Atubiña, Imbujolenuña Atubiña Amaneni

“Kristu niyena wayimweneni yihuñu, wayishiyilili chuma chakutalilahu, kulonda mwendi mumahaji indi.”—1 PET. 2:21.

MUKWAKULA NENUDI?

Hakwikala atubiña, aeluda anateli kumwimbujolaña ñahi Yehova?

Aeluda anateli kumwimbujola ñahi Yesu Kristu?

Muloñadi aeluda chazatilañawu nyidimu yakubiña?

1, 2. (a) Anyikoku ahandaña ñahi neyi ayakamenaña chiwahi? (b) Chumanyi chaleñeleli antu amavulu mumafuku aYesu ekali neyi anyikoku akadi kabiña?

 ANYIKOKU ahandaña chiwahi neyi kabiña yayakamenaña chikupu. Mukanda wahoshaña hakulela anyikoku washimunaña nawu, “muntu wakuminaña dakutwala nyikoku yindi kumunyevu nakuyishiya chakadi kuyakamena hela kuta maana kudi anyikoku yindi yashimbulaña wanyi nakukata nawa chimwahita yaaka yantesha hakamwenamuku.” Ilaña, neyi yakamenaña anyikoku yindi, nyikoku yahandaña chiwahi.

² Chochimu nimuchipompelu chawakwaKristu, neyi atubiña anyikoku yaNzambi akamenaña mukoku wudi wejima chipompelu chahetelañamu. Munateli kwanuka nenu Yesu watiyilili wushona mazaza awantu muloña “akabakeni, apalañeni neyi nyikoku yakadi kabiña.” (Mat. 9:36) Chumanyi chaleñeleli ekali neyi nyikoku yakadi kabiña? Muloña atubiña enkeluwu mudimu wakutañisha antu Nshimbi jaNzambi adiña azuwa, alukambu nawa anfukeji. Chatela akwasheña nikwakamena anyikoku jawu chiwahi, anlomboli amumachechi awaIsarela adiña nakutwika antu “yiteli yalema” hamafwiji.—Mat. 23:4.

3. Chumanyi chatela kwanukañawu aeluda amuchipompelu hampinji yinakwakamenawu anyikoku?

³ Atubiña akwaKristu makonu, dikwila nawu aeluda atondawu, akweti mudimu weneni nankashi. Anyikoku ekala hamukanka wabiñañawu ambala aYehova niYesu, waditena yomweni nindi “kabiña walala.” (Yow. 10:11) Anyikoku “ayilandili dehi nawuseya” wahaniniyi Yesu ‘namashi indi alema.’ (1 Kor. 6:20; 1 Pet. 1:18, 19) Wakeña nankashi anyikoku chakwila wahanini niwumi windi yomweni kukola wena. Mpinji yejima aeluda atela anukeña nawu hiyatubiña anyanya,  atela kwovwahilaña wunlomboli waMwana kaNzambi wakeñayi, Yesu Kristu, “kabiña kawanyikoku muneni.”—Heb. 13:20.

4. Yumanyi yitukuhanjekahu muchinu chibaaba?

⁴ Atubiña akwaKristu atela kwakamenaña ñahi anyikoku? Antu muchipompelu ayikonkomwenaña ‘kwovwahila antu anakulombola’ mukachi kawu. Cheñi nawa, aeluda akwaKristu ayikoleshaña kulonda abuleña ‘kwikala anyanta hadi antu jaNzambi ayishililuwu kuhemba.’ (Heb. 13:17; tañenu 1 Petulu 5:2, 3.) Hanu dinu, aeluda atondawu anateli kulombola ñahi chakadi kwikala anyanta hadi anyikoku? Cheñi nawa, aeluda anateli kwakamena ñahi anyikoku chakadi kubadika muñovu yayinkawu ankoñi kudi Nzambi?

“WAKAYISENDELA HANTULU YINDI”

5. Indi mazu ekala haIsaya 40:11 amwekeshañadi hadi Yehova?

⁵ Kaprofwetu Isaya wahosheli hadi Yehova nindi: “Wakadiisha mukanka windi wanyikoku neyi kabiña, wakakuñwila anyana muchikasa chindi, wakayisendela hantulu yindi, adi nakwamwisha wakayendeshaña chovu chovu.” (Isa. 40:11) Awa mazu anakumwekesha nawu Yehova wakamenaña antu azeya amuchipompelu nawa abula wakuyikiña. Neyi chochashaña kabiña maana kuyuma yinakukeña mukoku wudi wejima nikwikala wadiloñesha kuyikwasha, Yehova weluka yuma yakaankilañawu antu amuchipompelu nawa wafwilaña kuyikwasha chikupu. Neyi chochavuñilañayi kabiña mwana kamukoku wunasemuki muchikowelu chindi, Yehova, ‘Tata wavulisha luwi,’ watwakamenaña mukweseka kwetu kwejima. Nateli kutukundeja neyi tuholokela mukweseka hela neyi tudi mukukankila.—2 Kor. 1:3, 4.

