1, 2. (a) Ke a hyɛ tohi a nɔ saminya a, mɛni jeɔ mi kɛ baa? (b) Mɛni heje nɛ nihi fuu nɛ a hi si ngɛ Yesu be ɔ mi ɔ ngɛ kaa tohi nɛ a be hyɛli ɔ?

KE TO HYƐLƆ ko hyɛ e tohi a nɔ saminya a, to ɔmɛ waa nɛ a plɔkeɔ. A tsɔɔ ngɛ to lɛmi he womi ko mi kaa, “ke nɔ́ nɛ to hyɛlɔ ko peeɔ kɛkɛ ji kaa e ngɔɔ e to ɔmɛ kɛ yaa nɛ a ya yeɔ ní kɛkɛ se e hyɛ we a nɔ saminya a, e be kɛe nɛ hiɔ maa sɛ to ɔmɛ a kpɛti, nɛ e be e to ɔmɛ a he se náe.” Se ke a hyɛ tohi a nɔ saminya a, a hiɔ he wami.

² Jã kɛ̃ nɛ ke asafo mi nikɔtɔmahi hyɛ to ɔmɛ nɛ Yehowa ngɔ kɛ wo a dɛ ɔ eko tsuaa eko nɔ saminya a, asafo mluku ɔ tsuo náa he se. Eko ɔ, o ma kai kaa benɛ Yesu na nimli asafo ɔ, “e mi mi sã lɛ ngɛ ni ɔmɛ a he, ejakaa pɔ tɔ mɛ, nɛ a dɛ yaa kaa tohi nɛ be hyɛlɔ.” (Mat. 9:36) Mɛni heje nɛ a ní pee mɔbɔ ɔ? Ejakaa nihi nɛ e sa kaa a tsɔɔ ni ɔmɛ Mawu Mlaa a, a yi mi wa, a suɔ kaa a ná ni ɔmɛ a he se, nɛ a peeɔ osato. Nihi nɛ e sa kaa a tsɔɔ Israelbi ɔmɛ Mawu he ní ɔ je we suɔmi kpo kɛ ha we ni ɔmɛ nɛ a hyɛ we a nɔ saminya, mohu ɔ, a ha nɛ ni ɔmɛ naa Yehowa jami kaa e ji “tlomi” ko nɛ mi jiɔ.—Mat. 23:4.

3. Mɛni e sa kaa asafo mi nikɔtɔma amɛ nɛ a kai, be mi nɛ a ngɛ Mawu to ɔmɛ a nɔ hyɛe ɔ?

³ Mwɔnɛ ɔ, to hyɛli ɔmɛ ji asafo mi nikɔtɔma amɛ ɔ nɛ. A ngɛ blɔ nya nítsumi ko nɛ mi jiɔ wawɛɛ nitsɛ. A ngɛ Yehowa kɛ Yesu a tohi a nɔ hyɛe. To nɛ ɔmɛ a he jua wa ha Yesu nɛ ji “to hyɛlɔ kpakpa” a. (Yoh. 10:11) Yesu ngɔ lɛ nitsɛ e ‘muɔ nɛ he jua wa’ a kɛ ‘he mɛ.’ (1 Kor. 6:20; 1 Pet. 1:18, 19) Yesu suɔ to ɔmɛ hluu po kaa e je e tsui mi nɛ e gbo ngɛ a he. E sa nɛ asafo mi nikɔtɔma amɛ nɛ a kai kaa a ngɛ ní tsue ngɛ Yesu Kristo nɛ ji to “hyɛlɔ ngua a” sisi. Enɛ ɔ he ɔ, mɛ hu a piɛɛ nihi nɛ Yesu ngɛ a nɔ hyɛe ɔ a he.—Heb. 13:20.

