1, 2. (a) Savat paarineqarluaraangata qanoq kinguneqartarpa? (b) Sooq Jiisusip nalaani inuppassuit savatut paarsisoqanngitsutut ippat?

SAVAT paarineqarluartariaqarput. Atuakkami savanik paarsinermut tunngasumi allassimavoq savanik paarsisoq savaatini ivigartorfimmiitiinnarlugit pisariaqartitaannillu allanik isumaginninngippat ukiualuit ingerlaneranni savat sangiillillutillu napparsimalertartut. Savanilli paarsisoq savaatiminik tamanik immikkut isumassuilluarpat savat tamarmik paarineqarluarumaarlutillu ajoquteqarnavianngillat.

² Tamatumunngalu assingusumik kristumiut paarsisut savanik tamanik immikkut isumassuillutik soqutiginninnerat ilagiit tamarmik iluaqutigissavaat. Eqqaamassagunarpat Jiisusip inuit nalligingaarai “paarinerlugaallutillu naakkinarsisimangaarmata savatut paarsisoqanngitsutut”. (Matt 9:36) Sooq pissutsit taama ajortigaat? Guutip inatsisaanik ilinniartitsinermik akisussaaffillit naakkittaatsuullutik, piumasaqarpallaarlutillu ilumoortuusaarput. Upperisarsiornikkut siuttuusut taakkua inunnik asanninnatik isumassuinatillu inuit Guutimut kiffartornissaat sapernarsisittarpaat. Inuit “ersugassanik oqimaatsunik” ersukkertarpaat. — Matt 23:4.

3. Utoqqaanertat savanik paarsinerminni suna eqqaamasariaqarpaat?

³ Ullumikkut utoqqaanertat pingaarutilimmik akisussaaffeqarput. Savat paarisartagaat Jehovap Jiisusillu pigaat. Savat taakku Jiisusimut naleqangaarput. Taassumami, ‘paarsisup ajunngitsuusup’, allaat inuunini taakku pillugit pilliutigisimavaa. (Joh 10:11) Jiisusip taakku ‘aamminik erlinnartumik’ ‘pisiarai’. (1 Kor 6:20; 1 Petr 1:18, 19) Utoqqaanertat eqqaamajuartariaqarpaat Jiisusimit Kristusimit ‘savaatit paarsisuunerannit’ akisussaatinneqarumaarlutik. — Hebr 13:20.

4. Allaaserisami matumani suna sammissavarput?

 ⁴ Kristumiut utoqqaanertat savanik qanoq pinnittartussaappat? Ilagiinniittut tamarmik kajumissaarneqarput ‘siulersortitik naalassagaat’. Utoqqaanertallu kajumissaarneqarput Guutip kingornussai ‘naalagaaniarfigissanngikkaat’. (Hebr 13:17; 1 Petrusi 5:2, 3 atuakkit). Utoqqaanertat qanoq ‘naalagaaniaratik’ siulersuiuarsinnaappat? Allatut oqaatigalugu utoqqaanertat Guutimit oqartussaassusilerneqarnertik qimmunnagu savaatit pisariaqartitaat qanoq isumagisinnaavaat?

5. Esajap allagaani 40:11-mi Jehova pillugu suna paasivarput?

⁵ Jehova pillugu pruffiiti Esaja ima allappoq: “Savaatini paarsisutut paarai, talerminik katersorpai; savaaqqat pakkuppai, savallu miluttunik piarallit siulersorlugit.” (Es 40:11) Allassimaffimmi matumani Jehovap sanngiitsut sernissorneqartariaqartullu pisariaqartitaannik isumaginninnera allaatigineqarpoq. Jehovap ilagiinniittut tamaasa immikkut pisariaqartitaat nalunngilaa ikiorusuttarlugillu, soorlu savanik paarsisup savaatimi pisariaqartitaat ilisimagaa. Aamma soorlu savanik paarsisoq ilaannikkut piaqqanik kissumiartartoq, Jehovap misilinneqangaarnitsinni artornartorsiornitsinnilu tuppallersarlutalu isumassussavaatigut. Taannami tassaavoq “Ataataq nallittuisoq”. — 2 Kor 1:3, 4.

