1, 2. 1) Ximodo riuu ca dendxuʼ huiiniʼ ca ora rizaaláʼdxicabe laacaʼ. 2) Ca dxi bibani Jesús, xiñee guyuu ca binni que casi dendxuʼ ni qué gapa pastor.

 ORA rizaalaʼdxiʼ ti pastor ca dendxuʼ stiʼ nazaaca riuucame. Ti libru ni cusiene modo gusiniisi binni dendxuʼ na «pa ti pastor riné si laacame para gócame ne qué rizaalaʼdxiʼ laacame la? qué zandaa zaca huará stale de laacame ne qué zaniisicame galán». Peru ora rizaaláʼdxibe cada tobi de ca dendxuʼ huiiniʼ stibe la? riniisicame galán ne riuucame nazaaca.

² Zacaca nga runi ca binnigola ca ndaaniʼ ca neza binni ridagulisaa, pa gápacabe ca dendxuʼ huiiniʼ ca jneza la? ziuucaʼ jma gaxha de Dios. Cadi guiaandaʼ laanu xi biʼniʼ Jesús né ca binni ni bibani ca dxi stiʼ. Biabe laacaʼ «purti qué ganna ca xi guni ca ne iruti cayaca né laacaʼ. Nuu ca casi dendxu ni qué gapa pastor» (Mat. 9:36). Xiñee nuu ca binni que «casi dendxu ni qué gapa pastor» ca dxi stiʼ Jesús que yaʼ. Purtiʼ ca binni ni naquiiñeʼ nusiidiʼ laacabe ni ná Ley stiʼ Dios que gadxé ni rusiidicaʼ ne gadxé ni rúnicaʼ, nadúxhucaʼ, ne rinábacaʼ guni binni jma que biaʼ zanda guni. Casi ñaca nudxiibacabe «xiixa nanaa» yanni ca dendxuʼ huiiniʼ que, lugar de ñacanécabe laacaʼ ne nuyaanacabe laacaʼ (Mat. 23:4).

3. Xi naquiiñeʼ guietenalaʼdxiʼ ca binnigola laga cayápacaʼ ca dendxuʼ huiiniʼ stiʼ Dios.

³ Ca pastor ni nuu ndaaniʼ xquidxi Dios ca dxi riʼ —ca binnigola ni maʼ gulí Dios— nabé risaca dxiiñaʼ nápacaʼ. Ca dendxuʼ ni rápacabe ca stiʼ Jiobá ne Jesús laacame, ne laa nga zeeda gaca «pastor chaʼhuiʼ» (Juan 10:11). Nabé risaca ca dendxuʼ huiiniʼ riʼ para Jesús, purtiʼ guzíʼ laacame né «rini sti [...] ni risaca jma que irá xixé» (1 Cor 6:20; 1 Ped. 1:18, 19). Laabe nabé nadxiibe laacaʼ ngue runi bidiibe xquendanabánibe pur laacaʼ. Ca binnigola ca naquiiñeʼ gánnacaʼ xaíque  sticaʼ nga Jesucristu, Xiiñiʼ Dios, laabe nga «Pastor ni nandxóʼ stinu» (Heb. 13:20).

4. Xi zadúʼyanu lu tema riʼ.

⁴ Yanna, ximodo naquiiñeʼ gapa ca pastor ni nuu ra ridagulisaanu ca dendxuʼ huiiniʼ ca yaʼ. Ca xpinni Cristu ni nuu ndaaniʼ ca neza binni ridagulisaa cayábicabe laanu guzúʼbanu «stiidxa cani nuu de xaíque» ládenu. Peru laaca cayábicabe ca binnigola cadi uquichinacaʼ ne cadi guni mandarcaʼ ca xpinni Cristu, purtiʼ dendxuʼ stiʼ Dios laacabe (Heb. 13:17; biindaʼ 1 Pedro 5:2, 3). Ximodo zanda gapa ca binnigola ni nuu ra ridagulisaanu ca xpinni Cristu sin uquiichinácabe laacaʼ yaʼ. Ximodo zanda gudiicabe ni caquiiñeʼ ca dendxuʼ huiiniʼ sin guninácabe laacaʼ yaʼ.

