1, 2. a) Ka asuseredubei dan le téniwa lan houn mudún buidu? b) Lidan lidaani Hesusu, ka meha uagu ítara haña lubéi saragu gürigia kei mudún móuniritiña?

BUITI haweinamudun mudún dan le teni lan hóuniri houn buidu. Según aban líburu to ayanuhaboun luagu hagüriahóun mudún, “anhein barürügü lubaliña aban wügüri mudún eiga ani meteniti houn buidu, háfuga lidan fiú irumu ábame líchugun fe sandi hamá saragu hádangiñe ani siñahalime lasagarun ni kata hádangiñe”. Gama lumoun, masuseredunti ítara dan le téniwa lan houn buidu.

² Ítarameme, lun buidu lan hamadagua lílana damuriguaü luma Bungiu, mosu hetenirun wéiyaaña lidan afiñeni lun kada aban hádangiñe. Mabulieida huméi gudemehabuti lan meha Hesusu houn gürigia ha ítarabaña “kamá mudún ha móuniritiña” (Mat. 9:36). Ka meha uagu ítara lubéi gádantiña? Ladüga ha meha gánibalin buligasion lun harufudahani Lúrudu houn gürigia biánguati meha hagibu, magudemehabutiña ani héreti hafosuruniña gürigia. Lubaragiñe híderaguniña mudún ha lábugiñebaña haríaahan, rúrügütiña lábutigu relihión ha ísüraelina “anügüni hǘrüti” hanagawagun (Mat. 23:4).

3. Ka lunbei haritaguni wéiyaaña lidan afiñeni lidan añahan lan agunfulirei hawadigimari keisi hóuniri lumutuniña Bungiu?

³ Wéiyaaña lidan afiñeni ha lídanbaña wadaani wéiriti hani buligasion. Mudún ha únbaña hetenira lánigu Heowá luma Hesusu, le agúarubei lúniwagua ‘Hóuniri mudún buiti’ (Huan 10:11). “Lau lita” lagañeinhaña, ani séruti ebegi le lafayeirubei (1 Ko. 6:20; 1 Fe. 1:18, 19). Wériti hínsiñe lun darí lun líchuguni libagari hawagu. Lunti haritaguni wéiyaaña lidan afiñeni súnwandan hóuniri hamá mudún ha nadagimeinbaña lábugiñe ladundehan Liráü Bungiu le hínsiñehabubei, Hesukrístu, “hóuniri mudún le wéiritimabei” (Ebü. 13:20).

4. Kaba wariha lidan arütíkulu le?

 ⁴ Ligíati, ida luba hóuseruniña mudún wéiyaaña lidan afiñeni? Amuriahóuati hama lílana damuriguaü lun ‘gaganbadi hamá houn ha arufudahabaña houn’. Luagu le aban oubaü, ariñawagúati houn wéiyaaña lidan afiñeni lun móuserun hamá ‘kamá hamuga haburiña ha lábugiñebaña haríaahan hagía’ (Ebü. 13:17; aliiha huméi 1 Féduru 5:2, 3). Ida lubati hadundehaniña wéiyaaña lidan afiñeni íbirigu ha lábugiñebaña haríaahan sin hóuserun kamá gumadimatiña? Lidan amu dimurei, ida luba hetenirun lun le hemegeirubei mudún sin hayusuruni ubafu wuriba?

5. Ka larufudahabei hénpulu le lídanbei Isaíasi 40:11 woun luagu Heowá?

⁵ Ariñagati meha profeta Isaíasi luagu Heowá: “Liabin kei aban hóuniri mudún le óunigirutiña lánigu; budá lumutiña harahüñü mudún larünarugu, aba lanügüniña laniguagu teni ligía houn ha sun líñabei hemeilihóun” (Isa. 40:11). Hénpulu le arufudati luagu teni lan Heowá houn ha débilibaña lidan damuriguaü lun líchuguni sun hemegeirun houn. Ítara kei subudi lani aban hóuniri mudún ka lan hemegeirubei kada aban hádangiñe mudún ani aranseti lun letenirun houn súngubei, téniti giñe Heowá lun hemegeirun lílana damuriguaü ani ru lumuti le hemegeirubei houn lau sun lugundan. Ani ítara kei lanügüni aban hóuniri mudún lilügün mudún le ñǘraügili laniguagu, Heowá, “Wáguchi le gudemehabubei woun”, líderagubadiwa lidan lidaani lénrengunga. Líchuguba gurasu woun luma erei danme le wagagibudagun luma óuchawaguni le wéiriti o danme le megei wamani lídehan (2 Ko. 1:3, 4).

6. Ida luba gayara lan lasigiruni aban wéiyaali lidan afiñeni lani Heowá hénpulu lidan luadigimari keisi hóuniri mudún lidan damuriguaü?

