Nobeembezi, Amubaiye Beembezi Bapati

“Kilisito lwakwe wakapenga akaambo kandinywe, akumusiila citondezyo kutegwa mwiitobelesye mikondo yakwe.” —1 PE. 2:21.

INO INGA MWAINGULA BUTI?

Mbobali beembezi, mbuti baalu mbobakonzya kumwiiya Jehova?

Mbuti baalu mbobakonzya kumwiiya Jesu Kristo?

Ino mulimo wabweembezi ngobacita baalu ujisi makanze nzi?

1, 2. (a) Ncinzi cicitika ikuti mbelele zyalanganizyigwa kabotu? (b) Nkaambo nzi bantu banji mumazuba aa Jesu ncobakali mbuli mbelele zitakwe mweembezi?

MBELELE zilakonzya kuba abuumi buli kabotu lilikke buyo kuti zyalanganizyigwa kabotu. Bbuku limwi lipandulula buvwubi bwambelele lyakati: “Muntu uulekela butanga bwakwe kuti bulicelele akutabulanganya naa kutabubikkila maano, ulalangilwa kujana kuti mbelele zyakwe zyamana nguzu akunjilwa bulwazi mumyaka misyoonto buyo.” Nokuba boobo, ikuti mbelele zyalanganizyigwa kabotu, zilakonzya kuba abuumi bubotu.

² Oobo mbocibede amumbungano. Kulanganya akubikkila maano kwabeembezi Banakristo nkobatondezya kumbelele imwi aimwi kulakonzya kugwasya mbungano yoonse. Mulakonzya kuyeeya kuti Jesu wakabeetelela bantu akaambo kakuti “bakali kupenzyegwa alimwi bakalimwaikide mbuli mbelele zinyina mweembezi.” (Mt. 9:36) Nkaambo nzi ncobakali mubukkale buli boobu? Akaambo kakuti aabo ibakajisi mukuli wakuyiisya bantu Mulawo wa Leza bakali basilunya, bayumu myoyo, alimwi bakali basikuupaupa ameso. Muciindi cakubatondezya luyando bantu akubalanganya, basololi aaba babana Israyeli bakali kwaanga “mikuli milemu aamagwezyo aabantu.”—Mt. 23:4.

3. Ncinzi baalu mumbungano ncobateelede kuluba nobacita mulimo wamweembezi?

³ Beembezi Banakristo bamazuba aano—baalu basalidwe—bajisi mukuli mulemu. Mbelele nzyobalanganya nzizya Jehova a Jesu iwakalyaamba kuti “mweembezi mubotu.” (Joh. 10:11) Mbelele ‘zyakaulwa acintu cidula’ calo Jesu lwakwe ncaakabbadela “abulowa buyandisi.” (1 Ko. 6:20; 1 Pe. 1:18, 19) Ulaziyanda kapati mbelele cakuti wakatuula buumi bwakwe akaambo kanzizyo. Baalu lyoonse beelede kuyeeya kuti mulangizi wabo ngu Jesu Kristo, “mweembezi mupati wambelele.” Aboobo, bayakulyaambilila kulinguwe.—Heb. 13:20.

4. Ino tulalanga-langa nzi mucibalo eeci?

 ⁴ Aboobo, mbuti baalu Banakristo mbobeelede kuzilanganya mbelele? Boonse mumbungano baambilwa kuti beelede ‘kubamvwida aabo basololela’ akati kabo. Kulubazu lumwi, baalu Banakristo baambilwa kuti tabeelede “kuba mbuli basimalelo kuli baabo ibali ndukono lwa Leza.” (Heb. 13:17; amubale 1 Petulo 5:2, 3.) Aboobo, mbuti baalu basalidwe mbobakonzya kusololela kakunyina kuba basimalelo kubutanga? Munzila imwi inga twabuzya kuti, mbuti baalu mbobakonzya kulanganya mbelele kakunyina kuciindizya kubelesya nguzu nzyabapede Leza?