5. Xi rusiidiʼ ca diidxaʼ ni zeeda lu Isaías 40:11 laanu de Jiobá.

⁵ Isaías ni riguixhená que guníʼ de Jiobá sicaríʼ: «Casi ti pastor zápabe guiráʼ ca dendxuʼ stibe. Ne nabe zutópabe ca dendxuʼ huiiniʼ ca; ne ndaaniʼ nabe zinebe laacaʼ. Ne stale cuidadu zinebe cani cugadxi» (Is. 40:11). Ejemplu riʼ rusihuínnini rudii Jiobá guiráʼ ni caquiiñeʼ ca xpinni Cristu. Cásica ti pastor nanna xi caquiiñeʼ cada tobi de ca dendxuʼ stiʼ ne nuuca listu para gacané laacame, zacaca nga rudii Jiobá guiráʼ ni caquiiñeʼ cada tobi de ca xpinni Cristu ne riuuláʼdxibe gacanebe laacaʼ. Ne casi ruaʼ ti pastor ti dendxuʼ huiiniʼ casi gule ndaaniʼ xhaba, zacaca Jiobá —Bixhózenu ni riá laanu— laaca zacané laanu, zaguixhedxí ladxidoʼno ne zudii laanu stipa ora guidxaagalunu guendanagana ne ora iquiiñenu xiixa (2 Cor. 1:3, 4).

6. Ximodo zanda chinanda ti binnigola ejemplu stiʼ Jiobá.

⁶ ¡Nabé sicarú ejemplu ni bisaana Bixhózenu ni nuu guibáʼ para ca binnigola ni nuu ra ridagulisaanu! Cásica Jiobá, naquiiñeʼ chúʼcabe listu para gúʼyacabe ni caquiiñeʼ ca binni ridagulisaa. Xiñee yaʼ. Purtiʼ pa nánnacabe xi caquiiñeʼ ca binni ridagulisaa, zanda quixhedxícabe ladxidoʼcaʼ ne gudiicabe ni caquiiñecaʼ (Prov. 27:23). Para gaca nga naquiiñeʼ cuee ca binnigola tiempu para guiniʼné ca xpinni Cristu ne gucaadiágacabe laacaʼ. Ne neca nánnacabe nuu xiixa cosa ni cadi naquiiñeʼ gánnacabe la? ora gúʼyacabe o gunadiágacabe xiixa cosa ni cadi jneza cayuni tuuxa xpinni Cristu, racanécabe laacaʼ (Hech. 20:35; 1 Tes. 4:11).

7. 1) Ximodo guyuu ca dendxuʼ huiiniʼ stiʼ Dios tiempu bibani Ezequiel ne Jeremías. 2) Xi riziidiʼ ca binnigola de modo guluu jneza Jiobá ca pastor de dxiqué.

⁷ Guiníʼ íquenu ximodo guca ca pastor ni guzaniruʼ ndaaniʼ xquidxi Dios ca dxi bibani Ezequiel ne Jeremías, guluu jneza Jiobá laacaʼ purtiʼ qué ñápacaʼ ca dendxuʼ huiiniʼ stiʼ Jiobá. Cumu guirutiʼ ñapa laacabe la? guyuu tu bininá laacabe ne bixélecabe de Dios. Lugar de nudii ca pastor que ni caquiiñeʼ ca dendxuʼ stiʼ Dios la? laga ni caquiiñesicaʼ biyúbicaʼ (Ezeq. 34:7-10; Jer. 23:1). Tiempu riʼ laaca maʼ bidxiideche Jiobá ca xaíque stiʼ ca religión ni na zinanda Cristu, purtiʼ laaca qué rusiidicaʼ binni de Dios ne ruyúbicaʼ puru si para laacaʼ. Nga runi, ¡nabé risaca nga gannaxhii ca binnigola ni naca xpinni Cristu ca dendxuʼ huiiniʼ stiʼ Dios!

