Kãsem-dãmbã, rɩk-y Pe-kɩɩm-kãsemsã togs-n-taare
“Kirist me namsa yãmb yĩnga, n bas mamsg ne yãmb tɩ y tũ bãmb naoã.”—1 PƖƐ. 2:21.
1, 2. a) Pe-kɩɩm sã n get a piis yell sõma, wãn to la nafd piisã? b) Bõe yĩng t’a Zezi wakatẽ wã neb wʋsg ra yaa wa piis sẽn ka tar kɩɩma?
PE-KƖƖM sã n get a piis yell sõma, b tara laafɩ. Sebr a yembr wilgame tɩ pe-kɩɩm sã n talld a piis n kẽnd yamd sẽn beẽ bal n pa get b yell sõma, kaoosg zugẽ, b wat n lʋɩta bãase. La pe-kɩɩmã sã n get pesg fãa yell sõma, piisã fãa na n nobame, n tar laafɩ.
2 Yaa woto me ne tigingã nebã. Kãsem-dãmbã sẽn yaa pe-kɩɩmbã sẽn get tigingã ned kam fãa yellã nafda tigingã tõre. Tõe tɩ y tẽrame t’a Zezi sẽn yã kʋʋngã, b nimbãaneg yõk-a lame. Bala, “bãmb sũyã sãama wʋsgo, la bãmb pãngã fãa sɛɛme. Bãmb yaa wa piis sẽn ka tar kɩɩm ye.” (Mat. 9:36) Bõe yĩng tɩ nin-kãensã ra yaa wa piis sẽn ka tar kɩɩma? Bala, neb nins sẽn da segd n zãms-b Wẽnnaam tõogã ra yaa nin-toos la neb sẽn yaa dem-deme. Sẽn paase, b ra pa maand b sẽn zãmsd nebã bũmb ninsã ye. Wall tɩ tũudmã taoor dãmb ges nin-buiidã yellã, b ra kɩtdame tɩ Wẽnnaam tũub yaa toog wʋsg ne-ba, tɩ yaa wa nebã tʋka “zɩɩb sẽn yaa zɩsgo.”—Mat. 23:4.
3. Bõe la kãsem-dãmbã segd n tẽege?
3 Rũndã-rũndã, kãsem-dãmbã tara tʋʋmd sẽn tar yõod wʋsgo. Neb nins yell b sẽn getã yaa a Zeova ne a Zezi rẽnda. Nin-kãens tara yõod wʋsg a Zezi sẽn yaa ‘pe-kɩɩm-sõngã’ nifẽ, hal t’a ra-b ne a meng zɩɩm. (Zã 10:11; 1 Kor. 6:20; 1 Pɩɛ. 1:18, 19) A nong-b-la wʋsgo, n sak n kõ a vɩɩmã b yĩnga. Wakat fãa, kãsem-dãmbã segd n tẽegame tɩ yaa a Zezi Kirist sẽn yaa ‘piisã pe-kɩɩm-kãsengã’ la b taoor soaba.—Heb. 13:20.
4. Bõe yell la d na n gom sõs-kãngã pʋgẽ?
4 Wãn to la kãsem-dãmbã segd n ges tigingã neb yelle? Wẽnnaam datame tɩ tigingã nebã fãa ‘sak b taoor-dãmbã,’ tɩ kãsem-dãmbã me ra “soog [tigingã neb] ne pãng ye.” (Heb. 13:17; karm-y 1 Pɩɛɛr 5:2, 3.) Woto wã, wãn to la kãsem-dãmbã tõe n lʋɩ tigingã neb taoore, la b ra soogd-b ne pãnga? Wãn to la b tõe n ges tigingã neb yelle, la b gũus n da tũnug ne zu-sobend ning Wẽnnaam sẽn kõ-bã n maan tɩ loog nugu? D na n goma rẽ yelle.
