Reste vizilan an sa ki konsern lapriyer
Reste vizilan an sa ki konsern lapriyer
“Viv en fason rezonnab avek en lespri vizilan pour ou kapab priye.”—1 PYER 4:7.
KI OU POU REPONN?
Ki kalite lapriyer ou devret fer pli souvan?
Akoz bann vre Kretyen i devret kontinyelman priye?
Lekel ki benefisye kan ou priy pour lezot?
1, 2. (a) Akoz i vreman enportan pour reste vizilan an sa ki konsern lapriyer? (b) Ki kestyon konsernan lapriyer i byen nou demann nou lekor?
EN MSYE ki ti en gardyen avan i dir: “Sa moman pli difisil pour reste eveye se lo granmaten.” Sirman, bann dimoun ki bezwen reste eveye tou lannwit pou dakor. Pareyman, bann Kretyen denozour pe viv dan sa lannwit pli terib dan listwar imen akoz zot bezwen reste eveye dan sa move lemonn Satan. (Rom. 13:12) Pa i pou vreman danzere pour tonm dormi pandan sa letan, zis avan lafen! I vreman esansyel ki nou “viv [dan] en fason rezonnab” e swiv sa konsey Labib ki ankouraz nou pour reste “vizilan pour [nou] kapab priye” oubyen “vizilan an sa ki konsern lapriyer.”—1 Pyer 4:7, NW.
2 Vi ki nou pe viv dan sa letan zis avan lafen, i byen pour demann nou lekor: ‘Eski mon vizilan an sa ki konsern lapriyer? Eski mon abitye priye? Eski mon fer diferan kalite lapriyer? Eski mon abitye priy pour lezot? Eski mon lapriyer i zis baze lo mon bann bezwen ek lanvi? Ki kantite enportan mon bann lapriyer i ete pour mwan ganny sove?’
KONTINYEN FER DIFERAN KALITE LAPRIYER
3. Ki diferan kalite lapriyer i annan?
3 Dan son let pour bann Efezyen, zapot Pol ti koz lo lenportans pour “kontinyen fer diferan kalite lapriyer.” (Efe. 6:18, NW) Dan nou lapriyer, petet nou souvan demann Zeova led pour donn nou sa ki nou bezwen e pour sirmont bann lobstak. “Sa Enn ki ekout lapriyer” i kontan pour ekout nou ler nou rod led avek li. (Ps. 65:2) Par kont, nou devret fer lezot kalite lapriyer osi. Par egzanp, nou kapab loue Zeova, remersye li e sipliy li.
4. Akoz nou devret souvan loue Zeova dan nou lapriyer?
4 I annan en kantite rezon akoz nou devret loue Zeova dan nou lapriyer. Par egzanp, ler nou reflesir lo “son bann travay pwisan” ek “son grander enfini,” eski pa sa i pous nou pour loue li? (Lir Psonm 150:1-6. *) Dan zis sis verse dan Psonm 150, i ankouraz nou 13 fwa pour loue Zeova. Avek en profon respe pour Bondye, konpoziter en lot psonm ti sante: “Akoz ou bann zizman drwat, mon’n loue ou set fwa pandan lazournen.” (Ps. 119:164) Zeova i definitivman merit ganny loue. Alor, eski pa nou devret loue li dan nou lapriyer “set fwa pandan lazournen” setadir, tre souvan?
5. Akoz lapriyer remersiman i en proteksyon?
5 Remersiman i en lot kalite lapriyer vreman enportan. Pol ti ankouraz bann Kretyen dan lavil Filip: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan.” (Fili. 4:6) Vi ki nou pe viv dan bann dernyen zour sa lemonn Satan e nou antoure avek bann dimoun ki “engra,” i enportan pour nou senserman remersye Zeova pour tou son bann benediksyon. (2 Tim. 3:1, 2) Partou kote dan sa lemonn, dimoun nepli rekonesan. Si nou pa fer atansyon, nou osi nou kapab fasilman vin parey zot. Ler nou remersye Bondye dan lapriyer, sa i fer nou kontant nou avek sa ki nou annan e nou pa pou “mekontan e pe touzour plennyen.” (Zid 16) Deplis, kan bann sef fanmir i remersye Bondye dan zot lapriyer, zot ankouraz zot madanm ek zanfan pour annan sa menm leta lespri.