4. Mɛni he wa ma susu ngɛ munyu nɛ wa ngɛ kasee nɛ ɔ mi?

 ⁴ Ke jã a, lɛɛ kɛ e sa nɛ asafo mi nikɔtɔmahi nɛ a hyɛ to ɔmɛ a nɔ ha kɛɛ? A wo nihi nɛ a ngɛ asafo ɔ mi ɔ he wami kaa a bu a “hɛ mi nyɛɛli ɔmɛ tue.” Nɛ a wo asafo mi nikɔtɔma amɛ hu he wami kaa ‘a ko ye to kuu ɔ nɔ.’ (Heb. 13:17; kane 1 Petro 5:2, 3.) Lɛɛ mɛni blɔ nɔ asafo mi nikɔtɔmahi maa gu kɛ hyɛ to kuu ɔ nɔ nɛ a be a nɔ yee mɔ? Aloo ngɛ blɔ ko nɔ ɔ, kɛ asafo mi nikɔtɔmahi ma plɛ kɛ hyɛ to ɔmɛ a nɔ ha kɛɛ, nɛ a be he blɔ nɛ Mawu kɛ ha mɛ ɔ ngɔe kɛ tsu ní ngɛ blɔ nɛ sɛ nɔ?

5. Mɛni nɛ nɔ́ hetomi nɔ́ nɛ a kɛ tsu ní ngɛ Yesaya 40:11 ɔ tsɔɔ wɔ ngɛ Yehowa he?

⁵ Gbalɔ Yesaya de kɛ kɔ Yehowa he ke: “E maa lɛ e to kuu ɔ kaa to hyɛlɔ kpakpa; e maa bua e to bi ɔmɛ a nya, nɛ e maa hɛɛ mɛ ngɛ e bɔkɔ mi; to nyɛ ɔmɛ hu e ma tsɔ̃ mɛ blɛuu.” (Yes. 40:11) Nɔ́ hetomi nɔ́ nɛ ɔ tsɔɔ kaa Yehowa susuɔ nihi nɛ a ngɛ asafo ɔ mi nɛ a gbɔjɔ nɛ a hemi kɛ yemi mi wɛ ɔ a he, nɛ e tsuɔ a hiami níhi a he ní ha mɛ. Kaa bɔnɛ to hyɛlɔ hɛ hiɔ e to ɔmɛ hiami níhi a nɔ nɛ e tsuɔ he ní ha mɛ ɔ, jã kɛ̃ nɛ Yehowa le nihi nɛ a ngɛ asafo ɔ mi ɔ a hiami níhi nɛ e bua jɔ he kaa e ma tsu he ní ha mɛ. Kaa bɔnɛ to hyɛlɔ woɔ to bi nɛ a fɔ lɛ ehe ngɛ e kɔni bɔkɔ mi keji e he hia kaa e pee jã a, jã nɔuu nɛ ke waa kɛ haomihi nɛ a mi wa kpe ɔ, Yehowa nɛ ji “Tsɛ mɔbɔ nalɔ” ɔ yeɔ bua wɔ.—2 Kor. 1:3, 4.

6. Mɛni blɔ nɔ asafo mi nɔkɔtɔma ko ma nyɛ maa kase nɔ hyɛmi nɔ́ nɛ Yehowa pee ɔ ngɛ?

⁶ Ke nɔ ko ji asafo mi nɔkɔtɔma a, e ma nyɛ maa kase wa hiɔwe Tsɛ ɔ! E sa nɛ e tsu asafo mi bimɛ ɔmɛ a hiami níhi a he ní ha mɛ saminya kaa bɔnɛ Yehowa peeɔ ɔ. Ke asafo mi nɔkɔtɔma ko le nyagbahi nɛ asafo mi bimɛ ɔmɛ kɛ ngɛ kpee ɔ, e maa le bɔnɛ e ma plɛ kɛ wo mɛ he wami ha. (Abɛ 27:23) Enɛ ɔ tsɔɔ kaa e sa nɛ e ná deka kɛ ha asafo mi bimɛ ɔmɛ, nɛ e kɛ mɛ nɛ sɛɛ ní, nɛ e bu mɛ tue. E ngɛ mi kaa e sɛ nɛ asafo mi nikɔtɔmahi nɛ a ngɔ a he kɛ wo nihi a kɔkɔɔ mi sanehi a mi mohu lɛɛ, se ke a na kaa nɔ́ ko ngɛ nɔ yae ngɛ asafo ɔ mi aloo a nu nɔ́ ko ɔ, e sɛ nɛ a ma a hɛ ngɔ fɔ nɔ. E sa nɛ a je suɔmi mi nɛ a ‘ye bua nihi nɛ a gbɔjɔ ɔ.’—Níts. 20:35; 1 Tes. 4:11.

