1, 2. a) ¿Imaynam kanku sumaq atiendesqa ovejakunaqa? b) Jesuspa tiemponpi runakunaqa, ¿imanasqam mana michiqniyoq hina tarikurqaku?

LLIW ovejakunaqa allintam wiñanku michiqnin sumaqta atiendespan waqaychaptinqa. Ovejakunata imayna uywanamanta rimaq huk libropa nisqanman hinaqa, sichu michiqkuna ovejankunata mikunallanpaq pusaspan mana allinta atiendeptinkuqa, pisi tiempollamantam imawanpas onqorunku. Allinta atiendeptinkum ichaqa mana chaynachu.

² Congregacionpi cristianokunapas iñiyninkupi allin kanankupaqqa, ancianokuna sapa ovejakunata imayna atiendesqankumantam kanqa. Yuyariy runakunawan Jesus imayna kasqanmanta. Payqa runakunatam llakipayarqa “cheqesqa hinaspa mana michiqniyoq ovejakuna hina kasqankumanta” (Mat. 9:36). ¿Imanasqam chaynapi tarikurqaku? Paykunata yachachinankupaq punta apaqninkunam, iskay uya hinaspa hatunchakuspa kamachikuqllaña karqaku. Diospa ovejankunata sumaqta yanapanankumantaqa, Israel nacionpi chay punta apaqkunaqa ‘sasa kaqkunatam runakunaman kamachiqku llasaq qepita qepichichkaq hina’ (Mat. 23:4).

3. ¿Imatam ancianokunaqa yuyarinanku Diospa ovejankunata atiendespanku?

³ Kunan tiempopi ancianokunaqa congregacionpi hatun llamkayniyoqmi kanku. Atiendesqanku ovejakunaqa Jehova Diospa chaynataq Jesuspa ovejankunam kanku, kikin Jesusmi nirqa ‘allin michiq’ kasqanmanta (Juan 10:11). Payqa ovejankunatam rantirqa “precioyoq yawarninwan” (1 Cor. 6:20; 1 Ped. 1:18, 19). Jesusqa anchatamá ovejankunata kuyan chaymi vidantapas paykunarayku qoykurqa. Chaymi ancianokunaqa haykapipas  yuyarinanku ‘ovejakunapa hatun michiqnin Señorninchik Jesucristopa’ qawasqan kasqankuta (Heb. 13:20).

4. ¿Imamantam kay yachachikuypi qawasun?

⁴ Hinaptinqa, ¿imaynatam ancianokunaqa Diospa ovejankunata qawananku? Diosqa iñiqkunatam kamachin ‘pusaqninku runakunata kasukunankupaq’. Congregacionpi ancianokunatañataqmi Diosqa kaynata kamachin: “Amayá michiychikqa munaychakuq hinachu”, nispa (Heb. 13:17; leey 1 Pedro 5:2, 3). Chayna kaptinqa, ¿imaynatam ancianokunaqa mana munaychakuq hina Diospa ovejankunata pusananku? Huk rimaypiqa, ¿imaynatam Diospa ovejankunata tukuy imapi yanapanmanku mana hatunchakuspanku?

5. ¿Imatam Jehova Diosmanta qawachiwanchik Isaias 40:11 nisqanqa?

⁵ Jehova Diosmanta rimaspanmi, willakuq Isaias kaynata nirqa: “Ovejankuna michiq hinaraqmi hamunqa. Uñachankunatam brazonpi hoqarinqa. Marqayninpim paykunata apaykachanqa. Uña wawayoq ovejakunatam allillamanta pusanqa”, nispa (Is. 40:11). Kaypi nisqanmi allinta qawachiwanchik uña ovejachaman rikchakuq serviqninkunata Jehova Dios yanapasqanta. Imaynam michiqkunapas sapa ovejankunapa imayna kasqanta reqsispan utqayllaman atienden, chaynam Jehova Diospas serviqninkunapa imapas necesitasqankuta qawachkan hinaspam kusikuywan imapipas yanapaykun. Chaymantapas, allin michiqqa uña ovejachankunatam wakinpi marqayninpi apan. ‘Llakipayakuq Taytanchik’ Jehova Diospas sasachakuypi tarikuptinchikmi marqayninpi apawachkanchikmanpas hina yanapawasun. Payqa hawkayachiwaspanchikmi kallpata qowasun llumpay sasachakuypi tarikuptinchik otaq yanapasqa kayta munaptinchik (2 Cor. 1:3, 4).

