1, 2. (a) Mamoe naria tauna ese ena mamoe ia naridia namonamo neganai, dahaka do ia vara? (b) Dahaka dainai Iesu ena negai, momo be mamoe naria tauna ese ia naria lasi mamoe bamona?

 BEMA mamoe naria tauna ese ena mamoe ia naridia namonamo, edia tauanina be do idia goada bona do idia gorere lasi. Mamoe naria gaukarana ia herevalaia buka ta ia gwau: “Bema mamoe naria tauna ese ena mamoe be ava gabunai sibodia ia rakatania idia aniani totona, to edia ura gaudia ma haida ia henia lasi, lagani haida murinai ena mamoe be do idia manoka bona gorere.” Bema mamoe naria tauna ese ena mamoe ia naridia namonamo, ena mamoe be do idia goada bona gorere lasi.

² Kongrigeisen be unai bamona danu. Bema Keristani elda taudia ese tadikaka taihu idia naria bona laloa bada, unai ese kongrigeisen do ia durua bada. Reana oi laloatao, guna Iesu be hutuma ia hebogahisi henia, badina “idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” (Mat. 9:36) Dahaka dainai idia be mamoe naria tauna ese ia naria lasi mamoe bamona? Badina Dirava ese ia abia hidi tomadiho gunalaia taudia be taunimanima dekenai Dirava ena Taravatu idia hadibaia lasi, idia kara auka bona idia hadibaia gaudia idia badinaia lasi. Idia ese mamoe idia naria bona ubua lasi, to taunimanima edia pagana dekenai “metau gaudia” idia atoa bamona.—Mat. 23:4.

3. Elda taudia ese mamoe idia naria noho lalonai, dahaka idia laloatao be namo?

³ Iseda negai idia noho Keristani elda taudia, be mai edia maduna badana. Idia naria mamoe be Iehova bona Iesu edia mamoe. Iesu, “mamoe naria tauna namona,” ese ena mauri be unai mamoe totona ia henia. Ia ese ena “dava bada rarana” amo idia ia “hoia.” (Ioa. 10:11; 1 Kor. 6:20;  1 Pet. 1:18, 19) Namona be hanaihanai elda taudia idia laloatao idia edia gunalaia tauna be Iesu Keriso, “mamoe naria tauna badana.”—Heb. 13:20.

4. Inai stadi ai dahaka do ita herevalaia?

⁴ Vadaeni, Keristani elda taudia ese mamoe be edena bamona idia kara henia be namo? Iehova ia ura kongrigeisen taudia ese “hakaua taudia do [idia] kamonai henia.” To danu, Iehova ese elda taudia ia hagania, ‘Dirava ese idia dekenai ia henia taudia do idia biagua auka lasi.’ (Heb. 13:17; 1 Petero 5:2, 3 duahia.) Edena dala ai elda taudia ese mamoe do idia biagua auka lasi? Edena dala ai elda taudia ese mamoe idia naria namonamo, bona Dirava amo idia abia maduna idia gaukaralaia kerere lasi?

5. Isaia 40:11 ena hereva amo Iehova dekenai dahaka ita dibaia?

⁵ Peroveta tauna Isaia be Iehova ia herevalaia ia gwau: “Ia ese iena mamoe do ia ubua, mamoe naria tauna ia ubua noho bamona. Ia ese mamoe edia natudia do ia haboua, bona iena imana dekenai idia do ia rosia, idia do ia huaia lao. Bona edia sinadia bona rogorogo gaudia, be ia ese metairametaira do ia hakaudia lao.” (Isa. 40:11) Unai ese ia hahedinaraia, Iehova be kongrigeisen ai idia manoka taudia ia laloa bada. Mamoe naria tauna be hanaihanai ia noho hegaegae ena mamoe ta ta edia ura gaudia ia henia bona ia naria. Unai hegeregerena, Iehova danu be ia noho hegaegae kongrigeisen taudia ia durua totona. Mamoe naria tauna ese mamoe ena natuna be ena imana ai ia rosia bamona, Iehova—“hebogahisi Tamana”—ese nega aukadia ai ita do ia durua. Hahetoho badana ta ita davaria o heduru ita tahua neganai, ia ese ita do ia hagoadaia.—2 Kor. 1:3, 4.