6, 7. Ki si sa siplikasyon e lo kwa nou kapab sipliy Zeova?
6 Siplikasyon i en lapriyer entans kot nou devid nou leker avek Zeova. Lo kwa nou kapab sipliy Zeova? Nou kapab sipliy li kan nou pe ganny persekite ouswa si nou annan en maladi grav. Dan bann sityasyon koumsa, i normal ki nou sipliy Bondye pour ed nou. Me, eski zis dan sa bann moman ki nou devret sipliy Zeova?
7 Get lapriyer model Zezi e remark sa ki i ti dir konsernan non Bondye, Son Rwayonm ek Son lavolonte. (Lir Matye 6:9, 10.) Sa lemonn i ranpli avek lemal e bann gouvernman pa pe reisi pran swen menm avek bezwen de baz zot sitwayen. Alor, sirman nou devret priye pour ki non nou Papa ki dan lesyel i ganny sanktifye e ki son Rwayonm i elimin dominasyon Satan. I osi en letan pour sipliy Zeova pour ki son lavolonte i ganny fer lo later parey dan lesyel. Pour sa rezon, annou reste vizilan e kontinyen fer diferan kalite lapriyer.
KONTINYEN PRIYE
8, 9. Akoz nou pa devret ziz Pyer ek lezot zapot lefet ki zot ti tonm dormi dan zarden Zetsemane?
8 Menm si zapot Pyer ti ankouraz bann Kretyen pour reste vizilan an sa ki konsern lapriyer, i ti annan omwen en fwa ki i pa ti reisi fer sa. I ti enn parmi bann disip ki ti tonm dormi ler Zezi ti pe priye dan zarden Zetsemane. Menm apre ki Zezi ti’n dir zot ‘veye e kontinyen priye,’ zot pa ti fer sa.—Lir Matye 26:40-45.
9 Olye ziz Pyer ek lezot zapot dan en fason dir akoz zot pa ti reisi reste eveye, i byen pour nou rapel ki sa zour, i ti difisil pour zot fer sa. Zot ti’n prepar e selebre Lapak sa zour swar. Apre sa, Zezi ti entrodwir Repa Senyer e kit en legzanp pour komemor son lanmor. (1 Kor. 11:23-25) “Apre ki zot ti’n sant kantik zot ti al lo montanny Zolivye.” Zot ti bezwen mars en bon pti zistans an pasan par bann semen Zerizalenm. (Mat. 26:30, 36) Sa moman, manke minwi ti’n fini sonnen en bann letan. Si nou ti dan zarden Zetsemane sa zour swar, tre probab nou osi nou ti’n kapab tonm dormi. Olye kritik son bann zapot ki ti vreman fatige, Zezi ti admet ki “lespri i dispoze, me laser i feb.”
10, 11. (a) Ki leson Pyer ti aprann avek son leksperyans dan zarden Zetsemane? (b) Ki lefe leksperyans Pyer i annan lo ou?
10 Vi ki i pa ti reste vizilan, Pyer ti aprann en leson enportan atraver sa leksperyans dan zarden Zetsemane. Pli boner, Zezi ti’n dir: “Tanto, zot tou zot pou abandonn mwan.” Me Pyer ti’n dir li: “Kanmenm tou lezot i abandonn ou, mwan mon pa pou zanmen abandonn ou!” Zezi ti reponn Pyer par dir li ki i ti pou renye li trwa fwa. Pyer ti dir: “Mon pa pou zanmen renye ou, menm si fodre mon mor avek ou!” (Mat. 26:31-35) Me pourtan, Pyer ti tonbe zis parey Zezi ti predir. Apre ki i ti’n renye Zezi pour en trwazyenm fwa, Pyer “ti plere asodlarm.”—Lik 22:60-62.
