Ne Mbakuran, Dondo Nen Ikyav i Orkuranilev u Tamen La
“Kristu kpaa ya ican sha ci wen, A ver ne ikyav je sha u né dondo Un ijime yô.”—1 PET. 2:21.
1, 2. (a) Ka a nengen sha iyôngo doo doo yô, ka nyi ka i due kere? (b) Er nan ve ior mba sha ayange a Yesu kpishi lu er iyôngo i lun a orkuran i ga nahana?
ORKURANILEV ka nana ver ishima sha iyôngo i nan yô, i kpe i iyol kpishi. Takerada ugen u i gber sha kwagh u ilev mbi kuran yô kaa ér, “or u nan tee ilev nan due a mbi ér mbi za ya toho, maa nan kende mbi yô, mbia fatyô u gban angev, shi a yina mbi iyol ken atô u anyom kpuaa.” Kpa orkuranilev ka nana nengen sha iyôngo i nan tsembelee yô, i kpe i iyol.
2 Mbakuran ka vea wa iyôngo i Aôndo a we ve sha ikyev la ikyo shi vea nengen sha i asange asange yô, kwagh ne a na tiônnongo cii a taver ken jijingi. Alaghga u umbur er kunya yange kôr Yesu a ikpelaior sha ci u “i tumbul a ve, ve sambe wuee er iyôngo i i lu a orkuran i ga” la nahan. (Mat. 9:36) Er nan ve ve nyôr ken imba mlu u vihin nee? Lu sha ci u mba yange i na ve tom u tesen ior Tindi u Aôndo la ve wa tswam shi kwagh kuman ve ga, shi ve eren kwagh u ve tesen la ga. U yange ma ve lu tesen ior dooshima man ikyo i wan la yô, ve gema ve na taver ior kpishi u civir Aôndo. Ve na lu ior inja er i tôô ve “ikyav mbi yuhwan” sha avande nahan.—Mat. 23:4.
3. Ka nyi i doo u mbatamen mba ken tiônnongo vea umbur er ve lu eren tom ve u kuran iyôngo laa?
3 Sha nahan yô, Mbakristu mba ve lu mbakuran nyian la mba a tom u vesen. Iyôngo i ve kuran la ka i Yehova man Yesu, u a yer iyol na ér un ngu “Orkuranilev u dedoo” la. (Yoh. 10:11) Yesu ‘yam a yam iyôngo ne sha ishe je,’ a yam i sha “awambe a injaa” a na. (1 Kor. 6:20; 1 Pet. 1:18, 19) Iyôngo ne doo un ishima kpishi je yange lumun u nan uma sha ci u i. Ka Yesu Kristu, Wan u Aôndo u lun a dooshima la a lu “Orkuranilev u tamen” ye. Nahan doo u mbatamen vea umbur hanma shighe ér ve mba mbakuranilev mba ve lu wasen un a wase tom yô.—Heb. 13:20.
4. Se lu timen sha nyi ken ngeren nee?
4 Nahan yô, gba u Mbakristu mba ve lu mbakuran la vea eren a iyôngo nena? I wa anmgbianev mba ken tiônnongo kwagh ér ve̱ ‘ungwan imo i mbahemenev vev.’ Mbatamen di i gema i wa ve kwagh ér ve de lu mba “eren tahav sha kwagh u i we [ve] sha ikyev ga.” (Heb. 13:17; ôr 1 Peteru 5:2, 3.) Nahan mbatamen vea er nan ve vea hemen ken tiônnongo kpa vea eren tahav sha iyôngo ga? Shin se pine ser, mbatamen vea er nan ve vea nenge sha iyôngo, kpa vea er tahav sha i a hemba er Aôndo a ne ve la ga?