8. Ximodo zanda chinanda ca binnigola ca ejemplu stiʼ Jesús ora gudiicaʼ conseju.

⁸ Cumu nácanu binni ruchee la? nuu xpinni Cristu raca nagana para laa guiene xipeʼ nga na Jiobá guni. Zándaca qué rinándacabe xiixa conseju ni zeeda lu Biblia o gúnicabe xiixa ni gusihuinni caʼruʼ guiniisicabe lu stiidxaʼ Dios. Xi naquiiñeʼ guni ca binnigola ca óraca yaʼ. Naquiiñeʼ gápacaʼ paciencia cásica gupa Jesús ca  discípulo stiʼ dxi nuucaʼ gánnacaʼ tu tobi de laacaʼ jma zasaca lu Reinu stiʼ Dios. Lugar de nidxiichi Jesús la? bisiidiʼ laacabe ne bidii conseju laacabe para cadi gudxiibacabe laca laacabe (Luc. 9:46-48; 22:24-27). Ora gudiibiʼ Jesús ñee ca discípulo stiʼ bisiidibe laacaʼ cadi naquiiñeʼ gudxiibacaʼ laca laacaʼ. Ca binnigola ca laaca cadi naquiiñeʼ gudxiibacaʼ laca laacaʼ (biindaʼ Juan 13:12-15; 1 Ped. 2:21).

9. Ximodo guluu jneza Jesús ca discípulo stiʼ.

⁹ Apóstol Santiago ne Juan guníʼ íquecaʼ ti pastor nga tuuxa ni guni mandar stobi. Laacaʼ gunábacaʼ gudii Jesús laacaʼ ti puestu risaca lu Reinu stiʼ Dios. Peru gucané Jesús laacabe guchaacabe modo riníʼ íquecabe ne gudxi laacabe: «Nanna tu modo sti cani runi mandar ndaani guidxilayú, runi stica irá binni ni runi mandar caʼ. Ne zaqueca ca hombre ni risaca, riulaʼdxi ca guni binni ni na caʼ. Peru laatu cadi guni tu zacá lade tu, sínuque tu gacalaʼdxi isaca jma la? napa xidé gaca casi jmozo ca xcaadxi» (Mat. 20:25, 26). Ca apóstol que cadi naquiiñeʼ guiníʼ íquecaʼ guni mandarcaʼ xcaadxi xpinni Cristu.

10. 1) Xi racalaʼdxiʼ Jesús guni ca binnigola. 2) Xi ejemplu bisaana Pablu.

¹⁰ Ni racalaʼdxiʼ Jesús nga gannaxhii ca binnigola ni nuu ra ridagulisaanu ca xpínnibe cásica bíʼnibe. Naquiiñeʼ chúʼcabe listu para gacanécabe laacaʼ ne cadi gacaláʼdxicabe gácacabe xpixuaanacaʼ. Pablu bisihuinni qué nudxiibaʼ laca laa, ne rihuinni ni lu ca diidxaʼ ni bicaabe ra nuu ca xpinni Cristu ni nuu Éfeso. Laabe guniʼbe: «Laatu nanna tu ximodo huazaya lade tu dede primé dxi bedandaya Asia. Qué ñuu dxi nudxiiba naa ra cayune xhiiña Señor». Apóstol riʼ gucalaʼdxiʼ ñacané ca binnigola xcaadxi xpinni Cristu de guidubi ladxidoʼcaʼ ne cadi nudxiibacaʼ laca laacaʼ. Ne guníʼrube: «Ma bilué laatu de irá modo naquiiñe guni nu dxiiña para acané nu cani caquiiñe ni» (Hech. 20:18, 19, 35). Ne lu ti carta ni bicaabe ra nuu ca xpinni Cristu de Corinto, gúdxibe laacaʼ cadi laadibe nga riguíxhebe xi gúnicaʼ, sínuque nácabe ti hombre ni runi xhiiñaʼ Dios cásica laacaʼ ne gucanebe laacaʼ chuʼcaʼ nayecheʼ ora gúnicaʼ xhiiñaʼ Dios (2 Cor. 1:24). Pablu bisaana ti ejemplu galán para ca binnigola de yanna, purtiʼ qué nudxiibaʼ laca laa ne nabé biʼniʼ dxiiñaʼ.