‘A MOBGD-B-LA A YÃOOGẼ’
5. Ezai 40:11 goamã wilgda tõnd bõe a Zeova zugu?
5 No-rɛɛs a Ezai goma a Zeova yelle, n yeel woto: “Bãmb dɩlgda b nebã wa rũm-kɩɩm sẽn wãbend a rũmsi. Yẽ zãada a pe-bi wã ne a nusi, n mobg bãmb a yãoogẽ, la a tɛt b ma-rãmbã.” (Ezai 40:11) Gom-kãensã bilgda a Zeova sẽn get neb nins sẽn ka pãng wall sẽn tar zu-loeesã yell to-to. Wa pe-kɩɩm sẽn mi a piisã fãa sõma, tɩ bũmb sã n wa paam-b bɩ a yɩ tao-tao n sõng-bã, a Zeova mii tigingã ned kam fãa raabo, n sõngd-b ne yamleoogo. Wa pe-kɩɩm sẽn mi n dɩk pe-bil sẽn nan dog me n mobg a yãoogẽ wã, d sã n wa tar zu-loe-kɛgemse, a Zeova “sẽn yaa nimbãan-zoeer Ba” wã na n bels-d lame.—2 Kor. 1:3, 4.
6. Wãn to la kãsem-soab tõe n dɩk a Zeova togs-n-taare?
6 Ad d Ba a Zeova sɩd kõo kãsem-dãmbã sẽn be tigingã pʋgẽ wã mak-sõngo! Bãmb me segd n baood n bãngda bũmb nins sẽn pak tigingã nebã. Yaa kãsem-soab sẽn na n bãng zu-loees nins a tẽed-n-taasã sẽn tarã bal la a tõe n bãng a sẽn na n maan bũmb ning n sõng-ba, wall a sẽn tõe n yeel bũmb ning n keng b raoodo, la a sẽn tõe n maan dẽ wakat ningã. (Yel. 27:23) Rẽnd kãsem-soab segd n sõsda ne a tẽed-n-taasã sõma. Yaa sɩd t’a pa na n kẽ yɛl sẽn pa pak-a pʋgẽ ye. La a na n gũusdame n get tigingã neb manesem, n kelgd b sõsgã, la a modgd n ‘sõngd neb nins sẽn ka pãngã.’—Tʋʋ. 20:35; 1 Tes. 4:11.
7. a) A Ezekɩɛll ne a Zeremi wakatẽ wã, bõe yĩng tɩ Wẽnnaam nin-buiidã ra namsdẽ? b) A Zeova sẽn ning Israyɛll nebã taoor dãmb taalã zãmsda tõnd bõe?
7 Tẽeg-y manesem ning Wẽnnaam nin-buiidã taoor dãmb sẽn da tar a Ezekɩɛll la a Zeremi wakatẽ wã. A Zeova ning-b-la taale, bala b ra pa get nin-buiidã yell sõma wa sẽn segdã ye. A yeela woto: “We-rũms yõga m piisã n wãbe, pe-kɩɩmbã sẽn ka be wã yĩnga. Yaa m pe-kɩɩmbã sẽn ka baood m piisã yĩnga. Bãmb dɩlga b mens n bas m piisã.” Taoor dãmbã ra yaa neb sẽn get b mens yell bal la yão-be-rãmba, tɩ nin-buiidã namsdẽ. (Eze. 34:7-10; Zer. 23:1) Kiris-neb ne yʋʋrã taoor dãmb sẽn maand wa nin-kãensa wã, Wẽnnaam ninga bãmb me taale. Woto wilgdame tɩ tara yõod wʋsg tɩ kãsem-dãmbã ges tigingã neb yell sõma.
‘MAM KÕO YÃMB MAMSGO’
8. Kãsem-dãmbã sã n wa rat n sagl b tẽed-n-taaga, wãn to la b tõe n dɩk a Zezi togs-n-taare?
8 Ninsaalbã fãa sẽn pa zems zãngã, tigingã neb kẽer tõeeme n pa wʋm bũmb a Zeova sẽn dat tɩ b maan võor ye. B tõe n maanda bũmb sẽn pa zems ne Biiblã noyã, wall sẽn wilgd tɩ b tẽebã pa tar pãng ye. Kãsem-dãmbã manesem segd n yɩɩ wãn ne nin-kãensã? B segd n maana sũ-mar ne-b wa a Zezi sẽn maan sũ-mar ne a karen-biisã. Karen-biisã ra mii n wẽeda no-koɛɛma, n dat n bãng bãmb ned ning sẽn na n yɩ kãseng n yɩɩd Wẽnnaam Rĩungã pʋgẽ. La a Zezi kell n maana sũ-mar ne-ba, n da ket n zãmsd-b la a sagend-b tɩ b yɩ sik-m-mens rãmba. (Luk 9:46-48; 22:24-27) A waasa b naoã menga, n wilg-b yɩ sik-m-meng soab sẽn dat n yɛɛlga. Kãsem-dãmbã me segd n yɩɩ sik-m-mens rãmba.—Karm-y Zã 13:12-15; 1 Pɩɛ. 2:21.
