Berze, imit sa de pli Gran Berze

“Kris limenm in soufer pour zot, an lesan pour zot en legzanp pour zot swiv.”​—1 PYER 2:21.

KI OU POU REPONN?

Konman berze, ki mannyer bann ansyen i kapab imit Zeova?

Ki mannyer bann ansyen i kapab imit Zezi Kri?

Ki lobzektif bann ansyen kan zot al vizit zot bann frer ek ser?

1, 2. (a) Ki arive ler bann mouton i ganny pran byen swen avek? (b) Akoz bokou dimoun dan lepok Zezi ti parey mouton ki napa berze?

BANN mouton i byen ler zot berze i pran byen swen avek zot byennet. Dapre en liv ki koz lo konman pour okip mouton, i eksplike ki “en zonm ki senpleman anmenn son troupo kot i annan zerb e ki pa fatig li plis ki sa, pou tre probab vwar son bann mouton malad oubyen pa pe port byen dan enn de lannen.” Par kont, si zot ganny byen pran swen avek, sa troupo pou an bonn sante.

² Lafason ki bann berze i pran swen avek byennet sak mouton dan troupo Bondye i annan en lefe lo lasante spirityel kongregasyon antye. Kekfwa ou kapab rapel ki Zezi ti pran pitye pour lafoul akoz “zot ti fatige e dekouraze parey bann mouton ki napa berze.” (Mat. 9:36) Akoz zot ti dan en kondisyon parey? Parski bann ki ti annan sa responsabilite pour ansenny Lalwa Bondye ti pe ekspekte tro bokou avek zot, zot ti dir e ipokrit. Olye ede e nouri troupo, bann responsab spirityel Izrael ti pe met bann “fardo lour lo [zot] zepol.”​—Mat. 23:4.

3. Ki bann ansyen dan kongregasyon i devret mazinen ler zot pe desarz zot responsabilite konman berze spirityel?

³ Bann berze konmela, andotmo, bann ansyen ki’n ganny apwente dan kongregasyon i annan en gro responsabilite. Zot pe pran swen avek bann mouton ki pour Zeova ensi ki pour Zezi ki idantifye son lekor konman sa “bon berze.” (Zan 10:11) Sa bann mouton in ganny aste pour en pri ki Zezi ti peye e sa se son “disan presye.” (1 Kor. 6:20; 1 Pyer 1:18, 19) I telman kontan son bann mouton ki i’n volonterman sakrifye son lavi pour zot. Bann ansyen i devret toultan rapel ki zot bann berze ki anba lotorite  sa gran Berze, Zezi Kri, Garson byenneme Bondye.​—Ebr. 13:20.

4. Ki nou pou egzaminen dan sa lartik?

⁴ Ki mannyer bann ansyen dan kongregasyon i devret tret bann mouton? Bann manm kongregasyon i ganny demande pour “obei zot bann dirizan” parmi zot. De lot kote, bann ansyen i ganny demande pour “pa bezwen domin” troupo Bondye. (Ebr. 13:17; lir 1 Pyer 5:2, 3.) Me, ki mannyer bann ansyen i kapab desarz zot responsabilite san domin lo kongregasyon? Andotmo, ki mannyer bann ansyen i kapab pran swen avek bezwen kongregasyon san pran plas Zeova?

“I POU ANMENN ZOT DAN SON LEBRA”

5. Ki sa legzanp dan Izai 40:11 i montre nou lo Zeova?

⁵ Profet Izai ti dir sa konsernan Zeova: “Parey en berze, i pou pran swen avek son troupo. Avek son lanmen, i pou rasanble bann pti mouton ansanm; e i pou anmenn zot dan son lebra. Dousman dousman, i pou montre semen bann ki pe donn tete.” (Iza. 40:11) Atraver sa legzanp, Labib i montre ki Zeova i pran swen avek bann ki pli feb e pli vilnerab dan kongregasyon. Zis parey en berze i konn bezwen sak mouton dan son troupo e i pare pour pran swen avek zot, Zeova osi i konn bezwen sakenn dan kongregasyon e i kontan pour donn sa latansyon ki adapte avek sak mouton. En berze i pran en pti mouton ki fek ne dan son lebra ler i neseser, pareyman Zeova sa “Papa ki ranpli avek labonte” ek tandres pou pran swen avek nou e rekonfort nou ler nou pas dan dir. I pou konmsi nou dan lebra Zeova ler nou fer fas avek bann gro leprev oubyen nou bezwen led spesifik.​—2 Kor. 1:3, 4.