7. (a) Kɛ to hyɛli nɛ a hi si ngɛ Ezekiel kɛ Yeremiamɛ a be ɔ mi ɔ kɛ Mawu to ɔmɛ hi si ha kɛɛ? (b) Mɛni wa ma nyɛ maa kase ngɛ fɔ nɛ Yehowa bu to hyɛli nɛ a yi anɔkuale ɔ mi?

⁷ Mo susu su nɛ to hyɛli komɛ nɛ Mawu bu mɛ fɔ ɔ je kpo ɔ he nɛ o hyɛ. Ngɛ Ezekiel kɛ Yeremiamɛ a be ɔ mi ɔ, Yehowa bu nihi nɛ jinɛ e sa kaa a hyɛ e to ɔmɛ a nɔ saminya, se a pee we jã a fɔ. Ke nɔ ko hyɛ we e tohi a nɔ ɔ, lohwe awi yeli sɛɛ to kuu ɔ mi nɛ e gbɛɛ mɛ kɛ fĩaa. To hyɛli ɔmɛ lɛ́ to ɔmɛ, mohu ɔ, a ngɛ “mɛ nitsɛmɛ a he lɛe.” (Eze. 34:7-10; Yer. 23:1) Mawu bu jami nya dali nɛ a ngɛ jamihi nɛ a tsɛɛ a he ke Kristofoli ɔ mi ɔ fɔ ngɛ yi mi tomi nɛ ɔ nɔuu he. Mɛni asafo mi nikɔtɔmahi ma nyɛ maa kase ngɛ fɔ nɛ Yehowa bu to hyɛli nɛ a yi anɔkuale ɔ mi? E sa nɛ a je suɔmi mi nɛ a hyɛ Yehowa to kuu ɔ nɔ saminya.

8. Ke asafo mi nikɔtɔmahi ngɛ a nyɛmimɛ ga woe ngɛ su yaya ko he ɔ, mɛni a ma nyɛ maa kase ngɛ Yesu he?

⁸ Akɛnɛ wa yi mluku heje ɔ, eko ɔ, Yehowa to ɔmɛ ekomɛ be nɔ́ nɛ Mawu ngɛ hlae kaa a pee ɔ sisi nue mla. Eko ɔ, jamɛatsɛmɛ ɔmɛ be Baiblo sisi tomi mlaahi a nɔ dae kɛ mwɔ a yi kpɔ. Aloo eko ɔ, bɔnɛ a maa pee a ní ha a maa tsɔɔ kaa a ji Kristofoli nɛ a wɛ ngɛ mumi mi. Ke e ba jã a, kɛ e sa kaa asafo mi nikɔtɔma  amɛ nɛ a pee a ní ha kɛɛ? E sa nɛ asafo mi nikɔtɔma amɛ nɛ a kase bɔnɛ Yesu to e tsui si kɛ ha e kaseli ɔmɛ ha a. Yesu kaseli ɔmɛ sã nya si abɔ ngɛ nɔ nɛ ji nɔmlɔ ngua pe kulaa ngɛ Matsɛ Yemi ɔ mi ɔ he. Yesu mi mi fu we mɛ, mohu ɔ, e je suɔmi mi nɛ e ya nɔ tsɔɔ e kaseli ɔmɛ kaa e sa nɛ a ba a he si. (Luka 9:46-48; 22:24-27) Yesu fɔ a nanehi a he ha mɛ kɛ tsɔɔ mɛ nɔ́ nɛ ji he si bami. Mwɔnɛ ɔ, e sa nɛ asafo mi nikɔtɔmahi hu nɛ a ba a he si.—Kane Yohane 13:12-15; 1 Pet. 2:21.

