1, 2. (a) Entaama zaaba nizireebererwa gye niki ekirikubaho? (b) Ahabw’enki baingi baabaire bari nk’entaama ezitaine muriisa omu bunaku bwa Yesu?

ENTAAMA niziba gye, omuriisa waazo yaaba naazifaho kandi arikuzireeberera. Kurugiirira aha kitabo kimwe ekirikukwata aha kuriisa entaama, “omuntu yaaba naatwara entaama omu bunyaatsi kwonka atarikuzifaho, nizibaasa kuriibwa enyamaishwa nari zirware kandi zitarikumuha n’amagoba.” Kwonka yaaba naareeberera gye entaama ze kandi akazifaho, niziija kuba gye.

² Omuringo ogu abareeberezi barikufayo kandi bakareeberera entaama za Ruhanga ezi bakwatsiibwe, nigugasira buri ntaama omu kibiina. Ijuka ngu Yesu akagirira abantu esaasi ahabw’okuba “bakaba baburaburiirwe, bashobeirwe nk’entaama ezitaine muriisa.” (Mat. 9:36) Ahabw’enki baabaire bari omu mbeera mbi nk’egyo? N’ahabw’okugira ngu abo abaabaire baine obujunaanizibwa bw’okubeegyesa abaheereza ba Ruhanga ebiragiro, bakaba baine omwaga, batarikusiima kandi bari endyarya. Abeebembezi b’omuri Israeli bakaba beekoreza abantu “emitwaro erikuremeera,” omu mwanya gw’okubahwera.​—Mat. 23:4.

3. Abareeberezi baine kuguma nibaijuka ki baaba nibahikiiriza obujunaanizibwa bwabo nk’abariisa b’entaama za Ruhanga?

³ Abakristaayo abariisa ab’obunaku obu, baine obujunaanizibwa bw’amaani. Entaama ezi barikureeberera n’eza Yehova na Yesu, owaayeyetsire “Omuriisa omurungi.” (Yoh. 10:11) Entaama ‘zikagurwa n’obuguzi bwingi’ obu Yesu yaashashuriire “n’eshagama ye ey’obuguzi bwingi.” (1 Kor. 6:20; 1 Pet. 1:18, 19) Yesu akakunda munonga entaama ze yaahika n’aha kuhayo amagara ge ahabwazo. Abareeberezi bashemereire kuguma nibaijuka ngu n’abariisa abari ahansi y’obureeberezi bw’Omwana wa Ruhanga, Yesu Kristo,  “omuriisa w’entaama omukuru.”​—Heb. 13:20.

4. Nituza kushwijuma ki omu kicweka eki?

⁴ Mbwenu shi, abareeberezi bashemereire kutwariza bata entaama? Abari omu kibiina nibahigwa kworobera abareeberezi. Kwonka abareeberezi nabo, nibahigwa kutategyekyesa eikama obusyo obu bakwatsiibwe. (Heb. 13:17; shoma 1 Petero 5:2, 3.) Mbwenu shi, abareeberezi nibabaasa kureeberera bata entaama batarikuzitegyekyesa eikama? Nari abareeberezi nibabaasa bata kufayo aha byetengo by’entaama batarikukoresa kubi obushoboorozi obu Ruhanga abahaire?

5. Ebigambo ebiri omu Isaaya 40:11 nibyoreka ki ahari Yehova?

⁵ Arikugamba ahari Yehova, nabi Isaaya akagira ati: “Aryariisa obusyo bwe nk’omuriisa, aryakiikira abaana b’entaama ze omu mikono, abatwarire omu kifuba kye, n’ezirikuhaka azishotoore.” (Isa. 40:11) Ebigambo ebyo nibyoreka ngu Yehova naafayo aha byetengo by’abari omu kibiina abataine maani. Nk’oku omuriisa arikumanya ebyetengo bya buri ntaama eziri omu kitsibo kye, kandi arikuba ayeteekateekire kuzihwera, na Yehova naamanya ebyetengo by’abo abari omu kibiina kandi naaba ayeteekateekire kubahwera. Nk’oku omuriisa w’entaama arikutwarira entaama ento omu kifuba kye, na Yehova “Tataitwe ow’okusaasira” naija kuturabya omu bwire bw’oburemeezi. Naija kutuhwera twaba nitugyezibwa nari twaba twine eki turikwetenga.​—2 Kor. 1:3, 4.