6. Konman en berze spirityel, ki mannyer en ansyen i kapab swiv legzanp Zeova?

⁶ Pa i en leson merveye ki en berze oubyen ansyen dan kongregasyon i kapab aprann avek nou Papa ki dan lesyel! Parey Zeova, en ansyen i bezwen atantif avek bezwen sak mouton. Ler i konpran bann defi ek bezwen spesifik bann manm kongregasyon, en ansyen pou kapab deswit donn sa lankourazman ek sipor apropriye. (Prov. 27:23) Evidaman, en ansyen i bezwen annan en bon kominikasyon avek bann frer ek ser. I pou respekte zot lavi prive, me i pran en lentere senser dan sa ki i trouve oubyen tande dan kongregasyon, e avek lanmour i pare pour fer letan pour “ed bann ki feb.”​—Akt 20:35, NW; 1 Tesa. 4:11.

7. (a) Ki mannyer troupo Bondye ti ganny trete dan lepok Ezekyel ek Zeremi? (b) Ki leson nou kapab tire avek zizman Bondye lo bann berze spirityel enfidel?

⁷ Get latitid bann berze ki Bondye ti kondannen. Dan lepok Ezekyel ek Zeremi, Zeova ti kritik piblikman sa bann ki ti sipoze pe pran swen avek son bann mouton, me ki pa ti pe fer li byen. Ler personn pa ti pe pran swen avek troupo, bann mouton ti ganny atake e zot ti fann fannen. Olye nouri sa bann mouton, sa bann berze ti pe abiz lo zot e “nouri zot prop lekor.” (Ezek. 34:7-10; Zer. 23:1) Sa zizman Bondye lo bann berze Izrael i osi aplik pour bann sef dan bann larelizyon Kretyen. Me i osi montre ki kantite i enportan pour bann ansyen donn troupo Zeova sa latansyon ek lanmour ki zot merite.

“MON’N DONN ZOT EN LEGZANP”

8. Ki mannyer Zezi ti donn en bon legzanp an sa ki konsern koriz bann move latitid?

⁸ Vi ki imen i enparfe, serten mouton Bondye i kapab tarde pour konpran sa  ki Zeova i ekspekte avek zot. Kekfwa zot pa arive met an pratik bann konsey sorti dan Labib oubyen zot kondwit i montre ki zot pa matir spirityelman. Ki bann ansyen pou fer? Zot devret imit pasyans Zezi avek son bann disip, ki ti toultan pe rode lekel parmi zot ki ti pou pli gran dan Rwayonm. Me olye perdi pasyans, Zezi ti kontinyen ansenny son bann disip e avek lanmour donn zot konsey lo lenportans pour demontre limilite. (Lik 9:46-48; 22:24-27) Ler i ti lav zot lipye, zot ti kapab vwar legzanp Zezi lo konman pour demontre limilite, en kalite ki bann sirveyan Kretyen i devret demontre.​—Lir Zan 13:12-15; 1 Pyer 2:21.

9. Ki latitid Zezi ti demann son bann disip pour devlope?

⁹ Lafason ki Zezi ti vwar rol en berze spirityel i diferan avek lafason ki Zak ek Zan ti vwar sa responsabilite o konmansman. Sa de zapot ti pe rod pozisyon dan Rwayonm, me Zezi ti koriz zot latitid an dizan: “Zot konnen ki bann dirizan etranze i kontan fer zot dominer avek zot pep. Zot bann gran dirizan i annan tou pouvwar lo bann ki zot pe dirize. Me pa fer parey zot. Si ou oule vin en gran dimoun, ou devret vin serviter tou lezot.” (Mat. 20:25, 26, Contemporary English Version) Bann zapot ti bezwen reziste sa tandans pour anvi “domin” oubyen “fer zot dominer” avek zot bann frer ek ser.

