1, 2. a) ¿Imataq pasakun alli atiendishqa üshakunawan? b) Jesus kë patsachö kanqan witsan, ¿imanirtaq nunakunaqa mitseqninnaq üsha cuenta këkäyarqan?

ÜSHAQA mas miran mitseqnin kuyar atiendiptinmi. Üshata imanö wätanapaq kaqta willakoq librum kënö nin: “Juk mitsikoq üshankunata mitsinanlla mitsir shumaq mana atiendiptinqa, üshakunaqa rasmi qeshyar ushakäriyanqa y wätakunqampis manam ni imapaq sirwinqatsu”. Peru üshakunata shumaq kuyëpa atiendiyaptinqa mirarmi qallëkun.

² Jina tsënöllam cristiänukunawampis pasakun, Diospa kaqchö alli kayänampaqqa anciänukunam shumaq cuidayänan. Musyanqantsiknöpis, Jesusqa mëtsikaq nunakunata ‘mitseqninnnaq üsha cuenta pantacashqa puriquicaqta’ rikarmi llakiparqan (Mat. 9:36). ¿Imanirtaq nunakuna tsënö këkäyarqan? Porqui Diospa Leyninta yachatsiyänampaq carguyoq kaqkunam, alli tukoq, qayapäkoq y alläpa mandakoq kayaq. Yanapayänampa rantinmi, “imeca lasaq qepita juytutseq cuenta” sasakunata (ajakunata) rurayänampaq mandayaq (Mat. 23:4).

3. ¿Imatataq anciänukunaqa yarpäyänan?

³ Kanan witsan anciänukunapis mitsikoq karmi, alläpa jatun carguyoq kayan. Cuidayanqan üshakunaqa Jehoväpa y Jesuspam kayan. Jesusqa “alli mitsikoqmi” kä nirqanmi (Juan 10:11). Üshakunaqa alläpa chaniyoq päguwanmi rantishqa kayashqa: Jesus ‘yawarninta’ ramanqanwan (1 Cor. 6:20; 1 Pëd. 1:18, 19). Pëqa alläpam kuyan, tsëmi pëkunarëkur wanurqan. Anciänukunaqa yarparäyänanmi trabäjunkunataqa ‘alli mitsicoq’ Jesus rikarëkaptin rurëkayanqanta (Heb. 13:20).

4. ¿Imapitataq yachakushun kë yachatsikïchö?

⁴ Tsëqa, ¿imanötaq anciänukuna tratayanman  cristiänu mayinkunata? Congregacionchö kaqkunataqa mandamantsik, “yachatsir pushayäshoniquicunata cäsucuyanqui” nirmi. Y anciäkunkunatam mandan, “Diosman creyicoqcunata” mana allipa mana tratayänampaq (Heb. 13:17; leyi 1 Pëdru 5:2, 3). Tsëpenqa, ¿imanötaq Diospa üshakunata yanapayanman mana allipa mana tratashllapa?

5. ¿Imatataq Jehoväpita yachatsimantsik Isaïas 40:11 textu?

⁵ Jehoväpaq parlarninmi profëta Isaïas kënö nirqan: “Juk mitsikoqnömi üshankunata mitsinqa. Rikranwanmi üshankunata juntanqa, y mellqaninchömi apanqa. Y chichikaq kaqkunatam kuyëllapa apanqa” (Is. 40:11). Kënö ninqanqa rikätsikun, kallpannaq këkaqkunata y qeshyëkaqkunata llapan wanayanqanta Jehoväqa qonqantam. Imanöllam juk mitsikoq cada üshata reqin y atiendinampaq listu këkan, tsënöllam Jehoväpis sirweqninkunata cada ünuta reqin y wananqanta qon, y alläpam kushikun yanaparnin. Tsëraq yurishqa achkasta (ashkashta) juk mitsikoq mellqaninchö apanqannöllam Jehoväpis, ‘allapa ancupäcoq Papä’ karnin, mana allikunapa pasashqa shumaq yanapamantsik. Imëka pruëbakunapa pasashqa o imakunata wanashqapis, pëqa shoqamäshun y kallpatam qomäshun (2 Cor. 1:3, 4).