6. Utoqqaanertap Jehovap maligassiuinera qanoq malissinnaavaa?

⁶ Ataatarput qilammiusoq paarsisunut ilagiinniittunut maligassiuilluangaarami! Jehova assigalugu ilagiinni paarsisup savat pisariaqartitaat eqqumaffigisariaqarpaa. Utoqqaanertap taakkua unamminiagaat ilisimaguniuk qaqugukkut qanorlu pisariaqartumik kajumissaarissallunilu tapersersuissalluni paasisinnaavaa. (Uss 27:23) Tamanna ima paasisariaqarpoq utoqqaanertaq qatanngutiminik oqaloqateqarnissaminut tusarnaarnissaminullu piffissaqartariaqartoq. Qatanngutit inuunerannik ataqqinnittuulluni ilagiinni takusimasani tusarsimasanilu eqqumaffigisarlugillu ‘sanngiitsunik’ asannilluni ikiuinissaminut piffissaqartarpoq. — ApS 20:35; 1 Th 4:11.

7. (a) Ezekielip Jeremiallu nalaanni Guutip savaatai qanoq pineqartarsimappat? (b) Utoqqaanertat Jehovap paarsisunik ilumuunngitsunik itigartitsinera qanoq ilinniutigisinnaavaat?

⁷ Ezekielip Jeremiallu nalaanni Guutip innuttaanik paarsisut qanoq isiginnittaaseqarnersut eqqarsaatigeriaruk. Paarsisut taakku savaatinik paarinninnginnerat pissutigalugu Jehovap itigartippai. Jehova ima oqarpoq: “Savaatikka [nersutinut] nujuartanut tamanut nerisassanngormata paarsisussaqannginnamik — paarsisuuniaraluartummi savaatikka ujanngimmatigit imminnuinnaq isumagalutik.” Paarsisut namminissarsiorlutillu piumatuujummata inuit atugarliorput. (Ez 34:7-10; Jer 23:1) Guutip aamma kristumiuunerartut siuttui itigartippai. Utoqqaanertat Jehovap paarsisunik ilumuunngitsunik itigartitsinera qanoq ilinniutigisinnaavaat? Jehovap savaatai asannillutik soqutigingaartariaqarpaat.

8. Utoqqaanertat qatanngutiminnik siunnersuigaangamik qanoq Jiisusip maligassiuinera asseqanngilluinnartoq ilaarsinnaavaat?

⁸ Naammalluinnanngissuseq pissutigalugu ilagiinniittut ilaasa Jehovap qanoq piumaffigineraatik paasilluarsinnaanngilaat. Immaqa Biibilimut naapertuutinngitsumik aalajangiisinnaapput, imaluunniit iliuuseqarsinnaapput anersaakkut inersimalluannginnerminnut ersiutaasumik. Utoqqaanertat qanoq periassappat? Jiisusip ajoqersukkaminut naammagittarnera ilaartariaqarpaat. Ajoqersukkat Guutip naalagaaffiani kina annerunersoq oqallisigisarpaat,  Jiisusilli taakku kamaatilinngisaannarpai. Maniguunnissaannik ilinniartittuarlugillu asannilluni siunnersortarpai. (Luk 9:46-48; 22:24-27) Maniguunneq qanoq paasisariaqarnersoq ersersinniarlugu allaat taakkua isigaat asappai. Ullumikkut utoqqaanertat aamma maniguuttuusariaqarput. — Johannesi 13:12-15 atuakkit; 1 Petr 2:21.

9. Jiisusip apustilit sumik isiginnittaaseqaqquai?

⁹ Apustilit Jaaku Johannesilu isumaqarput allanik paarsineq tassaasoq allanut naalagaaneq. Guutip naalagaaffiani nuimasumik inissisimaffeqarusupput. Jiisusilli allamik isiginnittaaseqalersinniarlugit ima naqqippai: “Nalunngilarsi inuiaqatigiit naalagaanertaasa innuttatik naqisimasaraat, naalagartaasalu pissaanertik taakkununnga atornerluttaraat. Ilissinni taamaassanngilaq; akornassinnili angisuujumasoq ilissinnut kiffaassaaq.” (Matt 20:25, 26) Apustilit qatanngutitik naalagaaniarfigerusunnaveersaartariaqarpaat.

