1, 2. (a) Kuandu bibi-atan tau matan didiʼak ba ninia bibi sira, neʼe lori rezultadu saida? (b) Tanbasá mak ema barak iha Jesus nia tempu hanesan bibi neʼebé bibi-atan la iha?

 BIBI sira bele iha saúde neʼebé diʼak só deʼit se sira iha bibi-atan neʼebé diʼak. Livru ida neʼebé esplika kona-ba hakiak bibi sira hatete: “Kuandu bibi-atan lori ninia bibi ba duʼut, no husik beibeik deʼit sira han hodi la tau matan ba sira-nia presiza seluk, neineik-neineik, bibi sira-neʼe sei sai fraku no moras.” Maibé kuandu bibi-atan tau matan ho didiʼak ba bibi ida-idak, bibi-luhan hotu sei iha forsa.

² Hanesan neʼe mós iha kongregasaun laran. Kuandu katuas sira fó atensaun ba ema ida-idak, neʼe sei ajuda kongregasaun tomak. Iha Jesus nia tempu, povu sira “kole no neon nakraik, hanesan bibi sira neʼebé bibi-atan la iha”. (Mateus 9:36) Tanbasá mak Jesus haree bibi sira-neʼe hanesan bibi-atan la iha? Tanba maski relijiaun nia ulun-naʼin sira iha knaar atu hanorin Maromak nia Ukun-Fuan, maibé sira siʼak no hanehan povu no la halo tuir buat neʼebé sira rasik hanorin. Duké tau matan ba povu no hatudu domin, sira halo susar ba sira atu adora Maromak. Povu sente hanesan sira lori “naha todan”.—Mateus 23:4.

3. Nuʼudar katuas sira halaʼo sira-nia knaar, saida mak sira la bele haluha?

³ Ohin loron, katuas sira iha responsabilidade neʼebé todan tanba bibi sira neʼebé sira tau matan mak Jeová no Jesus nian. Bibi sira-neʼe iha folin boot tebes ba Jesus, “bibi-atan diʼak”, hodi nia fó ninia moris rasik ba sira. Nia sosa sira ho ninia raan. (Joao 10:11; 1 Korinto 6:20; 1 Pedro 1:18, 19) Katuas sira la bele haluha katak sira-nia ulun mak “Bibi-Atan Boot”, Jesus Kristu. Sira presiza hatán ba Jesus kona-ba oinsá mak sira tau matan ba bibi sira.—Ebreu 13:20.

4. Saida mak ita sei aprende husi lisaun neʼe?

 ⁴ Oinsá mak katuas kongregasaun sira presiza tau matan ba bibi sira? Maski ema hotu iha kongregasaun laran presiza halo tuir sira, maibé Jeová mós hakarak katuas sira atu labele ukun bibi sira. (Ebreu 13:17; lee 1 Pedro 5:2, 3.) Entaun, oinsá mak katuas sira bele dirije luhan hodi la ukun sira, katak, tau matan maibé la uza sala kbiit neʼebé Maromak fó ba ulun-naʼin sira?

5. Saida mak ita aprende kona-ba Jeová husi Isaías (Yesaya) 40:11?

⁵ Profeta Isaías hatete kona-ba Jeová hodi dehan: “Hanesan bibi-atan ida, nia sei tau matan ba ninia luhan. Ho ninia liman rasik, nia sei halibur nia bibi-oan sira; no Nia sei lori sira hodi tau iha ninia hirus-matan. Sira neʼebé sei kiʼikoan, nia sei tau matan ho kuidadu.” (Isaías [Yesaya] 40:11) Eskritura neʼe esplika kona-ba oinsá Jeová tau matan ba ema neʼebé fraku ka presiza mahon. Hanesan bibi-atan ida hatene ninia bibi ida-idak nia presiza, Jeová mós hatene ema ida-idak nia presiza iha kongregasaun laran no nia kontente atu ajuda. No hanesan bibi-atan ida sei koʼus bibi-oan, Jeová mós sei fó kmaan no lori ita liu husi tempu susar. Sin, Maromak mak “Aman laran-diʼak nian”.—2 Korinto 1:3, 4.

