1, 2. (a) Kuba namuphi umphumela nangabe timvu tinakekelwa kahle? (b) Kungani bantfu labanyenti bebafana netimvu letite umelusi ngesikhatsi Jesu asemhlabeni?

TIMVU tikhula kahle nangabe tinemelusi lotinakekelako. Lenye incwadzi lekhuluma ngekukhulisa timvu itsi: “Umelusi losuke nje atsatse umhlambi awuyise emadlelweni angawunakekeli, manyenti ematfuba ekutsi leto timvu tibe butsakatsaka futsi tihlaselwe kugula lokungaholela ekutseni tingandzi njengobe iminyaka ichubeka.” Nangabe timvu tinakekelwa kahle, wonkhe umhlambi ukhula kahle futsi ube nemphilo lenhle.

² Indlela belusi labangemaKhristu labanekekela ngayo imvu ngayinye ingazuzisa libandla lonkhe. Ungahle ukhumbule kutsi Jesu wativela buhlungu ticumbi tebantfu ngobe ‘betiphetfwe kabi futsi tihlakatekile njengetimvu letite umelusi.’ (Mat. 9:36) Kungani tatikulesimo lesidzabukisa kangaka? Kungobe labo lebebanemtfwalo wekufundzisa bantfu uMtsetfo waNkulunkulu bebaneludlame, bafuna tintfo tenteke ngenkhani futsi bebangakwenti loko lebebakufundzisa labanye. Kunekunakekela nekufundzisa emalunga emhlambi, labaholi baka-Israyeli “babopha imitfwalo” leyesindzako bayetfwesa bantfu.—Mat. 23:4.

3. Yini labadzala belibandla lokufanele bayikhumbule njengobe banakekela timvu?

³ Belusi labangemaKhristu lamuhla, lokungulabadzala lababekiwe, nabo banemtfwalo lobalulekile. Timvu letisemhlanjini labawunakekelako taJehova naJesu, lotibita ngekutsi ‘ungumelusi lokahle.’ (Joh. 10:11) Letimvu ‘tatsengwa ngelinani lelikhulu’ lelo Jesu lalikhokha ‘ngengati yakhe leligugu.’ (1 Khor. 6:20; 1 Phet. 1:18, 19) Utitsandza kakhulu timvu kangangekutsi wanikela kuphila kwakhe ngekutitsandzela ngenca yato. Labadzala kufanele ngaso sonkhe sikhatsi  bakhumbule kutsi babelusi lababekiwe futsi bangephansi kwekucondziswa yiNdvodzana yaNkulunkulu Jesu Khristu, “umelusi lomkhulu wetimvu.”—Heb. 13:20.

4. Sitawucoca ngani kulesihloko?

⁴ Nguyiphi-ke indlela lokulindzeleke kutsi belusi labangemaKhristu baphatse ngayo timvu? Emalunga elibandla ayacelwa kutsi ‘alalele labo labaholako’ emkhatsini wawo. Labadzala labangemaKhristu baphindze bakhutsatwe kutsi ‘bangatenti emakhosi etikwalabo labalifa laNkulunkulu.’ (Heb. 13:17; fundza 1 Phetro 5:2, 3.) Labadzala lababekiwe bangawuhola kanjani umhlambi ngaphandle kwekutenta emakhosi etikwawo? Ngalamanye emavi, labadzala bangatinakekela njani tidzingo tetimvu ngaphandle kwekulisebentisa kabi ligunya Nkulunkulu labanikete lona njengobe bababonisi?

5. Yini lesiyifundzako ngaJehova ku-Isaya 40:11?

⁵ Umphrofethi Isaya watsi ngaJehova: “Welusa umhlambi wakhe njengemelusi: Ugona emazinyane akhe ngemikhono yakhe, awasondzete edvutane nenhlitiyo yakhe. Utihola kahle leto letinemazinyane.” (Isa. 40:11) Lombhalo uchaza indlela Jehova lanakekela ngayo lababutsakatsaka nobe labadzinga sivikelo. Njengobe umelusi atati tidzingo letitsite temvu ngayinye emhlambini, uhlale akulungele kutinakekela. Jehova uyatati tidzingo talabo labasebandleni futsi uyajabula ngekubaniketa lusito labaludzingako. Njengobe umelusi aphatsa lizinyane lemvu lelisandza kutalwa, aligocotele ngengubo yakhe nakudzingekile, Jehova “longuYise wemusa,” natsi utasetfwala ngetikhatsi letimatima. Utasidvudvuta nasibhekene nekuvivinywa lokukhulu nobe nasinesidzingo lesikhetsekile.—2 Khor. 1:3, 4.