6. ¿Imaynatam ancianokunaqa Jehova Diosta qatipakunmanku iñiqmasinkunata yanapaspanku?

⁶ ¡Jehova Diosqa mayna qatipakunapaq hinam lliw ancianokunapaq! Jehova Dios hinam ancianokunapas iñiqmasinkunapa imayna tarikusqankuta yachananku. ¿Imanasqa? Iñiqmasinkunapa imayna tarikusqankuta hinaspa imapas necesitasqankuta yachaspankuqa, atinqakum kallpanchaspa yanapaykuyta (Prov. 27:23). Arí, ancianokunaqa iñiqmasinkunawan rimanankupaqmi tiempochakunanku. Paykunapa vidankupi mana chaqrukuspankupas, rikchan-rikchanllam kachkanku congregacionpi mana allinkunata uyarispanku otaq qawaspanku kuyakuywan yanapakuykunata qonankupaq (Hech. 20:35; 1 Tes. 4:11).

7. a) ¿Imaynam Ezequielpa chaynataq Jeremiaspa tiemponpi Diospa ovejankunaqa tarikurqaku? b) ¿Imatam ancianokunaqa yachanmanku mana allin michiqkunata Dios qepancharusqanmanta?

⁷ Piensarisun Ezequielpa chaynataq Jeremiaspa tiemponpi Diosmanta yachachinankupaq punta apaqkuna imayna kasqankumanta. Paykunatam Diosqa qepancharurqa ovejankunata mana allinta michisqankurayku. Diosmi nirqa: “Ovejaykunaqa mana michiqniyoq kasqanraykum pipapas mana maskasqan suwasqa hinaspa purun animalkunapa mikusqan kachkanku. Ñoqapa michiqniykunaqa ovejaykunata michinankupas kachkaptinmi kikillankuta michikuchkanku”, nispa (Ezeq. 34:7-10; Jer. 23:1). Chayraykum kunan tiempopi cristiano tukuqkunapa punta apaqninkunata Diosqa qepancharun. Chaymi ancianokunaqa kuyakuywan Diospa ovejankunataqa atiendenanku.

8. ¿Imaynatam Jesusqa qatiqninkunata yanaparqa pantaptinku?

⁸ Pantaq kasqankuraykum, Diospa ovejankunaqa wakinpi sasachakunku Diospa  yachachisqanta entiendenankupaq. Chaymi wakinpiqa Bibliapa huk kaqnin yachachikuyninta mana kasukunmankuchu otaq mana yuyayniyoq hina imatapas ruwanmanku. Chayna kaptinqa, ¿imatam ancianokunaqa ruwananku? Qatipakunankum qatiqninkunawan Jesuspa pacienciakusqanta. Paykunaqa achka kutipim atipanakurqaku Diospa munaychakuyninpi mayqanninku aswan reqsisqa kanankumanta. Paykunawan Jesus piñakurunanmantaqa, hinallam yachachirqa humilde kanankupaq (Luc. 9:46-48; 22:24-27). Paykunapa chakinta mayllaspanñataqmi qawachirqa humilde kay ima ninan kasqanmanta, chayna humildem lliw ancianokunapas kananku (leey Juan 13:12-15; 1 Ped. 2:21).

9. ¿Imaynatam Jesusqa apostolninkunata yanaparqa?

⁹ Apostol Santiagowan Juanqa piensarqakum michiq kayqa hukkunata kamachiy kasqanmanta. Chaymi iskayninku Diospa munaychakuyninpi aswan reqsisqa kayta mañakurqaku. Ichaqa chayna piensasqankuta saqenankupaqmi Jesusqa yanapaykurqa. Paymi nirqa: “Yachasqaykichikpi hinapas nacionkuna gobiernaqkunam runakunapi munaychakunku hinaspam kamachispanku kasuchikunku. Qamkunayá ichaqa ama chaynachu kaychik, qamkunamanta pipas kamachikuyta munaspaqa wakintayá servichun”, nispa (Mat. 20:25, 26). Apostolkunaqa kallpanchakunankum karqa iñiqmasinkunamanta mana hatunchakunankupaq hinaspa kamachikuqllaña mana kanankupaqpas.