6. Oinsá mak katuas ida bele banati-tuir Jeová nia ezemplu?

⁶ Bibi-atan sira iha kongregasaun bele aprende husi ita-nia Aman iha lalehan nia ezemplu diʼak! Hanesan Jeová, katuas sira mós presiza fó atensaun ba bibi sira-nia presiza. Se katuas ida hatene susar neʼebé irmaun-irmán sira hasoru daudaun, katuas neʼe sei hatene tempu no dalan neʼebé diʼak atu fó laran-manas no apoia ba sira. (Provérbios [Amsal] 27:23) Maibé atu halo nuneʼe, katuas sira presiza uza tempu atu koʼalia ho ninia irmaun-irmán sira no rona ba sira. Maski katuas kuidadu atu la mete iha sira-nia moris, maibé nia matan-moris ba buat neʼebé nia haree no rona iha kongregasaun hodi uza nia tempu atu “fó tulun ba ema kbiit-laek sira”.—Apostolu 20:35; 1 Tesalonika 4:11.

7. (a) Esplika toʼok kona-ba bibi sira iha Ezequiel no Jeremias nia tempu. (b) Tanba Jeová la simu bibi-atan sira neʼebé la diʼak, saida mak ita bele aprende husi ida-neʼe?

⁷ Hanoin toʼok kona-ba bibi-atan sira neʼebé iha knaar atu tau matan ba Maromak nia povu iha Ezequiel no Jeremias nia tempu. Jeová hirus ba bibi-atan sira-neʼe tanba maski sira presiza tau matan ba ninia bibi, maibé sira la halo nuneʼe. Jeová hatete: “Haʼu-nia bibi sira sai hahán ba animál fuik sira hotu, tanba la iha bibi-atan, no haʼu-nia bibi-atan sira la buka haʼu-nia bibi sira, maibé bibi-atan sira fó-han ba sira-nia an, no haʼu-nia bibi sira, sira la fó-han.” Povu sira hetan terus tanba sira-nia ulun-naʼin sira hanoin an deʼit. (Ezequiel [Yehezkiel] 34:7-10; Jeremias [Yeremia] 23:1) Bibi-atan aat sira-neʼe hanesan ho ulun-naʼin sira neʼebé ukun iha rai neʼebé relijiaun kristaun mak domina. Jeová la simu sira tanba sira mós bibi-atan neʼebé la diʼak. Sin, ezemplu ida-neʼe fó-hanoin katuas kristaun sira atu tau matan didiʼak ho domin Jeová nia bibi luhan.

8. Kuandu katuas sira presiza fó konsellu ba irmaun-irmán sira, oinsá mak sira bele banati-tuir Jesus nia ezemplu?

⁸ Tanba ema hotu sala-naʼin, karik ema balu iha kongregasaun laran la hatene ho klaru saida mak Jeová hakarak sira atu halo. Karik sira halo desizaun  neʼebé la tuir Bíblia nia matadalan, ka sira-nia hahalok hatudu katak sira mak ema kristaun neʼebé seidauk maduru iha lia-loos. Saida mak katuas sira presiza halo? Sira tenke banati-tuir dalan neʼebé Jesus hatudu pasiénsia ho ninia dixípulu sira. Maski dixípulu sira diskute malu beibeik kona-ba ida neʼebé mak sei sai boot iha ninia Ukun, maibé Jesus nunka hirus sira. Nia hanorin sira nafatin no fó konsellu ho domin kona-ba hatudu haraik-an. (Lucas 9:46-48; 22:24-27) Nia mós fase sira-nia ain atu hatudu ba sira ezemplu kona-ba haraik-an. Ohin loron mós, katuas sira presiza hatudu haraik-an.—Lee Joao 13:12-15; 1 Pedro 2:21.

9. Jesus presiza atu hadiʼa ninia apóstolu sira-nia hanoin sala saida?

⁹ Apóstolu Tiago no João hanoin katak atu sai bibi-atan, neʼe katak ukun ema seluk. Sira husu Jesus atu fó ba sira pozisaun neʼebé aas iha ninia Ukun. Maibé Jesus hadiʼa sira-nia hanoin no hanorin sira atu hanoin iha dalan neʼebé loos. Nia hatete: “Imi hatene katak naʼi-ulun jentiu sira-nian ukun povu hodi kbiit. Imi sei la halo hanesan neʼe; maibé iha imi leet sé mak hakarak sai boot, nia sei sai imi-nia atan.” (Mateus 20:25, 26) Apóstolu sira presiza kontrola sira-nia hakarak atu “ukun” sira-nia maluk sira, ka atu manda sira bá-mai.

