1, 2. (a) Tanbasá mak importante atu ‘matan-moris atu harohan’? (b) Ita bele husu ba ita-nia an pergunta saida deʼit kona-ba orasaun?

 MANE ida neʼebé serbisu durante kalan hatete: “Tempu neʼebé susar liu atu matan-moris mak foin antes madrugada.” Karik ema seluk neʼebé serbisu iha kalan mós sente hanesan mane neʼe. Ita bele kompara ida-neʼe ho ita-nia tempu ohin loron. Ita moris iha parte ikus husi Satanás nia mundu. Tempu neʼe hanesan kalan neʼebé nakukun liu no ema kristaun sira presiza hakaʼas an atu la toba-dukur. (Roma 13:12) Se ita toba-dukur iha dalan espirituál, neʼe perigu tebetebes. Tan neʼe, ita presiza duni iha “hanoin neʼebé loos” no kontinua atu ‘matan-moris atu harohan’.—1 Pedro 4:7, MF.

² Tanba Satanás nia mundu besik atu hotu, ita presiza husu ba ita-nia an: ‘Haʼu matan-moris kona-ba haʼu-nia orasaun ka lae? Haʼu halo orasaun oioin no halo beibeik ka lae? Haʼu halo orasaun ba ema seluk ka kona-ba buat neʼebé haʼu hakarak no presiza deʼit? Halo orasaun mak importante atu haʼu bele hetan salvasaun ka lae?’

3. Iha ita-nia orasaun, buat tolu saida mak ita presiza halo?

³ Kuandu apóstolu Paulo hakerek karta ba kongregasaun Éfeso, nia koʼalia kona-ba “orasaun oioin”. (Efeso 6:18, MF) Kuandu ita halo orasaun ba Jeová, baibain ita husu deʼit buat neʼebé ita presiza no atu nia bele ajuda hodi rezolve ita-nia problema sira. Bíblia hatete katak Jeová mak “Ida neʼebé rona orasaun”. Nia rona ba ita kuandu ita husu ajuda tanba nia hadomi ita. (Salmo [Mazmur] 65:2) Maibé kuandu ita halo orasaun, ita la bele husu deʼit buat neʼebé ita presiza. Ita mós presiza hahiʼi nia, fó agradese ba nia, no harohan.

4. Tanbasá mak ita tenke hahiʼi Jeová beibeik iha ita-nia orasaun?

⁴ Iha razaun barak tanbasá ita presiza fó hahiʼi ba  Jeová iha ita-nia orasaun sira. Porezemplu, kuandu ita hanoin kona-ba “buat furak neʼebé nia halo” no ninia ‘kmanek neʼebé boot tebetebes’, neʼe book ita atu hahiʼi nia. (Lee Salmo [Mazmur] 150:1-6. a) Haree toʼok Salmo 150. Iha versíkulu neen nia laran, eskritura sira-neʼe temi ba dala 13 atu fó hahiʼi ba Jeová! Hakerek-naʼin ida ba salmu hatete: “Loron ida dala hitu haʼu hahiʼi Ita tanba Ita-nia tesi-lia sira neʼebé loos.” (Salmo [Mazmur] 119:164) Jeová merese duni atu ita fó hahiʼi ba nia. Tan neʼe, ita tenke hahiʼi nia iha ita-nia orasaun “loron ida dala hitu”, neʼe katak ita tenke hahiʼi nia beibeik.

5. Se ita fó agradese kuandu ita halo orasaun, neʼe bele proteje ita husi saida?

⁵ Kuandu ita halo orasaun, ita mós presiza fó agradese ba Jeová. Kuandu apóstolu Paulo hakerek karta ba ema kristaun sira iha sidade Filipe, nia hatete: “Imi keta laran-taridu kona-ba buat ruma. Iha buat hotu, harohan no hamulak bá hodi fó-agradese; hatoʼo imi-nia harohan ba Maromak.” (Filipe 4:6) Ita moris iha loron ikus sira husi Satanás nia mundu no ita hela iha ema nia leet neʼebé “la hatene fó agradese”. Tan neʼe, importante tebes atu ita fó agradese ba Jeová ba nia bensaun hotu neʼebé ita simu, hodi ita la sai hanesan ema seluk iha mundu neʼe. (2 Timoteo 3:1, 2) Tanba ema barak iha mundu neʼe la hatene fó agradese, se ita la kuidadu, karik ita mós sei banati-tuir hahalok hanesan neʼe. Maibé se ita fó obrigadu kuandu ita halo orasaun, ita sei hafolin buat neʼebé ita iha no la muramura kona-ba ita-nia moris. (Judas 16) No mós, kuandu aman sira halo orasaun hamutuk ho sira-nia família no sira fó agradese ba Jeová, sira-nia ezemplu neʼe sei book sira-nia feen no oan sira atu fó mós agradese.