9. Mɛni su nɛ Yesu tsɔɔ e kaseli ɔmɛ kaa a kase?

⁹ E slo bɔnɛ Yesu buɔ to hyɛmi nítsumi ɔ ha ngɛ bɔnɛ Yakobo kɛ Yohane buɔ lɛ ha a he. Yakobo kɛ Yohane suɔ nɛ a ná blɔ nya ngua ngɛ Matsɛ Yemi ɔ mi. Se Yesu dla a juɛmi nɛ e de mɛ ke: “Nyɛ le bɔnɛ maje li ɔmɛ a nɔ yeli ɔmɛ yeɔ a nɔ ha. Nyɛ le bɔnɛ a ganɔ ɔmɛ yeɔ a nɔ kɛ he wami. Nyɛɛ lɛɛ e ko ba jã ngɛ nyɛ kpɛti; nɔ tsuaa nɔ nɛ maa suɔ kaa e pee nɔmlɔ ngua ngɛ nyɛ kpɛti ɔ, lɛ mohu e plɛ nyɛ sɔmɔlɔ.” (Mat. 20:25, 26) E he hia nɛ bɔfo ɔmɛ nɛ a hyɛ nɛ hi konɛ a ko ‘ye a nyɛmimɛ ɔmɛ a nɔ’ aloo ‘a hi mɛ nɔ́ nɛ e sa kaa a pee dee be tsuaa be.’

10. Kɛ Yesu suɔ kaa asafo mi nikɔtɔmahi nɛ a kɛ to ɔmɛ nɛ hi si ha kɛɛ, nɛ mɛni nɔ hyɛmi nɔ́ kpakpa Paulo pee ngɛ enɛ ɔ blɔ fa mi?

¹⁰ Yesu ngɛ blɔ hyɛe kaa asafo mi nikɔtɔmahi maa hyɛ to kuu ɔ nɔ jã kɛ̃. E sa nɛ a je a tsui mi nɛ a sɔmɔ a nyɛmimɛ ɔmɛ, se pi kaa a maa ye a nɔ nyɔmtsɛmɛ. Bɔfo Paulo ba e he si jã nɛ e de asafo mi nikɔtɔmahi nɛ a hi Efeso ɔ ke: “Nyɛ nitsɛmɛ nyɛ le bɔnɛ i kɛ nyɛ hi si be nɛ be ɔ tsuo, kɛ je kekleekle ligbi nɛ i ba Asia a. I ba ye he si saminya kɛ sɔmɔ Nyɔmtsɛ ɔ.” Bɔfo Paulo suɔ nɛ asafo mi nikɔtɔmahi nɛ a ngɛ Efeso ɔ nɛ a je a tsui mi nɛ a ba a he si kɛ sɔmɔ nihi. E de mɛ ke: “I ngɔ ní nɛ ɔmɛ tsuo kɛ to nyɛ okadi kaa jã nɛ e sa kaa a tsu ní nɛ a kɛ ye bua nihi nɛ be he wami ɔ.” (Níts. 20:18, 19, 35) Paulo de Korintobi ɔmɛ ke, e kudɔɔ we a hemi kɛ yemi ɔ. Se mohu ɔ, e kɛ mɛ tsu ní konɛ a ná bua jɔmi. (2 Kor. 1:24) Paulo pee he si bami he nɔ hyɛmi nɔ́ kɛ ha asafo mi nikɔtɔmahi nɛ a ngɛ mwɔnɛ ɔ.

11, 12. Mɛni blɔ nɔ asafo mi nɔkɔtɔma ko ma nyɛ maa gu kɛ ye bua e nyɛmi Odasefono ko konɛ e mwɔ e yi mi kpɔ?