6. Edena dala ai elda taudia ese Iehova idia tohotohoa diba?

⁶ Elda taudia be iseda guba Tamana amo mai anina bada gauna ta idia dibaia! Iehova bamona namona be idia noho hegaegae mamoe idia durua totona. Bema elda ta be mamoe edia hekwakwanai ia diba, vadaeni do ia diba edena nega bona dala ai heduru maorona ia henia totona. (Aon. 27:23) Oibe, namona be elda tauna ese nega ia atoa tadikaka taihu ida ia herevahereva bona edia hereva ia kamonai. Ena be edia mauri lalonai idia vara gaudia ia lalopararalaia bona idia ia matauraia, to bema ia itaia o kamonai kongrigeisen lalonai ta ia manoka, kara haraga heduru ia henia.—Kara 20:35; 1 Tes. 4:11.

7. (a) Esekiela bona Ieremia edia negai, mamoe naria taudia haida ese Iehova ena mamoe be edena bamona idia kara henidia? (b) Iehova ese unai mamoe naria taudia ia gwauraia dika karana amo, elda taudia ese dahaka idia dibaia?

⁷ Mani Iehova ese ia gwauraia dika mamoe naria taudia haida ita laloa. Esekiela bona Ieremia edia negai, Iehova ese mamoe naria taudia haida ia dadaraia, badina iena mamoe idia naria namonamo lasi. Ia gwau: “Lauegu mamoe be uda sisia bona laiona edia aniani gauna idia lao vadaeni, edia naria tauna ta be lasi dainai. Bona lauegu mamoe naria taudia ese egu mamoe idia tahua lasi. Unai mamoe naria taudia ese idia sibona idia ubua bona naria. To idia ese lauegu mamoe idia naria lasi.” Taunimanima be idia hisihisi badina edia gunalaia taudia be sibona idia laloa bada bona idia mataganigani. (Ese. 34:7-10; Ier. 23:1) Unai hegeregerena, Iehova ese Kerisendom gunalaia taudia ia gwauraia dika. To danu, ia hahedinaraia Keristani elda taudia ese Iehova ena mamoe idia naria bona lalokau henia be mai anina bada.

8. Edena dala ai elda taudia be tadikaka taihu idia sisiba henia neganai, Iesu idia tohotohoa diba?

⁸ Taunimanima be idia goevadae lasi dainai, nega haida Iehova ia ura do idia karaia gaudia idia lalopararalaia namonamo lasi. Reana  Baibel ena taravatu hegeregerena idia kara lasi, eiava idia hahedinaraia idia be lo Keristani taudia lasi. Elda taudia ese dahaka idia karaia be namo? Namona be Iesu idia tohotohoa. Aposetolo taudia be idia “sibodia huanai idia hepapahuahu, daika be ia bada” neganai, Iesu be mai haheauka ida idia ia kara henia. Idia ia hadibaia bona mai lalokau ida ia sisiba henidia, manau karana idia hahedinaraia totona. (Luka 9:46-48; 22:24-27) Danu, Iesu ese edia aena ia huria karana amo manau karana ia hahedinaraia. Hari, elda taudia ese manau karana idia hahedinaraia be namo.—Ioane 13:12-15 duahia; 1 Pet. 2:21.

9. Iesu ese aposetolo taudia ia hamaorodia dahaka lalohadai idia dadaraia be namo?

⁹ Aposetolo Iamesi bona Ioane ese idia hahedinaraia idia laloa mamoe naria tauna ena gaukara be ma haida do ia lohiadia. Iesu idia noia ena Basileia lalonai dagi badana do idia abia. To, Iesu ese edia lalohadai ia hamaoromaoroa, ia gwau: “Umui diba, bese idauidau taudia edia king ese edia bese idia lohiaia bona ladana bada taudia ese idia biagudia auka. Emui huanai unai bamona do ia vara lasi, to bema ta ia ura emui huanai do ia bada, namona be emui hesiai tauna ai do ia lao.” (Mat. 20:25, 26) Oibe, unai aposetolo taudia ese edia tadikaka o ma haida “lohiaia” lalohadaina idia dadaraia be namo.

10. Iesu ia ura Keristani elda taudia ese mamoe oreana be edena bamona do idia kara henia? Bona Paulo be dahaka haheitalai namona ia hahedinaraia?

