1, 2. Jehová Diosajj mä awatirïkaspas ukhamwa jupa pachpat parli, ¿kunatsa ukajj wali wakiskirejja?

JEHOVÁ Diosajj mä awatirïkaspas ukhamwa Jupa pachpat parli (Eze. 34:11-14). Ukhamatwa Jupajj kunjam Diosäkitï uk amuysna. Mä munasir awatirejja, jupar katuyatäki uka uwijanakapat wal llakisi, ukat sumwa uñjaraki janiw usuchjasipjjañap munkiti. Chʼojjña pastonakaru ukat kawkhantejj um umtʼasipkaspa uka cheqanakaruw anaki (Sal. 23:1, 2); uruy arumaw uñji (Luc. 2:8); ñanqha animalanakatsa jarkʼaqe (1 Sam. 17:34, 35); jiskʼa uwij qallunakarus amparaparuw ichjjarusi (Isa. 40:11); chhaqatanakarus thaqhe ukat usuchjatanakarus qolltʼarakiwa (Eze. 34:16).

² Nayrapachajja, israelitanakajj yapuchañsa ukat uywa awatiñsa sum yatipjjäna. Ukhamajja, Diosajj mä uwij awatirjamätwa sasin siskäna uk sum amuyapjjpachäna. Ukat uwijanakaru sum uñjañ wakisitapsa yatipjjarakïnwa. Diosar yupaychañ toqetjja, ukhamarakiw jaqenakarojj sum uñjañajj wakisi (Mar. 6:34). Jan suma uñjatasa ukat Diosar yupaychañ toqen jan yanaptʼatasa, jaqenakajj tʼaqhesipjjewa. Kunatï walïki ukat jan walïki uk janiw yatipkiti ukat kuna jan walinaks lurasipkakispawa, jupanakajj “jan awatirini ovejanakar uñta[täpjjewa]” (1 Rey. 22:17). Ukampis munasiñampiw Jehová Diosajj kuntï servirinakapajj munapki uk churi.

3. ¿Kuna toqetsa aka yatichäwin yatjjataskañäni?

³ Jehová Diosajj mä awatirïkaspas ukham jupa pachpat parlki, ukajj jichhürunakan wali wakiskirirakiwa. Jupajj servirinakaparu, mä arunjj uwijanakaparojj yanaptʼaskakiwa. Ukhamajj kunjamsa jichhürunakan uwijanakapar irpaski ukat kunatï wakiski uks churi ukwa uñjañäni. Ukat kunjamsa jiwasajj munasir Jehová Diosan yanaptʼap katoqasiñasa uksa yatjjatarakiñäniwa.

4. ¿Kunjamsa Jesusajj Jehová Diosan uwijanakapar uñji?

⁴ Jehová Diosajja, Jesusaruw cristian tamar Pʼeqtʼañapatakejj uttʼayi (Efe. 1:22, 23). Jesusajj Awkipjam “suma awati[rirakiwa]”. Jupajj uwijanakapar munasiwa ukat sum uñjaraki. Ukat ovejanakap laykuw jakañapsa aptʼasiwayi (Juan 10:11, 15). Jesusajj jiwasar qhespiyañatak jakäwip loqtasiwayki, ¡ukajj wali jachʼa bendicionawa! (Mat. 20:28.) Cheqas ‘taqe khitinakatejj Jesusar iyawsapki ukanakajj jan chhaqhapjjañapa, jan ukasti wiñay jakañ’ katoqapjjañapwa Jehová Diosajj muni (Juan 3:16).

5, 6. 1) ¿Khitinakarus Jesusajj uwijanakapar uñjañapatakejj uttʼayawayi, ukat uka awatirinakapamp yanaptʼayasiñatakejj kunsa uwijanakapajj lurapjjañapa? 2) ¿Kunatsa irpir chuymaninakar istʼañasa?

⁵ ¿Kunjamsa uwijanakajj Suma Awatiri Jesusan arunakap istʼapjje? “Uwijanakajjajj arojj uñtʼiwa, nayasti uñtʼaraktwa, jupanakasti arkapjjarakituwa” sasaw jupajj säna (Juan 10:27). Suma Awatirin arunakap istʼañajja, taqe kunan jupamp irpayasiña sañ muni. Ukhamarus khitinakarutï tamar uñjañatak uttʼayki uka awatirinakarus istʼañasarakiwa. Kuna luräwtejj nayajj qalltawaykta ukjja, apostolonakajampi arkirinakajampiw lurasipkakini sasaw Jesusajj säna. Jupanakaw Jesusan ‘uwijanakaparojj’ awatipjjañapäna ukat yatichapjjañapäna (Mat. 28:20; Juan 21:15-17 liytʼasiñapawa). Suma yatiyäwinakajj jukʼamp yatiyasiskakïnwa ukat arkirinakas jiljjattasipkakïnwa, ukatwa Jesusajj tam awatipjjañapatakejj experienciani cristianonakar uttʼayäna (Efe. 4:11, 12).