9. Sagl-bʋg la a Zezi kõ a tʋm-tʋmdbã?
9 Daar a yembre, tʋm-tʋmd a Zak ne a Zã talla manesem sẽn wilg tɩ b tagsdame tɩ taoor lʋɩtbã segd n sooga b tẽed-n-taasã. B kosa a Zezi t’a kɩt tɩ b nin-yend zĩnd a goabga, t’a to wã zĩnd a rɩtg Wẽnnaam Rĩungã pʋgẽ. La a Zezi rems-b lame, n yeel woto: “Yãmb mi tɩ soolem toɛy-toɛyã nanambs maanda bãmb pãnga, la tɩ nin-kãsems soo bãmba. A kõn yɩ woto yãmb sʋk ye. La ned ning fãa sẽn dat n yɩ yãmb nin-kãsenga, bɩ a yɩ yãmb sõangda.” (Mat. 20:25, 26) Tʋm-tʋmdbã fãa ra segd n maoome n da bao n soog b tẽed-n-taasã ne pãnga, rat n yeel tɩ wilg-b bũmb nins b sẽn segd n maanã wakat fãa ye.
10. Wãn to la a Zezi rat tɩ kãsem-dãmb ges tigingã neb yelle, la mak-sõng bʋg la a Poll kõ zĩ-kãng wɛɛngẽ?
10 A Zezi ratame tɩ kãsem-dãmbã rɩk yẽ togs-n-taare, n ges b tẽed-n-taasã yell sõma. B segd n tʋmda b neer yĩnga, n pa baood n na n soog-b ye. Tʋm-tʋmd a Poll ra yaa sik-m-meng soab wa a Zezi, bala, a yeela Efɛɛz tigingã kãsem-dãmb woto: “Yãmb mii mam yel-manesem yãmb sʋk wakat fãa, hal mam sẽn wa Azi soolem pipi tɩ ta masã. Mam sakda Zu-soabã ne sik-m-meng yam.” A Poll ra ratame tɩ nin-kãensã yɩ sik-m-mens rãmba, la b tʋm wʋsg b tẽed-n-taasã neer yĩnga. A paasame: “Mam wilga yãmb bũmb fãa tɩ ne tʋʋmd a woto, a zemsame tɩ y tʋm n sõng neb nins sẽn ka pãngã.” (Tʋʋ. 20:18, 19, 35) A yeela Korẽnt tigingã neb me tɩ yẽ pa b tẽebã soaada, la t’a yaa b tʋm-n-taaga. A paasame tɩ yẽ sẽn dat yaa a sõng-b tɩ b tũ Wẽnnaam ne sũ-noogo. (2 Kor. 1:24) Ad a Poll sɩd kõo kãsem-dãmbã mak-sõngo!
TALL-Y SƖD KOƐƐGÃ KÃN-KÃE
11, 12. Wãn to la kãsem-soab tõe n sõng a tẽed-n-taag t’a yãk yam tɩ zemse?
11 Kãsem-dãmbã sã n na n kõ sagl fãa, b segd n tika Biiblã sẽn yaa ‘sɩd koɛɛgã’ zugu. (Tɩt 1:9) B tog n maana rẽ “ne sũ-maasem” me. (Gal. 6:1) Kãsem-soab sẽn tʋmd a tʋʋmd sõma modgdame n sõngd a tẽed-n-taasã tɩ b sã n na n yãk yam n maan bũmb bɩ yɩ b sẽn nong a Zeova la a Gomdã yĩnga. A pa modg-b ye. Wala makre, saam-biig sã n wa segd n yãk yam n maan bũmb sẽn tar yõod wʋsg n tɩ kos kãsem-soab sõngre, kãsem-soabã tõe n wilg-a-la Biiblã sagls wall tõnd sɛbã sẽn yet bũmb ning rẽ zugã. Sẽn paase, a tõe n sagla a tẽed-n-taagã t’a tags a sẽn na n yãk yam n maan bũmb ningã sẽn tõe n sãam wall maneg yẽ ne a Zeova zoodã yelle. Kãsem-soabã tõe n tẽeg-a lame tɩ tara yõod t’a reng n pʋʋs Wẽnnaam n yaool n yãk yam n maan bũmbu. (Yel. 3:5, 6) Rẽ fãa poore, kãsem-soabã na n basa a tẽed-n-taagã t’a yãk yam a toore.—Rom 14:1-4.