10. Jiisusip utoqqaanertat sumik piumasaqarfigai, Paulusilu qanoq maligassiuilluarpa?

¹⁰ Jiisusip utoqqaanertat savaatinik pinnittarnermisut pinnittarnissaat piumasaraa. Qatanngutitik naalakkatut pissusilersorfiginagit kajumillutik kiffartorfigisariaqarpaat. Apustili Paulusi Jiisusitut maniguulluni allanik kiffartorfiginnippoq. Utoqqaanertat Efesosimi ilagiinniittut ima oqarfigai: “Nalunngilarsi nunap immikkoortuanut Asiamut peqqaarfinniilli akornassinni qanoq inuusimasunga. Naalagaq kiffartuussimavara tamatigut nikanartillunga.” Paulusip kissaatigaa utoqqaanertat maniguullutik ilungersorlutillu qatanngutitik kiffartorfigissagaat. Paulusip maligassiuinermigut utoqqaanertat ilinniartippai ‘sanngiitsut qanoq isumagisariaqaraat’. (ApS 20:18, 19, 35) Korinthimiut allaffigai taakkua uppernerannut naalagaanani. Taakku assigalugit Guutimut kiffartortuuvoq maniguuttoq, ikiorusuppaalu nuannaarlutik Guutimut kiffartorsinnaaqqullugit. (2 Kor 1:24) Paulusi maniguunnermut ilungersornermullu tunngatillugu ullumikkut utoqqaanertanut maligassiuilluarpoq.

11, 12. Utoqqaanertap qatanngut aalajangernissaanut qanoq ikiorsinnaavaa?

¹¹ Ilagiinni utoqqaanertap siunnersuutai ‘oqaaserineqartunik ilumoortunik’, tassa Biibilimi allassimasunik, tunngaveqartuartariaqarput. (Tit 1:9) Aamma ‘qanilaarluni’, imaluunniit saamalluni, siunnersuisariaqarpoq. (Gal 6:1) Paarsisup ajunngitsup qatanngutini aalajangersimasumik iliuuseqarnissaannut pinngitsaalinagit Jehovamulli asanninnerat taassumalu Oqaasia tunngavigalugit namminneq aalajangersinnaaqqullugit ikiortarpai. Assersuutigalugu utoqqaanertap qatanngut pingaarutilimmik aalajangernissaanut ikiorsinnaavaa najoqqutassiat Biibilimeersut allaaserisalluunniit atuagassiaatitsinniittup oqaloqatigiissutiginerisigut. Qatanngut kajumissaarsinnaavaa aalajangiinnginnermini qinigassat assigiinngitsut qanoq Jehovamut attaveqarneranut sunniuteqarsinnaasut eqqarsaatigeqqullugit. Taava utoqqaanertap eqqaasissinnaavaa aalajanginnginnermini Guutimut siulersoqqulluni qinunissaa qanoq pingaaruteqartigisoq. (Uss 3:5, 6) Qatanngut utoqqaanertamit oqaloqatigineqareeruni qanoq iliorumanerluni nammineq aalajangertussaavaa. — Rom 14:1-4.

¹² Utoqqaanertat oqartussaassuseqarnerat taamaallaat Biibilimik tunngaveqarpoq. Taamaattumik Biibilimik atuilluartarnissaat tamatigullu Biibili tunngavigalugu siunnersuisarnissaat pingaaruteqarluinnarpoq. Taamaaliornermikkut Guutimit oqartussaassusilerneqarnertik qimmussanngilaat.  Taakkuami savaatit piginngilaat. Ilagiinniittullu tamarmik immikkut aalajangersimasatik pillugit Jehovamut Jiisusimullu akisussaatinneqarumaarput. — Gal 6:5, 7, 8.

13, 14. Utoqqaanertaq qanoq savaatinut maligassaasinnaava?

¹³ Petrusip utoqqaanertat qatanngutiminnut naalagaaniassanngitsut eqqartoreerlugu kajumissaarpai ‘savaatinut maligassaassasut’. (1 Petr 5:3) Utoqqaanertaq savaatinut qanoq maligassaasinnaava? Utoqqaanertanit pissuserineqartussat marluk sammissavavut. Siullermik, ‘silatusaartuusariaqarpoq’. Tamanna ima paasisariaqarpoq taassuma najoqqutassiat Biibilimeersut inuunerminilu taakku qanoq maleruassanerlugit paasilluarsimasariaqarai. Pisuni ilungersunartorsiorfiusuni eqqissisimasarpoq, aalajanginnginnerminilu eqqarsaqqissaartarpoq. Aappassaanik, ‘inoqutiminik aqutsisinnaasuusariaqarpoq’. Tamanna ima paasisariaqarpoq uiusutut ataataasutullu maligassaalluartariaqartoq, “qanormi ililluni Guutip ilagiissai isumagisinnaassavai nammineq inoqutini aqussinnaanngikkunigit?” (1 Tim 3:1, 2, 4, 5) Qatanngutit ilagiinniittut misigisarput utoqqaanertat taamatut pissusillit tatigisinnaallugit.