6. Abareeberezi nibabaasa kutooreza bata Yehova?

⁶ Abareeberezi ka nibabaasa kwegyera ekintu kikuru ahari Tataitwe ow’omu iguru! Nka Yehova, baine kufayo kumanya ebyetengo by’entaama. Abareeberezi kubaasa kuhwera abahweiremu amaani, baine kumanya oburemeezi obu baine n’ebyetengo byabo. (Enf. 27:23) Buzima, omureeberezi aine kuba naahurizana gye n’abaheereza ba Ruhanga bagyenzi be. N’obu araabe atarikwetatsya omu nshonga ezitarikumukwataho, naata omutima aha bi arikureeba n’ebi arikuhurira omu kibiina kandi naafayo “kuhwera abataine maani.”​—Byak. 20:35; 1 Tes. 4:11.

7. (a) Abaheereza ba Ruhanga bakaba nibatwarizibwa bata omu bunaku bwa Ezekieli na Yeremia? (b) Yehova okutasiima abariisa b’entaama abatari beesigwa nitubaasa kukyegaho ki?

⁷ Yetegyereze emiteekateekyere y’abareeberezi etaraashemeize Ruhanga. Yehova tarasiimire abo abaabaire baine obujunaanizibwa bw’okureeberera entaama, kwonka abaabaire batarikukikora gye, omu bunaku bwa Ezekieli na Yeremia. Tihaine n’omwe owaabaire naafayo kureeberera entaama, n’ahabw’ekyo zikaba zihikwaho oburemeezi kandi zitaataana. Omu mwanya gw’okuriisa entaama, abariisa abo bakaba nibaziitsa omwaga kandi ‘barikweriisa bonka.’ (Ezk. 34:7-10; Yer. 23:1) Nk’oku Ruhanga atarasiimire abariisa abo, nikwo na hati atarikusiima abeebembezi b’amadiini g’ebishuba. Kandi ekyo nikyoreka ngu abareeberezi baine kukunda kandi bakafayo aha ntaama za Yehova.

8. Abareeberezi baine kutooreza Yesu bata baaba nibaha ab’eishe-emwe bagyenzi baabo obuhabuzi?

⁸ Ahabw’okutahikiirira, abamwe nibabaasa kutarahuka kwetegyereza ebi Yehova arikwenda ngu bakore. Nibabaasa kutagyendera aha buhabuzi bw’Ebyahandiikirwe, nari nibabaasa kutwaza omu muringo ogurikworeka ngu bakiri bato omu by’omwoyo. Mbwenu ekyo abareeberezi bashemereire kukitwara bata? Bashemereire kutooreza Yesu owaagumisiririize abeegi be, obu baabaire nibahakana  ngu n’oha oraabe mukuru omu Bukama bwa Ruhanga. Akagumizamu naabeegyesa kandi arikubaha n’obuhabuzi aha ku baabaire baine kuba abacureezi. (Luk. 9:46-48; 22:24-27) Yesu akataho eky’okureeberaho ky’obucureezi, omutwarize ogu abareeberezi baine kugira.​—Shoma Yohaana 13:12-15; 1 Pet. 2:21.

9. Ni miteekateekyere ki ei Yesu yaahigire abeegi be kugira?

⁹ Emiteekateekyere ya Yesu aha bujunaanizibwa bw’abareeberezi neetaana aha ya Yakobo na Yohaana. Bakaba nibenda omwanya gw’ahaiguru omu Bukama bwa Ruhanga. Kwonka Yesu akabahwera kuhindura emiteekateekyere yaabo arikugira ati: “Nimumanya abakuru b’abanyamahanga ku babategyekyesa eikama, n’abakuru baabo bakabaragiiza obushoboorozi. Kwonka omuriimwe tikwo kiriba; weena orikwenda kuba mukuru omuriimwe, ashemereire kuba omuheereza waanyu.” (Mat. 20:25, 26) Entumwa bakaba baine kwetantara omuze gw’okutegyekyesa eikama bagyenzi baabo nari kubaragiira.

10. Yesu naayenda ngu abareeberezi batwarize bata abari omu kibiina, kandi Paulo akataho ky’okureeberaho ki omu nshonga egyo?