6. Indi kabiña wapama kuspiritu nateli kwimbujola ñahi chakutalilahu chaYehova?

⁶ Kabiña wamuchipompelu watela kudizila chikupu kudi Tata yetu wamwiwulu. Kufwana Yehova, watela kusha muchima kuyuma yinakukeña anyikoku. Neyi eluda yeluka kukala kunakumonawu anyikoku nikukala kunakukeñeka kuzatilahu mukunyakashana, nateli kuyikolesha nikuyikwasha chiwahi. (Yish. 27:23) Eñañi, eluda watela kutiyañana chachiwahi nawakwawu akwakwitiya. Hela chakwila hadiñijaña munsañu yawakwawuku, washaña muchima kuyuma yinakumonayi nikutiya muchipompelu nakudihana chikupu kulonda ‘yakwashi azeya.’—Yil. 20:35; 1 Tesa. 4:11.

7. (a) Indi nyikoku yaNzambi ayihembeleña ñahi mumafuku aEzekeli niYeremiya? (b) Chumanyi chitunateli kudizila kudi Yehova chayikaaniniyi ana atubiña abulili kashinshi?

⁷ Tuhanjekenu hadi atubiña adiña nayililu yatama yamuneñesheleña Nzambi. Mumafuku aEzekeli niYeremiya, Yehova watanyishili atubiña enkeliyi mudimu wakuhemba nyikoku yindi ilaña akañenyi kuyihemba chiwahi. Chelili atubiña aleki kuhemba nyikoku chiwahi, ayilumbu atachikili kuyikabisha nawa yapalañenenumu. Chatela adyisheña nyikoku, ana atubiña atachikili kuyiyandisha ‘nikudidiisha aweni.’ (Ezek. 34:7-10; Yere. 23:1) Nzambi chayikaaniniyi ana atubiña, dichayimonañayi nianlomboli amuKristendomu. Hela chochu, chumichi chinateli kuyikwasha aeluda akwaKristu kusha muchima hakuhemba nyikoku yaYehova munjila yayiwahi nikuyikeña.

“AMI NAYILEJI CHUMA CHAKWIMBUJOLA”

8. Yesu wamwekesheli chakutalilahu chamuchidinyi chatela kwimbujolawu aeluda hakufumba muntu wudi nayililu yatama?

⁸ Hamuloña wakubula kuwanina kwawantu, anyikoku aNzambi amakwawu chayikalilaña kutiyisha yuma yakeñañayi Yehova nindi eleña. Anateli kukañanya kulondela kufumba kwamuNsona hela kwila yuma yikumwekesha nawu apama kuspiritu wanyi.  Indi aeluda anateli kwiladi? Atela kwimbujola Yesu wadiwunjikili nawatumbanji twindi adiña nakumwihula malwihu amavulu kulonda eluki hakachi kawu wadi kwikala wabadika muWanta. Chatela yayihosholi, Yesu watwalekeluhu kuyidizisha atumbanji twindi nikuyifumba munjila yakukeña kulonda adizozeña. (Luka 9:46-48; 22:24-27) Kuhitila mukuyiwelesha kunyendu, Yesu wayidizishili chililu chalema chakudizoza, chililu chatela kumwekesha aeluda akwaKristu.—Tañenu Yowanu 13:12-15; 1 Pet. 2:21.

9. Chililwinyi chakeñeleñayi Yesu nindi atumbanji twindi amwekesheña?

⁹ Njila yamweneneñamu Yesu mudimu wawatubiña akwaKristu yadiña yambukaku nachamweneñawu aYakoba naYowanu. Awa apostolu ayedi akeñeleña kwikala nayifulu yahewulu muWanta. Ilaña Yesu wayifumbili, nindi: ‘Mweluka dehi anyanta jawaJentili chayiyuulañawu; niantu awu alema chekalañawu nawanta hadi wena. Ilaña mukachi kenu bayi chakekala chochochuku; yowu wukukeña kwikala muneni mukachi kenu ekali mukwakuyikalakela.’ (Mat. 20:25, 26) Apostolu ateleleli kuleka chaaku chakufwila ‘kwikala anyanta’ hadi akwawu hela ‘kuyiyuula.’