6. Njengobe angumelusi wemhlambi waNkulunkulu, lomdzala angasilandzela njani sibonelo saJehova?

⁶ Lesi sifundvo lesihle kakhulu umelusi longumKhristu langasifundza kuBabe wetfu wasezulwini. Kufanele atinakekele tidzingo tetimvu alingise Jehova. Nakatati tinsayeya timvu letibhekene nato netidzingo letikhetsekile letifuna kunakekelwa ngekushesha, lomdzala angakhona kutiniketa sikhutsato lesidzingekako nekutisekela. (Taga 27:23) Kuyacaca kutsi lomdzala kufanele acoce njalo nalabo lakholwa nabo. Nanobe atihlonipha tindzaba tabo letiyimfihlo, unendzaba nalakubonako nalakuvako ebandleni futsi ngenca yelutsandvo, uba khona kute ‘asite lababutsakatsaka.’—Imis. 20:35; 1 Thes. 4:11.

7. (a) Timvu taNkulunkulu tatiphatfwa njani ngesikhatsi saHezekiya naJeremiya? (b) Yini lesingayifundza kuJehova ngekulahlwa kwebelusi bemhlambi waNkulunkulu lebebangaketsembeki?

⁷ Asewucabange ngesimo sengcondvo sebelusi Nkulunkulu labehlulela. Ngesikhatsi saHezekiya naJeremiya, Jehova wabalahla ngelicala belusi lebekufanele banakekele timvu takhe kodvwa bebangakwenti ngendlela lefanele loko. Ngesikhatsi kungenamuntfu lonakekela timvu, umhlambi wahlaselwa futsi wahlakateka. Kunekondla letimvu, labo belusi bebatihlukumeta futsi ‘batondla bona.’ (Hez. 34:7-10; Jer. 23:1) Kulahlwa kwalabelusi nguNkulunkulu kungase kufane naloko baholi labaseTinkholweni Letitsi TebuKhristu labakwentako. Kuphindze kugcizelele kubaluleka kwekutsi labadzala labangemaKhristu bawunakekele ngelutsandvo umhlambi waJehova.

8. Labadzala bangasilingisa njani sibonelo lesihle saJesu nabeluleka bazalwane babo?

⁸ Ngesizatfu sekutsi tinesono, letinye timvu taNkulunkulu tingahle tingakucondzi  kahle loko Jehova lakufunako kuto. Tingahle tehluleke kwenta ngekuvumelana neseluleko lesisemBhalweni, nome tente tintfo ngendlela lekhombisa kutsi tisengakavutfwa. Nakunjalo, kufanele bente njani labadzala? Kufanele balingise Jesu lowababeketelela bafundzi bakhe ngesikhatsi bakhatsateke ngekutsi ngubani lotawuba mkhulu kakhulu eMbusweni emkhatsini wabo. Esikhundleni sekuphelelwa sineke, Jesu wachubeka nekufundzisa bafundzi bakhe futsi ngelutsandvo wabaniketa seluleko sekutsi bangakukhombisa njani kutfobeka. (Luk. 9:46-48; 22:24-27) Ngekubageza tinyawo Jesu abebakhombisa sifundvo sekutfobeka, njengobe nebabonisi labangemaKhristu kufanele bakhombise kutfobeka.—Fundza Johane 13:12-15; 1 Phet. 2:21.

9. Nguyiphi indlela yekucabanga Jesu lokwadzingeka kutsi ayilungise?

⁹ Umbono waJesu ngekuba ngumelusi wemhlambi waNkulunkulu bewehlukile kulowo waJakobe naJohane. Labaphostoli lababili baticelela sikhundla lesiphakeme eMbusweni. Kodvwa Jesu wayilungisa indlela yabo yekucabanga, watsi: “Niyati kutsi babusi betive bayatiphakamisa futsi tikhulu tibusa ngekucindzetela. Akusinjalo ngani, ngobe nobe ngubani lofuna kuba mkhulu emkhatsini wenu kufanele abe yinceku yenu.” (Mat. 20:25, 26) Labaphostoli bekufanele babalekele lomkhuba lomubi wekufuna ‘kutenta emakhosi’ kulabanye baphostoli.