¹⁴ Utoqqaanertat aamma Jiisusitut oqaluussinermi siuttuunermikkut maligassaalluarput. Jiisusip nunarsuarmiikkallarami Guutip naalagaaffianik nutaarsiassaq nuannersoq pillugu oqaluussineq pingaartippaa, ajoqersukkanilu qanoq oqaluussissanersut ilinniartippai. (Mark 1:38; Luk 8:1) Ullumikkut oqaluussisartut utoqqaanertanik oqaluusseqateqartarnertik nuannaarutigaat. Utoqqaanertat suliamik pingaarutilimmik tamatuminnga aallussilluarnerat maluginiartarpaat ilinniartitseriaasiallu ilinniarfigisinnaallugu. Utoqqaanertat ulapputeqaraluarlutik piffissaminnik nukiminnillu oqaluussinermut atuisarnerat ilagiit aallussilluarnissaminnut kajumissaarutigaat. Utoqqaanertat aamma maligassaalluarsinnaapput ataatsimiinnernut piareersartarnermikkut, akisarnermikkut naalagaaffilersaarfimmilu eqqiaallutillu aserfallatsaaliueqataasarnermikkut. Kajumissaarneqarpugut taakkua ‘uppersuseqarneratigut assigeqqullugit’. — Ef 5:15, 16; Hebr 13:7.

15. Utoqqaanertat paarsisutut pulaarnissaannut pissutaasut ilaat suuppat?

¹⁵ Savanik paarsisup ajunngitsup sava napparsimasoq ikiligaasorluunniit ikiupallattarpaa. Taamatuttaaq utoqqaanertat ilagiinni naalliuttunik siunnersorneqartariaqartunilluunniit qiimmassarneqartariaqartunilluunniit ikiuipallattariaqarput. Utoqqaat napparsimasullu ulluinnarni pisariaqartitaannik isumagineqartariaqarput,  ingammilli anersaakkut tuppallersarneqarnissartik kajumissaarneqarnissartillu pisariaqartippaat. (1 Th 5:14) Ilagiinni inuusuttut immaqa “inuusuttut kajungerisaat” akiorniagassaraat. (2 Tim 2:22) Utoqqaanertat paarsisutut pulaarnermikkut ilagiinniittut tamaasa ikiortarpaat. Pulaarnerminni taakkua unamminiarnartitaat paasiniartarlugillu Biibili iluaqutigalugu qiimmassartarpaat. Utoqqaanertat qatanngutimik pisariaqartitaannik ikiuipallattarpata ajornartorsiuterujussuannguussinnaagaluartut pinaveersaarneqarsinnaapput.

16. Ilagiinniittoq ingasattumik ajornartorsioraangat utoqqaanertat qanoq ikiorsinnaavaat?

¹⁶ Qatanngummi ilagiinniittoq ingasattumik ajornartorsiorlunilu Jehovamut attaveqarnini navianartorsiortippagu? Biibilimik allattoq Jaaku ima allappoq: “Akornassinni napparsimasoqaruni taassuma ilagiit utoqqaanertaat qaaqqussavai, taakkualu Naalakkap aqqani uuliamik tanissavaat qinnullugulu. Uppernikkut qinnutaasup napparsimasoq annaatissavaa, Naalakkallu ajorunnaarsissavaa; ajortulisimagunilu isumakkeerfigineqassaaq.” (Jaak 5:14, 15) Qatanngutip ‘napparsimasup’ utoqqaanertat aggeqqunngikkaluarai utoqqaanertat qanoq atugaqarnersoq paasigunikku ingerlaannaq ikiorniarlugu iliuuseqartariaqarput. Utoqqaanertat qatanngutitik qinoqatigalugillu qinnukkaangamikkit annikilliornerannilu tapersersoraangamikkit ersersittarpaat paarsisuullutik ajunngitsut qatanngutitik nuannaarlutik Guutimut kiffartortuarsinnaaqqullugit kajumissaarisut. — Esaja 32:1, 2 atuakkit.

17. Utoqqaanertat ‘paarsisuunermik’ ilaarsinerat ilagiit qanoq iluaqutigaat?

¹⁷ Kristumiut utoqqaanertat Jehovap peqatigiissortaani qanorluunniit ilioraluaraangamik Jiisusi Kristusi, ‘paarsisuuneq’, ilaarniartarpaat. Angutit akisussaassusillit taakku savaatit anersaakkut siumukartuarsinnaaqqullugit aalajaallutillu Guutimut kiffartorsinnaaqqullugit ikiortarpaat. Paarsisivut asannittut paarsisorsuarpullu, Jehova, qutsavigingaarpavut.