12 Yaa Biiblã bal la kãsem-dãmbã segd n tik n wilg b tẽed-n-taasã sore. Woto wã, zemsame tɩ b bãng Biiblã sõma tɩ b sã n na n kõ saglg fãa, bɩ b tik a zugu. B sã n maand woto, na n sõng-b lame tɩ b ra tũnug ne zu-sobend ning Wẽnnaam sẽn kõ-bã n maan tɩ loog nug ye. Kãsem-dãmbã segd n tẽegame tɩ pa bãmb la tigingã neb zu-soben-dãmb ye, la t’a Zeova ne a Zezi taoore, tigingã ned kam fãa tʋkda a zɩɩbo.—Gal. 6:5, 7, 8.
‘YƖ-Y MAMSG BÃMB YĨNGA’
Kãsem-dãmbã sõngda b zagsã rãmb tɩ b segend b mens koe-moonegã yĩnga (Ges-y sull 13)
13, 14. Zĩ-bʋs wɛɛngẽ la kãsem-dãmbã segd n kõ mak-sõngo?
13 Tʋm-tʋmd a Pɩɛɛr sẽn sagl tigingã kãsem-dãmb tɩ b ra soog b tẽed-n-taasã ne pãngã poore, a yeel-b lame tɩ b yɩ “mamsg bãmb yĩnga.” (1 Pɩɛ. 5:3) Wãn to la kãsem-soab tõe n yɩ mamsg a tẽed-n-taasã yĩnga? D tẽeg bũmb a yiib Biiblã sẽn yete. Pipi, Biiblã wilgame tɩ nand tɩ b yãk saam-biig t’a lebg kãsem-soaba, a segd n yɩɩ ned sẽn tõe a menga, la sẽn gũusd t’a yel-manesem yaa sõma, rat n yeel t’a segd n mii Wẽnnaam noyã sõma, la a mi a sẽn tõe n tũ-b to-to. Baa a sã n wa be yell taoore, a maagda a yĩnga, n tags sõma n yaool n yãk yam n maan bũmbu. Yiib-n-soaba, a segd n yɩɩ ned sẽn get “a meng yir dãmb yell tɩ zemse.” Kãsem-soab sã n kẽe kãadem, a segd n geta a pagã ne a kambã yell sõma, bala, “ned sã n ka tõe n ges a meng yir yelle, yẽ na n maana wãn n tall Wẽnnaam tẽedbã?” (1 Tɩm. 3:1, 2, 4, 5) Tigingã neb sã n ne kãsem-dãmbã sẽn maand woto, b yam gãe bãane, bala, b miime tɩ b tõe n teeg-b lame.
14 Kãsem-dãmbã lʋɩta taoor koe-moonegã pʋgẽ me, n kõt b tẽed-n-taasã mak-sõngo. Zĩ-kãng wɛɛngẽ, a Zezi kõo kãsem-dãmbã mak-sõngo. A sẽn wa n be tẽngã zugã, koe-moonegã n da pak-a n yɩɩda. Sẽn paase, a wilga a karen-biisã b sẽn segd n moon koɛɛgã to-to. (Mark 1:38; Luk 8:1) Kãsem-dãmbã me sã n naagd b tẽed-n-taasã n moondẽ, nooma b tẽed-n-taasã. Bala, b nee kãsem-dãmbã sẽn moond ne yẽesem to-to wã, n tõe n dɩk yam b sẽn zãmsd nebã Biiblã to-to wã pʋgẽ. Kãsem-dãmbã sẽn modgd n moond koɛɛgã baa b sẽn tar tʋʋm wʋsgã, kɩtdame tɩ tigingã neb rɩkd b togs-n-taar n moond ne yẽesem. Bũmb a to me kãsem-dãmbã sẽn tõe n maan n kõ mak-sõng yaa b sẽn na n segend tigissã sõma, n kõt leoore, la b tʋmd tigingã tʋʋm a taab wala Rĩungã roog pɩɩsg la a manegre.—Ef. 5:15, 16; karm-y Hebre dãmb 13:7.‘SÕNG-Y KA PÃNG RÃMBÃ’
Kãsem-dãmbã kõta mak-sõng koe-moonegã wɛɛngẽ (Ges-y sull 14)