“UNA TÔÔ VE UNA WA SHA IKYUM NA”
5. Kwagh u i er ken Yesaia 40:11 la tese se nyi sha kwagh u Yehova?
5 Profeti Yesaia ôr kwagh u Yehova kaa ér: “Una koso ilev Nav er orkuranilev nahan, Una kohol ônovmbaiyôngov sha uwegh Nagh, Una tôô ve Una wa sha ikyum Na, Una za a mbiambenônov tegh tegh.” (Yes. 40:11) Ivur ne tese er Yehova a nengen sha mgbe u mba ken tiônnongo mba ve taver ga, shi vea ngôôr gban ga la yô. Er orkuranilev ka nan fa mgbe u hanma iyôngo shi nan kegh iyol u wasen i nahan, kape Yehova kpa a fe mbamgbe mba mba ken tiônnongo, shi ka i saan un iyol u nan ve iwasen i i gbe u a na ve la je la. Shi er orkuranilev ka nan wa waniyôngo shin ikyum nahan, kape Yehova, “Ter u A lu a mhôônom ma zungwen” la kpa ka a tese se ikyo i wan sha ashighe a ican je la. Una sur se asema shighe u se tagher a imeen shin se nyôr ken zayol u vesen yô.—2 Kor. 1:3, 4.
6. Ortamen nana fatyô u dondon ikyav i Yehova nena?
6 Orkuranilev u ken jijingi nana fatyô u henen kwagh ken ikyav i Ter wase u sha ne kpishi je! Gba u nana ver ishima sha mbamgbe mba iyôngo i i we nan sha ikyev la, er Yehova nahan. Aluer ortamen fa mbamtaver mba iyôngo i lu tagher a mi la yô, nana fa shighe kua gbenda u u hembe doon u nana taver i ishima shi nana sue i yô. (Anz. 27:23) Jighilii yô, gba kpee u ortamen nana lamen vea mba nan civir Yehova a ve imôngo la doo doo. Er nan we ikyo sha akaa a ve a myer nahan kpa, ka nan ver ishima sha kwagh u nan ongo shi nan nenge a mi ken tiônnongo la, nahan nan na iyol i nan sha u nana “wase mba ve taver ga la.”—Aer. 20:35; 1 Tes. 4:11.
7. (a) Yange mbakuran lu eren a iyôngo i Aôndo sha ayange a Esekiel man Yeremia la nena? (b) Mbatamen vea fatyô u henen nyi ken ibo i Yehova a ne mbakuran mba mimi ga la?
7 Time ase sha ieren i mbakuran mba Aôndo yange na ve ibo la. Sha ayange a Esekiel man Yeremia la, Yehova venda mbakuran mban sha ci u ve lu nengen sha iyôngo na tsembelee, er doo u ma ve er la ga. Er or môm lu kuran iyôngo ne ga yô, kwagh tser i, nahan i sarem. Mbakuran mban na iyôngo i Aôndo ican, ve koso i ga, ve “koso ayol a ve” tseegh. (Esek. 34:7-10; Yer. 23:1) Ibo i Yehova yange na mbakuran mba sha ayange a tsuaa la, a fatyô u nan mbahemenev mba Mbakristu Mbaaiev mba sha ayange a ase ne kpaa. Kpa kwagh ne gema tese er i lu hange hange u Mbakristu mba ve lu mbatamen la vea tesen iyôngo i Yehova dooshima shi vea nengen sha i doo doo yô.
“M VER NE IKYAV”
8. Mbatamen vea fatyô u dondon ikyav i dedoo i Yesu la shighe u ve lu wan anmgbianev vev kwagh nena?
8 Er uumace ve yen yô, alaghga iyôngo i Aôndo igen ia kav kwagh u Yehova a soo hen ve la fese ga. Alaghga vea er kwagh u Ruamabera a vende yô, shin vea er kwagh u a tese ér ve via ken jijingi ga yô. Nahan mbatamen vea er nena? Doo u vea wa ishima a ve er Yesu yange er a mbahenen nav, shighe u kwagh hemba gban ve u fan or u nana hemba ken Tartor la nahan. Yesu yange yina ishima a mbahenen nav ga, kpa a za hemen u tesen ve shi a wa ve kwagh sha dooshima, sha kwagh u hiden a iyol ijime. (Luka 9:46-48; 22:24-27) Yesu yange tese ve kwagh u a lu iyolhiden a mi ijime la sha u ôôn ve angahar; man ka ieren i i gbe u mbatamen vea lu a mi je la.—Ôr Yohane 13:12-15; 1 Pet. 2:21.