10. Jesu ufuna labadzala bawuphatse njani umhlambi, futsi ngusiphi sibonelo lesabekwa nguPawula kulendzaba?

¹⁰ Jesu ulindzele kutsi labadzala labangemaKhristu baphatse umhlambi ngendlela naye lawuphatsa ngayo. Kufanele bahlale bakulungele kutenta tinceku kulabakholwa nabo, hhayi kutenta emakhosi etikwabo. Umphostoli Pawula bekatfobekile ngobe watjela emadvodza lamadzala asebandleni lase-Efesu watsi: “Nati kahle kutsi bengiphila njani ngesikhatsi nginani kusukela ngelilanga lekucala lengefika ngalo esifundzeni sase-Asiya, ngikhonta iNkhosi ngekutfobeka lokukhulu.” Lomphostoli bekanesifiso sekutsi labo bazalwane basite labanye ngekutimisela nangekutitfoba. Watsi: “Nginikhombise kanyenti kutsi kufanele nisite lababutsakatsaka.” (Imis. 20:18, 19, 35) Pawula watjela baseKhorinte kutsi bekangasiyo inkhosi ekukholweni kwabo. Kunaloko, abesisebenti lebesikanye nabo kute bajabule. (2 Khor. 1:24) Pawula wabekela labadzala balamuhla sibonelo lesihle sekutfobeka nekusebenta ngekutimisela.

11, 12. Lomdzala angase amsite njani lakholwa naye kutsi atentele sincumo?

¹¹ Lomdzala welibandla kufanele “abambelele emavini letsembekile mayelana nelikhono lakhe lekufundzisa.” (Thit. 1:9) Kodvwa ufundzisa “ngemoya lomuhle.” (Gal. 6:1) Kunekutsi aphocelele labo lakanye nabo ebandleni kutsi bente ngendlela letsite, umelusi lokahle wetama kubasita kutsi batentele tincumo ngekuvumelana neliVi laJehova kanye nelutsandvo labanalo ngaye. Lomdzala angahle agcamise timiso temBhalo umzalwane langaticabangela nangabe afuna kutsatsa sincumo lesibalulekile. Angahle ahlole naye incwadzi letsite lekhuluma ngaleyo ndzaba. Angaphindze amcele kutsi acabange ngendlela leso sincumo lafuna kusitsatsa lesitabutsintsa ngayo buhlobo bakhe naJehova. Lolomdzala angagcizelela kubaluleka kwekufuna sicondziso saNkulunkulu ngemthantazo ngaphambi kwekwenta sincumo. (Taga 3:5, 6) Ngemuva kwekucoca ngaloko nemzalwane wakhe, lona lomdzala utawushiyela kuye kutsi atentele sincumo.—Rom. 14:1-4.

¹² Ligunya babonisi labangemaKhristu labanalo livela emiBhalweni. Ngako-ke,  kubalulekile kutsi balisebentise kahle liBhayibheli futsi bakulalele loko lelikushoko. Nabenta loko labadzala babalekela kusebentisa kabi emandla labanawo. Bona bamane nje babelusi lababekiwe futsi lilunga ngalinye lelibandla litatiphendvulela kuJehova nakuJesu ngaloko lelincuma kukwenta.—Gal. 6:5, 7, 8.

13, 14. Ngutiphi tindlela lomdzala langawubekela ngato sibonelo umhlambi?

¹³ Ngemuva kwekucela emadvodza lamadzala ebandleni kutsi ‘angatenti emakhosi etikwalabo labalifa laNkulunkulu,’ umphostoli Phetro wawacela kutsi ‘abe tibonelo emhlambini.’ (1 Phet. 5:3) Lomdzala angawubekela njani sibonelo umhlambi? Cabanga ngetintfo letimbili lokufanele tentiwe yindvodza ‘lefisa kuba ngumbonisi.’ Kudzingeka kutsi abe yindvodza “lenengcondvo lebhadlile.” Nangabe lomdzala anemndeni, kufanele awengamele kahle ngobe “nangabe indvodza ingakhoni kwengamela likhaya layo, ingalinakekela njani-ke libandla laNkulunkulu?” (1 Thim. 3:1, 2, 4, 5) Kute kuyifanele kuba ngumbonisi, indvodza kufanele ibe nengcondvo lebhadlile, iticondze kahle timiso taNkulunkulu nekutsi ingatisebentisa njani ekuphileni kwayo. Kufanele ingabi nemawala, ingatatateli ekukhipheni sehlulelo. Emalunga elibandla nakakubona loku lesesicoce ngako ayabetsemba labadzala.