10. a) Jesuspa munasqanman hina, ¿imaynam ancianokunaqa iñiqmasinkunawan kananku? b) ¿Imanasqam Pabloqa qatipakunapaq hina?

¹⁰ Jesusqa munanmi pay hina kunan tiempopi ancianokunapas kanankuta. Manam kamachikuqllañachu kananku aswanqa iñiqmasinkunatam servinanku. Chayna humildem Pablopas karqa, chayna kasqanmi sutilla qawakun Efeso llaqtapi ancianokunaman qellqasqanpi, paymi nirqa: “Qamkunam yachankichik kay Asia lawman hamusqaymantapuni imaynam qamkunawan kawsasqayta. [. . .] Humillakuspaymi waqastinpas hinaspa ñakaristinpas Señorninchikta servirqani”, nispa. Pabloqa anchatamá munarqa chay lawpi ancianokunapas humillakuspanku iñiqmasinkunata tukuy sonqonkuwan yanapanankuta. Nirqataqmi: “Qamkunatapas yachachirqaykichikmi ñoqa hina llamkaspa wakchakunata yanapanaykichikpaq”, nispa (Hech. 20:18, 19, 35). Corinto llaqtapi cristianokunaman qellqaspanpas nirqam iñiyninkupi mana munaychakusqanmanta, payqa Jehova Diosta kusisqa servinankupaqmi yanapayta munarqa (2 Cor. 1:24). Arí, kunan tiempopi ancianokunaqa Pablopa humilde hinaspa yanapakuq kasqantam qatipakunanku.

11, 12. ¿Imaynatam huk anciano iñiqmasinta yanapanman allinta tanteananpaq?

¹¹ Congregacionpi ancianokuna iñiqmasinta yanapaspanqa, Bibliapa ‘cheqap yachachikuyninman’ hinam ruwanan (Tito 1:9). Ichaqa, ‘llampu sonqollawantaqmi’ chaytaqa ruwanan (Gal. 6:1). Allin ancianoqa iñiqmasin ima ruwananpaq hikutananmantaqa, yuyaymananmi sonqonman imayna chayananpaq. Imatapas tanteanan kaptinqa, Bibliapa wakin textonkunata hinaspa qellqanchikkunapi chaymanta rimaq yachachikuykunatam qawachinman. Chaymantapas, yuyaymanachinmanmi imapas tanteasqanwan Jehova Dioswan amistadnin imayna kananmanta. Ninmantaqmi manaraq imatapas tanteachkaspan Diospa yanapakuyninta mañakunanpaq (Prov. 3:5, 6). Iñiqmasinwan tukuy chaykunamanta  rimaruspanqa, ancianoqa saqenanmi kikinña tanteananpaq (Rom. 14:1-4).

¹² Ancianokunaqa pitapas yanapaspankuqa hinaspa yachachispankuqa Bibliapa nisqanman hinallam ruwananku. Chaymi ancha allin Bibliapa nisqankunata sumaqta yachayninku. Chaynata ruwaspankum mana munasqankuman hina hatunchakuspankuchu yachachinqaku. Diospa ovejankunaqa manamá ancianokunapachu. Chaymi sapakama cristianokunaqa imapas tanteasqankumanta Diosman hinaspa Jesusman cuentata qonqaku (Gal. 6:5, 7, 8).

13, 14. ¿Imakunapitaq ancianokunaqa ejemplo kananku?

¹³ Apostol Pedrom congregacionpi ancianokunata nirqa ama ‘munaychakuq hina’ Diospa ovejankunata michinankupaq, nirqataqmi ‘ejemplon kanankupaqpas’ (1 Ped. 5:3). ¿Imaynatam ancianokunaqa chay nisqanta kasukunmanku? Chaypaq puntata qawasunchik pipas anciano kananpaq Bibliapa ima nisqanta. Puntataqa ‘allin piensaqmi’ kanan. Huk rimaypiqa, Bibliapa yachachisqankunatam allinta entiendenan hinaspapas chayman hinam kawsanan. Ima sasachakuypi tarikuspanpas manam chayllachu imatapas ruwanan, aswanqa allinta yuyaymanaspanmi imatapas tanteanan. Chaymantapas, ‘wasinpi kaqkunawan kasuchikuqmi’ kanan. Huk rimaypiqa, familiayoq kaspanqa allin tayta hinaspa allin qosam kanan. “Wasinpipuni mana imayna kamachikuyta atispaqa ¿imaynataq Diosman iñiqkunataqa nanachikunman?” (1 Tim. 3:1, 2, 4, 5). Congregacionpi cristianokuna ancianokunapa chayna kasqankuta qawaspankuqa kallpanchasqam tarikunqaku paykunaman asuykunankupaq.