9. Ka ieren i nyi Yesu yange kaa a mbahenen nav ér ve lu a mi?
9 Mnenge u Yesu lu a mi sha kwagh u tom u orkuran la kaha a ieren i Yakobu man Yohane yange ve tese la. Mbaapostoli mba uhar mban yange ve lu keren ian i vesen ken Tartor. Kpa Yesu kôôm ve kaa ér: “Ne fa er utor mba ken atôatyev ka ve manger sha a ve, man mbatamen vev kpaa ve eren tahav sha a ve; kpa her a ven yô, i̱ de lu nahan ga; kpa hanmô u i sar nan ka lun u vesen ken a ven yô, nana̱ hingir wanakiriki wen.” (Mat. 20:25, 26) Yange gba u mbaapostoli vea palegh ieren i “manger sha” mbaapostoli mbagenev shin ‘eren tahav sha ior’ la.
10. Yesu soo ér mbatamen ve eren a iyôngo nena, man ka ikyav i nyi Paulu a ver sha gbaa ne?
10 Yesu soo ér Mbakristu mba ve lu mbatamen la ve̱ eren a iyôngo er un kpa yange un eren a i nahan. Gba u vea kegh iyol u eren anmgbianev vev tom, a lu u eren tahav sha a ve ga. Apostoli Paulu yange lu a ieren i hiden a iyol i ijime ne, gadia a kaa a mbatamen mba ken tiônnongo u ken Efese la ér: “Hii sha iyange i m hii tan nguhar ken Ashia je, ne ayol a en kpaa ne fa inja i mlu wam i m lu a ven sha ayange la cii, er m lu eren tom u Ter, m hide a iyol yam ijime cii” yô. Yange sar apostoli ne u mbatamen mban ve wasen mbagenev a ishima i môm man a iyolhiden a mi ijime. A kaa ér: “Ken akaa cii m tese ne ikyav mer, ka sha u eren tom nahan man i doo u né wase mba ve taver ga la ye.” (Aer. 20:18, 19, 35) Paulu shi kaa a mba ken Korinte kpaa ér un ya tor sha kwagh u jighjigh ve u nan ga. Kpa lu eren tom a ve imôngo sha ci u iember ve. (2 Kor. 1:24) Paulu ver mbatamen mba sha shighe wase ne ikyav i dedoo i hiden a iyol ijime shi eren tom kpoghuloo.
“KÔR AVE TAVERAA SHA KWAGHÔRON U JIGHJIGH”
11, 12. Ortamen nana fatyô u wasen anmgbian u nan civir Yehova vea nan imôngo u tsuan kwagh u nana er nena?
11 Gba kpee u ortamen nana “kôr ave taveraa sha kwaghôron u jighjigh er i tese nahan.” (Titu 1:9) Kpa nana̱ er kwagh ne “sha ishima i legh legh.” (Gal. 6:1) Orkuran u dedoo nan keren u kighir anmgbianev mba ken tiônnongo ér ve er ma kwagh ga, kpa ka nan hemba veren ishima u ôron kwagh u una kôr ve ken ishima yô. Ortamen nana fatyô u pasen ma anmgbian akaawan a ken Ruamabera a i doo u nana time sha mi zum u nan soo u tsuan kwagh u hange hange yô. Nana fatyô u timen sha kwagh u i nger ken ityakerada yase sha kwagh shon la vea nan. Shi nana fatyô u taver anmgbian la ishima ér nana hen sha gbenda u akaa a nan tsough u eren la aa bende a ikyar i nan ye a Yehova la kpaa. Orkuran la nana fatyô u pasen nan er i lu hange hange u nana sôn Aôndo ér a tese nan kwagh u nana er cii ve nana mase eren un yô. (Anz. 3:5, 6) Ortamen nana lamen a anmgbian u ve civir Yehova imôngo la sha ambaakaa ne nana been yô, nana de nan nana tsua kwagh u nan soo la.—Rom. 14:1-4.