⁶ Aban óunwenbu hénpulu Wáguchi le siélubei houn wéiyaaña lidan afiñeni uguñe weyu! Ítara kei Heowá, lunti hetenirun lun le gádanbaliña mudún. Ka uagu? Ladüga anhein subudi habalin turóbuli le gádanbaliña mudún luma ka lan hemegeirubei, gayarabei híchuguni gurasu luma ídemuei le hemegeirubei houn (Ari. 27:23). Chóuruti mosu lan hayanuhan wéiyaaña lidan afiñeni hama híbirigu lidan afiñeni. Íbini mádaragun hamá houngua lidoun habagari lílana damuriguaü, beresetiña lau le harihibei luma le haganbubei lidan damuriguaü ani deregeguatiña houngua lun ‘híderaguniña ha aniheinbei hemegeirun’ (Adü. 20:35; 1 Tesa. 4:11).

7. a) Ida liña meha houserúniwa lumutuniña Bungiu lidan lidaani Esekiéli luma Heremíasi? b) Ka hafurendeirubei wéiyaaña lidan afiñeni lídangiñe lasiadiruniña Heowá hóuniri mudún ha múaraguntiña?

⁷ Samina wamá luagu hagaburi hóuniri mudún ha meha awinwandubaña lidan lidaani Esekiéli luma Heremíasi, ha únbaña ladeinha Bungiu ladüga metenirun hamá houn mudún buidu. Kei le mounigirúniwa hamá meha mudún, aba meha héiguadun háhaburugun wuribatiña o aba heferidiragun. Lubaragiñe meha hetenirun houn lau ínsiñeni, ábarüga ‘hóunigiragun hóuniri mudún houngua’ (Ese. 34:7-10; Her. 23:1). Luaguméme katei le lamahada Heowá houn lábutigu relihión mama inarüniti uguñe weyu. Ligíati mosu lubéi hetenirun wéiyaaña lidan afiñeni houn lumutuniña Bungiu lau ínsiñeni.

8. Ida liña líchugun Hesusu aban hénpulu buiti dan le meha mosu lubéi ladügün lun hasansiruni lani disipulugu aban igaburi wuribati?

⁸ Ladüga figóu le hádanbei, háfuga hénrenguti houn fiú lánigu Bungiu mudún hadügüni le lagurabubei hámagiñe. Háfuga masigirun hamá somu adundehani le tídangiñeti Bíbülia o hadügün somu katei le arufuduti lilouguan subudi luagu Bungiu. Ka lunbei hadügüni wéiyaaña lidan afiñeni  lidan kesi burí le? Lunti háyeihani luguraasun Hesusu hama lani disipulugu sagü hasigenehan kaba lan hádangiñe íñutima ubara lidan Larúeihan Bungiu. Lubaragiñe lasafaragun, sigiti Hesusu arufudaha houn ani ru ligía adundehani houn lun ǘnabugu hamá (Luk. 9:46-48; 22:24-27). Lau lachibuni hagudi, arufudaha lumuti houn le mini lubéi ǘnabuguni, aban igaburi le lunti harufuduni sun wéiyaaña lidan afiñeni (aliiha huméi Huan 13:12-15; 1 Fe. 2:21).

9. Ida liña meha ladügün Hesusu lun hasansiruni lani disipulugu hagaburi?

⁹ Ámuti meha ligaburi lisaminan Hesusu luagun luadigimari aban wéiyaali lidan afiñeni luéi igaburi le harufudubei apostolugu Santiagu luma Huan lidan aban ókaasion. Biángubei hagía busentiña meha hibihin aban ubaraü íñuti lidan Larúeihan Bungiu. Gama lumoun, aba lariñagun Hesusu houn: “Keisi hasubudiruni, ha agumadihabaña hadan ha mámabaña huríu arufudaguatiña houngua kamá hamuga haburiña lílana fulasu ligía; hati wéinamubaña hadan, arufuda hamuti habafu. Anhein hidan, mama luba; le abusenruti lun weiri lan hidan, lunti leseriwiduniña híbiri” (Mat. 20:25, 26). Mosu meha háfaagun apostolugu hagidaruni ayumahani lun habusenrun hagumadiruniña hánigu paaná, lun hariñaguni houn kaba lan hadüga.

10. a) Ida liña labusenrun Hesusu lun hóuseruniña wéiyaaña lidan afiñeni íbirigu? b) Ka hénpulu lánina ǘnabuguni lígirubei Pábulu?