6, 7. Harohan katak sá? Ita bele harohan kona-ba saida deʼit?

⁶ Kuandu ita halo orasaun, ita mós presiza harohan. Harohan katak hatoʼo ita-nia orasaun husi laran no husu makaʼas ba Maromak. Ita bele harohan kona-ba saida deʼit? Ita bele harohan ba Jeová atu husu ninia ajuda kuandu ema fó-terus mai ita ka kuandu ita moras todan. Iha tempu hanesan neʼe, ita sei husu makaʼas ba Jeová atu ajuda ita. Maibé iha situasaun sira-neʼe deʼit mak ita sei husu Jeová nia ajuda ka lae?

⁷ Atu hatene resposta ba pergunta neʼe, mai ita hanoin kona-ba Jesus nia orasaun kuandu nia koʼalia kona-ba Maromak nia naran, ninia Ukun no ninia hakarak. (Lee Mateus 6:9, 10.) Mundu neʼe iha buat barak neʼebé aat tebes, no ema nia governu sira la bele fó buat neʼebé povu presiza. Ida-neʼe fó razaun diʼak mai ita atu harohan ba Maromak hodi nia naran sai santu, no ba ninia Ukun atu halakon Satanás husi mundu neʼe. Ida-neʼe mós tempu atu halo orasaun atu Jeová nia hakarak sai loos iha rai, hanesan iha lalehan. Tan neʼe, mai ita matan-moris nafatin hodi halo orasaun oioin.

8, 9. Tanbasá mak ita la bele tesi lia ba Pedro no apóstolu sira seluk tanba sira toba-dukur iha jardín Getsémani?

⁸ Apóstolu Pedro hakerek ba ema kristaun atu “matan-moris bá atu harohan”, maibé dala ida, Pedro mós falta atu halo ida-neʼe. Nia ho dixípulu sira seluk  toba-dukur kuandu Jesus harohan iha jardín Getsémani. Jesus dehan ba sira atu “matan-moris no harohan bá”, ka halo orasaun beibeik. Maibé sira toba nafatin.—Lee Mateus 26:40-45.

⁹ Duké tesi lia kedas ba Pedro no apóstolu sira seluk, ita la bele haluha katak sira kole tebes tanba iha loron neʼe sira halo buat barak. Sira prepara no selebra Páskua hamutuk iha kalan neʼe. Depois Jesus fó matadalan ba sira kona-ba oinsá atu halaʼo Naʼi nia Han Kalan, hodi sira bele halo nafatin depois nia mate. (1 Korinto 11:23-25) Bíblia hatete katak “hananu tiha knananuk ida, sira sai ba Foho Ai-Oliveira nian”. Atu bá neʼebá, sira presiza laʼo liuhusi sidade Jerusalém. (Mateus 26:30, 36) Iha tempu neʼe, karik kalan boot ona. Se ita mós iha jardín Getsémani iha kalan neʼe, karik ita mós toba-dukur. Jesus la hirus ninia apóstolu sira, maibé nia hatene katak “espíritu hakarak maibé isin kbiit-laek”.

10, 11. (a) Saida mak Pedro aprende husi ninia esperiénsia iha jardín Getsémani? (b) Saida mak Ita rasik aprende husi Pedro nia esperiénsia?

