1, 2. (a) San na a bakapisi te skapuman e sorgu den skapu fu den bun? (b) Fu san ede furu sma na ini a ten fu Yesus ben de leki skapu di no abi skapuman?

WAN skapuman di e poti prakseri na den skapu fu en, kan meki taki a e go bun nanga den. Wan buku e taki dati te skapuman e tyari den skapu go na wei fu nyan grasi nomo, ma den no e poti prakseri na den skapu, dan baka wan tu yari furu fu den skapu o kon siki èn den skapuman no o kisi furu wini fu den. Ma te den e sorgu den skapu bun, dan sani o go bun nanga den.

² Na so a de tu na ini a gemeente. Te Kresten skapuman e poti prakseri na ibriwan fu den skapu fu Gado èn den e sorgu den, dan a o go bun nanga a heri gemeente. Kande yu e memre taki Yesus ben firi sari gi a pipel fu di „sma ben e pina den èn den ben e waka bruyabruya leki skapu di no abi skapuman” (Mat. 9:36). Fu san ede a no ben e go bun nanga den? Fu di den sma di ben musu leri Gado pipel a Wèt, ben e du ogri-ati sani nanga den, den ben e aksi tumusi furu fu den èn den ben e hoigri. Den kerki fesiman fu Israel no ben e yepi a pipel èn den no ben e sorgu den. Na presi fu dati den ben poti „hebi lai” na tapu den skowru.—Mat. 23:4.

3. San owruman musu hori na prakseri te den e sorgu den skapu fu Gado?

³ Sobun, den Kresten skapuman na ini a ten disi, noso owruman, kisi wan seryusu frantwortu. Den skapu di den e luku na fu Yehovah èn fu Yesus, di e kari ensrefi a „bun skapuman” (Yoh. 10:11). Yesus bai den skapu nanga en eigi „brudu di warti trutru” (1 Kor. 6:20; 1 Petr. 1:18, 19). A lobi den skapu so te taki a ben de klariklari fu gi en libi gi den. Ala ten  owruman musu hori na prakseri taki na edeman fu den na Yesus Krestes, „a gran skapuman”. Sobun, den musu gi frantwortu na en fu a fasi fa den e sorgu den skapu.—Hebr. 13:20.

4. San wi o luku na ini na artikel disi?

⁴ Ma fa Kresten owruman musu sorgu den skapu? Brada nanga sisa na ini a gemeente e kisi a deki-ati fu „gi yesi na den wan di e teki fesi” na den mindri. Na a tra sei, owruman e kisi a rai fu ’no prei basi gi den wan di de wan gudu fu Gado’. (Hebr. 13:17; leisi 1 Petrus 5:2, 3.) Dan fa owruman kan teki fesi sondro fu prei basi gi den skapu? Nanga tra wortu, fa owruman di kisi a frantwortu fu sorgu den skapu, kan du dati sondro fu go tumusi fara?

5. San na agersitori na ini Yesaya 40:11 e sori wi fu Yehovah?

⁵ A profeiti Yesaya ben taki fu Yehovah: „Leki wan skapuman a o sorgu gi den skapu fu en. Nanga en anu a o tyari den pikin skapu kon na wán èn a o hori den na en borsusei te a e tyari den. Na wan lobi-ati fasi a o sorgu gi den pikin skapu di e dringi merki ete” (Yes. 40:11). Na agersitori disi e sori taki Yehovah e broko en ede nanga den swakiwan na ini a gemeente èn nanga den wan di no man yepi densrefi. Wan skapuman sabi san ibriwan fu den skapu fu en abi fanowdu èn a de srekasreka fu yepi den. Na so Yehovah sabi san ibriwan fu den sma na ini a gemeente abi fanowdu èn a breiti fu sorgu den. Neleki fa wan skapuman e tyari wan pikin skapu na ini wan ploi fu en dyakti te dati de fanowdu, na so Yehovah, „a Tata di abi furu sari-ati” o tyari wi na ini muilek ten. A o trowstu wi te wi e kisi bigi tesi noso te wi abi wan spesrutu sani fanowdu.—2 Kor. 1:3, 4.