¹⁰ Yesu naayenda ngu abareeberezi batwarize entaama za Ruhanga nk’oku yaabaire naazitwariza. Bashemereire kuba beeteekateekire kuheereza ab’eishe-emwe bagyenzi baabo omu mwanya gw’okubategyeka. Entumwa Paulo akaba ari omucureezi, kandi akagambira abareeberezi b’omu kibiina ky’omuri Efeso ati: “Nimumanya oku naatwire naimwe ebiro byona okuruga aha izooba eri naahikiireho omuri Asia; nkaba nkorera Mukama n’obucureezi bwingi.” Akaba naayenda ngu abareeberezi abo bahwere abandi omu muringo gw’obucureezi. Akagira ati: “Omuri byona mbabeereire eky’okureeberaho, ngu mubone kukora mutyo emirimo, kuhwera abataine maani.” (Byak. 20:18, 19, 35) Paulo akagambira Abakorinso ngu akaba atarikutegyeka kwikiriza kwabo. Kureka ngu akaba ari omukozi mugyenzi waabo arikwenda kubareetera kushemererwa. (2 Kor. 1:24) Paulo akateeraho abareeberezi eky’okureeberaho kirungi ky’obucureezi obunaku obu.

11, 12. Omureeberezi naabaasa kuhwera ata ow’eishe-emwe mugyenzi we omu kucwamu?

¹¹ Omureeberezi omu kibiina ashemereire kuba “orikuhamira aha kigambo ky’okwesigwa ekiri nk’okwegyesa” kwe oku kuri. (Tit. 1:9) Kwonka ekyo naakikora “n’omutima gw’obucureezi.” (Gal. 6:1) Omu mwanya gw’okugyemesereza abari omu kibiina kutwaza omu muringo ogu arikwenda, omureeberezi murungi naabahwera kwecweramu barikwihirira ahari rukundo ei bainiire Yehova n’Ekigambo kye. Omureeberezi naabaasa kworeka ow’eishe-emwe emisingye kuruga omu Byahandiikirwe yaaba aine eki arikwenda kucwamu. Kandi naabaasa n’okuhikaanisa nawe ebiteekateeko aha biri omu bitabo byaitu ebirikugamba aha nshonga egyo. Naabaasa kumuhwera kureeba oku emitwarize emwe erikubaasa kushiisha omukago gwe na Yehova. Omureeberezi naabaasa kuhwera ow’eishe-emwe kureeba obukuru bw’okushaba Yehova obuhabuzi atakacwiremu. (Enf. 3:5, 6) Yaaheza kugaaniira n’ow’eishe-emwe aha nshonga ezo, naamureka kwecweramu.​—Rom. 14:1-4.

¹² Obushoboorozi obu abareeberezi baine n’oburikworekwa omu Byahandiikirwe bwonka. N’ahabw’ekyo, ni kikuru ngu tukorese gye Baibuli kandi tugyendere aha buhabuzi oburimu. Abareeberezi baakora batyo, nikibahwera kwetantara kukoresa kubi obushoboorozi. N’obu abareeberezi  baraabe baine obujunaanizibwa bw’okureeberera ekibiina, buri omwe omu kibiina naajunaanwa ahari Yehova na Yesu ahabw’ebi arikucwamu.​—Gal. 6:5, 7, 8.

13, 14. Ni miringo ki ei omureeberezi arikubaasa kuteeraho abandi eky’okureeberaho?

¹³ Bwanyima y’okuhiga abareeberezi omu kibiina kwetantara ‘kutegyekyesa eikama obusyo obu baakwatsiibwe,’ entumwa Petero akabahiga kuteeraho entaama “eky’okureeberaho.” (1 Pet. 5:3) Abareeberezi nibabaasa kuteeraho bata entaama eky’okureeberaho? Yetegyereze ebintu bibiri ebi ogwo orikwenda kuba omureeberezi ashemereire kuhikiiriza. Ashemereire kuba ari “omwerinzi” kandi arikumanya kwebembera gye ab’omu ka ye. Omureeberezi yaaba aine eka, aine kwebembera ab’omu ka ye arikubateeraho eky’okureeberaho, ahakuba omuntu otarikumanya kwebembera ab’omu ka ye, naabaasa ata kwebembera ekibiina kya Ruhanga? (1 Tim. 3:1, 2, 4, 5) Kubaasa kuhikiiriza ebirikwetengyesa kuba omureeberezi, ­omushaija aine kuba ari omwerinzi arikwetegyereza gye emitindo ya Ruhanga, kandi arikumanya kugigyenderaho omu bi arikukora byona. Ashemereire kuba naayetwara atarikurahukiiriza kucwamu. Abari omu kibiina baareeba abareeberezi baine emitwarize nk’egyo, nibabeesiga.