¹⁰ Iha kalan neʼe, Pedro aprende lisaun importante liuhusi esperiénsia neʼebé triste loos. Antes neʼe, Jesus dehan ba ninia apóstolu sira: “Kalan neʼe imi laran la metin iha haʼu.” Maibé Pedro hatán: “Maski ema hotu laran la metin iha Ita-Boot, haʼu lae!” Depois, Jesus dehan ba Pedro katak nia sei nega nia ba dala tolu. Maibé Pedro la fiar Jesus. Nia hatete: “Maski haʼu mate ho Ita-Boot, haʼu sei la nega Ita.” (Mateus 26:31-35) Liutiha tempu uitoan, Jesus nia liafuan neʼe sai loos kuandu Pedro nega duni nia. Kuandu Pedro hatene buat neʼebé nia halo, nia “tanis ho neon-sala tebetebes”.—Lucas 22:60-62.

¹¹ Liuhusi ninia esperiénsia, Pedro aprende atu la bele fiar an demais. Orasaun mak ajuda nia atu la halo hanesan neʼe. Oinsá mak ita hatene? Tanba Pedro rasik mak ida neʼebé dehan atu “matan-moris bá atu harohan”. Ita halo tuir Bíblia nia konsellu neʼe ka lae? Ita halo orasaun beibeik hodi hatudu katak ita sadere ba Jeová ka lae? (Salmo [Mazmur] 85:8) Ita mós tenke halo tuir apóstolu Paulo nia konsellu neʼebé dehan: “Ema neʼebé hanoin katak nia hamriik metin, matan-moris bá atu nia labele monu.”—1 Korinto 10:12.

12. Tanbasá mak Neemias hatudu ezemplu diʼak mai ita?

¹² Iha tinan 450 molok Kristu, fiar-naʼin ida naran Neemias hatudu ezemplu diʼak. Nia mak iha knaar atu toma konta ba  Artaxerxes nia hemu, liurai Pérsia nian. Neemias halo orasaun ba Jeová ho laran. Bíblia hatete katak nia halo jejún no harohan ba loron barak tanba iha Jerusalém ema judeu hasoru situasaun susar. (Neemias 1:4) Kuandu Artaxerxes husu tanbasá mak nia triste, Neemias esplika kona-ba situasaun susar iha Jerusalém. Depois, liurai husu saida mak Neemias hakarak. Antes Neemias hatán, nia halo orasaun kedas ba “Maromak lalehan nian”. (Neemias 2:2-4) Rezultadu mak saida? Jeová hatán ba Neemias nia orasaun iha dalan neʼebé ajuda ninia povu. (Neemias 2:5, 6) Ita bele fiar katak ida-neʼe hametin duni Neemias nia fiar!

13, 14. Atu iha fiar neʼebé metin no hodi Satanás la halo ita laran-tun, ita presiza halo saida?

¹³ Se ita halo orasaun beibeik hanesan Neemias halo, ida-neʼe bele ajuda ita atu hametin ita-nia fiar. Satanás laran-aat tebes no baibain nia ataka ita kuandu ita sente fraku. Porezemplu, se ita moras todan ka ita sente laran-tun tebes, karik ita komesa atu hanoin katak Maromak ladún haree ba tempu neʼebé ita uza atu bá haklaken fulan-fulan. Karik uluk ita balu hasoru esperiénsia neʼebé la diʼak no ita sente laran-susar tanba ita hanoin beibeik kona-ba neʼe. Satanás hakarak ita sente katak ita la iha folin. Nia koko atu aproveita ita-nia sentimentu neʼe hodi halo fraku ita-nia fiar. Maibé se ita ‘matan-moris atu harohan’, ita bele haburas fiar neʼebé metin tebes. Bíblia hatete katak ita-nia fiar mak hanesan eskudu boot neʼebé bele hapara “rama ho ahi neʼebé mai husi diabu”.—Efeso 6:16.

¹⁴ Se ita ‘matan-moris atu harohan’, ita mos sei laran-metin nafatin ba Jeová kuandu ita hasoru situasaun susar neʼebé mosu derrepente deʼit. Ita presiza hanoin nafatin Neemias nia ezemplu hodi halo orasaun kedas ba Maromak Jeová. Ita bele manán  susar sira no laran-metin ba Jeová só deʼit ho ninia ajuda.