¹⁰ Iesu ia ura Keristani elda taudia be ia do idia tohotohoa bona mamoe oreana do idia naria namonamo. Namona be mai edia ura ibounai ida tadikaka taihu idia hesiai henia, to idia biagudia auka lasi. Iesu bamona, aposetolo Paulo be mai manau ida ma haida ia hesiai henia. Efeso kongrigeisen ena elda taudia dekenai ia gwau: “Dina ginigunana Asia provinsi dekenai lau mai neganai, unai nega ibounai lalonai umui huanai lau karaia karadia umui diba goevagoeva. Bona Lohiabada totona igui hesiai gaukara lau karaia mai lalomanau momokani ida.” Paulo ia ura elda taudia be do idia manau bona idia gaukara goada tadikaka taihu idia durua totona. Ia gwau: “Gau ibounai lalonai umui dekenai lau hahedinaraia, namona be umui gaukara goada bona manoka taudia umui durua.” (Kara 20:18, 19, 35) Paulo ese Korinto tadikaka taihu ia hamaoroa ia be edia abidadama ia biagua lasi. To, do idia moale totona idia ida ia gaukara hebou. (2 Kor. 1:24) Hari, Paulo ena haheitalai ese elda taudia ia durua idia manau bona idia gaukara goada ma haida idia durua totona.

11, 12. Edena dala ai elda ese tadikaka ia durua diba abia hidi maorona ia karaia totona?

¹¹ Kongrigeisen elda taudia ese edia ‘hadibaia karana lalonai hereva momokani do idia dogoatao auka’ be namo. (Tito 1:9) To, namona be “mai manau ida” unai idia karaia. (Gal. 6:1) Namo lasi tadikaka idia doria kara ta idia karaia totona, to namona be idia durua edia lalokau Dirava bona ena Hereva dekenai hegeregerena abia hidi idia karaia. Hegeregere, tadikaka ta be abia hidi badana ta ia do karaia lasi neganai, elda be ia ida Baibel ena hakaua hereva haida eiava iseda pablikeisen ena atikol ta idia riviulaia hebou diba. Reana elda ese tadikaka ia hamaoroa edena dala ai abia hidi haida ese ena hetura karana Iehova ida idia hadikaia o hanamoa diba. Danu, reana tadikaka ia hamaoroa abia hidi ia do karaia lasi neganai, guriguri amo Iehova ena heduru ia noia be gau badana. (Aon. 3:5, 6) Idia herevahereva murinai, elda ese tadikaka dekenai nega ia henia ia sibona ese abia hidi ia karaia totona.—Roma 14:1-4.

¹² Elda taudia ese Baibel sibona amo sisiba idia henia be maoro. Unai dainai, Baibel idia gaukaralaia namonamo bona idia badinaia be gau badana. Unai amo elda taudia ese edia maduna  do idia gaukaralaia kerere lasi. Idia be Iesu ena henunai idia gaukara mamoe naria taudia, bona kongrigeisen taudia ta ta sibona ese ia karaia abia hidi ena badina be Iehova bona Iesu vairanai do ia gwauraia hedinarai.—Gal. 6:5, 7, 8.

13, 14. Edena dala ai elda ese mamoe oreana dekenai haheitalai namona idia hahedinaraia diba?

¹³ Aposetolo Petero be kongrigeisen tatau badadia ia hagania, ‘Dirava ena kohu do idia biagua auka lasi.’ Unai murinai idia ia hamaoroa ‘mamoe oreana dekenai haheitalai namona do idia hahedinaraia.’ (1 Pet. 5:3; futnout.) Edena dala ai elda ese mamoe oreana dekenai haheitalai namona idia hahedinaraia diba? Bema ta ia ura “naria tauna ena maduna ia abia” inai gaudia rua ia karaia be namo. Do ia “laloa namonamo,” bona “dala maorona ai iena ruma bese ia naria.” Bema elda ta be mai ena famili, namona be dala maoronai ia naridia, badina “bema ta be ena ruma bese naria dalana ia diba lasi, edena bamona Dirava ena kongrigeisen do ia naria?” (1 Tim. 3:1, 2, 4, 5) Bema ta ia ura naria tauna ena maduna ia abia, namona be ia “laloa namonamo.” Anina be ia ese Baibel ena hakaua herevadia ia lalopararalaia namonamo, bona ena mauri lalonai do ia badinaia daladia ia dibaia. Danu, nega aukadia ai ia laloa namonamo guna, gabeai abia hidi ta ia karaia. Tadikaka taihu ese unai bamona kara ia hahedinaraia elda tauna idia abidadama henia diba.