12 Tahav mbu mbakuran ve lu a mi ken tiônnongo la due ken Ruamabera tseegh. Sha nahan yô, gba hange hange u vea fa u eren tom a Bibilo tsembelee shi vea dondo kwagh u i kaa la. Aluer mbatamen er nahan yô, kwagh ne una wase ve vea er tahav a za per uwegh ga. Kera kpa, mba a mba mbawasen Yehova man Yesu tom u kuran tsô. Ka hen Yehova man Yesu hanma or u ken tiônnongo nana va pase akaa a nan tsough u eren la ye.—Gal. 6:5, 7, 8.
“LU NEN IKYUMUILE LA IKYAV”
Mbatamen ka ve wase icombor ve u wan agoyol sha kwaghpasen (Nenge ikyumhiange i sha 13 la)
13, 14. Ka sha igbenda i nyi nahan i gbe u ortamen nana ver ikyumuile ikyav i dedoo?
13 Apostoli Peteru yange we mbatamen kwagh ér ve de ‘eren tahav sha kwagh u i we ve sha ikyev la ga,’ been yô, a taver ve ishima ér ve ‘lu ikyumuile la ikyav.’ (1 Pet. 5:3) Ortamen nana fatyô u lun ikyumuile ikyav nena? Nenge ase akaa ahar a i gbe u or u nan lu “keren u lun orkuran” la nana lu a mi ve a tese ér nan kuma u eren tom shon yô. Gba u nana lu “or u kundun ishima” man “or u nengen sha ya u nan dedoo.” Aluer ma ortamen nan ngu a tsombor yô, a gba u nana nengen sha tsombor u nan la sha inja, “gadia aluer or nana fa u nengen sha ya u nan ga yô, á er nan man nana kura nongo u Kristu u Aôndo?” (1 Tim. 3:1, 2, 4, 5) Cii man or nana kuma u eren tom u orkuran yô, ka i gba u nana lu or u kundun ishima, inja na yô, nana kav akaawan a Aôndo wang, shi nana fa u eren tom a a ken uma u nan kpaa. Ka nan shir a ishima shimi, nan hen sha kwagh zulee cii ve nan mase eren un ye. Anmgbianev mba ken tiônnongo ka vea nenge mbatamen vea tesen aeren ne yô, kwagh ne a na ve lu a vangertiôr ken a ve.
14 Shi mbatamen ka vea hemen ken kwaghpasen yô, ngun kpa i lu gbenda ugen u veren Mbakristu mbagenev ikyav i dedoo. Yesu yange ver mbakuran ikyav i dedoo sha gbaa ne. Tom u pasen loho u dedoo u Tartor la yange lu kwagh u hange hange u Yesu eren shighe u lu shin tar la. A tese mbahenen nav er vea eren u yô. (Mar. 1:38; Luka 8:1) Nyian ne, mbapasenkwagh ka vea due kwaghpasen vea mbatamen, shi vea nenge er tom u waren uma ne u gbe mbatamen kwagh kpishi, shi vea hen kwagh ken igbenda i mbatamen ve pasen kwagh la nahan, ishima i taver mbapasenkwagh mban kpen kpen! Er mbatamen ve lu a ityom ave kpishi nahan kpa, ka vea er tom a shighe man agee a ve u pasen loho u dedoo yô, kwagh ne a mgbegha tiônnongo u dondon ishimatseen ve la. Shi mbatamen vea fatyô u veren anmgbianev vev ikyav i dedoo sha u wan agoyol sha mbamkombo mba tiônnongo shi wan zwa sha kwagh u i lu henen ker la, shi eren ityom igen er u esen Iyou i Tartor shi nengen sha i nahan.—Ef. 5:15, 16; ôr Mbaheberu 13:7.