“ULATUKUMBATILA AKAANGO KAKWE”

5. Ino cikozyanyo cili mulugwalo lwa Isaya 40:11 cituyiisya nzi kujatikizya Jehova?

⁵ Musinsimi Isaya wakaamba boobu kujatikizya Jehova, wakati: “Ulalela butanga bwakwe mbuli mweembeli. Ulabunganya twana akuboko kwakwe, ulatukumbatila akaango kakwe, azyalo zinyonsya ulazyeenzya kabotu.” (Is. 40:11) Cikozyanyo eeci citondezya kuti Jehova ulalanganya nzyobayandika aabo ibali mumbungano ibatyompedwe alimwi abaabo ibayandika lukwabililo. Mbubwenya mbuli mweembezi mbwabikkila maano kuziyandika zyambelele imwi aimwi iili mubutanga, Jehova ulizizyi nzyobayandika aabo ibali mumbungano alimwi uliyandide kubapa lugwasyo ndobayandika. Mbubwenya mbuli mweembezi mbwanyamuna kabelele ikazyalwa ino-ino acisani cakwe nokuyandika, Jehova—“Taata siluse”—uyakutuumbulizya akutulanganya ciindi notusunkwa anotujana buyumuyumu.—2 Ko. 1:3, 4.

6. Mbwali mweembezi, mbuti mwaalu mbwakonzya kwiiya cikozyanyo ca Jehova?

⁶ Eelo kaka eeci nciiyo cibotu kapati ncaelede kwiiya mweembezi mumbungano kuzwa kuli Taateesu wakujulu! Mbubwenya mbuli Jehova, weelede kubikkila maano mbelele. Kwiinda mukuzyiba buyumuyumu mbobajisi azyintu ziyandika kubikkilwa maano cakufwambaana, mwaalu uyakucikonzya kukulwaizya akugwasyilizya. (Tus. 27:23) Eeci caamba kuti mwaalu weelede kujana ciindi cakubandika akubaswiilila basyominyina. Nokuba kuti tanjilili mumakani aamaseseke aamuntu, ulazibikkila maano eezyo nzyamvwa akubona mumbungano alimwi ulajana ciindi ‘cakubagwasya aabo batajisi nguzu.’—Mil. 20:35; 1 Te. 4:11.

7. (a) Mbuti mbelele mbozyakali kulanganizyigwa mumazuba aa Ezekieli a Jeremiya? (b) Mbwaanga beembezi ibatakali kusyomeka wakabakaka Jehova, nciiyo nzi ncotukonzya kwiiya?

⁷ Amubone bube bwabeembezi Leza mbaakapa mulandu. Mumazuba aa Ezekieli a Jeremiya, Jehova wakabapa mulandu aabo ibakeelede kunakulanganya mbelele zyakwe pele ibatakali kucita oobo bweelede. Ciindi nokwakanyina iwakali kuzilanganya mbelele, zyakali kujatwa abanyama alimwi zyakali kumwaika. Muciindi cakusanina mbelele, beembezi aabo tiibakali kuzyeendelezya kabotu, bakali ‘kulisanina beni.’ (Ezk. 34:7-10; Jer. 23:1) Akaambo katwaambo tukozyenye atooto, Leza wabakaka basololi ba Bunakristo Bwakubeja. Makani aabeembezi aaba alimwi alatondezya mbociyandika kubaalu Banakristo kuti kababikkila maano akutondezya luyando kubutanga bwa Jehova.

