Lesa afwaya.” (Kol. 4:12) Tufwile ukuipusha ukuti: ‘Bushe lyonse ndapepelako aba bwananyina ba mwi sonde lyonse? Miku inga mpepelako Abena Kristu banandi abalecula pa mulandu wa tuyofi? Ni lilali nalekelesheko ukupepelako bamunyinane abakwata imilimo iingi mu cilonganino ca kwa Yehova? Bushe ni lilali napepeeleko bamunyinane mu cilonganino abali na mafya?’

16. Bushe amapepo tupepelako bambi yalicindama? Londololeni.

¹⁶ Ukupepelako bambi kuti kwabafwa icine cine. (Belengeni 2 Abena Korinti 1:11.) Nangu ca kuti Yehova tasuka amapepo pa mulandu fye wa kuti ababomfi bakwe abengi balepepela pa cintu cimo lyonse, alamona ifyo babika amano kuli umo no munankwe ne cilengele ukuti balepepa. Kanshi tulingile ukubikako sana amano ku kupepelako bambi. Nga filya fyacitile Epafra, na ifwe tulanga ukuti twalitemwa aba bwananyina kabili twalibabikako amano nga tulebapepelako. Ukucita ifi, kukalenga tukabe sana ne nsansa pantu “mwaba insansa ishingi mu kupeela ukucila ishaba mu kupokelela.”—Imil. 20:35.

‘IPUSUKILO LYESU NALIPALAMA’

17, 18. Bushe ukuba “abalola mu kupepa” kutwafwa shani?

¹⁷ Ilyo Paulo ashilalanda amashiwi ya kuti “ubushiku bwalaswa buce; akasuba nakapalama,” abalilepo ukusosa ukuti: “Namwishiba ukuti ino ni nshita ya kushibuka mu tulo, kanshi mulecita ifi nalanda. Ilyo twatendeke ukutetekela ipusukilo lyesu lyali ukutali, lelo nomba nalipalama.” (Rom. 13:11, 12) Icalo cipya ico Lesa atulaya cili mupepi, kabili ipusukilo lyesu lili mupepi ukucila ne fyo tuletontonkanya. Kanshi tufwile ukuba abalola, kabili tatufwile ukuleka ifya muli ici calo ukulatusendela inshita ica kuti twalafilwa no kulapepa kuli Yehova. Lelo tufwile ukuba “abalola mu kupepa.” Ukucita ifi kukatwafwa “ukuba ne mibele ya mushilo ne milimo ya bukapepa” ilyo tulelolela ubushiku bwa kwa Yehova. (2 Pet. 3:11, 12) Imibele yesu ilalanga nga ca kuti twaliba abalola kabili twalicetekela ukuti cino calo cili mupepi no kupwa. Kanshi ‘natulepepa ukwabula ukuleka.’ (1 Tes. 5:17) Tufwile ukulasangako inshita ya kuba fweka no kupepa kuli Lesa nga filya Yesu alecita. Nga tatulekwankwanya ilyo tulepepa kuli Yehova, tukapalama sana kuli ena. (Yako. 4:7, 8) Ukupalama kuli Yehova lipaalo icine cine!

¹⁸ Baibolo itila: “Ilyo ali umuntunse, Kristu alipapeete no kulomba e lyo no kulila nga nshi ne filamba kuli Uyo uwali na maka ya kumupususha ku mfwa, kabili balimuumfwile pa mulandu wa kutiina Lesa.” (Heb. 5:7) Yesu alepapaata no kulomba kuli Lesa kabili atwalilile uwa cishinka mpaka ne mfwa. Pa mulandu wa kuti Yesu alitwalilile uwa cishinka, Yehova alimubuushishe no kumupeela umweo uushifwa mu muulu. Na ifwe bene kuti twatwalilila aba cishinka kuli Shifwe wa ku muulu te mulandu na mesho nelyo amafya tukakwata ku ntanshi. Nga twatwalilila ukuba “abalola mu kupepa,” tukapokelela icilambu ca mweo wa muyayaya.

[Ifipusho]

[Icikope pe bula 5]

Nangu ca kuti Petro alilufyenye, alisambilile ukuba ‘uwalola mu kupepa’ (Moneni paragrafu 10 na 11)

[Ifikope pe bula 6]

Ukuba “abalola mu kupepa” kukatwafwa ukushipikisha amafya ayalekanalekana (Moneni paragrafu 13 na 14)