¹⁴ Kandi abareeberezi nibateeraho ab’eishe-emwe eky’okureeberaho barikwejumbira kimwe omu kubuurira. Omu nshonga egi, Yesu akateeraho abareeberezi eky’okureeberaho. Obu Yesu yaabaire ari omu nsi, akatwara okubuurira amakuru marungi nk’ekintu kikuru munonga. Akooreka abeegi be oku omurimo ogu gwabaire gwine kukorwa. (Mak. 1:38; Luk. 8:1) Omu bunaku obu, ka nikigaruramu ababuurizi amaani kubuurira hamwe n’abareeberezi, bakareeba obweziriki bwabo omu murimo ogu ogw’okukiza amagara, kandi bakeegyera aha miringo ei barikukoresa omu kwegyesa abantu! Abareeberezi ku barikukoresa obwire bwabo n’amaani gaabo kwejumba omu kubuurira butoosha, n’obu baraabe baine bingi by’okukora, ekyo nikihiga abari omu kibiina boona kugira omujinya nk’ogwabo. Kandi abareeberezi nibateeraho ab’eishe-emwe eky’okureeberaho barikutebeekanisiza enteerane kandi bakazejumbamu, n’emirimo y’ekibiina endiijo, nk’okuboneza n’okureeberera gye Ekyombeko ky’Obukama.​—Efe. 5:15, 16; shoma Abaheburaayo 13:7.

15. Ni nshonga ki ezirikureetera abareeberezi kutaayaayira ab’eishe-emwe?

¹⁵ Omuriisa murungi naarahuka kuhwera entaama ezirikuba ziine obuhuta nari ezirwaire. Nikyo kimwe, abareeberezi baine kurahuka kuhwera abari omu kibiina abaine oburemeezi nari abarikwetenga  obuhwezi omu by’omwoyo. ­Abakaikwire n’abarwaire nibaba baine kuhwerwa omu by’omubiri, kwonka okukira munonga baine kuhwerwa omu by’omwoyo kandi bakahuumurizibwa. (1 Tes. 5:14) Eminyeeto omu kibiina, nibabaasa kuba nibateeraho kusingura “okwetenga okubi kw’obutsigazi.” (2 Tim. 2:22) N’ahabw’ekyo, abareeberezi baine kutaayaayira ab’eishe-emwe baine ekigyendererwa ky’okumanya embeera zaabo, kandi bakabagumya barikubaha obuhabuzi kuruga omu Byahandiikirwe. Abareeberezi baarahuka kuha ab’eishe-emwe obuhwezi obu barikwetenga omu by’omwoyo, oburemeezi obw’amaani nibubaasa kwetantarwa.

16. Ow’eishe-emwe omu kibiina yaaba aine oburemeezi bw’amaani, abareeberezi nibabaasa kukora ki?

¹⁶ Kwonka shi ow’eishe-emwe omu kibiina ku yaakutunga oburemeezi bw’amaani kikashiisha omukago gwe na Yehova? “Omuriimwe harimu orwaire? Atume aha bakuru b’ekanisa [b’ekibiina] bamushabire, bamusiigye amajuta omu iziina rya Mukama; n’okushaba okurimu okwikiriza kuryakiza ogwo orwaire, Mukama amwimutsye; kandi ku araabe aine ebibi ebi akozire, aryabisaasirwa.” (Yak. 5:14, 15) Abareeberezi baine kurahuka kuhwera oine oburemeezi ahonaaho baakimanya, n’obu yaakuba atabeetsire. Abareeberezi nibooreka ngu n’abariisa barungi abarikuhiga ab’eishe-emwe kugumizamu nibaheereza Yehova, baashaba nabo kandi bakabahwera omu by’omwoyo.​—Shoma Isaaya 32:1, 2.

17. Niki ekirikurugamu, abareeberezi baatooreza “omuriisa omukuru”?

¹⁷ Omuri byona ebi barikukora omu kibiina kya Yehova, abareeberezi nibateeraho kutooreza “omuriisa omukuru,” Yesu Kristo. Abari omu kibiina nibagasirwa munonga kandi nibeyongyera kuba gye omu by’omwoyo baaba nibatunga obuhwezi bw’abareeberezi omu kibiina. Ebi byona, bishemereire kutureetera kugumizamu nituhimbisa Omuriisa waitu orikukirayo, Yehova.