6. Fa wan owruman kan teki na eksempre fu Yehovah?

⁶ Skapuman na ini a gemeente kan leri wan moi sani fu wi hemel Tata. Neleki Yehovah, den musu poti prakseri na san den skapu abi fanowdu. Fu di wan owruman sabi sortu tesi e miti den skapu èn na sortu sani a musu poti prakseri wantewante, meki a man gi den a deki-ati nanga a yepi di den abi fanowdu (Odo 27:23). A de krin taki wan owruman musu sabi fa fu taki nanga den brada nanga sisa. Aladi a no e bumui na ini den libi, toku a o poti prakseri na den sani di a e si èn e yere na ini a gemeente. Na wan lobi-ati fasi a musu sori taki a de klariklari fu „yepi den swakiwan”.—Tori 20:35; 1 Tes. 4:11.

7. (a) San den skapuman na ini a ten fu Esekièl nanga Yeremia ben e du nanga den skapu fu Gado? (b) San wi kan leri fu a fasi fa Yehovah krutu den ogri-ati skapuman dati?

⁷ Luku fa den skapuman na ini a ten fu Esekièl nanga Yeremia ben e tyari densrefi. Yehovah ben krutu den skapuman disi fu di den no ben e sorgu den skapu fu en leki fa a wani. Fu di nowan sma ben e luku den skapu dati, meki den ben e pina èn den ben e panya go na ala sei. Den skapuman disi no ben e gi den skapu nyanyan, aladi densrefi ben e „nyan den bere furu” èn den ben e denki densrefi nomo (Esek. 34:7-10; Yer. 23:1). Neleki fa Gado ben krutu den skapuman disi, na so a e krutu den fesiman fu den falsi Kresten kerki. Ma disi e sori tu o prenspari a de gi Kresten owruman fu sorgu den skapu fu Yehovah bun èn fu poti prakseri na den.

8. Fa owruman kan teki a moi eksempre fu Yesus te den musu gi den brada nanga sisa rai?

⁸ Fu di wi na sondu libisma, meki son leisi wan skapu fu Gado no e frustan so esi san Yehovah e fruwakti fu en. Kande a e  du sani di no e kruderi nanga a rai fu Bijbel, noso kande a e tyari ensrefi na wan fasi di e sori taki a no de wan lepi Kresten ete. San owruman musu du? Den musu abi pasensi neleki fa Yesus ben abi pasensi nanga den disipel di ben wani sabi nomonomo suma fu den ben o tron a moro bigiwan na ini a Kownukondre. Na presi taki Yesus lasi pasensi nanga den disipel fu en, a tan gi den leri èn a gi den rai na wan lobi-ati fasi fu sori fa den ben kan abi sakafasi (Luk. 9:46-48; 22:24-27). Fu di Yesus wasi den futu fu den, a sori den san a wani taki fu abi sakafasi. Na ini a ten disi owruman musu sori sakafasi tu.—Leisi Yohanes 13:12-15; 1 Petr. 2:21.

9. Soleki fa Yesus ben taki, dan na sortu fasi den disipel ben musu tyari densrefi?

⁹ Den apostel Yakobus nanga Yohanes ben wani abi wan bun posisi na ini a Kownukondre. A fasi fa den ben e tyari densrefi, ben sori taki gi den wan skapuman na wan sma di e basi trawan. Ma Yesus sori den tu apostel disi taki a denki fu den no ben bun kwetikweti. A taigi den: „Unu sabi taki den tiriman fu den pipel e basi den èn den bigiman abi makti na den tapu. Ma nanga unu a no musu de so. Efu wan sma wani de wan bigiwan na un mindri, dan a musu de un dinari” (Mat. 20:25, 26). Den apostel ben musu luku bun fu no „basi den” brada fu den.