¹⁴ Babonisi bangawabekela lesinye sibonelo lesihle emaKhristu labakanye nawo, ngekuhola emsebentini wekushumayela. Jesu wababekela sibonelo labadzala kulendzaba. Kushumayela tindzaba letimnandzi teMbuso bekuyincenye lebalulekile emsebentini waJesu wasemhlabeni. Wakhombisa bafundzi bakhe kutsi lomsebenti wentiwa njani. (Mak. 1:38; Luk. 8:1) Esikhatsini setfu, kuyabakhutsata bamemeteli kushumayela nalabadzala, kubona inkhutsalo yalabadzala kulomsebenti losindzisa kuphila nekufundza tindlela tekufundzisa kubo. Inshisekelo yebabonisi, kutimisela nekunikela ngesikhatsi nemandla abo ekushumayeleni tindzaba letimnandzi nanobe bahlale bamatasatasa, kukhutsata libandla lonkhe kutsi nalo lilingise inshisekelo yabo. Labadzala bangaphindze babekele bazalwane babo sibonelo lesihle ngekulungiselela nekuhlanganyela ngetimphendvulo emihlanganweni yelibandla nangekwenta leminye imisebenti lefaka ekhatsi kuhlanta nekunakekela liHholwa LeMbuso.—Ef. 5:15, 16; fundza Hebheru 13:7.

15. Ngutiphi letinye tetizatfu letenta labadzala bente umsebenti wekwelusa?

¹⁵ Umelusi lokahle uyashesha kubona nangabe imvu ilimele nobe igula bese uyayisita. Nalabadzala belibandla kudzingeka batsatse sinyatselo ngekushesha ekusiteni labo labagulako nobe labadzinga seluleko nobe sikhutsato. Lasebakhululile nalabagulako bangahle badzinge  lusito ngetidzingo tabo tamalanga onkhe kodvwa ikakhulukati badzinga sikhutsato nendvudvuto levela emibhalweni. (1 Thes. 5:14) Labasebasha ebandleni bangase babhekane nensayeya yekulwa ‘netifiso tebusha.’ (2 Thim. 2:22) Kungako umsebenti wekwelusa uhlanganisa nekuwavakashela njalo emalunga elibandla kute belusi batewutati kahle timo labhekene nato futsi bawakhutsate ngemiBhalo lefanele. Nangabe tintfo letifana naleti tisheshe tanakwa, tinkinga letinyenti tingacatululwa tingakabi tinkhulu kakhulu.

16. Nangabe lotsite ebandleni anenkinga lenkhulu letsintsa buhlobo bakhe naNkulunkulu, yini labadzala labangayenta?

¹⁶ Kungentiwani nangabe lotsite ebandleni anenkinga lenkhulu futsi lefaka buhlobo bakhe naJehova engotini? Lomunye umbhali weliBhayibheli, Jakobe, watsi: “Ukhona yini logulako emkhatsini wenu? Akabite labadzala belibandla, futsi abamthantazele, bamgcobe ngemafutsa egameni laJehova. Umthantazo wekukholwa utamphilisa umuntfu logulako, naJehova utamvusa. Nangabe onile, utawutsetselelwa.” (Jak. 5:14, 15) Nanobe logulako ‘angababiti labadzala belibandla,’ kufanele bamsite ngekushesha nasebasati simo sakhe. Nabathantaza kanye nabo futsi babafaka emithantazweni yabo bazalwane babo, babasekela nangetikhatsi letimatima, labadzala basuke bakhombisa kutsi babelusi labakahle labakhutsata labo lababelusile kutsi bachubeke nekukhonta Nkulunkulu ngenjabulo.—Fundza Isaya 32:1, 2.

17. Yini lengenteka nangabe labadzala balingisa ‘umelusi lomkhulu’?

¹⁷ Kuko konkhe labakwentako enhlanganweni yaJehova, belusi labangemaKhristu benta konkhe lokusemandleni kutsi balingise ‘umelusi lomkhulu’ longuJesu Khristu. Ngekusitwa ngulamadvodza lanakekelako ngeteluleko temiBhalo, umhlambi usitakala kakhulu futsi uchubeka ukhonta Nkulunkulu ngekwetsembeka. Ngenca yawo onkhe lamalungiselelo, siba nesifiso sekumbonga nekumdvumisa uMelusi wetfu longacatsaniswa namuntfu, Jehova.