1, 2. (a) Ngo ma timme ka lakwat gwoko romine maber? (b) Pingo jo ma i kare pa Yecu onongo gitye calo romi ma gipe ki lakwat?

 BUK mo acel ma loko i kom kit me gwoko romi waco ni ka ce lakwat cwalo romine i olet ci dong pe paro pigi, two bimako romine dok gidoko goro i nge mwaki manok keken. Ento, ka lakwat gwoko romine maber, ci romi gibedo ma komgi yot.

² Gwok ki kony ma lakwat miyo bot romo acel acel twero konyo kacokke me dongo i yo me cwiny. Wi opo ni kica omako Yecu i kom lwak pien “onongo gitye ka unogi matek, dong gudoko goro, calo romi ma lakwatgi pe.” (Mat. 9:36) Pingo jo ma i kare pa Yecu onongo gitye calo romi ma gipe ki lakwat? Pien jo ma onongo gitye ki tic me pwonyo Cik pa Lubanga onongo giger, gidiyo dano, dok pe gitimo jami ma gipwonyo. Ma ka maro ki dok konyo romi, lutela dini guminigi “yec mapek” me atinga i pal gwokgi.​—Mat. 23:4.

3. Gin ango ma luelda myero wigi opo iye ka gitye ka gwoko romi?

³ I kare-ni, luelda gitye ki tic matek me atima. Romi ma gigwoko-ni gubedo pa Jehovah gin ki Yecu, ma owaco ni etye “lakwat maber.” (Jon 10:11) Romi magi Yecu ‘owilogi awila’ kun ‘kokogi ki remone me wel madwong.’ (1 Kor. 6:20; 1 Pet. 1:18, 19) En maro romi adada mumiyo en omiyo kwone pigi labongo dic. Luelda myero wigi opo ni gin lukwat, dok bene ni gitye i te twero pa Wod pa Lubanga, Yecu Kricito, ma en aye “akwat adwong me rommi.”​—Ibru 13:20, Baibul me leb Lango.

4. Gin ango ma wabinyamo ipwony man?

 ⁴ Ci dong, luelda myero guter romi nining? Kicuko cwiny Lukricitayo me ‘winyo lok pa jo ma telogi.’ Kitungcel bene, kiciko luelda pe me ‘loyo dano ma giketo i cinggi ki tek. (Ibru 13:17; kwan 1 Petero 5:2, 3.) Pi meno, luelda gitwero telo wi romi labongo loyogi ki tek nining? Onyo waromo penye ni, luelda giromo gwoko romi nining labongo tic i yo marac ki twero ma Lubanga ominigi?

5. Pwony ango ma wanongo madok i kom Jehovah ki i Icaya 40:11?

⁵ Lanebi Icaya oloko i kom Jehovah ni: “En bikwayo romine calo lakwat, bitingo litino romine i bade, en bitingogi i kore, ci mako litino romi ma dot, peyogi motmot.” (Ic. 40:11) Lok man ma kelo cal i wi dano-ni konyowa me niang ni Jehovah paro pi jo ma gigoro dok bene gwokogi. Kit macalo lakwat ngeyo peko pa romo acel acel dok bedo atera me cobone-ni, Jehovah ngeyo peko pa jo ma i kacokke dok cwinye yom me minigi jami ma gimito. Kit macalo lakwat tingo latin romo i kore ka mitte-ni, Jehovah​—“Won ma lakica”​—bitingowa bene. En bikweyo cwinywa ka watye i atematema malit nyo kwo tye matek.​—2 Kor. 1:3, 4.

6. Macalo lakwat i yo me cwinye, laelda twero lubo lanen pa Jehovah nining?

⁶ Lakwat pud dong twero nongo pwony ma pigi tego ya ki bot Wonwa me polo! Calo Jehovah, en myero oket cwinye me ngeyo peko pa romi. Ka laelda ngeyo peko ma romi gitye iye ki dok peko mene ma mito acoba oyotoyot, ci en bicuko cwinygi kun bene minigi cwak muromo. (Car. 27:23) Ada, laelda myero olok ki luye luwote i yo maber. Kadi bed ni en pe myero odony i mung pa jo mukene, ento en myero oket cwinye i jami ma neno dok winyo ki i kacokke kun kwanyo cawane me ‘konyo jo ma gigoro.’​—Tic 20:35; 1 Tec. 4:11.

7. (a) I kare pa Ejekiel ki Jeremia, romi pa Lubanga onongo kiterogi nining? (b) Pwony ango ma wanongo ma lubbe ki gin mumiyo Jehovah okwero lukwat me kare ca?

⁷ Nen kong labol pa lukwat mogo ma onongo Jehovah daggi. I kare pa Ejekiel ki Jeremia, Jehovah okwero jo ma onongo myero gubed ka gwoko romine ento onongo pe gitye ka timone maber. Pien pe tye ngat mo ma onongo tye ka kwayogi, kibedo ka mako romi dok man omiyo guket woko ata. Ma ka pito romi, lukwat magi gubedo ka uno romi kun ‘gipito komgi keken.’ (Ejek. 34:7-10; Jer. 23:1) Pi kit tim acel-lu, Lubanga bene okwero lutela dini pa Lukricitayo ata-ni. Ento man bene nyuto kit ma pire tek kwede ni luelda myero guket cwinygi adada i gwoko romi pa Lubanga.