10. Fa Yesus ben wani taki owruman musu sorgu den skapu èn sortu eksempre Paulus gi owruman?

¹⁰ Neleki fa Yesus ben e du nanga den skapu, na so a wani taki Kresten owruman musu du nanga den tu. Den musu de klariklari fu de leki futuboi gi den brada nanga sisa fu den èn den no musu basi den. Na apostel Paulus ben abi sakafasi, bika a taigi den owruman fu a gemeente na Efeise: „Unu sabi heri bun fa mi tyari misrefi na un mindri sensi a fosi dei di mi poti futu na ini a distrikt Asia. Mi ben e dini Masra leki wan srafu nanga ala sakafasi.” Na apostel ben wani taki den owruman ben musu yepi den brada nanga sisa na wan sakafasi èn nanga wan krin-ati. A taki: „Mi sori unu na ala fasi taki un musu wroko . . . fu man yepi den swakiwan” (Tori 20:18, 19, 35). Paulus taigi den Korentesma taki a no ben de basi fu a bribi fu den. Na presi fu dati a ben de Gado en futuboi di ben abi sakafasi neleki den èn di ben wani yepi den fu dini Gado nanga prisiri (2 Kor. 1:24). A moi eksempre fu Paulus e sori owruman na ini a ten disi taki den musu abi sakafasi èn taki den musu wroko tranga.

11, 12. Fa wan owruman kan yepi wan brada noso sisa fu teki wan bosroiti?

¹¹ „A fasi fa [wan owruman] e gi leri, musu sori taki a e hori finifini na a wortu di tru” (Tit. 1:9). Ma a musu du disi „na wan safri-ati fasi” (Gal. 6:1). Wan bun skapuman no e pruberi fu dwengi den brada nanga sisa na ini a gemeente fu du sani soleki fa en wani, ma a e pruberi fu yepi den fu teki den eigi bosroiti fu di den lobi Yehovah nanga en Wortu. Wan owruman kan sori wan brada san Bijbel e taki fu wan tori te a musu teki wan prenspari bosroiti èn kande a e luku makandra nanga en san den buku fu wi e taki fu a tori. A kan sori a brada tu fa son sani di a o du kan abi krakti na tapu a matifasi di a abi nanga Yehovah. A kan sori en o prenspari a de fu begi Gado fu yepi en fosi a teki wan bosroiti (Odo 3:5, 6). Baka te a taki nanga a brada fu den tori disi, a o gi en na okasi fu teki en eigi bosroiti.—Rom. 14:1-4.

¹² Den rai di owruman e gi musu komoto na ini Bijbel wawan. Dati meki a  de prenspari taki den sabi fa fu gebroiki Gado Wortu èn den musu du san Bijbel e taki. Te den e du dati, dan dati o yepi den fu no prei basi gi tra Kresten. No frigiti taki den skapu a no fu den èn ibri sma na ini a gemeente musu gi frantwortu na Yehovah nanga Yesus te den e teki bosroiti.—Gal. 6:5, 7, 8.

13, 14. Na sortu fasi owruman musu de wan bun eksempre gi den skapu?

¹³ Baka di na apostel Petrus gi den owruman a rai fu no basi den wan di den musu luku, a taigi den owruman tu fu „tron eksempre gi den skapu” (1 Petr. 5:3). Fa wan owruman kan de wan bun eksempre gi den skapu? Luku tu sani di wan brada musu du te a „e suku fu tron wan sma di e teki fesi na ini a gemeente”. „A musu de nanga krin frustan” èn „a musu de wan man di e tiri en osofamiri na wan bun fasi”. Te wan owruman abi wan osofamiri, dan a musu tiri den na wan bun fasi, bika „efu wan sma no sabi fa fu tiri en eigi osofamiri, dan fa a o man sorgu a gemeente fu Gado?” (1 Tim. 3:1, 2, 4, 5) Wan brada di wani tron wan owruman musu de nanga krin frustan. Disi wani taki dati a e frustan Bijbel gronprakseri bun èn a sabi fa fu gebroiki den na ini en eigi libi. A no e bruya esi èn no e krutu sma sondro fu sabi a fini fu wan tori. Te den sma na ini a gemeente e si taki wan owruman e tyari ensrefi na a fasi disi, dan den o frutrow en.