¹⁰ Agurabati Hesusu lun hóuseruniña wéiyaaña lidan afiñeni mudún kei meha lóuseruniña. Mosu aranseñu hamá lun heseriwidun houn híbirigu, mama lun iyubudirigu hamá. Arufuda lumuti Pábulu ǘnabuguni ligía, kei larufuduni dimurei le lariñagubei houn wéiyaaña lidan afiñeni Éfesu: “Subudi humuti ida liña lan nigaburi lúmagiñe furumiñeti weyu nachülürün Ásioun. Sun dan le haganaguañadina lubéi, seriwitina lun Bungiu lau ǘnabuguni”. Busenti meha apostolu Pábulu lun híderaguniña wéiyaaña lidan afiñeni hagía híbirigu lau ugundani luma ǘnabuguni. Lárigiñe, aba lariñagun houn: “Súnwandan narufudahan hun luagu ítara liña lan luadigimaríniwa lun híderawagun ha aniheinbei hemegeirun” (Adü. 20:18, 19, 35). Lidan amu ókaasion, abürühati houn kristiánugu korintuna mama lan labureme hafiñen ligía, líderaguarügüñanu lan lun heseriwidun lun Heowá lau ugundani (2 Ko. 1:24). Ítara liña, ígirati Pábulu aban hénpulu buiti lánina ǘnabuguni luma benefaü houn wéiyaaña lidan afiñeni uguñe weyu.

11, 12. Ida liña gayara lan líderaguni aban wéiyaali lidan afiñeni aban íbiri desidírü buidu?

¹¹ “Lunti lárügüdün [wéiyaali lidan afiñeni] luagu uganu inarüniti le arufudahóubei lun lun gayara lan líchugun dǘgüdaguaü houn amu lau arufudahani le richabei” (Titu 1:9). Gama lumoun, mosu ladügüni “lau ínsiñehabuni” (Gal. 6:1). Lubaragiñe lafosurun aban íbiri lun lóuserun lidan somu manera, aban hóuniri mudún le buiti saminati ida luba lan lachülürün tidoun lanigi. Gayarati lariñaguni lun ka lan adundehani tídangiñeti Bíbülia lunbei gabaroun lani danme le desidírü lan somu katei súdiniti, gayarati giñe lakutihan somu ariñahani tídangiñe wani agumeiraguagüdüni luma. Gayarati líderaguni asaminara kaba lan lani le desidírü lubéi efekütu lidan lumadagua luma Heowá. Gayarati giñe layanuhan luma luagu súdini lan lafurieidun lun Bungiu amuriahei ladundehan lubaragiñe desidírü lan (Ari. 3:5, 6). Gama lumoun, lárigiñe lakutihani sun katei burí le luma íbiri ligía, aba lígiruni lun desidírü lani lungua kaba lan ladüga (Rom. 14:1-4).

¹² Bíbüliarügüñoun lúrudu to gayarabei hayusurunu wéiyaaña lidan afiñeni lun híchugun adundehani luma lun harufudahan. Ligía súdini lubéi hasubudiruni ida luba  lan hayusurunu Bíbülia buidu ani lun hasigiruni le tarufudahabei. Ítara, míchugunbaña adundehani le úati tidan Bíbülia. Lau sun luwuyeri, hetenirarügüña houn mudún ha líchugubaña Heowá lábugiñoun haríaahan, ani kada lílana damuriguaü híchuguba fe lun Heowá luma Hesusu luagu le desidírü habéi (Gal. 6:5, 7, 8).

13, 14. Ka burí katei ídanbei lunti lan híchuguni wéiyaaña lidan afiñeni hénpulu houn lílana damuriguaü?

¹³ Lárigiñe lariñagun houn wéiyaaña lidan afiñeni lun ‘móuserun hamá kamá hamuga haburiña ha lábugiñebaña haríaahan hagía’, ínchaha lumutiña apostolu Féduru lun aban hamá “hénpulu buiti houn” (1 Fe. 5:3). Ida liña gayara lan lasigiruni aban wéiyaali lidan afiñeni adundehani le? Akutiha wamá biama lídangiñe katei le lunbei lagunfuliruni sun wügüri le busenti “alidihatibei lan”: lunti “buidu [lan] lichügü”, ani “lunti gayara lániña tílana luban agumadira”. Lun aban lan wéiyaali lidan afiñeni aban gürigia, lunti “buidu [lan] lichügü”, lidan amu dimurei, lunti gunfuranda lani inarüni méiniti le tídanbei Bíbülia buidu, ani wínwanleime lidan libagari. Lunti chu lan lau ani mafuresehan ligíame desidírü sin lasubudiruni lébuna katei. Ani anhein gafamilian lubéi, mosu aban lan buiti ichügüdinaü, lugundun “anhein magumadirún lubaliña wügüri tílana luban, ida lubagia gayara lan larihin hau tílana liligilisin Bungiu?” (1 Tim. 3:1, 2, 4, 5). Afiñetiña lílana damuriguaü hawagu wéiyaaña lidan afiñeni dan le harihini igaburi burí le hawagu.

