1, 2. 1) ¿Keyej moneki maj ‘tiksentokakan timotatatautilikan iuan Dios’? 2) ¿Toni netajtanilmej moneki timochiuiliskej ika netataujtil?

SE AKIN tekitia youak kijtoj: “Okachi teouijmaka se ijsatos keman amo uejkaua tanesitiya”. Miakej akin moneki ijsatoskej nochi youal xa no ijkon kijtouaj. Akin axkan tikchiuaj kemej Cristo no tikpanouaj se ouijkayot kemej nejon, porin nikan taltikpak kampa taixyekantok Satanás kemej yeskia moajsi tel youakya, tein kijtosneki ke amo uejkaua ixpoliuis (Rom. 13:12). ¡Tel tamouilil komo kemej yeskia tikochiskiaj axkan tonalmej kampa tinentokej! Yejua ika motelneki maj ‘tikuatamatkanentinemikan’ uan maj ‘tiksentokakan timotatatautilikan iuan Dios’ kemej techyolmajxitia Biblia (1 Ped. 4:7).

² Kemej amo uejkaua ixpoliuis tein amo kuali, moneki timotajtaniskej: “¿Nikita keniuj nikchiujtok netataujtilmej? ¿Nikchiua nochi taman netataujtilmej? ¿Niksentoka nimotataujtia? ¿Niktataujtia Dios maj kinpaleui oksekin, oso nochipa sayoj niktajtania tein nejua nechpoloua uan tein niknejneki? Uan no, ¿nikita ke motelneki nikchiuas netataujtil uan ijkon uelis nimomakixtis?”.

3. Xikonijto seki taman netataujtil tein uelis se kichiuas.

³ Itech amat tein Pablo kinijkuilouilij tokniuan akin nemiaj Éfeso, kikuik tajtol “nochi taman netataujtil” (Efes. 6:18, TNM). ¿Melauj ke okachi tiktajtaniaj Jiova maj techmaka tein techpoloua uan maj techpaleui maj tikixnamikikan ouijkayomej? Yejuatsin ‘akin kikaki netataujtil’ ika netasojtalis techkakilia tein tiktajtaniaj (Sal. 65:2). Sayoj ke, no moneki tikchiuaskej okseki taman netataujtil. Moneki tikueyichiuaskej Jiova, tiktasojkamatiliskej uan chikauak tiktataujtiskej.

4. ¿Keyej moneki nochipa tikueyichiuaskej Jiova itech tonetataujtiluan?

⁴ Onkak miak taman keyej moneki tikueyichiuaskej  Jiova itech tonetataujtiluan. Kemej neskayot, techolinia maj tikueyichiuakan keman titanemiliaj itech “uejueyi taman [tein kichiua] ika ichikaualis” uan “tel miak [taman kampa] nesi iueyitilis” (xikonixtajtolti Salmo 150:1-6). Chikuasen versículos tein kipia Salmo 150, trecejpa techyoleua maj tikueyichiuakan Jiova. Uan okse akin kijkuiloj Salmo mokuikatij ika ueyi poujkaitalis ijkon: “Nimitsueyichiuani chikojpa tonal porin titemaka tajtolmej tein kinextia tatsakuiltilis tein melauak” (Sal. 119:164). Kemej tikitaj, Jiova kinamiki maj se kiueyichiua. Yejua ika, ¿amo monekiskia tikueyichiuaskej itech tonetataujtiluan “chikojpa tonal”, tein kijtosneki nochipa?

5. ¿Keniuj techpaleuia komo tiktasojkamatiliaj Jiova keman tiktataujtiaj?

⁵ Itech netataujtil no uelis tiktasojkamatiliskej Jiova. Uan nejin yejua okse taman netataujtil tein moneki tikchiuaskej. Pablo kiniluij itatojtokakauan Cristo akin nemiaj itech altepet Filipos: “Amo tenika ximoyolkuejmolokan. Ta, nachipa ximoteixpantikan iixpantsinko [...] Dios ika namonetatatautilis uan xiktasojkamachilikan [...]. Uan no xiktajtanilikan [...] nochi ten namechpoloa” (Filip. 4:6). Semi techpaleuia komo tiktasojkamatiliaj Jiova ika nochi toyolo keman tiktataujtiaj. Okachiok itech nejin itamian tonalmej kampa techyoualouaj akin ‘amo no teyi ika motasojkamachiliaj’ (2 Tim. 3:1, 2). Komo amo timoyekpiaj, nejon tanemilil uelis techmauas. Sayoj ke komo tiktasojkamatiliaj Dios keman timotataujtiaj, techpaleuia maj tiyolpaktokan uan maj amo tikitakan ke tel amo kuali kemej timoajsij itech tonemilis (Jud. 16). Keman tepopaj kichiua netataujtil iuan ichankauan uan kitasojkamatilia Dios, kipaleuis inamik uan ikoneuan maj no ijkon motasojkamatikan.