¹⁴ Wan tra fasi fa owruman kan sori taki den de wan bun eksempre gi den Kresten brada nanga sisa, na te den e teki fesi na ini a preikiwroko. Te a abi fu du nanga a preikiwroko, Yesus ben de wan bun eksempre. Di a ben de na grontapu, a ben de prenspari gi en fu preiki a bun nyunsu fu a Kownukondre. A ben sori den disipel fu en fa den musu du a wroko disi (Mark. 1:38; Luk. 8:1). Na ini a ten fu wi preikiman e prisiri fu go na ini a preikiwroko makandra nanga den owruman. Den e si fa den owruman de nanga faya te den e du a prenspari wroko disi èn den kan leri wan sani fu a fasi fa den owruman disi e gi sma leri. Te owruman abi a gwenti fu gebroiki den ten nanga den krakti fu preiki a bun nyunsu awinsi den abi furu fu du, dan a gemeente o kisi deki-ati fu de nanga faya tu. Owruman kan de wan bun eksempre tu te den e sreka densrefi gi gemeente konmakandra, te den e gi piki èn te den e du tra sani soleki fu yepi krin èn ondrow a Kownukondre zaal.—Ef. 5:15, 16; leisi Hebrewsma 13:7.

15. Fu san ede a de fanowdu taki owruman e go luku den skapu?

¹⁵ Wan bun skapuman no e draidrai fu yepi wan skapu te a kisi mankeri noso te a siki. Na so a de tu taki wan owruman musu yepi sma na ini a gemeente wantewante te problema miti den, noso te den  abi rai noso deki-ati fanowdu. Kande den musu yepi wan brada noso sisa di owru noso siki. Ma san moro prenspari na taki den musu gi den deki-ati nanga trowstu fu Bijbel (1 Tes. 5:14). Son leisi den musu yepi yongu sma na ini a gemeente di musu meki muiti fu kakafutu „gi den lostu di yongu sma abi” (2 Tim. 2:22). Sobun, te owruman e sorgu den skapu, dan dati wani taki tu dati den e go luku den brada nanga sisa fu a gemeente fu si fa a e go nanga den èn sortu problema den abi. Na den okasi dati den e gi den deki-ati nanga bun rai fu Bijbel. Te den e poti prakseri biten na den sortu tori disi, dan furu problema kan lusu fosi den kon moro seryusu.

16. Fa owruman kan yepi Kresten brada nanga sisa di abi wan seryusu problema?

¹⁶ Ma fa a de te sani e pasa di kan pori a matifasi di den brada nanga sisa na ini a gemeente abi nanga Gado? Yakobus ben taki: „Efu wan fu unu siki, meki a kari den owruman fu a gemeente kon na en. Meki den begi gi en èn salfu en nanga oli na ini a nen fu Yehovah. Te den e begi nanga bribi, dan a sma di siki o kon betre èn Yehovah o meki a kisi ensrefi baka. Boiti dati, efu a du sondu, dan a o kisi pardon fu dati” (Yak. 5:14, 15). Srefi efu wan sma di „siki” no e „kari den owruman” kon, toku den owruman musu du muiti fu yepi en esi-esi efu den sabi taki a no e go bun nanga en. Te den owruman e begi gi den brada nanga sisa noso te den e du dati makandra nanga den èn te den e yepi den na ini muilek ten, dan den e sori taki den na bun skapuman di e gi trawan deki-ati fu tan dini Gado nanga prisiri.—Leisi Yesaya 32:1, 2.

17. Sortu wini a gemeente o abi te owruman e teki na eksempre fu „a gran skapuman”?

¹⁷ Awinsi san Kresten skapuman e du na ini Yehovah organisâsi, den e meki muiti fu teki na eksempre fu „a gran skapuman” Yesus Krestes. Den brada disi e yepi den skapu fu Gado fu go na fesi èn fu tan dini Gado fayafaya. Wi de nanga bigi tangi taki wi abi den brada disi èn wi wani prèise wi Moro Bigi Skapuman, Yehovah.