¹⁴ Apurichihani ligía ábanya katei le ídanbei lunti lan híchuguni wéiyaaña lidan afiñeni hénpulu. Ru lumuti meha Hesusu hénpulu le houn, lugundun apurichihani meha aban lídangiñe katei le súdinitimabei lidan lani ministeriu ya ubouagu. Arufuda lumuti meha giñe houn lani disipulugu ida luba lan hadügüni wadagimanu le (Mar. 1:38; Luk. 8:1). Uguñe weyu, gúndaatiña íbirigu dan le hapurichihan hama wéiyaaña lidan afiñeni, dan le harihini ubebeni le harufudubei lidan wadagimanu esefuhati ibagari le ani furendei haméi ligaburi harufudahan. Dan le harihini lílana damuriguaü yusu hamani wéiyaaña lidan afiñeni hadaani luma here lidan apurichihani íbini gibe lan haberesegun, súngubei busentiña háyeihaniña. Rútiña giñe wéiyaaña lidan afiñeni aban buiti hénpulu lau haranserun lubá adamuridaguni ani ru hagía óunabagülei lidan, ani ídeha hagía lidan amu burí wadagimanu, kéiburi tarumadahóun luma taransehóun Luban Wadamuridagun (Efe. 5:15, 16; aliiha huméi Ebüréu 13:7).

15. Írida humá fiú resun le uágubei houdin wéiyaaña lidan afiñeni abisidahaña íbirigu.

¹⁵ Aban hóuniri mudún le buiti ídehati lau lóufudagun dan le anuhein lan aban mudún sánditu. Ítarameme, lunti hánhingichun wéiyaaña lidan afiñeni lau lóufudagun dan le lasufuriruña lan somu hádangiñe lílana damuriguaü o dan le megei lan ídemuei  lun lakipuruni lumadagua luma Heowá. Íbirigu ha wéiyougaaña hama ha sándibaña, gayarati hemegeirun ídemuei ladüga gádantiña, gama lumoun mégeitimatiña gurasu luma ídemuei lun hakipuruni hemenigin luagu Bungiu (1 Tesa. 5:14). Ánheinti nibureintiña, gayarati hagagibudagun luma amu burí lénrengunga kéiburi “luriban hayumahan nibureingiña” (2 Tim. 2:22). Ligíati, lidan hounigirúniwa lílana damuriguaü lunti habisidahóun kada átiri dan lun gayara lan gunfuranda hamani wéiyaaña lidan afiñeni ka lan gádanbaliña ani ru hagíame gurasu houn lau haliihan somu bérusu tídangiñeti Bíbülia houn. Dan le laransehóun turóbuli lidan dan, libe-agei dan gayarati laranserúniwa lubaragiñe laweiridagun.

16. Dan le megei lan somu lílana damuriguaü ídemuei lun lakipuruni lumadagua luma Bungiu, ka lunbei hadügüni wéiyaaña lidan afiñeni?

¹⁶ Ánheinti aganwoundagua turóbuli darí lun gayara lan lagadeiruni lumadagua somu íbiri luma Heowá? Abürühati disipulu Santiagu: “Anhein sándiñein lubéi, lunti lagúarun houn [wéiyaaña lidan afiñeni ha lídanbaña damuriguaü] lun hafurieidun luagu, luma lun háhurudaguni lau garaba lidan liri Wabureme. Dánmeti le hafurieidun lau afiñeni, ábame lareidaguagüdüni Bungiu sánditi iñuragualeime; ani anhein giñe afigouhaali lubéi, ferudunawabei lifigoun” (Sant. 5:14, 15). Anhein anihein lubéi somu sánditi lidan damuriguaü ani magúati houn wéiyaaña lidan afiñeni; dan le híchugun fe luagu gádanti, lunti houdin íderaguei. Dan le hafurieidun wéiyaaña lidan afiñeni hama híbirigu ani luagu hafulesein íbirigu hagía, ani íderagua hamaña dan le megei hamaniña, arufudatiña ítara buidu hamá keisi wéiyaaña lidan afiñeni ha etenirubaña buidu houn mudún ha líchugubaña Bungiu lábugiñoun haríaahan (aliiha huméi Isaíasi 32:1, 2).

17. Ka ibihúbei dan le háyeihani wéiyaaña lidan afiñeni “hóuniri mudún le wéiritimabei”?

¹⁷ Áfaaguatiña wéiyaaña lidan afiñeni lun háyeihani “hóuniri mudún le wéiritimabei”, Hesukrístu, lidan sun le hadügübei. Ídemuei le híchugubei wügüriña ha íderagua lumutiña íbirigu saragu ani ídehati giñe lun hawanserun lidan hafiñen. Ínchaha lumutiwa katei le lun walawahani ani ru wagíame seremei lun Heowá, Wóuniri le móubabei.