⁶ Nayrïr patak maranakanjja, apóstol Pablojj Éfeso tamankir irpir chuymaninakaruw qellqäna, ukat ‘qollan ajayuw Tatitun tamap uñjapjjañamataki ajllipjjtamjja’ sasaw säna (Hech. 20:28). Jichhürunakanjja, irpir chuymaninakajj qollan ajayump uttʼayatäpjjarakiwa. ¿Kunatsa ukham sistanjja? Kunattejj Diosan Arupan utjki uka mayitanakwa jupanakajj phoqhapjje. Jupanakar istʼasajja, jachʼa Awatiri Jehová Diosampiru Jesusampir respetataswa uñachtʼaytanjja (Luc. 10:16). Ukatpï irpir chuymaninakar taqe chuyma istʼañajj wali wakiskirejja. Ukampis jupanakar istʼañasatakejj janiw ukakïkiti, jukʼampinakaw utji.

7. ¿Kunjamsa irpir chuymaninakajj Jehová Diosampi sum apasiñamatak yanaptʼapjjtamjja?

⁷ Irpir chuymaninakajja, jilat kullakanakaru yanaptʼkasajj pachpa Bibliampi jan ukajj Biblian yatichäwinakapampiw ewjjtʼapjje ukat chʼamañchtʼapjjaraki. Ukampis kunjamsa sapa maynejj jakañapa ukjja janiw jilat kullakanak lantejj amtapkiti (2 Cor. 1:24). Jan ukasti, suma amtar puripjjañapatakisa ukat taman sumankañ utjañapatakisa Bibliampiw yanaptʼapjje (1 Cor. 14:33, 40). ¿Kunatsa irpir chuymaninakajj jilat kullakanakan ‘almanakapat llakisipjje’? Kunattejj Jehová Diosampi sum apasipjjañapwa munapjje. Ukhamasti, kawkïr jilat kullakanakatï ‘juchar tinkuntirjamäpki’ jan ukajj juchar purtʼasipki ukanakar yanaptʼañatakejj jankʼakïpjjewa (Gál. 6:1, 2; Jud. 22). Ukhamajj tama sarayapki ukanakar ‘istʼañasajj’ wali wakiskiriwa (Hebreos 13:17 liytʼasiñapawa).

8. ¿Kunjamsa irpir chuymaninakajj Diosan tamapar arjjatapjje?

⁸ Apóstol Pablojj mä awatirjamarakiw tama taypin irnaqtʼäna, ukat akham sasaw Colosankir jilat kullakanakar qellqäna: “Wal amuyasipjjam, janiraki sallqjayasipjjamti khitinakatejj kʼari amuytʼanakapampi sallqjañ munapjjtam ukanakampejja. Jupanakasti janiw Tatitur iyawsapkiti, jan ukasti jaqenakan sarnaqäwinakaparu, amtatanakaparukiw phoqhapjje kuna toqensa” sasa (Col. 2:8). Irpir chuymaninakajj Bibliarjam ewjjtʼkistu ukhajj kunatsa jupanakar istʼañasa ukwa uka arunakajj uñachtʼayistu. Ukat tamat saranukuyañ  munapki ukanakat amuyasipjjañapatakiw jilat kullakanakar yanaptʼapjje, ukhamatwa jupanakajj tamar jarkʼaqapjje. Apóstol Pedrojja, ‘kʼari profetanaka’ ukat “kʼari yatichirinaka[w]” utjani ukat “pisi amuytʼaninakarusti” jucharuw puriyapjjani sasaw säna (2 Ped. 2:1, 14). Jichhürunakanjja, irpir chuymaninakajj ukhamarakiw wakiskani ukhajj tamar ewjjtʼapjjañapa. Uka jilatanakajj Diosar yupaychañan wakichtʼatäpjjewa ukat jakäwins wali experiencianïpjjewa. Ukhamarus janïr irpir chuymanjam uttʼayatäsaw jupanakajj Biblia sum uñtʼapjjatapsa ukat cheqa yatichäwi yatichañataki wakichtʼatäpjjataps uñachtʼayapjjäna (1 Tim. 3:2; Tito 1:9). Ukat Bibliamp yanaptʼayasisaw wali amuyumpi ukat yatiñampi sarnaqapjje, ukaw tamar sum irpañatakejj jupanakar yanaptʼi.

9. ¿Kunjamsa Jesusajj cristian tamar irpi ukat manqʼa churi?