“NDAMUPA CITONDEZYO”

8. Mbuti baalu mbobakonzya kwiiya cikozyanyo ca Jesu iciinda kubota ciindi nobapa lulayo ku Banakristonyina?

⁸ Akaambo kakutalondoka kwabantu, bamwi mumbungano balakonzya kumuka kumvwisya Jehova ncayanda kulimbabo. Balakonzya kwaalilwa kucita  zyintu kweelana alulayo lwamu Magwalo, naa balakonzya kucita zyintu munzila iitondezya kutasima kumuuya. Ino baalu beelede kucita buti? Beelede kwiiya Jesu mbuli mbwaakali kubakkazyikila moyo basikwiiya bakwe ciindi nobakali kubikkila maano kukuyanda kuzyiba naa nguni iwakali kuyakuba mupati mu Bwami. Jesu wakazumanana kubakkazyikila moyo, alimwi wakazumanana kubayiisya basikwiiya bakwe akubapa lulayo kutegwa kabalicesya. (Lk. 9:46-48; 22:24-27) Kwiinda mukubasanzya kumaulu, Jesu wakatondezya mbobakali kunga batondezya kulicesya, bube mbobeelede kutondezya balangizi Banakristo.—Amubale Johane 13:12-15; 1 Pe. 2:21.

9. Mbube buli buti Jesu mbwaakakulwaizya basikwiiya bakwe kuba ambubo?

⁹ Mbwaakali kuubona mulimo wabweembezi Jesu kwakaliindene akooko kwa Jakobo a Johane. Baapostolo aaba bobilo bakali kuyanda kulijanina zyuuno zilemekwa mu Bwami. Nokuba boobo, Jesu wakabalulamika mukuyeeya kwabo, wakaamba kuti: “Mulizyi kuti baleli bamasi balabadyaaminina bantu, alimwi abapati akati kabo balabeendelezya calunya. Oobu tabusyi mbocibede akati kanu, pele kufwumbwa uuyanda kuba mupati akati kanu weelede kuba mubelesi wanu.” (Mt. 20:25, 26) Baapostolo bakali kuyandika kutantamuka cilengwa ‘cakudyaaminina’ Banakristonyina naa kubaambila ncobeelede kucita kufwumbwa ciindi.

10. Ino Jesu uyanda kuti baalu kababweendelezya buti butanga, alimwi ino Paulo wakapa cikozyanyo cili buti mumakani aaya?

¹⁰ Jesu uyanda kuti baalu Banakristo kabeendelezya butanga mbubwenya mbwaakali kubweendelezya. Beelede kuba aaluyandisisyo lwakuba bazike kubanyina, kutali kuba basimalelo pe. Mwaapostolo Paulo wakali kulicesya, wakaambila baalu bamumbungano yaku Efeso kuti: “Nyoonse mulizyi kabotu mbondali kucita akati kanu kuzwa mubuzuba bwakusaanguna mbondakasika mucooko ca Asiya, kandibelekela Mwami cakulicesya.” Mwaapostolo wakali kuyanda kuti baalu aabo bagwasye bamwi amoyo omwe, cakulicesya. Wakati: “Ndakamutondezya muzyintu zyoonse kuti kwiinda mukubeleka canguzu boobo mweelede kubagwasya aabo batajisi nguzu.” (Mil. 20:18, 19, 35) Paulo wakaambila bana Korinto kuti tanaakali simalelo walusyomo lwabo pe. Muciindi caboobo, wakali mubelesinyina kutegwa bakondwe. (2 Ko. 1:24) Paulo wakapa cikozyanyo cibotu kubaalu mazuba aano cakulicesya alimwi acakubeleka canguzu.

‘AMUKAKATILE KUMAJWI AASYOMEKA’

11, 12. Ino mwaalu inga wamugwasya buti musyominyina kusala kabotu?