8. Yecu oweko lanen maber nining ma lubbe ki miyo tira?

⁸ Pi roc ma gitye kwede, romi mogo gitwero tero kare malac me niang gin ma Lubanga mito ki botgi. Oromo bedo ni pe gitimo jami kit ma Ginacoya tito kwede, nyo i yo ma nyuto ni peya guteggi i yo me cwiny. Luelda omyero gudok iye nining? Gin myero gulub lanen pa Yecu pien en odiyo cwinye i kom lupwonnyene i kare ma gubedo ka pyem i kingi ma lubbe  ki anga ma bibedo dit loyo i Ker me polo. Ma ka keco i komgi, Yecu omedde ki pwonyogi kun minigi tira i yo me mar i kit ma myero gunyut kwede cwiny me mwolo. (Luka 9:46-48; 22:24-27) Yecu opwonyogi me bedo jo mamwol i kare ma olwoko tyengi, dok man bene nyuto ni luelda myero gubed jo mamwol.​—Kwan Jon 13: 12-15; 1 Pet. 2:21.

9. Kodi cwiny mene ma Yecu owacci lupwonyene myero gubed kwede?

⁹ Kit ma Yecu onongo neno kwede tic pa lakwat i yo me cwiny onongo pat ki pa Yakobo gin ki Jon. Lukwena aryo magi onongo gimito kabedo maber loyo i Ker pa Lubanga. Ento Yecu otirogi kun wacci: “Wun wungeyo ni, jo ma gin lulo Lurok giloyo dano ki tek, dok luditogi bene gibedo ki twero i komgi. Pe bibedo kit meno i kinwu; ento ngat ma mito bedo ladit i kinwu aye myero obed laticwu.” (Mat. 20:25, 26) Lukwena onongo myero pe gubed ki cwiny me ‘loyo dano ki tek’ nyo cawa weng tito botgi gin me atima.

10. Yecu mito ni luelda guter romi nining, dok lanen ango ma Paulo oweko?

¹⁰ Yecu mito ni luelda myero guter romi kit ma en eterogi kwede. Gin pe myero gubed macalo ludito ento gumine kengi me tic pi luwotgi. Lakwena Paulo obedo ki cwiny me mwolo, pien en owaco bot luelda me kacokke me Epeco ni: “Wun kikomwu wungeyo kit ma yam abedo kwede i kinwu wun ducu, nia i kare ma tyena okwongo nyono lobo Acia, kun atiyo ki Rwot ki mwolo ducu.” En onongo mito ni luelda ma kunnu gubed ki cwiny me mwolo dok guti matek pi utmege. En owaco ni: “I kare ducu atyeko nyuto botwu ni pi tiyo tic matek macalo meno myero wakony lugoro.” (Tic 20:18, 19, 35) Paulo owaco bot Lukricitayo me Korint ni epe ki twero i kom niyegi. Ma ka meno, en onongo tiyo kacel kwedgi ki cwiny me mwolo wek gubed ki yomcwiny. (2 Kor. 1:24) Paulo oweko lanen maber pi luelda i kareni pien en onongo mwol dok bene tiyo matek.

11, 12. Laelda romo konyo laye lawote nining wek en omok tam matir?

¹¹ Laelda myero ‘omak matek lok pa Lubanga ma lubbe ki gin ma en pwonyo.’ (Tito 1:9) Ma ka diyo jo me kacokke me timo jami i kit ma emito, laelda maber tamo i kom kit ma eromo konyogi me moko tamgi pigi kengi pi margi pi Jehovah kacel ki Lokke. Laelda moni romo lok i kom cik mogo ma igi lac ma omego moni myero otam iye. Gitwero nyamo pwony mogo ma kicoyogi i bukkewa ma peya en omoko tam ma pire tek. En bene romo tito bot ngat meno kit ma timo jami i yo mapat pat gudo kwede watte ki Jehovah. Laelda-ni romo poyo wiye pi kit ma pire tek kwede me lega bot Jehovah ma peya en omoko tam. (Car. 3:5, 6) I nge nyamo lok magi ki laye lawote-ni, laelda miye kare me moko tamme pire kene.​—Rom. 14:1-4.

¹² Twero ducu ma lukwat gitye kwede a ki i Ginacoya. Pi man, pire tek ni guti ki Baibul i yo maber ki diro dok myero gulub gin ma tye iye. Timo meno bikonyogi pe me nywaro twero ma Lubanga ominigi. Ki lok ada,  romi pe gubedo pa luelda dok ngat acel acel ma i kacokke bimiyo lagam bot Jehovah gin ki Yecu ma lubbe ki tam ma gumoko.​—Gal. 6:5, 7, 8.

13, 14. I kabedo macalo mene ma laelda myero onyut iye lanen maber bot romi?