15. Bõe yĩng la kãsem-dãmbã sẽn mi n kẽnd n kaagd b tẽed-n-taasã?
15 Pe-kɩɩm-sõng sã n yã pesg sẽn pogl wall sẽn bẽeda, a yɩta tao-tao n tɩp-a. Woto me, kãsem-dãmbã sã n yã tigingã ned sẽn namsd wall tẽeb sẽn komse, b tog n yɩɩ tao-tao n sõng-a. Sẽn kʋʋl-bã la bãad-rãmbã tõe n data sõngr takɩ, la sẽn tar yõod n yɩɩd yaa kãsem-dãmbã sẽn na n mii n karem Biiblã n keng b raood la b bels-ba. (1 Tes. 5:14) Tõe tɩ tigingã kom-bɩɩs me maooda ne “yãadem datem-wẽnga.” (2 Tɩm. 2:22) Rẽ n so tɩ kãsem-dãmbã mi n kẽnd n kaagd b tẽed-n-taasã, sẽn na yɩl n bãng zu-loees nins b sẽn tarã, la b bao vɛrse sẽn zems n karem tɩ keng b raoodo. Kãsem-dãmbã sã n wae n kaagd tigingã neb woto, tõe n sõngame tɩ b welg zu-loees wʋsg nand tɩ b lebg kãsemse.
16. Tigingã ned sã n maan yel-wẽn-kãsenga, bõe la kãsem-dãmbã segd n maane?
16 La tigingã ned tõe n wa maana yel-wẽn-kãseng tɩ yẽ ne a Zeova zoodã rat n sãame. Sã n wa yaa woto, bõe la kãsem-dãmbã segd n maane? Karen-biig a Zak yeela woto: “Ned bee yãmb sʋk n ka laafɩ bɩ? Bɩ a bool Wẽnnaam tẽedbã kãsem-dãmbã, la bɩ bãmb tik a soab ne kaam ne Zu-soabã yʋʋr n pʋʋs Wẽnnaam a yĩnga. Tẽeb pʋʋsg na maag bãadã, la Zu-soabã na yik-a t’a paam laafɩ, la yẽ sã n da maana yel-wẽnã, a na paam sugri.” (Zak 5:14, 15) La baa sẽn maan-a yel-wẽndã sã n pa “bool Wẽnnaam tẽedbã kãsem-dãmbã,” kãsem-dãmbã sã n bãng yellã, b segd n yɩɩ tao-tao n sõng-a. B sã n pʋʋsd b tẽed-n-taasã yĩnga, la b naagd-b n pʋʋsd n gomd zu-loees nins sẽn pak-bã yell la b teend-ba, na n kenga b tẽed-n-taasã raood tɩ b ket n tũud Wẽnnaam ne sũ-noogo. Woto la b wilgd tɩ b yaa kãsem-dãmb sẽn tʋmd b tʋʋmd sõma.—Karm-y Ezai 32:1, 2.
17. Kãsem-dãmbã sã n dɩkd ‘pe-kɩɩm-kãsengã’ togs-n-taare, wãn to la nafd tigingã nebã?
17 Sẽn yaa bũmb ning fãa la kãsem-dãmbã maand a Zeova siglgã pʋgẽ, b maoodame n dɩkd “pe-kɩɩm-kãseng” a Zezi Kirist togs-n-taare. Rẽ nafda tigingã neb fãa, la sõngd-b tɩ b ket n tũud a Zeova ne sũ-noogo. Woto fãa kɩtame tɩ d sũy yaa noog ne d kãsem-dãmbã, tɩ d pẽgd a Zeova sẽn yaa d pe-kɩɩm sẽn ka to wã.