11 Pyer ti sirman aprann en leson avek sa leksperyans e sirmont sa tandans pour annan tro bokou konfyans dan son lekor. Sirman, lapriyer ti ed Pyer dan sa domenn. Anfet, i byen pour note ki Pyer menm ki ti donn sa konsey pour nou reste vizilan an sa ki konsern lapriyer. Eski nou pe pran aker sa konsey? An plis ki sa, eski nou pe ‘kontinyen priye’ e demontre dan sa fason ki nou pe depan lo Zeova? (Ps. 85:8) Annou gard antet osi sa konsey zapot Pol: “Sa ki krwar i pe debout, fer atansyon ki i pa tonbe.”—1 Kor. 10:12.
LAPRIYER NEEMYA TI GANNY REPONN
12. Akoz Neemya i en bon legzanp pour nou?
12 Annou egzamin legzanp Neemya ki ti en serviter lerwa Pers, Artakzerses dan senkyenm syek A.N.L. Neemya in kit en bon legzanp lo konman pour priy avek lentansite. Pour plizyer zour, i ti pe ‘kontinyen zennen e priy Bondye’ konsernan sityasyon difisil bann Zwif Zerizalenm. (Nee. 1:4) Ler Artakzerses ti demann li akoz i ti paret tris, “deswit [Neemya] ti priy Bondye lesyel.” (Nee. 2:2-4) Ki ti arive? Zeova ti reponn son lapriyer e ede pour ki keksoz i mars dan en fason ki Son pep ti pou benefisye. (Nee. 2:5, 6) Sa ti’n vreman bezwen fortifye lafwa Neemya, pa i vre?
13, 14. Ki nou devret fer pour kontinyen annan en lafwa for e reziste zefor Satan pour dekouraz nou?
13 Parey Neemya, nou pou annan en lafwa for si nou kontinyen priye. Satan napa en sou mizerikord e i souvan atak nou ler nou feb. Par egzanp, si nou malad ouswa pe lalit avek depresyon, petet nou kapab konmans santi ki sa letan ki nou pase dan predikasyon sak mwan napa gran valer pour Bondye. Serten parmi nou i kapab annan bann panse negatif e dekourazan, petet akoz zot lepase. Satan i anvi nou krwar ki nou pa vo nanryen. I souvan zwe lo nou santiman e sa an retour i afebli nou lafwa. Me, si nou reste vizilan an sa ki konsern lapriyer, nou pou kontinyen annan en lafwa for. Vreman, ‘lafwa i konman en proteksyon ki en gran boukliye i donnen. Avek sa nou a kapab tenny dife tou bann dart alimen ki Dyab i anvoye.’—Efe. 6:16.
14 Si nou reste vizilan an sa ki konsern lapriyer, nou pa pou tonm dan latrap oubyen fer konpromi ler nou lafwa i ganny teste san ekspekte. Kan nou rankontre leprev, annou pa zanmen oubliy legzanp Neemya e priy Bondye deswit. I zis avek led Zeova ki nou kapab reisi reziste tantasyon e kontinyen andire ler nou lafwa i ganny teste.
PRIY POUR LEZOT
15. Ki kestyon nou kapab demann nou lekor konsernan priy pour lezot?
15 Zezi ti sipliy Zeova pour ki zapot Pyer pa perdi lafwa. (Lik 22:32) Epafras, en Kretyen fidel dan premye syek ti imit Zezi dan sa domenn. I ti lite dan lapriyer pour son bann frer ek ser Kolos. Pol ti ekrir zot: “I toultan priy en kantite pour zot, pour ki zot reste ferm, mir avek konviksyon e antyerman devoue pour fer lavolonte Bondye.” (Kol. 4:12, The New English Bible) I byen pour demann nou lekor: ‘Eski mon priy en kantite pour mon bann frer ek ser dan lemonn antye? Ki kantite fwa mon priy pour mon bann frer ek ser ki pe soufer akoz dezas natirel? Ki dernyen fwa mon’n lite dan lapriyer pour bann ki annan bann gro responsabilite dan lorganizasyon Zeova? Eski tou resaman mon’n priy pour en dimoun dan kongregasyon ki pe rankontre difikilte?’