6. ¿Imanötaq juk anciänu Jehovä ruranqannölla alli mitsikoq kanman?

⁶ ¡Jehoväqa alläpa alli ejemplum anciänukunapaq! Jehovänöllam, pëkunapis alkäbulla këkäyänan üshakuna imakunapa pasëkäyanqanta. Porqui imakunapa pasëkäyanqanta y imata wanëkäyanqanta musyarninqa, rasllam y shumaqmi yanapariyanqa (Prov. 27:23). Awmi, anciänukunaqa cristiänu mayinkunawan imallatapis parlarëkäyänanmi. Kawëninkunaman mana mëtikurpis, congregacionchö rikäyanqanman y wiyayanqanmanqa interesäkuyanmi o kuyëpam “dëbil kaqkunata yanapayan” (Hëch. 20:35, NM; 1 Tes. 4:11).

7. a) Ezequielwan Jeremïas kawayanqan witsanchö, ¿imanötaq Diospa üshankunata mitsikoqkuna tratayarqan? b) ¿Ima precisaq yachatsikïtataq anciänukuna yachakuyan mana alli mitsikoqkunata Jehovä piñapanqampita?

⁷ Yarpärishun Ezequielwan Jeremïas kawayanqan witsanchö, Diospa markanta cuidaqkuna imanö kayanqanman y üshankunata shumaq mana cuidayanqampita Dios piñapanqanman. Pipis mana cuidaptinmi, üshakunaqa mana alli nunakunapa makinkunaman ishkiriyaq o oqrakäriyaq. Cuidayänampa rantinmi, kë mitsikoqkunaqa, kikinkunapaq imëkata ruratsiyaq (Ezeq. 34:7-10; Jer. 23:1). Tsënö rurayanqanrëkurmi cristiänu tukoqkunapa pushaqninkunatapis Jehovä chaskinnatsu. Këqa anciänukunatapis yanapanmi cristiänukunata kuyëpa cuidayänampaq.

8. ¿Imatataq yachakuntsik apostulninkunata Jesus consejanqampita?

⁸ Jutsa ruraq karnin, wakin üshakunaqa itsa endiendiyanmantsu pëkunapita Dios imata shuyaranqanta. Itsa Bibliapa consëjunkuna ninqanmannö imatapis rurayanmantsu o alleq mana pensar imatapis rurariyanman. ¿Tsëkuna pasakuptinqa imatataq anciänukuna rurayanman? Yarpäyänan Jesus pacienciayoq kanqantam. Qateqninkuna mas precisaq këta munar plëtuyaptinmi, pëqa mana piñakushllapa shumaq yachatsirqan y consejarqan humildi kayänampaq (Lüc. 9:46-48; 22:24-27).  Chakinkunata paqapurmi (awipurmi) yachatsirqan humildi kayänampaq, tsëtam anciänukunapis rikätsikuyänan (leyi Juan 13:12-15; 1 Pëd. 2:21).

9. ¿Imanötaq Jesus consejarqan discïpulunkunata?

⁹ Mitsikoq këtaqa Jesus rikarqan alläpa jukläyam, manam apostulninkuna Santiäguwan Juan juk kutichö rikäyanqannötsu. Ishkampis Diospa Gobiernunchö precisaq këtam ashiyarqan. Peru Jesusqa kënömi consejarqan: “Musyayanqequinomi Diosman mana marcäcoq mandacoqcunaqa nunacunata allqutsayan, y puedeq quenincunaman atenicurmi, nunacunata munashqanta rurayan. Peru qamcunachoqa manam tsenotsu canqa. Meqequipis mandacoq queta munarqa, llapantam sirwiyänequi” (Mat. 20:25, 26). Apostulkunaqa corregikuyänanmi karqan yanaqinkunata mana allipa mana tratayänampaq o mas precisaq tukoq mana kayänampaq.

10. a) ¿Anciänukuna üshakunata imanö tratayänantataq Jesus munan? b) ¿Ima ejemplutataq Pablu jaqishqa?