¹¹ Mwaalu umwi aumwi mumbungano napa lulayo weelede ‘kukakatila kumajwi aasyomeka kujatikizya luzyibo lwakwe mukuyiisya.’ (Tit. 1:9) Nokuba boobo, weelede kucita oobo ‘amoyo mubombe.’ (Gal. 6:1) Muciindi cakusinikizya banyina kucita zyintu munzila imwi, mweembezi mubotu ulabagwasya kutegwa balisalile beni kweelana aluyando ndobajisi kuli Jehova a Jwi lyakwe. Mwaalu ulakonzya kwaamba njiisyo imwi yamu Magwalo mukwesu njakonzya kulanga-langa nayanda kusala cintu cimwi. Mwaalu ulakonzya kulanga-langa anguwe makani amwi aakamwaigwa mumabbuku eesu. Mwaalu alimwi ulakonzya kumukulwaizya munyina kutegwa alange-lange mbocikonzya kujatikizyigwa cilongwe cakwe a Jehova kweelana antaamu njaabweza. Mwaalu ulakonzya kukankaizya kaambo mbociyandika kulangaula busolozi bwa Leza kwiinda mukupaila kusala kakutanacitwa. (Tus. 3:5, 6) Amana kubandika amusyominyina makani aali boobu, mwaalu weelede kumuleka munyina kutegwa alisalile cakucita.—Lom. 14:1-4.

¹² Nguzu zilikke nzyobapedwe balangizi  Banakristo zijanika mu Magwalo. Aboobo, cilayandika kapati kuti kabalibelesya kabotu Bbaibbele akutobela ncolyaamba. Kucita boobo kuyakubagwasya baalu kutegwa batazibelesyi buteelede nguzu nzyobapedwe. Kuyungizya waawo, tabeelede kuluba kuti mbeembezi buyo basalidwe, alimwi kuti mbelele tazili zyabo, beelede kuyeeya kuti umwi aumwi mumbungano uyakulyaambilila kuli Jehova a Jesu akaambo kazyintu nzyasala.—Gal. 6:5, 7, 8.

“ZIKOZYANYO KUBUTANGA”

13, 14. Muumbazu zili mwaalu mwayelede kuba cikozyanyo cibotu kubutanga?

¹³ Naakamana kwaambila baalu mumbungano kuti tabeelede ‘kuba mbuli basimalelo kuli baabo’ mbobapedwe kulanganya, mwaapostolo Petro wakabakulwaizya ‘kuba zikozyanyo kubutanga.’ (1 Pe. 5:3) Mbuti mwaalu mbwakonzya kuba cikozyanyo kubutanga? Amubone zyeelelo zyobilo nzyayelede kuzuzikizya mwaalumi ‘uuyanda mulimo wabulangizi.’ Weelede kuba muntu “uulibatamika” alimwi weelede kuba muntu “uubeendelezya kabotu bamuŋanda yakwe.” Ikuti mwaalu kajisi mukwasyi, weelede kupa cikozyanyo cibotu, nkaambo “ikuti muntu katacizyi kweendelezya bamuŋanda yakwe mwini, ino mbuti mbwakonzya kulanganya mbungano ya Leza?” (1 Ti. 3:1, 2, 4, 5) Kutegwa mukwesu ayelele mulimo wabulangizi, weelede kulibatamika, nkokuti weelede kuzimvwisya njiisyo zya Leza alimwi akuzibelesya mwini mubuumi bwakwe. Weelede kubatama nokuba kuti bukkale bwabija alimwi ulakkala ansi kuyeeya katanasala cakucita. Ikuti bakwesu abacizyi mumbungano babona kuti mwaalu ulijisi bube oobu, bayakumulemeka.

¹⁴ Mwaalu alimwi weelede kupa cikozyanyo cibotu ku Banakristonyina caboola kukutola lubazu mumulimo wakukambauka. Jesu wakabapa cikozyanyo balangizi munzila eeyi. Kukambauka makani mabotu aa Bwami wakali mulimo mupati ngwaakali kucita Jesu naakali anyika. Wakabatondezya basikwiiya bakwe mbowakeelede kucitwa mulimo ooyu. (Mk. 1:38; Lk. 8:1) Mazuba aano, basikumwaya balakulwaizyigwa kapati kukambaukila antoomwe amwaalu akubona mbwali musungu mwaalu mumulimo wakufwutula maumi aabantu, alimwi akwiiya nzila nzyabelesya mukuyiisya. Busungu mbwajisi mwaalu bwakukambauka makani mabotu nokuba kuti ujisi bubi, kulabakulwaizya boonse mumbungano kuba basungu abalo. Baalu alimwi balakonzya kupa cikozyanyo cibotu kwiinda mukulibambila kabotu miswaangano akutola lubazu mumiswaangano amumilimo imwi iicitwa ambungano, milimo mbuli kusalazya akubamba Ŋanda ya Bwami.—Ef. 5:15, 16; amubale Bahebulayo 13:7.