⁹ Jehová Diosajj markap toqew oraqpachankir taqe jilat kullakanakar ajay toqet jilarkir manqʼa churi. Bibliat apstʼat qellqatanakasanjja, Diosan Arupat apstʼat walja ewjjtʼanakaw utji. Ukhamarusa awisajj irpir chuymaninak toqe, cartanak toqe jan ukajj tamanak tumptʼir jilatanak toqew Diosan markapajj ewjjtʼistu. Taqe ukanak toqew Jehová Diosajj uwijanakapar wali qhan ewjjtʼi.

10. ¿Tamat jitheqtirinakar yanaptʼañatakejj kunsa irpir chuymaninakajj lurapjjañapa?

¹⁰ Irpir chuymaninakaw tamar jarkʼaqapjjañapa ukat Diosar yupaychañ toqet sum jikjjatasipjjañapatakis uñjapjjañapa. Yamas  khitinakatejj ajay toqet aynachtʼatäpki jan ukajj usutäpki ukanakaruw jukʼamp yanaptʼapjjañapa (Santiago 5:14, 15 liytʼasiñapawa). Uka jilat kullakanakat yaqhepajj tamat jitheqtawayapjje ukat Diosar serviñsa qʼal apanukuwayapjje. ¿Janit mä munasir irpir chuymanejj jupanakar thaqheri sarañatak chʼamachaskaspa? ¿Janit tamar kuttʼanipjjañapatak chʼamañchtʼkaspa? Jïsa, ukhamwa luraspajja. Jesusajj akham sänwa: “Alajjpachankir Awkimajj janiw khiti jiskʼan chhaqañapsa munkiti” sasa (Mat. 18:12-14).

11. ¿Kunatsa yaqhep jilat kullakanakatakejj irpir chuymaninakar istʼañajj chʼamäspa?

¹¹ Jehová Diosampi Jesusampejj jan pantjasir Awatirïpjjewa, ukampis khitinakatï tama uñjapjjañapatak uttʼayatäpki uka awatirinakajj pantjasirïpjjewa. Ukatwa yaqhep jilat kullakanakatakejj jupanakar istʼañajj chʼamäspa. Inas akham amuyapjjchi: “Jiwasjam pantjasir jaqëpjjewa. Ukat kuntï lurañajäki uk janiw sapkitaspati” sasa. Cheqansa irpir chuymaninakajj pantjasirïpjjewa. Ukampis janiw pantjasitanakapak uñchʼukiskañajj wakiskaspati.

12, 13. 1) Jehová Diosajj markap uñjañatakejj pantjasir chachanakar uttʼaykäna ukanakatjja, ¿kamsasispasa? 2) Markap uñjañataki uttʼaykäna uka yaqhep chachanakan pantjasitanakapjja, ¿kunatsa Jehová Diosajj Bibliar qellqaypachäna?

¹² Nayra pachajja, Jehová Diosajj pantjasir jaqenakampiw tamap irpayäna, uka jaqenakan pantjasitanakapajj Qollan Arunakan suma qellqantatawa. Amuytʼañäni, Davitajj reyïñataki ukat Israel marka apnaqañapatak ajllitänwa. Ukampis uka reyejj wachoq jucharuw purtʼasïna ukat jaqerus jiwayarakïnwa (2 Sam. 12:7-9). Pedrojj nayrïr cristian taman wali wakiskir luräwsa katoqkchïnjja, jan walinakwa luräna (Mat. 16:18, 19; Juan 13:38; 18:27; Gál. 2:11-14). Adán chachata ukat Eva warmit qalltasajj taqeniw pantjasirïptanjja, Jesús sapakiw jan pantjasirïkiti.

¹³ Jehová Diosajj markap uñjañatak uttʼaykäna uka chachanakan pantjasïwinakapjja, ¿kunatsa Bibliar qellqaypachäna? Mä toqet akawa, markap uñjañatakejj pantjasir jaqenakar uttʼayirïtap uñachtʼayañatakiwa. Cheqans nayratpachaw ukhamänjja. Ukhamasti tama sarayirinakan pantjasïwip uñjasakejj janiw jupanak contra parlañasäkiti ni jan walits uñjañasäkiti. Jehová Diosajj jupanakar respetañasa ukat istʼañaswa muni (Éxodo 16:2, 8 liytʼasiñapawa).

14, 15. ¿Kunjamtï Jehová Diosajj markapar yatiyirïkäna ukat kuns yateqsna?