16. Eski i enportan pour priy pour lezot? Eksplike.
16 Kan nou priy pour lezot, sa i kapab vreman ed zot. (Lir 2 Korentyen 1:11.) Menm si Zeova pa oblize azir zis akoz en serten kantite son bann adorater pe kontinyen fer menm demann, kantmenm sa, i remark e i pran an konsiderasyon zot lentere senser e i reponn zot lapriyer. Alor, nou devret pran o serye nou privilez ek responsabilite pour priy pour lezot. Parey Epafras, nou devret demontre nou lanmour senser ek konsern pour nou bann frer ek ser Kretyen par lite dan lapriyer pour zot. Si nou fer sa, nou pou pli ere ankor akoz “i annan plis lazwa pour donnen ki pour resevwar.”—Akt 20:35.
NOU “DELIVRANS I PLI PRE”
17, 18. Akoz i enportan pour reste vizilan an sa ki konsern lapriyer?
17 Zis avan i ti dir ki “lannwit in avanse, lizour pe aprose,” Pol ti ekrir: “Zot devre konnen dan ki letan nou pe viv. Ler in arive pour zot reveye dan zot sonmey. Delivrans i pli pre avek nou ki ler nou ti kwar pour premye fwa.” (Rom. 13:11, 12) Lakonplisman promes Bondye konsernan en nouvo later i pros e nou delivrans i pli pros ki nou ekspekte. Nou pa devret tonm dormi spirityelman e pa zanmen les bann distraksyon sa lemonn pran tou sa letan kot nou devret tousel avek Zeova pe priye. Plito, annou reste vizilan an sa ki konsern lapriyer. Si nou fer sa, nou pou “anmenn en lavi sen e annan respe pour Bondye,” anmezir nou esper zour Zeova. (2 Pyer 3:11, 12) Koumsa, lafason ki nou viv nou lavi pou montre ki nou pe reste eveye spirityelman e ki nou vreman krwar ki lafen sa move lemonn i tre pros. Alor, annou “priye tou letan.” (1 Tesa. 5:17) Nou devret osi imit Zezi par rod en landrwa trankil pour priye. Si nou pran plis letan pour koz avek Zeova dan nou lapriyer, nou pou vin pli pros avek li. (Zak 4:7, 8) Pa sa pou en gran benediksyon!
18 Labib i dir: “Zezi, pandan son lavi konman en zonm, ti ofer son lapriyer ek son siplikasyon, avek leokri ek larm, sa enn ki ti kapab sov li dan lanmor. Annefe, Bondye ti egzos li akoz son lobeisans.” (Ebr. 5:7) Zezi ti fer siplikasyon ek demann e i ti reste fidel avek Bondye ziska lafen son lavi lo later. Akoz sa, Zeova ti resisit son Garson byenneme e rekonpans li avek lavi imortel dan lesyel. Nou osi nou kapab reste fidel avek nou Papa ki dan lesyel malgre tantasyon ek leprev ki nou kapab rankontre. Vreman, nou kapab ganny lavi eternel si nou reste vizilan an sa ki konsern lapriyer.
[Not anba lo paz]
^ par. 4 Psonm 150:1-6: “1 Loue Ya, zot lepep. Loue Bondye dan son landrwa sen. Loue li pour lefet ki lesyel i montre son pwisans. 2 Loue li pour son bann travay pwisan. Loue li pour son grander enfini. 3 Loue li par soufle korn. Loue li avek lenstriman lakord ek larp. 4 Loue li avek tanbourin ek ladans an ron. Loue li avek gitar ek laflit. 5 Loue li avek bann senbal ki fer zoli melodi. Loue li avek senbal ki fer tapaz. 6 Ki tou sa ki vivan i loue Ya. Loue Ya, zot lepep!”
[Kestyon]
[Portre lo paz 3]
[Portre lo paz 5]
Menm si Pyer ti fer fot, i ti aprann pour reste vizilan an sa ki konsern lapriyer (Vwar paragraf 10, 11)
[Portre lo paz 6]
Kan nou reste vizilan an sa ki konsern lapriyer, nou kapab sirmont nenport leprev (Vwar paragraf 13, 14)