“AMUBAGWASYE AABO IBATAJISI NGUZU”

15. Ntwaambo nzi tumwi tupa baalu kucita nyendo zyabweembezi?

¹⁵ Mweembezi mubotu ulafwambaana kubweza ntaamu kugwasya mbelele  iyalicisa naa kuciswa. Mbubwenya buyo, baalu beelede kufwambaana kubikkila maano kumuntu uuli woonse mumbungano uupengede naa uuyandika kugwasya kumuuya. Bacembeede abaabo baciswa bayandika kulanganya kumubili, pele ncobayandika kapati ndugwasyo lwakumuuya akukulwaizyigwa. (1 Te. 5:14) Bakubusi bamumbungano balakonzya kuti balwana buyumuyumu mbuli “zisusi zyabukubusi.” (2 Ti. 2:22) Aboobo, bweembezi bubikkilizya kuswaya basimbungano ciindi aciindi kutegwa baalu bazyibe bukkale bwabo abuyumuyumu mbobajisi akubakulwaizya kuzwa mu Magwalo. Ikuti mapenzi ngobajisi alwanwa cakufwambaana, mapenzi manji taakonzyi kukomena pe.

16. Ikuti umwi mumbungano uyandika lugwasyo lwakumuuya, ndugwasyo nzi baalu ndobakonzya kupa?

¹⁶ Mbuti kuti mapenzi akomena cakuti buumi bwakumuuya bwamukwesu naa mucizyi bwaba muntenda? Mulembi umwi wa Bbaibbele, Jakobo, wakalemba kuti: “Sena kuli uuciswa akati kanu? Aite baalu bambungano, eelyo abamupailile akumunanika mafwuta muzyina lya Jehova. Eelyo mupailo walusyomo ulamuponya ooyo uucisidwe, alimwi Jehova ulamubusya. Kunze lyaboobo, ikuti naa wakacita zibi, ulalekelelwa.” (Jak. 5:14, 15) Nokuba kuti muntu ooyo uucisidwe kumuuya taakwe ‘naaita baalu,’ beelede kufwambaana kumugwasya muntu ooyo mbobalizyibila buyo penzi lyakwe. Ikuti babapailila alimwi akupaila ambabo bakombinyina, akubagwasya nobayandika lugwasyo, nkokuti baalu bayakucikonzya kubakatalusya akubakulwaizya aabo mbobalanganya.—Amubale Isaya 32:1, 2.

17. Ikuti baalu bamwiiya “mweembezi mupati,” ncinzi cicitika?

¹⁷ Muzyintu zyoonse nzyobacita mumbunga ya Jehova, beembezi Banakristo balasoleka kumwiiya “mweembezi mupati,” Jesu Kristo. Kwiinda mukugwasyigwa kumuuya abaalumi ibabikkila maano, butanga bulazumanana kuba muciimo cibotu. Tulabalumba beembezi besu basiluyando alimwi a Mweembezi uubainda boonse, Jehova.

[Mibuzyo yaciiyo]

[Cifwanikiso icili apeeji 29]

Baalu balaigwasya mikwasyi yabo kulibambila kuunka mumulimo wakukambauka (Amubone muncali 13)

[Zifwanikiso icili apeeji 30]

Balangizi balapa cikozyanyo cibotu mumulimo wakukambauka (Amubone muncali 14)