¹⁰ Jesusqa shuyaran pë tratanqannölla üshankunata anciänukuna tratayänantam. Cristiänu mayinkunata sirwiyänampaqmi listu këkäyänan y manam pëkunata sirwiyänantatsu shuyaräyänan. Pabluqa humildi kanqantam rikätsikurqan, tsëmi Ëfesuchö këkaq anciänukunaman kënö qellqarqan: “Qamkunaqa allim musyayanki Asia markëkikunaman chämushqäpita patsa imanö portakushqäta, imëpitapis qamkunawan juntum karqö Diosnintsikta esclävunö sirwirnin”. Pabluqa munarqan kë anciänukuna rasumpa y humildäwan wakin kaqkunata yanapayänantam. Tsëmi nirqan: “Imëkanöpam yachatsiyarqoq noqanölla trabajarnin dëbil kaqkunata yanapayänëkipaq” (Hëch. 20:18, 19, 35, NM). Juk kutichönam corintuchö cristiänukunaman qellqarnin nirqan markäkïninkunapa duëñun mana kanqanta, sinöqa pëkuna Jehoväta kushishqa sirwiyänampaq yanapakoqlla kanqanta (2 Cor. 1:24). Rikanqantsiknöpis Pabluqa, humildi kanqanta y alli trabajaq kanqanta anciänukuna qatiyänampaqmi juk alli ejempluta jaqishqa.

11, 12. ¿Imanötaq juk anciänu cristiänu mayintayanapanman alli kaqkunata akranampaq?

¹¹ Alläpam precisan anciänukunaqa, ‘Diospa palabrantaqa, wiyashqantanolla, caqllata yachatsicuyänan’ (Tïtu 1:9). Peru tsëtaqa rurayänan, ‘shumag palabrankunawanmi’ (Gäl. 6:1, NTCN). Imanö rurayänampaq kaqta obligayänampa rantinmi, juk alli mitsikoqqa Diospa palabranta shonqunman chätsita procuran. Imatapis dicidiyänampaqqa Bibliapa mëqan musyatsikïninkuna y publicacionkuna ninqanman yarpänampaqmi yanapanan. Jina ima rurëtapis akraptin Dioswan amïgu këninchö imanö yanapanampaq kaqman yarpänampaqmi yanapanan. Jina rikätsinanmi imatapis manaraq akrarnin Diosman mañakunan alläpa precisanqanta (Prov. 3:5, 6). Tsëkunata alleq rikäratsirqa kikin akrakunampaqmi jaqirinan (Rom. 14:1-4).

¹² Consëjakuyänampaq y yachatsikuyänampaqqa Bibliallapitam anciänukunaqa yachatsikïkunata jorqayänan y manam kikinkunapa yarpëninkunapitatsu. Tsëmi precisan Bibliata alli utilisëta yachayänan, ninqannölla rurayänampaq. Tsënöpam cristiänu mayinkunata mana alliqa tratayanqatsu. Anciänukunaqa, Jehoväpa y Jesuspa mandädun ruraqllam kayan, y cada cristiänum rurëninkunamannö  Jehoväta y Jesusta cuentata qoyanqa (Gäl. 6:5, 7, 8).

13, 14. ¿Imakunachötaq anciänukunaqa alli ajemplu kayanman cristiänu mayinkunapaq?

¹³ ‘Patronno’ mana kayänampaq anciänukunata consejarirmi apostul Pëdruqa animarqan, “antis alli ruraq cayë pecunapaq” nirnin (1 Pëd. 5:3). ¿Imanötaq juk anciänu qatinman kë consëjuta? Rikärishun anciänu këta munaq cristiänu kë ishkë precisaq rurëkunata cumplinan precisanqanta: “Alli yarpeninwan shumaq portacoq” kananta y ‘wayincho caqcunatapis allapa shumaq manijaq’ kananta. Anciänu kanampaqqa ‘alli yarpeninwan shumaq portacoqmi’ kanan, tsë ninanqa Diospa musyatsikïninkunatam alleq entiendinan y kawëninchö ruranan. Imatapis alleq pensëkur-raq ruraq nunam kanan y manam rasllaqa imatapis rurarinantsu. Jinamampis familiayoq karqa, familianta alli dirigeqmi kanan, “porqui pipis wayincho mana mandaquita yachecar ¿Imanoparaq Diosman creyicoqcunata cuidanman!” (1 Tim. 3:1, 2, 4, 5). Tsënö ruraqta rikarninmi, congregacionchö kaqkunaqa pëkunaman markäkuyanqa.