¹¹ Ke asafo mi nɔkɔtɔma ko maa wo nɔ ko ga a, e sa nɛ e da Baiblo ɔ mi “anɔkuale” ɔ nɔ kɛ pee jã. (Tito 1:9) Se e sa kaa e ‘to e tsui si blɛuu kɛ pee enɛ ɔ.’ (Gal. 6:1) E sɛ nɛ to hyɛlɔ kpakpa nɛ nyɛ asafo mi bimɛ ɔmɛ a nɔ konɛ a pee nɔ́ ko, mohu ɔ, e sa nɛ e ye bua mɛ konɛ mɛ nitsɛmɛ nɛ a je suɔmi mi nɛ a da Ngmami ɔ nɔ kɛ mwɔ a yi mi kpɔ. Kaa nɔ hyɛmi nɔ́ ɔ, eko ɔ, asafo mi nɔkɔtɔma ko kɛ nyɛmi ko nɛ e suɔ kaa e mwɔ e yi mi kpɔ ngɛ nɔ́ ko nɛ he hia he ɔ ma susu Baiblo sisi tomi mlaahi a he aloo nɔ́ ko nɛ a ngma ngɛ asafo ɔ womi ko mi ɔ he. Eko ɔ, asafo mi nɔkɔtɔma a maa wo nyɛmi ɔ he wami konɛ e susu bɔnɛ yi mi kpɔ nɛ e maa mwɔ ɔ maa sa huɛ bɔmi nɛ ngɛ e kɛ Yehowa a kpɛti ɔ he ha a he. Asafo mi nɔkɔtɔma a ma nyɛ ma kai nyɛmi ɔ kaa e he hia nɛ e sɔle kɛ bi Yehowa blɔ tsɔɔmi loko e ma e juɛmi nya si. (Abɛ 3:5, 6) Ke asafo mi nɔkɔtɔma kɛ nyɛmi ɔ susu níhi a he ta a, e maa ngmɛ nyɛmi ɔ blɔ konɛ lɛ nitsɛ e mwɔ e yi mi kpɔ.—Rom. 14:1-4.

¹² Ngmami ɔ lɛ tsɔɔ he blɔ nɛ asafo mi nikɔtɔmahi ngɛ. Enɛ ɔ he ɔ, e he hia nɛ a kɛ Baiblo ɔ nɛ tsu ní ngɛ he bemi mi, konɛ a kɛ Baiblo blɔ tsɔɔmi nɛ tsu ní be tsuaa be. Ke asafo mi nikɔtɔmahi peeɔ  jã a, lɔɔ ma ye bua mɛ nɛ a be blɔ nya nɛ a ngɛ ɔ ngɔe kɛ tsu ní ngɛ blɔ nɛ sɛ nɔ. Ngɛ anɔkuale mi ɔ, pi mɛ nitsɛmɛ a tohi a nɔ nɛ a ngɛ hyɛe. Nyagbenyagbe ɔ, nɔ tsuaa nɔ nɛ ngɛ asafo ɔ mi maa bu akɔtaa kɛ ha Yehowa kɛ Yesu ngɛ yi mi kpɔhi nɛ e mwɔ ɔ he.—Gal. 6:5, 7, 8.

13, 14. Mɛni blɔhi a nɔ asafo mi nikɔtɔmahi ma nyɛ maa pee nɔ hyɛmi nɔ́ kpakpa kɛ ha to ɔmɛ ngɛ?