¹⁴ Ancianokunaqa ejemplotaqmi kananku Diosmanta willakuypipas. Jesuspas Diosmantaqa willakurqam, chay ruwaytam kay Pachapi kachkaspan puntapi churarqa. Chaymantapas, Jesusqa qatiqninkunamanmi yachachirqa Diosmanta imayna willakunankupaq (Mar. 1:38; Luc. 8:1). Kunan tiempopi cristianokunaqa kusikunkum ancianokunawan Diosmanta willakuspanku. Paykunaqa ancianokunapa kusikuywan hinaspa imayna willakusqankuta qawaspankum allinta yachanmanku. Ancianokuna imapas ruwayninkumanta tiempochakuspanku Diosmanta willakuypi kallpanchakusqankuta iñiqkuna qawaspankum llapanku qatipakuyta munanku. Ancianokunaqa qatipakunapaq hinataqmi kanku huñunakuykunapaq preparakuspanku, chaypi rimarispanku chaynataq Salonpi ima ruwaypipas yanapakuspanku (Efes. 5:15, 16; leey Hebreos 13:7).

15. ¿Imanasqam ancianokunaqa iñiqmasinkunata watukunku?

¹⁵ Allin michiqqa ovejankuna onqoruptinqa otaq ima mana allintapas ruwakuruptinqa utqayllamanmi yanapan.  Ancianokunapas chayna utqayllamanmi yanapananku congregacionpi mayqan cristianopas ñakariypi tarikuptinqa otaq iñiyninpi yanapana kaptinqa. Yuyaqña hinaspa onqoq cristianokunaqa imapas necesitasqankupi yanapanatam munanku, chaywanpas astawanraqmi munanku Bibliawan kallpanchaspa yanapanata (1 Tes. 5:14). Mozo-sipaskunañataqmi hukkunawan sasachakunmanku, ichapas sasachakunku aychapa munasqankunata atipanankupaq (2 Tim. 2:22). Chaymi ancianokunaqa mana qonqaspa paykunata watukunanku, chaynapi imayna tarikusqankuta yachaspa Bibliawan allinta yanapanankupaq. Tiempollanpi yanapayqa ancha allinmi sasachakuykuna mana aswanyarunanpaq.

16. Congregacionpi pi cristianopas iñiyninpi yanapanapaq kaptinqa, ¿imatam ancianokunaqa ruwananku?

¹⁶ Ichaqa, ¿imatam pi cristianopas ruwanman llumpay sasachakuyninwan Jehova Dioswan amistadnin yanqachakurunanpaqña kaptinqa? Bibliam nin: “Mayqannikichikpas onqosqa kaspaqa iñiqkuna ukupi ancianokunatayá qayaychik chaynapi Diosta mañapususpaykichik Señorpa sutinpi aceitewan untasunaykichikpaq. Confiakuspa mañakuptinkuqa Señormi onqoqta sanoyachispa sayarirachinqa, huchapi kaptinqa pampachaykunqam”, nispa (Sant. 5:14, 15). Iñiyninkupi onqoq cristianokuna ancianokunata mana qayaptinkupas, paykunaqa utqayllamanmi chayta yachaykuspanku yanapanankupaq watukunanku. Ancianokuna iñiqmasinpaq Diosta mañakuspankuqa hinaspa sasachakuyninkupi yanapaspankuqa, allin michiqkuna kasqankutam qawachichkanku (leey Isaias 32:1, 2).

17. ¿Imanasqam ancha allin ‘hatun michiq’ Jesucristota ancianokuna qatipakuyninkuqa?

¹⁷ Congregacionpi ancianokunaqa allintam kallpanchakunku ‘hatun michiq’ Jesucristota tukuy imapi qatipakunankupaq. Paykunapa yanapakuyninqa allintamá lliw iñiqkunata yanapan, yanapantaqmi iñiyninkupi ñawparinankupaqpas. Paykunamantamá anchata agradecekunchik alli-allin Michiwaqninchik Jehova Diosta.