10. Ki mannyer Zezi i oule bann ansyen i tret kongregasyon e ki legzanp Pol in kite dan sa domenn?

¹⁰ Zezi i ekspekte ki bann ansyen i tret kongregasyon dan menm fason ki li i ti tret kongregasyon. Zot devret pare pour vin serviter lezot e non pa vin zot met. Zapot Pol ti annan sa kalite limilite, akoz dan lavil Efez i ti dir bann ansyen: “Zot konnen konman mon’n pas mon letan ler mon ti avek zot, depi premye zour ki mon ti ariv dan Provens Lazi. Mon’n travay konman Serviter Senyer avek bokou limilite.” Sa zapot ti anvi ki sa bann ansyen i fer bokou zefor pour ed lezot avek limilite. I ti dir: “Dan tou sirkonstans mon’n montre zot ki fodre travay pour kapab ed bann ki pli pov [oubyen “bann ki feb,” NW].” (Akt 20:18, 19, 35) Pol ti dir bann Korentyen ki i pa ti pe domin lo zot lafwa. Plito, i ti travay ansanm avek zot pour zot lazwa. (2 Kor. 1:24) Pol in kit en legzanp limilite ek travay dir pour bann ansyen ozordi.

“RESTE FERM DAN SA MESAZ SIR”

11, 12. Ki mannyer en ansyen i kapab ed en Kretyen pour fer en desizyon?

¹¹ En ansyen dan kongregasyon i devret ‘reste ferm dan sa mesaz sir pour ki i a kapab ansenny lezot,’ andotmo i devret reste atase avek sa parol fidel ki dan Labib. (Tit 1:9) Me, i devret fer li avek “en lespri ladouser.” (Gal. 6:1) Olye esey fors lezot dan kongregasyon pour azir dan en serten fason, en bon berze i mazinen konman pour tous zot leker. En ansyen i kapab met lanfaz lo serten prensip ki en frer i devret mazin lo la ler i annan en desizyon enportan pour fer. I kapab diskit avek li en lartik lo sa size. I kapab ankouraz li pour vwar ki mannyer diferan fason fer keksoz i kapab annan en lefe lo son relasyon avek Zeova. Sa ansyen i osi kapab met lanfaz lo lenportans pour rod gidans Zeova dan lapriyer avan fer en desizyon. (Prov. 3:5, 6) Apre ki i’n diskit sa size avek sa frer oubyen ser, en ansyen pou les li fer son prop desizyon.​—Rom. 14:1-4.

¹² Bann sirveyan Kretyen napa lotorite  lo zot menm, sanmenm zot toultan servi Labib. Pour sa rezon, i vreman enportan ki zot konn byen servi Labib e zot toultan swiv sa ki i dir. Ler zot rapel sa, sa i fer zot pa abiz zot lotorite. Apre tou, zot zis bann berze ki anba lotorite Kris e sak manm kongregasyon pou rann kont avek Zeova ek Zezi pour bann desizyon ki zot fer.​—Gal. 6:5, 7, 8.

EN LEGZANP POUR TROUPO

13, 14. Dan ki laspe, en ansyen i devret en legzanp pour troupo?

¹³ Apre ki i ti’n konsey bann ansyen pour pa “domin lo bann ki’n ganny konfye dan zot responsabilite,” zapot Pyer ti ankouraz zot pour “vin en model pour troupo.” (1 Pyer 5:3) Ki mannyer en ansyen i kapab vin en model oubyen legzanp pour troupo? Get sa de kalite ki en frer i bezwen annan avan i kalifye pour “en fonksyon nob.” I bezwen “rezonnab” e devret konn “diriz son prop lakour.” Si en ansyen i annan en fanmir, i devret diriz zot dan en fason egzanpler akoz “si en dimoun pa konn diriz son prop lakour, ki mannyer i pou kapab pran swen [“kongregasyon,” NW] Bondye?” (1 Tim. 3:1, 2, 4, 5) Pour kalifye pour vin en ansyen, en frer i bezwen rezonnab dan sa sans ki i klerman konpran bann prensip Bondye e i konnen konman pour aplik li dan son lavi. I reste kalm dan bann sityasyon difisil e i pa taye pour ziz bann sityasyon. Kan bann manm kongregasyon i vwar sa bann kalite dan en ansyen, zot pou annan konfyans dan li.