¹³ I nge miyo tira bot luelda me kacokke ni ‘pe gulo dano ma giketo i cinggi ki tek,’ lakwena Petero ocuko cwinygi ni ‘gubed lanen maber bot romi.’ (1 Pet. 5:3) Laelda moni twero bedo lanen maber bot romi nining? Tam kong i kom kit mabeco aryo ma omego moni myero obed kwede wek en oti macalo laelda. En myero obed ki ‘wic makwiri’ dok bene “obed ngat ma loyo ode maber.” Ka laelda moni tye lawi ot, en myero onen ni etero jo me ode i yo maber, pien “ka ce dano pe loyo ode kikome maber, ci en twero gwoko jo muye Lubanga nining?” (1 Tem. 3:1, 2, 4, 5) Wek omego moni oti macalo laelda, en myero obed ki wic makwiri, ma te lokke ni en myero oniang cik ma igi lac me Baibul dok oketgi i tic. En bedo ma cwinye opye mot dok pe rune ka moko tam. Ka luelda gitye ki kodi kit magi, ci man weko jo me kacokke giketo gengi i komgi.

¹⁴ Telo wi lutit kwena i ticwa me pwony-nyi obedo yo mukene ma luelda ginyuto kwede lanen maber bot Lukricitayo luwotgi. Ma lubbe ki meno, Yecu oweko lanen maber adada bot luelda. Tito kwena maber me Ker-ri obedo but tic ma pire tek ma Yecu obedo ka timone i kare ma tye i lobo. Onyuto ki lupwonyene kit ma myero kitim kwede tic man. (Mar. 1:38; Luka 8:1) I kare-ni, lutit kwena ginongo cuko cwiny adada ka luelda gitiyo kacel kwedgi i ticwa me pwony. Man weko lutit kwena gineno mit kom ma luelda gitye kwede i tic man ma laro kwo pa dano-ni, ki dok gilubo diro ma luelda gitiyo kwede i pwonygi. Ka luelda gicwalo cawagi kacel ki kerogi i tito kwena maber-ri kadi bed ni ticgi pol, man cuko cwiny omege ki lumege me tiyo ticwa me pwony-nyi ki mit kom. Luelda bene giweko lanen maber pi omegigi ka giyubbe pi cokke kun bene gimiyo lagam maber, ki bene ka gitiyo tic mukene calo roco ki dok gwoko lengo me Ot me Ker.​—Ep. 5:15, 16; kwan Jo Ibru 13:7.

15. Pingo luelda gicito i limo me kwat?

¹⁵ Lakwat maber pe galle me konyo romo moni ka owanne nyo kome lit. I yo acel-li bene, luelda myero gumi kony oyotoyot bot Lakricitayo ma tye i peko nyo kome lit i yo me cwiny.  Jo ma guteggi ki ma komgi lit gimito ni kikonygi ki jami ma mitte me kom, ento tutwalle gimito kony i yo me cwiny ki dok bene cuko cwiny. (1 Tec. 5:14) Oromo bedo ni jo matino me kacokke gitye ka rwatte ki pekki mapat pat calo lweny ki ‘miti me bulu.’ (2 Tem. 2:22) Pi meno, bedo lakwat kwako limo Lukricitayo kare ki kare. I limo magi, gin gitemme me niang pekki ma omegigi ki lumegigi gitye ka wok ki iye ki dok bene gicuko cwinygi kun gitiyo ki Ginacoya. Ka luelda gitimo man oyotoyot, giromo cobo pekki mapol ma peya onya odoko rac.

16. Ka Lakricitayo mo mito kony i yo me cwiny, kony ango ma luelda gitwero miyone?

¹⁶ Ka omego mo i kacokke tye i peko madit ma oketo watte ki Jehovah ka ma ding kono? Yakobo ocoyo ni: “Tye ngat mo i kinwu ma kome lit? Myero en olwong ludongo me lwak pa Lubanga, wek guleg Lubanga pire kun giwire ki moo i nying Rwot [Jehovah]. Lega ma niye tye iye bicango latwo, Rwot [Jehovah] bitinge malo; ka ce onongo yam otimo bal mo, ci gibitime iye kica.” (Yak. 5:14, 15) Kadi bed ni ngat ma kome lit i yo me cwiny pe ‘olwongo ludongo,’ ento ka guniang pekone, omyero gukonye oyotoyot. Ka luelda gilego kacel ki omegigi kun bene gikonyogi i kare ma kwo tek, gin ginyuto ni gitye lukwat maber ma gicuko cwiny utmegigi me medde ki tic pi Lubanga ki yomcwiny.​—Kwan Icaya 32:1, 2.

17. Adwogi ango ma bino ka luelda gilubo lanen pa “lakwat madit”?

¹⁷ I jami ducu ma luelda gitimo i dul pa Jehovah, gin gilubo lanen pa “lakwat madit,” Yecu Kricito. Co magi gikonyo romi me dongo i yo me cwiny ki dok me tic pi Lubanga ki gen. Pi jami magi ducu, cwinywa yom dok wapako Lakwatwa madit loyo, Jehovah.