10. Jesus hakarak katuas sira atu tau matan ba luhan ho hahalok saida deʼit? Paulo hatudu ezemplu diʼak saida?

¹⁰ Jesus hakarak katuas sira atu tau matan ba luhan hanesan nia mós halo. Katuas sira presiza prontu atu serbí sira-nia maluk sira, duké sai ukun-naʼin ba sira. Apóstolu Paulo, hanesan Jesus, mós serbí ema seluk ho haraik-an. Nia fó-hatene ba katuas sira iha Efeso: “Imi hatene oinsá haʼu moris iha imi-nia leet hori loron uluk neʼebé haʼu sama rai-Ásia. Haʼu serbí Naʼi ho haraik-an.” Paulo hakarak katuas sira atu hatudu haraik-an no serbí ho badinas sira-nia maluk sira. Hodi hatudu ezemplu neʼebé diʼak, Paulo hanorin katuas sira atu “fó tulun ba ema kbiit-laek sira”. (Apostolu 20:18, 19, 35) Iha ninia karta ida, nia fó-hatene ba irmaun-irmán sira iha Korinto katak nia lakohi ‘atu hatodan sira-nia fiar’. Nia mós Maromak nia atan ida, hanesan deʼit ho sira, no nia hakarak ajuda sira atu serbí Maromak ho ksolok. (2 Korinto 1:24) Paulo hatudu ezemplu diʼak ba katuas sira ohin loron kona-ba haraik-an no serbí ho badinas.

11, 12. Oinsá mak katuas bele fó ajuda ba irmaun ida atu foti desizaun?

¹¹ Konsellu neʼebé katuas ida fó, presiza mai husi Maromak nia Liafuan, Bíblia. (Tito 1:9) Nia mós presiza fó “ho laran-kmaus”. (Galasia 6:1) Duké obriga ninia maluk sira atu halo buat ruma, bibi-atan neʼebé diʼak ajuda sira atu foti desizaun rasik hodi hatudu sira-nia domin ba Jeová no ba ninia Liafuan. Porezemplu, karik katuas ida ajuda irmaun ida atu foti desizaun importante hodi uza Bíblia nia matadalan ka ita-nia livru sira. Karik nia bele husu irmaun neʼe atu hanoin kona-ba oinsá buat neʼebé nia hili bele kona ninia relasaun ho Jeová. Katuas neʼe bele fó-hanoin nia katak atu halo orasaun hodi husu Maromak nia matadalan antes nia foti desizaun mak importante tebes. (Provérbios [Amsal] 3:5, 6) Kuandu katuas koʼalia ona ho nia, sira sei husik irmaun neʼe atu foti desizaun rasik.—Roma 14:1-4.

¹² Matadalan hotu neʼebé katuas sira fó la liu buat neʼebé Maromak nia Liafuan hatete. Tan neʼe, importante katak  sira uza Bíblia didiʼak no sempre fó konsellu husi ida-neʼe. Hodi halo nuneʼe, katuas sira la uza sala sira-nia kbiit neʼebé Maromak fó ba sira. Tuir loloos, bibi sira laʼós katuas sira-nian. Ikusmai, ema ida-idak iha kongregasaun laran presiza hatán ba Jeová no Jesus kona-ba desizaun neʼebé sira halo.—Galasia 6:5, 7, 8.

13, 14. Iha dalan saida deʼit mak katuas sira hatudu ezemplu diʼak ba luhan?

¹³ Depois apóstolu Pedro hatete atu la bele “ukun” luhan, nia dehan atu “sai ezemplu” ba luhan. (1 Pedro 5:3) Oinsá mak katuas ida bele sai ezemplu ba luhan? Hanoin toʼok kona-ba hahalok rua neʼebé irmaun ida presiza atu bele serbí nuʼudar katuas. Primeiru, nia presiza “iha hanoin neʼebé loos”. Ida-neʼe katak nia komprende didiʼak Bíblia nia matadalan no oinsá atu uza matadalan neʼe iha ninia moris. Iha situasaun neʼebé susar, nia ukun an hodi kalma nafatin no hanoin didiʼak antes nia foti desizaun. Segundu, nia presiza “tau matan ba ninia umakain iha dalan neʼebé diʼak”. Ida-neʼe katak nia presiza hatudu ezemplu neʼebé diʼak nuʼudar laʼen no aman, tanba “se ema ida la hatene tau matan ba ninia umakain rasik, oinsá mak nia sei tau matan ba Maromak nia kongregasaun?” (1 Timoteo 3:1, 2, 4, 5, MF) Irmaun no irmán sira iha kongregasaun bele tau fiar ba katuas sira neʼebé hatudu hahalok sira-neʼe.