Mbakuran ka ve ver ikyav i dedoo ken kwaghpasen (Nenge ikyumhiange i sha 14 la)
“WASEN NEN MBA VE TAVER GA YÔ”
15. Ka atôakyaa agen a nyi ka a na ve i gba u mbatamen vea zaan anmgbianev vev inyaa?
15 Orkuranilev u dedoo nan ngôôr eren kwagh u una wase ma iyôngo i vihi iyol shin i gbe angev la ga. Mbatamen kpa gba u vea timbir u nengen sha hanma or u ken tiônnongo u nan lu yan ican shin i gbe u a wase nan ken jijingi la ga. Alaghga a gba u a nenge sha mbamgbe mba mbabeenyol man mba ve lu dedoo ga mbara, nahan kpa hemba gban u a wase ve ken jijingi shi a taver ve ishima cii. (1 Tes. 5:14) Shi alaghga agumaior a ken tiônnongo aa lu tagher a mbamtaver, er u hemban “asaren a sha inja i mbayevikyaior la” nahan. (2 Tim. 2:22) Sha nahan yô, gba u mbakuran vea zaan anmgbianev vev mba ken tiônnongo inya sha ashighe ashighe, sha u fan mbamzeyol vev, nahan taver ve ishima ken Ruamabera. Aluer mbatamen mba nengen sha ambaakaa ne fele fele yô, vea fatyô u palegh mbamzeyol mba vesen kpishi.
16. Ka a gba u mbatamen vea wase ma anmgbian u ken tiônnongo ken jijingi yô, ka ve na nan iwasen ne nena?
16 Kpa aluer mbamzeyol mbagenev na ma anmgbian u ken tiônnongo nan ngu nôngon u kpen ken jijingi di ye? Yakobu u un kpa lu môm ken mbangeren Bibilo la yange pine ér: “Orgen ken a ven nan ngu uangeaa?” Yô, “nana̱ yila mbatamen mba nongo u Kristu, ve̱ er msen sha ci u nan, ve̱ shighe nan mkurem ken iti i Ter. Msen u sha jighjigh u nan la una yima oruange la man Ter Una mough a nan sha. Aluer nan er isholibo je kpaa, á de nan.” (Yak. 5:14, 15) Aluer or u nan gbe angev mbu ken jijingi la nan “yila mbatamen” ga je kpa, vea va fa zayol u nan ne yô, doo u vea er kwagh sha mi fese u una wase nan yô. Mbatamen ka vea eren msen sha ci u anmgbianev vev shin vea eren msen vea ve imôngo, shi vea suen ve ken ashighe a ican yô, ve tese ér ve mba mbakuran mba dedoo mba ve lu taver anmgbianev vev asema ér ve za hemen u civir Aôndo saan saan yô.—Ôr Yesaia 32:1, 2.
17. Aluer mbatamen dondo ikyav i “Orkuranilev u tamen” la yô, ka nyi ia fatyô u duen kere?
17 Hanma kwagh u Mbakristu mba ve lu mbakuran mbara ve eren ken nongo u Yehova cii kpa, doo u vea nôngo vea dondo ikyav i Yesu Kristu, u a lu “Orkuranilev u tamen” la. Aluer mbatamen mba nan ikyumuile iwasen i ken jijingi yô, ia za hemen u taver ken jijingi shi civir Aôndo sha mimi. Se wuese Yehova, u a lu Orkuranilev u hemban cii la kpishi er a ne se mbakuran mba lun a dooshima yô.