¹³ Benɛ bɔfo Petro wo asafo mi nikɔtɔma amɛ ga kaa a ko ‘ye nihi nɛ Mawu ngɔ ha mɛ ɔ a nɔ’ ɔ se ɔ, e wo mɛ he wami kaa, ‘a ngɔ a he ngɔ pee nɔ hyɛmi nɔ́ ngɔ ha Mawu asafo ɔ.’ (1 Pet. 5:3) Mɛni blɔ nɔ asafo mi nɔkɔtɔma ko ma nyɛ maa ngɔ e he ngɔ pee nɔ hyɛmi nɔ́ kɛ ha to kuu ɔ? Mo susu ní enyɔ komɛ nɛ e sa kaa nyumu ko nɛ e su he loko e sɔmɔ kaa asafo mi nɔkɔtɔma a he nɛ o hyɛ. E he hia nɛ e “hɛ mi nɛ ka si,” nɛ ‘e hyɛ lɛ nitsɛ e we nɔ saminya.’ Ke asafo mi nɔkɔtɔma ko ngɛ weku ɔ, e sa nɛ e hyɛ weku ɔ nɔ saminya, ejakaa “ke nɔ ko nyɛ we nɛ e hyɛ lɛ nitsɛ e we nɔ ɔ, kɛ e maa pee kɛɛ nɛ e ma nyɛ hyɛ Mawu asafo ɔ nɔ.” (1 Tim. 3:1, 2, 4, 5) Loko nɔ ko he maa su konɛ e sɔmɔ kaa asafo mi nɔkɔtɔma a, e sa nɛ e hɛ mi nɛ ka si. E sa nɛ e le Mawu sisi tomi mlaa amɛ kɛ bɔnɛ a kɛ tsuɔ ní ha. E sa nɛ e juɛmi mi nɛ tsɔ nɛ e he nɛ ko sɔ kɛ bu nihi fɔ. Ke nyɛmimɛ nɛ a ngɛ asafo ɔ mi ɔ na su nɛ ɔmɛ ngɛ asafo mi nikɔtɔma amɛ a he ɔ, a náa hɛ kɛ nɔ fɔmi ngɛ a mi.

¹⁴ Jehanɛ se hu ɔ, asafo mi nikɔtɔma amɛ peeɔ nɔ hyɛmi nɔ́ kpakpa kɛ haa nyɛmimɛ ɔmɛ nɛ a nyɛɛɔ fiɛɛmi nítsumi ɔ hɛ mi. Yesu pee enɛ ɔ he nɔ hyɛmi nɔ́. Benɛ Yesu ngɛ zugba a nɔ ɔ, Matsɛ Yemi ɔ he sane kpakpa fiɛɛmi nítsumi ɔ ji nítsumi titli nɛ e tsu. E tsɔɔ e kaseli ɔmɛ bɔnɛ e sa kaa a tsu fiɛɛmi nítsumi ɔ ha. (Mar. 1:38; Luka 8:1) Mwɔnɛ ɔ, ke fiɛɛli kɛ asafo mi nikɔtɔmahi nyɛɛ kɛ ya fiɛɛmi ɔ, a bua jɔɔ wawɛɛ. A naa kã nɛ nikɔtɔma amɛ kɛ tsuɔ nítsumi nɛ e he hia nɛ ɔ, nɛ a nyɛɔ kaseɔ bɔnɛ a tsɔɔ ní ha. Jehanɛ se hu ɔ, asafo mi nikɔtɔmahi ma nyɛ maa pee nɔ hyɛmi nɔ́ kpakpa kɛ ha nyɛmimɛ ɔmɛ keji a dlaa a he loko a yaa asafo mi kpehi, nɛ ke a ya hu ɔ, a haa sanehi a heto, nɛ a dlaa Matsɛ Yemi Asa nɔ kɛ e he.—Efe. 5:15, 16; kane Hebribi 13:7.