6, 7. ¿Toni kijtosneki maj chikauak timotataujtikan, uan toni uelis titajtaniskej itech nejon netataujtil?

⁶ Keman chikauak timotataujtiaj kijtosneki ke semi chikauak tein tikmachiliaj. ¿Itech toni taman ouijkayot uelis chikauak tiktataujtiskej Jiova? Uelis yeski keman techixnamikij oso timotelkokouaj. Keman tikpanouaj nejon, techuikas maj chikauak timotataujtikan. ¿Sayoj keman tikpanoskej nejon moneki chikauak timotataujtiskej iuan Jiova?

⁷ Maj tikitakan netataujtil tein Jesús kikauak kemej neskayot kampa ika tajtoj itokay Dios, iTekiuajyo uan itanejnekilis (xikonixtajtolti Mateo 6:9, 10). Itech taltikpak mochiujtok tein tel amo kuali, uan taltikpaktekiuajyomej amo uelij kinmakaj taltikpakneminij tein kinpoloua. Yejua ika, moneki chikauak tiktataujtiskej toTajtsin maj itokay mochipaua uan maj iTekiuajyo kiajchiua itaixyekanalis Satanás. No kuali komo chikauak tiktataujtiaj maj mochiua itanejnekilis nikan taltikpak ijkon kemej ne iluikak. Kemej tikitaj, moneki tiijsatoskej uan tikchiuaskej nejin tataman netataujtil.

8, 9. ¿Keyej moneki maj amo niman tikinijtouilikan tein amo kuali Pedro uan okseki tatitanilmej porin kintanik kochilis itech xochital Getsemaní?

⁸ Maski tatitanil Pedro kinyolchikauak akin kichiuayaj kemej Cristo maj ‘kisentokakan motatatautilikan iuan Dios’, tein melauj tikmatij ke yejua se tonal amo kichiuak nejon. Katka semej imomachtijkauan Jesús akin kitanik kochilis keman Jesús motataujtiaya itech xochital Getsemaní. IninTamachtijkauj kiniluijka: “Xiixpetantokan uan ximotatatautilijtokan”. Sayoj ke yejuan amo kichiujkej (xikonixtajtolti Mateo 26:40-45).

⁹ Moneki maj amo niman tikinijtouilikan tein amo kuali Pedro uan oksekin tatitanilmej porin kintanik kochilis. Maj tikelnamikikan ke nejon tonal yejuan semi sioujtoyaj porin katkaj tajtakouanij uan yejua ika amo semi chikaujkej katkaj. Kichiujkaj tein monekia uan ijkon ueliskia kichiuaskej Pascua. Satepan Jesús kipeualtij iTakualis toTekotsin  tein ika kinextij keniuj kielnamikiskiaj imikilis (1 Cor. 11:23-25). Uan “satepan ke mokuikatijkej tein ika taueyichiuayaj, kiskej uan yajkej itech tepet tein itokay Olivos”, uan monekik nejnemiskej tepitsin uejka itech ojmej tein amo semi pataujkej ompa Jerusalén (Mat. 26:30, 36, TNM). Keman kichiujkej nejon, xa semi panouayaya tajkoyouan. Komo tejuan tiyetoskiaj iniuan itech xochital Getsemaní xa no techtaniskia kochilis. Jesús amo kinijijtoj itatitaniluan akin sioujtoyaj, ta ika netasojtalis kinyekiluij: “Namoyolojuan kipiaj tanejnekilis de kuali, pero kuetautok namochikaualis”.

10, 11. 1) ¿Toni kimachtij Pedro tein kipanok youak keman kitanik kochilis itech xochital Getsemaní? 2) ¿Toni mitsonmachtia tein kipanok Pedro?

¹⁰ Maski Pedro kiyolkokoj tein kipanok youak keman kitanik kochilis itech xochital Getsemaní, momachtij se taman tein motelneki. Tepitsin achto, Jesús kiniluijka: “Nochi namejuan nanmomoutiske [...] porin Nejuatsin tech nijin youal”. Ompa Pedro tanankilij: “Maski nochi in tagayot momoutiske [...] por tejuatsin, pero nejua amo”. Keman Jesús kiiluij Pedro ke expa kijtoskia ke amo kiixmati, kisentokak kijtoj: “Maski mouan ma nimikiti, pero amo nikijtos de ke amo nimitsixmati” (Mat. 26:31-35). Sayoj ke, ijkon kemej Jesús kijtojka, Pedro kijtoj ke amo kiixmatia. Keman kiitak tein kichiujka, tayokolchokak (Luc. 22:60-62).