10. Yesu wakeñaña nindi aeluda ahembaña nyikoku munjilanyi nawa chakutalilahwinyi chashiliyi Pawulu?

¹⁰ Yesu wakeñaña aeluda akwaKristu kuhemba nyikoku neyi chayihembañayi. Atela kudikeñela kwikala akwakukalakela akwawu, bayi kwikala anyanta hadi antuku. Kapostolu Pawulu wadiña wadizoza, dichi chalejeleliyi akulumpi muchipompelu chakuEfwesesa nindi: “Enu aweni mweluka dehi munashakaminaña nenu mafuku ejima, kufumisha kwifuku dinasambilili kudata mwendu muAsiya; nakukalakela Mwanta nakudizoza mumuchima.” Pawulu wakeñeleña nindi ana aeluda akwashi akwawu chikupu munjila yakudizoza. Washimwini nindi: “Yuma yejimiyi nelili kulonda mutaliluhu, kulonda enu aweni mwakakalakali mukwashi akwenu abula ñovu.” (Yil. 20:18, 19, 35) Pawulu wayilejeli akwawu akwaKorinda nindi hadiña mwanta wachikuhwelelu chawuku. Ilaña wadiñi mukwawu mukwakukalakala wadizoza wafwilileña kuyikwasha kumukalakela Nzambi namuzañalu. (2 Kor. 1:24) Pawulu wayishilili aeluda amakonu chakutalilahu chachiwahi chakuzata nañovu nikwikala adizoza.

‘KAKELENU KUMAZU ALALA’

11, 12. Eluda nateli kukwasha ñahi mukwawu mukwakwitiya kufuukulahu?

¹¹ Eluda wamuchipompelu watela ‘kukakela kumazu alala kulonda yatañisheña chachiwahi.’ (Tit. 1:9) Ilaña waleña mwenimu “naspiritu yakudizoza.” (Ŋal. 6:1) Chatela yakakejeña akwawu muchipompelu kwila yuma munjila yambukaku, kabiña wamuwahi wafwilaña kuyikwasha afuukuleñahu awenawu kushindamena hakukeña kwamukeñawu Yehova. Eluda nateli kushimuna chishina chamuNsona chatela kutoñojokahu mana kwetu neyi nakukeña kufukulahu yuma yalema. Nateli kuhanjeka nindi hansañu yasonekawu yahosha hanoyu nsañu. Nateli cheñi kumukolesha mana kwetu kulonda yeluki nindi neyi yela yuma yatama wulunda windi naYehova wukumana. Eluda watela kumuleja chikupu nindi henohu kanda yafuukuluhu watela kulomba kudi Nzambi kulonda yamukwashi. (Yish. 3:5, 6) Neyi anahanjeki dehi haniyi nsañu namukwawu mukwakwitiya, eluda wukumuleka yafuukuluhu yomweni.—Rom. 14:1-4.

¹² Ñovu yazatishañawu ankoñi akwaKristu yafumaña muNsona. Dichi, mpinji yejima atela kuzatishaña Bayibolu chachiwahi nikukakela kuyuma yahosha Bayibolu.  Neyi elaña mwenimu chayikwashaña aeluda kubula kuzatisha ñovu yayinkawu munjila yaheña. Muloña wena hiyatubiña anyanya nawa muntu wejima wamuchipompelu wamba kalumbulula kudi Yehova niYesu hayuma yaleñayi.—Ŋal. 6:5, 7, 8.

‘IKALENU AKUTALILAHU KUDI ANYIKOKU’

13, 14. Eluda watela kwikala wakutalilahu kudi anyikoku muyumanyi?

¹³ Hanyima yakufumba akulumpi muchipompelu nindi ‘bayi ekala anyanta hadi ana ayishililuwu kuhembaku,’ kapostolu Pawulu wayikonkomweneni nindi ‘ekali akutalilahu anyikoku.’ (1 Pet. 5:3) Eluda nateli kwikala ñahi chakutalilahu kudi anyikoku? Shinshikenu yuma yiyedi yatela kwilayi muntu wunakukeña ‘kushikahu hamudimu wakutala akwawu.’ Watela ‘kuwundisha mumesu’ nawa watela ‘kuyuula chachiwahi mwitala dindi yomweni.’ Neyi eluda wukweti chisaka watela kuchiyuula munjila yayiwahi, muloña neyi ‘muntu wabula kwiluka kuyuula mwitala dindi yomweni, indi chipompelu chaNzambi wukuchihemba ñahi?’ (1 Tim. 3:1, 2, 4, 5) Hakwila nawu muntu yashikuhu hakukalakala mudimu wakutala akwawu, watela kwikala wawundisha mumesu dikwila nawu weluka nshimbi jaNzambi nawa weluka chakuyizatisha muchihandilu chindi. Neyi namoni kukala wawundishaña muchima nawa watoñojokaña chiwahi henohu kanda yafuukuluhu. Antu amuchipompelu neyi amona iyi yililu mudi aeluda akuyikuhwelela.