¹⁴ Jichhürunakanjja, tama sarayirinakar istʼañasajj wali wakiskiripuniwa. Kuna toqes Jehová Diosajj wali wakiskir toqenakat markapar yatiyirïna uk amuytʼañäni. Israelitanakajj Egiptot mistunipkäna ukhajja, kuntï lurapjjañapäkäna uk Moisés ukat Aarón chachanak toqew Jehová Diosajj yatiyäna. Uka markar jan walinak apaykäna ukanakat tunkïr jan waltʼäwit qhespipjjañapatakejja, uka arumajj mä suma manqʼäwiw utjañapäna ukat kharinoqat uwijan wilapampiw utap punku markur chʼallkatapjjañapäna. Ukham lurapjjañapatakejj janiw alajjpachat mä aru istʼapkänti. Jan ukasti, israelitanakan irpirinakaparuw istʼapjjañapäna. Jupanakajja, Moisesajj kuntï qhan siskäna ukwa katoqapjjäna (Éxo. 12:1-7, 21-23, 29). Ukhamanakanjja, Jehová Diosan arupajj Moisés ukat israelitanakan irpirinakap toqew yatiyasïna. Jichhürunakan ukhamarakiw irpir chuymaninakajj wali wakiskir luräw phoqhapjje.

¹⁵ Jehová Diosajj servirinakapar qhespiyañatakejja, Jupa lantejj angelanakaparu jan ukajj jaqenakaruw yatiyañapatak khitirïna, uka toqenakat Diosan Arupan parlki ukanakat inas jumajj walj amtsta. Taqe ukhamanakanjja, Jupa lanti kuns lurañapatak yaqhanakar uttʼayañajj Jehová Diosatakejj walikïnwa. Jupanakajj Diosan  sutipjjaru ukat kunsa qhespipjjañapatakejj lurapjjañapäna ukanakwa yatiyapjjerïna. Armagedonajj purinkani ukhajja, ¿Jehová Diosajj janit ukham lurkarakispa? Cheqansa, jichhürunakan khitinakatï Diosan sutipjjata jan ukajj markapjjat arjjatañatak irpir chuymanjam uttʼayatäpki ukanakajj kuntï lurapjjañapäki ukakwa lurapjjañapa.

16. ¿Kuna arurus istʼañasa?

¹⁶ Jehová Diosan markapajj ‘mä sapa tamakiwa’ ukat “mä sapa awatirinikiraki” jupajj Jesucristowa (Juan 10:16). Jesusajj arkirinakaparojj akham sänwa: “Nayajj sapürupuniw jumanakampïskta akapachan tukusiñapkama” (Mat. 28:20). ¿Kunjamsa uka arsutarjam phoqhaski? Alajjpachan Reyit uttʼayatjamajj kunanakatï Supayan apnaqat akapachan tʼunjäwipar apkani ukanakajj amparapankiwa. Jiwasatï Jehová Diosan tamapankaskakiña ukat ukan jarkʼaqatäñ munstan ukhajja, kuna thaknamsa sarañasa uka amuytʼayir ‘arwa istʼañasaʼ, ukaw kuna thakinjamsa sarañasa uk amuytʼayistu. Uka amuytʼayir “arojja”, kuntï qollan ajayojj Biblia toqe siski ukat Jehová Diosasa Jesusasa uttʼayat awatirinak toqejj siski ukarakiwa (Isaías 30:21; Apocalipsis 3:22 liytʼasiñapawa).

17, 18. 1) ¿Diosan uwijanakapajj kuna jan walinsa jikjjatasipjje, ukat kunatsa janipun pächasiñasäki? 2) ¿Kuna toqetsa jutïr yatichäwin yatjjataskañäni?

¹⁷ Ñanqha Supayajj “mä leonar uñtataw warartʼasisa sarnaqaski” sasaw apóstol Pedrojj säna (1 Ped. 5:8). Manqʼat awtjat mä sallqa animaljamawa, jupajj khitinakatï jan amuyasipki ukat tamat jitheqtatäpki ukanakar manqʼantañatakejj wal uñchʼukiski. Ukatwa Diosan tamapata ukat khititï ‘awatirir uñtat imkistu, almanakasatsa llakiskaraki’ ukat janipun jitheqtañasäkiti (1 Ped. 2:25). Jachʼa tʼaqhesïwit qhespirinakatjja, akham sasaw Apocalipsis 7:17 jiskʼa tʼaqajj qhanañchi: “Corderow [Jesusaw] [...] awatini, jakkir uma jalsunakaruw anakirakini. Diosasti taqe jachanakap nayranakapat phiskurjjani” sasa. ¿Yaqha ukham suma arsüwejj utjarakispati?

¹⁸ Niyakejjay Jehová Diosan tamapa uñjiri irpir chuymaninakajj kunjamsa awatirjam lurañanakap phoqhapjje uk uñjawaystanjja, akham sasin jisktʼasiñasaw wali askïspa: “Uttʼayat uka chachanakajja, ¿kunjamsa Jesusan uwijanakapar sum uñjasipkatap yatipjjaspa?” sasa. Uka jisktʼarojj jutïr yatichäwinwa qhanañchasiskani.