¹¹ Tein kipanok Pedro kimachtij ke monekia amo itech takuaujtamatis, uan tikmatij ke netataujtil semi kipaleuij itech nejon. Tein melauj, yejua tayolmajxitij maj ‘tiksentokakan timotatatautilikan iuan Dios’. ¿Tikchiuaj ijkon kemej ika ichikaualis Dios tayolmajxitij Pedro? ¿Nochipa timotataujtiaj uan ijkon tiknextiaj ke moneki tikpiaskej inepaleuil Jiova? (Sal. 85:8.) Maj no tikelnamikikan tein tayolmajxitia Pablo: “Naken moyolmachilia ke yejua semi se yek takuautamatkatagat ya, [...] ma kiyekita niyalis para ma amo uetsiti” (1 Cor. 10:12).

12. ¿Keyej Nehemías techkauilij se kuali neskayot?

¹² Maj titanemilikan itech Nehemías akin amo kikauak Dios. Yejua katka itayilmakakauj tekiuaj persa Artajerjes kemej itech xiuit 450 achto itech totonaluan. Nejin itekitikauj Dios kichiuaya netataujtil semi chikauak uan ika nejon kikauak se kuali neskayot. Miak tonalmej ‘mosaujtoya uan motataujtijtoya iixpan Dios akin moajsi iluikak’ porin semi tetayokoltij kemej moajsiaj judíos ompa Jerusalén (Neh. 1:4). Keman Artajerjes kitajtanij keyej tayokoxtoya uan toni kinekia kitajtanis, Nehemías ‘niman motataujtij iuan Dios akin yetok iluikak’ (Neh. 2:2-4). ¿Toni panok? Jiova kinankilij inetataujtiluan uan  taolinij maj mochiua tein kipaleuiskia ixolal (Neh. 2:5, 6). ¡Nejon semi kichikauak itakuaujtamatilis!

13, 14. ¿Toni moneki tikchiuaskej uan ijkon moajsis chikauak totakuaujtamatilis keman Satanás kitemos techijtakos?

¹³ Komo tiksentokaj timotataujtiaj kemej kichiuak Nehemías, techpaleuia maj kisentoka chikauak totakuaujtamatilis. Satanás semi amo teiknelia, uan miakpa techixnamiki keman kiita ke amo tichikaujkej. Kemej neskayot, komo tikpiaj se kokolis tein amo ueli techkaua oso semi timotayokoltiaj, uelis tikitaskej ke tein titanojnotsaj sejse metsti semi tepitsin iixpan Dios. Oso xa tikpiaj tanemililmej tein semi techtekipachoua porin achto tikpanokej seki taman tein amo kuali. Satanás kineki maj tiknemilikan ke amo teyi tikualtiaj uan ika nejon tanemililmej tein amo teyolchikaua kitemoua kikaxanis totakuaujtamatilis. Sayoj ke komo ‘tiksentokaj timotatatautiliaj iuan Dios’, uelis moajsis chikauak totakuaujtamatilis. Uan maj tikelnamikikan ke “ne totakuautamatilis [tein] keme yeskia se tepos youaltik ten monotsa escudo”, techpaleuis maj tikxikokan “nochi tataman kuejmololis tenika in Satanás kineki techyolxokolis” (Efes. 6:16).

¹⁴ Komo ‘tiksentokaj timotatatautiliaj iuan Dios’, amo techichtakauis keman ejkotiuetsis se tayejyekolis. ¿Toni uelis tikchiuaskej keman tikpanoskej nejon tein uelis kijtakos tokuali uikalis iuan Dios? Maj tikelnamikikan Nehemías uan maj niman tiktataujtikan Dios, porin sayoj ika inepaleuil uelis tikixnamikiskej tayejyekolis uan titaxikoskej.

15. ¿Toni moneki timotajtaniskej uan ijkon tikmatiskej ox tiktataujtiaj Dios maj kinpaleui oksekin?

¹⁵ Jesús kitataujtij Dios maj amo kaxani itakuaujtamatilis Pedro (Luc. 22:32). Itech yekinika  siglo, Epafras, se itatojtokakauj Cristo akin amo kikauak Dios, kichiuak kemej Jesús uan kitataujtij Jiova maj kinpaleuiani tokniuan akin nemiaj Colosas. Pablo kintajkuilouilij: “Nachipa motatatautilijtok iuan Dios ika por namejuan, [...] para ma xiyolmajsitokan uan para ma amo teyi namechpolo ok ten nochi ten Dios kimonekiltia ke xikpixtinemikan” (Col. 4:12). Semi kuali komo timotajtaniaj: “¿Chikauak niktataujtia Dios maj kinpaleui tokniuan akin moajsij semanauak taltikpak? ¿Kanachpa no nitajtani maj kinpaleui akin kipanouaj se tetsauit? ¿Kemanianya niktataujtij Dios ika nochi noyolo maj kinpaleui akin kipiaj uejueyi tekit itech inechikol? ¿Yankuixtok niktataujtij Dios maj kinpaleui tokniuan itech nechikol akin kipanotokej ouijkayomej?”.