15. Pergunta saida deʼit mak ita bele husu ba ita-nia an kona-ba halo orasaun ba ema seluk?

¹⁵ Jesus harohan hodi Pedro ninia fiar bele nafatin metin liután. (Lucas 22:32) Ema kristaun ida iha apóstolu sira-nia tempu naran Epafras, nia halo tuir Jesus nia ezemplu. Epafras halo orasaun ba ninia maluk sira iha sidade Koloso. Paulo hakerek ba sira hodi hatete katak Epafras harohan atu sira-nia fiar sei la namlele, maibé katak sira metin no loos nafatin ba Maromak nia hakarak. (Koloso 4:12) Ita presiza husu ba ita-nia an: ‘Haʼu hakaʼas an atu halo orasaun kona-ba haʼu-nia maluk kristaun sira iha mundu tomak ka lae? Kuandu irmaun-irmán sira hasoru dezastre naturál, haʼu halo orasaun beibeik kona-ba sira ka lae? Haʼu halo orasaun kona-ba sira neʼebé iha responsabilidade boot iha Jeová nia organizasaun no mós kona-ba ema iha kongregasaun neʼebé foin hasoru susar ka lae?’

16. Halo orasaun kona-ba ita-nia maluk sira bele ajuda ka lae? Esplika toʼok.

¹⁶ Kuandu ita halo orasaun ba Maromak Jeová kona-ba ita-nia irmaun-irmán sira, ida-neʼe bele ajuda duni. (Lee 2 Korinto 1:11.) Maski Jeová la presiza hein ninia atan sira-nia orasaun hodi fó ajuda, maibé nuʼudar nia hatán sira-nia orasaun, nia kontente hodi haree katak sira hanoin tebes sira-nia maluk. Tan neʼe, haree ita-nia orasaun ba ita-nia maluk sira nuʼudar knaar neʼebé importante. Ita tenke banati-tuir Epafras hodi hatudu domin ba ita-nia irmaun-irmán sira no hakaʼas an atu temi sira iha ita-nia orasaun. Se ita halo nuneʼe, ita sei kontente tanba Bíblia hatete katak “diʼak liu fó liu fali simu”.—Apostolu 20:35.

17, 18. Hodi ‘matan-moris atu harohan’, oinsá mak ida-neʼe bele ajuda ita?

¹⁷ Antes apóstolu Paulo hatete katak “kalan toʼo ona nia rohan, loron besik daudaun ona”, nia hakerek: “Imi hatene ona tempu; oras neʼe tempu ona ba imi atu hadeer, basá ita-nia maksoin besik ona liu fali wainhira ita foin fiar.” (Roma 13:11, 12) Maromak nia mundu foun besik ona no lakleur tan nia sei salva ita. Agora laʼós tempu atu toba-dukur iha dalan espirituál. Ita la bele husik buat ida iha mundu neʼe atu hadau ita-nia tempu hodi la halo orasaun mesak ba Jeová. Ita presiza ‘matan-moris atu harohan’. Hodi halo nuneʼe sei ajuda ita atu hatudu ‘hahalok santu no serbí Maromak ho laran-metin’ nuʼudar ita hein ba Jeová nia loron. (2 Pedro 3:11, 12, MF) Dalan neʼebé ita halaʼo ita-nia moris hatudu se ita matan-moris nafatin iha dalan espirituál. Ida-neʼe mós sei hatudu ita fiar metin ka lae katak mundu aat neʼe atu ramata. Ita tenke “hamulak beibeik”. (1 Tesalonika 5:17) Ita presiza banati-tuir Jesus hodi buka fatin hakmatek atubele halo orasaun mesak ba Jeová. Se ita uza tempu atu halo orasaun, ita sei hakbesik liután ba nia. (Tiago 4:7, 8) Neʼe mak bensaun neʼebé furak tebes!

¹⁸ Bíblia hatete: “Wainhira [Jesus] sei moris iha rai neʼe, nia hasaʼe orasaun no harohan ho lia makaʼas no matabeen ba Ida neʼebé bele soi nia husi mate, no Maromak rona nia tan nia haraik an ba Naʼi.” (Ebreu 5:7) Jesus harohan ba Jeová no hatudu laran-metin toʼo rohan. Tan neʼe, Jeová fó moris-hiʼas ba ninia Oan-Mane hodi nia hetan kolen atu moris ba nafatin iha lalehan. Ita mós bele laran-metin ba ita-nia Aman Jeová maski ita hasoru susar naran deʼit. Sin, ita bele hetan bensaun moris rohan-laek naran katak ita ‘matan-moris atu harohan’.