15. Mɛni heje nɛ asafo mi nikɔtɔma amɛ ya slaa nyɛmimɛ nɛ a woɔ mɛ he wami ɔ?

¹⁵ To hyɛlɔ kpakpa yeɔ bua e to ɔmɛ amlɔ nɔuu ke e na kaa eko plaa. Jã kɛ̃ nɛ e sa kaa asafo mi nikɔtɔmahi hu nɛ a ye bua asafo mi bimɛ amlɔ nɔuu ke a na kaa a ngɛ nɔ́ nae aloo e he hia nɛ a wo mɛ ga loo a wo mɛ he wami. Eko ɔ, e he maa hia nɛ a tsu nihi nɛ a bwɔ kɛ nihi nɛ be he wami ɔ a helo nya hiami níhi a he  ní ha mɛ mohu lɛɛ, se nɔ́ titli nɛ e he hia kaa a pee ha jamɛatsɛmɛ ɔmɛ ji, nɛ a ma tsu a Mawu jami mi hiami níhi a he ní ha mɛ. (1 Tes. 5:14) Eko ɔ, nihewi kɛ yihewi nɛ a ngɛ asafo ɔ mi ɔ kɛ haomihi nɛ kɔɔ “akɔnɔ yaya” he ɔ ngɛ kpee. (2 Tim. 2:22) Asafo mi nikɔtɔmahi yeɔ bua nihi nɛ ngɛ asafo ɔ mi ɔ kɛ guu slaami nɛ a ya slaa mɛ nɛ a woɔ mɛ he wami ɔ nɔ. Ke a ya slaa mɛ ɔ, a bɔɔ mɔde konɛ a le haomihi nɛ a kɛ ngɛ kpee, nɛ a daa Baiblo ɔ nɔ kɛ woɔ mɛ he wami. Ke asafo mi nikɔtɔmahi kɛ oya yemi tsuɔ nyɛmimɛ ɔmɛ a hiami níhi a he ní ha mɛ ɔ, lɔɔ be hae nɛ nyɛmimɛ ɔmɛ maa sɛ haomi nguahi a mi.

16. Ke asafo ɔ mi nɔ ko hia Mawu jami mi yemi kɛ buami ɔ, mɛni asafo mi nikɔtɔma amɛ ma nyɛ maa pee?

¹⁶ Nɛ ke asafo ɔ mi nɔ ko kɛ haomi ko nɛ mi wa kpe nɛ ma nyɛ ma puɛ huɛ bɔmi nɛ ngɛ e kɛ Yehowa a kpɛti ɔ hu nɛɛ? Kaselɔ Yakobo ngma ke: “Ke nyɛ ti nɔ ko be he wami ɔ, e ha nɛ a tsɛ asafo ɔ mi nikɔtɔma amɛ kɛ ba; a sɔle ha lɛ, nɛ a pɔ lɛ nu ngɛ Nyɔmtsɛ ɔ biɛ mi. Ke a sɔle kɛ hemi kɛ yemi ha lɛ kikɛ nɛ ɔ, hiɔtsɛ ɔ ma na he wami. Nyɔmtsɛ ɔ ma tsa lɛ kulaa, nɛ e maa ngɔ yayami tsuo nɛ ngɛ hiɔtsɛ ɔ he ɔ kɛ pa lɛ.” (Yak. 5:14, 15) Ke hiɔtsɛ ɔ tsɛ we ‘asafo mi nikɔtɔma amɛ’ po nɛ asafo mi nikɔtɔma amɛ nu nɔ́ ko ɔ, e sa nɛ a kɛ oya yemi nɛ ya ye bua nɔ ɔ. Ke asafo mi nikɔtɔma amɛ kɛ nɔ ɔ bla kɛ sɔle, nɛ a sɔle kɛ ha nɔ ɔ nɛ a ye bua lɛ ngɛ be nɛ mi wa nɛ ɔ mi ɔ, lɔɔ tsɔɔ kaa a ji to hyɛli kpakpahi nɛ a woɔ nyɛmimɛ ɔmɛ he wami konɛ a ya nɔ nɛ a sɔmɔ Yehowa.—Kane Yesaya 32:1, 2.

17. Ke asafo mi nikɔtɔmahi kase “to hyɛlɔ ngua” a, mɛni ma nyɛ maa je mi kɛ ba?

¹⁷ Asafo mi nikɔtɔmahi bɔɔ mɔde nɛ a kaseɔ “to hyɛlɔ ngua” a nɛ ji Yesu Kristo ɔ ngɛ nɔ́ tsuaa nɔ́ nɛ a peeɔ ɔ mi. Akɛnɛ asafo mi nikɔtɔma amɛ yeɔ bua to kuu ɔ heje ɔ, to kuu ɔ náa he se nɛ a yaa nɔ nɛ a kɛ anɔkuale yemi sɔmɔɔ Yehowa. Wa naa wa nɔ hyɛli nɛ a ngɛ suɔmi ɔ, kɛ Yehowa nɛ ji To Hyɛlɔ ngua a si.