¹⁴ Katuas sira mós hatudu ezemplu neʼebé diʼak hanesan Jesus, hodi hola parte boot iha serbisu haklaken. Haklaken kona-ba Maromak nia Ukun mak parte importante iha Jesus nia moris, no nia hanorin ninia dixípulu sira atu halo serbisu neʼe. (Marcos 1:38; Lucas 8:1) Ohin loron, haklaken-naʼin sira gosta atu haklaken hamutuk ho katuas sira. Sira haree katak katuas sira laran-manas kona-ba haklaken no sira bele aprende husi dalan neʼebé sira hanorin. Maski katuas sira okupadu tebes iha sira-nia moris, maibé sira uza sira-nia tempu no forsa atu haklaken beibeik liafuan diʼak. Ida-neʼe bele book irmaun-irmán sira iha kongregasaun atu mós hatudu laran-manas hanesan neʼe. Katuas sira bele hatudu ezemplu diʼak ba maluk sira hodi prepara ba reuniaun sira, fó komentáriu no halo serbisu hanesan hamoos no hadiʼa Reuniaun-Fatin.—Efeso 5:15, 16; lee Ebreu 13:7.

15. Tanbasá mak katuas vizita irmaun-irmán sira?

¹⁵ Bibi-atan neʼebé diʼak sai prontu lalais atu ajuda bibi ida neʼebé moras ka kanek. Hanesan neʼe mós, katuas sira presiza ajuda kedas sira neʼebé hasoru susar no sira neʼebé presiza konsellu ka laran-manas. Porezemplu, maski karik katuas-ferik sira presiza ajuda ho sira-nia atividade loroloron nian, maibé liuliu sira  presiza laran-manas no kmaan husi Eskritura sira. (1 Tesalonika 5:14, 15) Karik joven sira iha kongregasaun luta hasoru “hakarak foin-saʼe nian”. (2 Timoteo 2:22) Katuas sira ajuda ema hotu iha kongregasaun hodi vizita sira. Kuandu sira vizita, sira koko atu komprende problema neʼebé irmaun-irmán sira hasoru daudaun, no sira fó kmaan husi Bíblia. Se katuas sira lalais atu fó ajuda, irmaun-irmán sira bele sees an husi problema boot.

16. Kuandu ema ida iha kongregasaun iha problema neʼebé todan, katuas sira bele halo saida?

¹⁶ Oinsá se irmaun ida iha kongregasaun iha problema todan neʼebé bele estraga ninia relasaun ho Jeová? Tiago hakerek: “Imi ida moras? Nia sei bolu katuas kreda nian bá; sira sei reza ba nia, no nia halo sala karik, nia sei hetan perdua.” (Tiago 5:14, 15) Maski irmaun neʼebé “moras” iha dalan espirituál la bolu katuas sira, maibé kuandu katuas sira hatene kona-ba irmaun neʼe nia problema, sira presiza sai prontu lalais atu ajuda nia. Katuas sira halo orasaun hamutuk ho irmaun-irmán sira no temi sira iha sira rasik nia orasaun. Katuas sira mós fó apoiu durante sira-nia susar. Kuandu halo nuneʼe, katuas sira hatudu katak sira mak bibi-atan neʼebé diʼak neʼebé fó laran-manas ba maluk atu kontinua serbí Maromak ho ksolok.—Lee Isaías (Yesaya) 32:1, 2. a

17. Kuandu katuas sira banati-tuir “Bibi-Atan Boot”, oinsá mak ida-neʼe ajuda kongregasaun?

¹⁷ Katuas kristaun sira hakaʼas an atu banati-tuir “bibi-atan diʼak” Jesus Kristu, iha buat hotu neʼebé sira halo iha Jeová nia organizasaun. Tan neʼe, irmaun sira-neʼe ajuda bibi luhan atu sai metin iha lia-loos no serbí Maromak ho laran-metin. Sin, ita agradese tebes ba Bibi-Atan Boot Jeová, no ba ita-nia bibi-atan sira neʼebé hatudu domin mai ita.