16. ¿Tapaleuia maj tiktataujtikan Dios maj kinpaleui oksekin?

¹⁶ Keman tiktataujtiaj Dios maj kinpaleui oksekin uelis kinualkuilis tein kuali (xikonixtajtolti 2 Corintios 1:11). Jiova ueliskia amo teyi kichiuas ijkuak miakej itekitikauan miakpa kitajtaniaj teisa. Sayoj ke kemaj kiita keniuj nochin yejuan yekmelauj semi motekipachouaj se iuan okse ijkuak kinnankilia ininnetataujtiluan. Yejua ika, motelneki maj tikitakan ke se ueyi tatiochiualis maj tiuelikan tiktataujtikan Dios maj kinpaleui oksekin. Ijkon kemej Epafras, maj chikauak tiktataujtikan Dios maj kinpaleui tokniuan, ta ijkon tiknextiskej ke tikintasojtaj uan ke techtekipachoua tein kinpanoua. Ijkon okachi tiyolpakiskej, ta “kachi yolpaktok in tagat ten tapaleuijtinemi [...] uan ke ne tagat ten sayo kiselia” (Hech. 20:35).

17, 18. ¿Keniuj techpaleuia komo ‘tiksentokaj timotatatautiliaj iuan Dios’?

¹⁷ Tepitsin achto ke Pablo kinextiskia ke tayouayanilot poliujtiujya porin axkan tanestiuitsya, kijkuiloj: “Namejuan nankiixmatij tiempo, ke moneki xiijsakanya itech kochilis, porin okachi amo uejka yetok tonemakixtilis ke ijkuak timochiujkej titaneltokanij” (Rom. 13:11, 12, TNM). Amo uejkaua mochiuas yankuik taltikpak kemej Dios motenkaua, uan xa tonemakixtilis okachi amo uejka yetok kemej tiknemiliaj. Maj amo tikochikan ika totaueyichiualis uan maj amo tikauakan maj techtapololti tein onkak nikan taltikpak, porin xa amo uelisok timoajsiskej toselti keman uelis tiktataujtiskej Jiova. Ta maj ‘tiksentokakan timotatatautilikan iuan Dios’ porin nejon techpaleuis maj ‘tichipaukanemikan uan maj tikmouistilijtiyakan Dios’ axkan ke tikchiaj itonal Jiova (2 Ped. 3:11, 12). Ijkon, itech tonemilis tiknextiskej ke tiijsatokej ika totaueyichiualis uan tikneltokaj ke amo uejkaua ixpoliuis nochi tein amo kuali. Yejua ika, maj ‘timotatatautilikan iuan Dios youalitonal’ (1 Tes. 5:17). Ijkon kemej Jesús, maj tiktemokan timoajsiskej toselti uan ijkon timotataujtiskej iuan Jiova. Maj amo tikijsiujkachiuakan netataujtil. Nejon techpaleuis maj okachi timotokikan iuan (Sant. 4:7, 8). ¿Onkak okse tatiochiualis okachi ueyi ke nejon?

¹⁸ Biblia kinextia: “Kuak Cristo Jesús nentinemia nikan taltikpak, [...] motatatautiliaya [...] iuan Dios. Uan [...] kitsajtsiliaya Itajtsin [...] uan hasta no ka chokilis. Porin sayo Totajtsin Dios kipixtinemik uelilis para kitakajkaualtis [...] de ne chikaualispan kampa in mikilis momasoutok. Uan [...] Dios kikakilij [...] porin [...] takuautamatinemik iuan” (Heb. 5:7). Jesús chikauak kitataujtij uan kitsajtsilij iTajtsin uan amo keman kikauak ijkuak nemik nikan taltikpak. Yejua ika, Jiova kimakixtij itech mikilis uan kimakak nemilis ompa iluikak tein amo kipia mikilis. Komo ‘tiksentokaj timotatatautiliaj iuan Dios’, amo no keman tikauaskej toTajtsin maski tikixnamikiskej tayejyekolis oso techejkos tanemilil tein amo kuali uan ijkon tikpiaskej nemilis nochipaya kemej se netetayokolil.