¹⁴ Kulombola mumudimu wakushimwina hinjila yikwawu yamwekeshelañamu ankoñi chakutalilahu chachiwahi kudi akwawu akwaKristu. Yesu washilili ankoñi chakutalilahu chachiwahi. Mudimu wakushimwina nsañu yayiwahi yaWanta himudimu walema wazatileñayi Yesu. Wayilejeli atumbanji twindi chakuzata iwu mudimu. (Maku 1:38; Luka 8:1) Nimakonu, chalema nankashi akwakushimwina kuzatila hamu nawaeluda, kulonda amoneña iyena dikwetuwu aeluda muniwu mudimu wakupulwisha wumi wawuntu, nikumona chatañishañawu. Ankoñi chafwilañawu kuzata mpinji yeneni nikudikita chikupu mumudimu wakushimwina nsañu yayiwahi chakoleshaña antu ejima muchipompelu hela chakwila ekala nanyidimu yayivulu niwena amwekesheña iyena dodimu. Aeluda anateli cheñi kuhana chakutalilahu kudi amana kwawu kuhitila mukuloñesha nikwakulahu hakupompa kwachipompelu nikuzataku nyidimu yikwawu, yidi neyi kuwahisha nikwakamena Itala daWanta.—Efwes. 5:15, 16; tañenu Aheberu. 13:7.

‘KWASHENU AZEYA’

15. Muloñadi aeluda chabiñilañawu anyikoku?

¹⁵ Kabiña wamuwahi wanyakalaña kukwasha mukoku neyi nadikatishi hela neyi nakati. Aeluda atela kunyakala kukwasha muntu wejima muchipompelu  wunakabakani hela wunakukeña kumukwasha kuspiritu. Atushinakaji niakata akeñekaña kwayikwasha muyuma yakeñañawu kumujimba, sweje-e dinu akeñekaña kuyikundeja nikuyikolesha naNsona. (1 Tesa. 5:14) Atwansi amuchipompelu hadaha anakuhita mukukala kwakushinda “kufwila kwatama kwawukwenzi.” (2 Tim. 2:22) Dichi mudimu wakubiña wakeñekaña kuhempulaña antu amuchipompelu mumpinji mumpinji kulonda kwiluka kukala kunakumonawu nikuyikolesha kuhitila mukuzatisha Nsona. Neyi munyakala kuyikwasha, munateli kumanisha kukala kwakuvulu henohu kanda kusweji kutohelaku.

16. Neyi muntu muchipompelu wudi nakukala kweneni, chumanyi chatela kwilawu aeluda?

¹⁶ Indi neyi mana kwetu muchipompelu wudi nakukala kweneni chikupu nawa kunateli nikuluwañesha wubwambu windi naYehova? Yakoba Nsoneki waBayibolu wehwili nindi: “Omu mukachi kenu mudi wakata, tahindi? Atambiki akulumpi achipompelu, amulombeli, amuwayishi manji mwijina daMwanta. Kulomba kwakukuhwelela kukuhandisha wakata, niMwanta wukumukolesha; neyi navulumuni akumwanakena.” (Yak. 5:14, 15) Hela neyi chakwila wakata ‘hanatambiki akulumpi achipompeluku,’ atela kunyakala kumukwasha chelukawu kukala kukwetiyi. Neyi amulombelaku nikulombelaku amana kwawu nikuyikwasha mumpinji yinamonuwu kukala, aeluda amwekeshaña nawu hiyatubiña amawahi akoleshaña amana kwetu kulonda atwalekuhu kumukalakela Nzambi namuzañalu.—Tañenu Isaya 32:1, 2.

17. Neyi aeluda embujolaña ‘kabiña muneni,’ yumanyi yinateli kufumamu?

¹⁷ Nyidimu yazatañawu mukuloñesha kwaYehova, atubiña akwaKristu afwilaña kumwimbujola Yesu Kristu ‘kabiña muneni.’ Awa mayala akwashaña anyikoku kulonda atwelekuhu akola nikumukalakela Nzambi nakashinshi. Twamusakililaña nikumushimeka Kabiña Muneni, Yehova watukoñelaña yuma yejimiyi.

[Malwihu aKuzatisha haKudiza]

[Mwevulu wudi hefu 29]

Aeluda akwashaña yisaka yawu kuloñesha mudimu wakushimwina (Talenu parakalafu 13)

[Nyevulu yidi hefu 30]

Ankoñi ahanaña chakutalilahu mumudimu wakushimwina (Talenu parakalafu 14)