¹⁴ Jina anciänukunaqa Diospita yachatsikïchöpis ejemplum kayänan. Imanö rurayänampaq kaqtaqa Jesusmi yachatsirqan, pëpaqqa Diospita yachatsikïmi kawëninchö mas precisarqan (Mar. 1:38; Lüc. 8:1). Kanan witsanqa, Diospita yachatsikoqkunaqa alläpam kushikuyan anciänunkunawan yachatsikurnin y imanö yachatsikuna kanqanta pëkunapita yachakurnin. Anciänukuna rurëninkunawan alläpa ocupädu këkarpis yachatsikuyänampaq tiempunkunata jorqar y llapan puëdiyanqanmannö ruraqta rikarmi, congregacionchö kaqkunapis pëkunanölla rurëta munayanqa. Jina anciänukunaqa reunionkunapaq alleq preparakurnin, comentarnin, Ëllukäyänan Wayichö pitsapakurnin y tsëchö imëka pishinqankunata rurapakurninmi alli ejemplu kayan (Efes. 5:15, 16; leyi Hebrëus 13:7).

15. Willakaramï anciänukuna imanir watukakuyanqanta.

¹⁵ Juk alli mitsikoqqa, üshanta qeshyëkaqta rikarninqa rasllam atiendin. Jina tsënöllam anciänukunapis, congregacionchö cristiänu mayinkunata qeshyëkaqta rikarnin o Diospa kaqchö yanapëta wanëkäyaqta rikarninqa raslla atiendiyänan. Edäyashqakuna y qeshyëkaqkunaqa imallachöpis yanaparkuyänantam wanayanqa, peru masqa Diospa kaqchö yanaparkuyänantam wanayanqa (1 Tes. 5:14). Y jövin kaqkunaqa,  “jobincunapa lluta rurenincunata” mana rurayänampaqmi yanapakïta wanayanqa (2 Tim. 2:22). Tsëmi congregacionchö kaqkunata cuidëqa seguïdu watukayänanta wanan, tsënöpam musyayanqa imakunapa pasëkäyanqanta Bibliawan shumaq yanaparkuyänampaq. Ima problëma kaptimpis raslla atiendirqa, manaraq peoraptinmi altsariyanqa.

16. Juk cristiänu Diospa kaqchö yanapakïta wanaptinqa, ¿imataraq rurayanman anciänukuna?

¹⁶ Peru ima problëmapis juk cristiänuta Diospa kaqchö qepëkätseqta rikarqa, ¿imataraq anciänukuna rurayanman? Discïpulu Santiägum kënö nirqan: “Qamcunapita meqequipis qeshyarnenqa, inglisiacho mandacoqcunata qayatsiyë. Pecunanam qeshyaq nunata Teyta Jesuspa jutincho aseitiwan llushirnin, Dios Yayaman mañacuyanqa. Dios Yayaman marcäcur mañacuyaptinmi, tse qeshyaq cachacärenqa. Teyta Jesusmi cachacätsir sharcaratsenqa; jutsacunata rurashqa captinpis, perdoneconqam” (Sant. 5:14, 15). Itsa Diospa kaqchö mana alli këkaqkunaqa willakuyanqatsu, peru anciänukuna mäkurirninqa rasmi yanapaqnin ëwayänan. Anciänukunaqa, cristiänu mayinkunawan Diosman mañakurnin y wanayanqan höra yanaparninqa, cargunkunachö këkaq üshakunata alli mitsikäyanqantam rikätsikuyanqa (leyi Isaïas 32:1, 2 *).

17. ¿Imataq pasakun anciänukuna ‘alli mitsikoq’ ruranqanta qatiyaptin?

¹⁷ Anciänukunaqa, imëkata rurayanqanchömi ‘alli mitsikoq’ Jesucristuta qatiyänampaq kallpachakuyan. Tsënö yanapakuyanqanqa alläpam cristiänukunata yanapan y alli sientikatsin. Alli kaq Mitsikoq Jehovä kë llapanta ruramunqanmi yanapamantsik, pëta agradecikunapaq y imëpis alabëkänapaq.