¹⁴ Bann sirveyan Kretyen i devret osi en bon legzanp pour bann frer ek ser dan predikasyon. Dan sa laspe, Zezi in kit en legzanp pour zot. Anons sa bon nouvel Rwayonm ti en laspe enportan minister Zezi lo later. I ti montre son bann disip ki mannyer sa travay i ganny fer. (Mark 1:38; Lik 8:1) Dan nou letan, eski pa i ankourazan pour bann proklanmater pres kot a kot avek bann ansyen, pour vwar devouman sa ansyen dan sa travay ki sov lavi e pour aprann avek zot fason ansennyen! Devouman ek determinasyon bann sirveyan pour depans zot letan ek zefor dan predikasyon malgre zot annan en progranm sarze i en lankourazman pour kongregasyon antye pour demontre menm devouman. Bann ansyen i osi kapab kit en bon legzanp pour bann frer kan zot prepare e partisip dan renyon kongregasyon ek lezot aktivite, tel ki netwayaz ek antretyen Lasal Rwayonm.​—Efe. 5:15, 16; lir Ebre 13:7.

“ED BANN KI FEB”

15. Pour ki rezon bann ansyen i vizit bann frer ek ser?

¹⁵ En bon berze i pran aksyon deswit kan en mouton i ganny blese oubyen i tonm malad. Pareyman, bann ansyen pa devret tarde pour donn lasistans bann ki pe soufer ouswa ki bezwen led spirityel. Bann frer ek ser aze ouswa ki malad i kapab bezwen led an sa  ki konsern zot byennet, me zot sirtou bezwen led spirityel ek lankourazman. (1 Tesa. 5:14) Bann zenn dan kongregasyon i fer fas avek “bann pasyon lazenes.” (2 Tim. 2:22) Rol en berze i enkli vizit bann manm kongregasyon regilyerman. Sa pou ed zot konpran bann sityasyon ki bann frer ek ser i fer fas avek e ankouraz zot avek bann konsey apropriye sorti dan Labib. Ler sa bann konsey i ganny donnen zis a tan, sa i ede pour regle bann sityasyon avan i vin pli grav.

16. Kan en manm kongregasyon i bezwen led spirityel, ki led bann ansyen i kapab donnen?

¹⁶ Me ki bann ansyen pou fer si en problenm i menas lasante spirityel en manm kongregasyon? Dan Labib, Zak ti dir: “Eski i annan ki malad parmi zot? I devre apel bann ansyen dan [“kongregasyon,” NW], e zot a priy pour li e zot a vers delwil lo li o non Senyer. Lapriyer avek lafwa i a sov sa malad, e Senyer i a donn li lasante; e si i’n komet okenn pese i a ganny pardonnen.” (Zak 5:14, 15) Menm si sa enn ki malad pa “apel bann ansyen,” me desito ki zot okouran son sityasyon, zot pa devret tarde pour ed li. Ler bann ansyen i priy avek e pour bann frer ek ser, e zot siport zot kot i neseser, sa bann ansyen pou rekonfort e ankouraz sa enn ki zot pe pran swen avek spirityelman.​—Lir Izai 32:1, 2. *

17. Kan bann ansyen i imit sa “gran Berze,” ki pou arive?

¹⁷ Dan tou sa ki zot fer dan lorganizasyon Zeova, bann berze spirityel i devret fer bokou zefor pour imit sa “gran Berze,” Zezi Kri. Avek led spirityel sa bann zonm responsab, troupo i benefisye en kantite e kontinyen progrese. Pour tou sa la, nou vreman rekonesan e motive pour loue Zeova, nou Berze enkonparab.

[Not anba lo paz]

[Kestyon]

[Portre lo paz 26]

[Portre lo paz 29]

Bann ansyen i ed zot fanmir prepare pour predikasyon (Vwar paragraf 13)

[Portre lo paz 30]

Bann ansyen i kit en legzanp dan predikasyon (Vwar paragraf 14)