¹⁴ Iesu hegeregerena, elda taudia ese haroro gaukara idia gunalaia neganai, haheitalai namona idia hahedinaraia. Iesu be tanobada ai ia noho neganai, ena mauri ibounai lalonai Basileia ena sivarai namona harorolaia gaukarana ia laloa bada. Ia ese aposetolo taudia ia hadibaia, edena dala ai unai gaukara do idia karaia. (Mar. 1:38; Luka 8:1) Hari, pablisa momo be elda ida idia haroro neganai idia moale. Idia itaia elda taudia be unai gaukara idia ura henia bada bona elda edia hadibaia karana amo diba idia abia. Ena be elda taudia be idia bisi bada, to edia nega bona goada idia gaukaralaia sivarai namona idia harorolaia totona. Unai ese kongrigeisen taudia ia hagoadaia elda taudia idia tohotohoa totona. Danu, elda taudia be kongrigeisen heboudia totona idia hegaegae bona haere, bona gaukara ma haida hegeregere, Kingdom Hall hanamoa bona hagoevaia gaukarana idia durua amo haheitalai namona idia hahedinaraia diba.—Efe. 5:15, 16; Heberu 13:7 duahia.

15. Dahaka dainai elda taudia ese mamoe vadivadi idia karaia?

¹⁵ Mamoe naria tauna namona be karaharaga dala do ia tahua ia bero o gorere mamoena ia durua totona. Unai hegeregerena, bema kongrigeisen lalonai ta be hahetoho ia davaria o Baibel ena heduru ia abia be namo, elda taudia ese karaharaga ia idia durua be namo. Momokani, buruka bona gorere taudia ese tauanina dalanai heduru idia be namo, to idia ese  Baibel amo heduru bona hagoadaia herevadia idia abia be mai anina bada. (1 Tes. 5:14) Reana kongrigeisen ai matamata taudia be idia hekwarahi, “matamata taudia ese vaia idia abia ura idauidau” idia dadaraia totona. (2 Tim. 2:22) Elda taudia ese kongrigeisen taudia idia durua totona, mamoe vadivadi idia karaia loulou be namo. Unai vadivadi lalonai idia ese tadikaka taihu edia hekwakwanai idia lalopararalaia toho, bona Baibel amo idia hagoadaia. Bema elda taudia ese tadikaka taihu dekenai heduru idia henia haraga, dika bada do ia vara lasi.

16. Bema kongrigeisen ai ta ese hekwakwanai badana ta ia davaria, elda taudia be dahaka heduru idia henia diba?

¹⁶ Bema kongrigeisen ai tadikaka ta be hekwakwanai badana ta ia davaria o ena hetura karana Iehova ida be kahirakahira do ia dika, be edena bamona? Baibel torea tauna Iamesi, ia gwau: “Umui huanai ta ia gorere, a? Namona be kongrigeisen ena tau badadia ia boiria, bona ia totona do idia guriguri, bona Iehova ena ladanai dehoro amo ia do idia horoa. Bona guriguri mai abidadama ese gorere tauna do ia hanamoa bona Iehova ese ia do ia hatorea isi. Danu, bema ia be kara dikadia ia karaia, Dirava ese ena dika do ia gwauatao.” (Iam. 5:14, 15) Ena be ia manoka tauna be kongrigeisen ena “tau badadia” o elda taudia ia hadibaia lasi, to bema elda taudia be unai tauna ena sivarai idia kamonai, karaharaga heduru idia henia be namo. Bema elda taudia be tadikaka ida o tadikaka totona idia guriguri bona nega aukadia ai idia durudia, elda taudia ese idia hahedinaraia idia be mamoe naria bona durua taudia namodia.—Isaia 32:1, 2 duahia.

17. Elda taudia be “mamoe naria tauna hereadaena,” idia tohotohoa neganai, dahaka do ia vara?

¹⁷ Elda taudia be Iehova ena orea lalonai idia karaia gaudia ibounai lalonai, idia gaukara goada “mamoe naria tauna hereadaena,” Iesu Keriso idia tohotohoa. Elda taudia ese mamoe oreana idia durua idia goada idia lao bona Dirava idia hesiai henia noho. Unai ibounai ese ita ia hamoalea bona hagoadaia eda Mamoe Naria Tauna Hereadaena, Iehova ita hanamoa totona.