11, 12. Ximodo zanda gacané ti binnigola ti xpinni Cristu ganna xi guni.

¹¹ Ca binnigola ni nuu ra ridagulisaanu ca naquiiñeʼ gusiidicaʼ ni na Stiidxa Dios (Tito 1:9). Peru naquiiñeʼ gúnicaʼ ni «ne diidxa nadóʼ» (Gál. 6:1). Ti pastor nachaʼhuiʼ qué zucaa ti xpinni Cristu guni ni na, sínuque zaquiiñeʼ Biblia para gacané laabe gánnabe xi naquiiñeʼ gúnibe. Zanda gabi binnigola ca ti xpinni Cristu xi textu zanda gacané laa para quixhe ique guni ni jneza, ne laaca zanda gúʼndanebe laa ti tema stiʼ xiixa revista o libru ni nápanu. Zanda gacanebe laa guiníʼ ique zanda chuʼ gaxha de Jiobá o guixeleʼ de laabe pur cani quixhe ique guni. Laaca naquiiñeʼ gusiene binnigola ca laabe nabé risaca nga guni orarbe Dios ante quixhe íquebe gúnibe xiixa (Prov. 3:5, 6). Peru ora maʼ bisiene binnigola ca laabe cani bizéʼtenu riʼ, zudii lugar laabe cuibe xi gúnibe (Rom. 14:1-4).

¹² Guiráʼ ca conseju gudii ca binnigola naquiiñeʼ guiree cani de ndaaniʼ Biblia. Nga runi, naquiiñeʼ gánnacabe iquiiñecabe Biblia stícabe ne gusiénecabe ni na ni. Zacá qué zuquiichinácabe binni. Cadi naquiiñeʼ guiaandaʼ laacabe laaca nuucabe lu náʼ Jiobá ne Jesús ne laacaʼ zabídxicaʼ cuenta cada tobi de ca xpinni Cristu (Gál. 6:5, 7, 8).

13, 14. Xi guiráʼ naquiiñeʼ guni ca binnigola para gácacaʼ ejemplu stiʼ ca xpinni Cristu.

¹³ Pedru gudxi ca binnigola que ca diidxaʼ riʼ: «Cadi guni mandar tu laacabe casi ñaca laatu nga xpixuaana cabe, sínuque lasá jneza ti guʼya cabe ximodo ibani cabe» (1 Ped. 5:3). Ximodo zanda chinanda ti binnigola conseju ca yaʼ. Guidúʼyanu xi chupa cosa naquiiñeʼ guni ti hombre ni «cá ique gaca xaíque sti ca xpinni Cristu». Naquiiñeʼ «cuʼ xpiaaniʼ» ne ganna «guni mandar ndaani lidxi». Para gaca ti xpinni Cristu binnigola naquiiñeʼ «cuʼ xpiaaniʼ», o guiene chaahuiʼ ca conseju ni zeeda de Dios ne gúnini lu xquendanabani. Naquiiñeʼ guiníʼ ique chaahuiʼ ante guni xiixa cosa ne cadi guidxiichi nagueenda ora chuʼ xiixa guendanagana. Ne pa nápabe familia, naquiiñeʼ gácabe ejemplu ndaaniʼ lídxibe, «purti pa qué ganna be guni mandar be ndaani lidxi be la? ximodo zanda gapa be ca xpinni Dios yaʼ» (1 Tim. 3:1, 2, 4, 5). Ora guʼyaʼ ca xpinni Cristu runi ca binnigola ca guiráʼ ni maʼ bizéʼtenu ca la? nga zucaa laacaʼ guidxíñacaʼ laacabe.

¹⁴ Ora ruuyaʼ ca xpinni Cristu rucheeche ca binnigola ca diidxaʼ reeda gácacabe ti ejemplu para laacaʼ. Nabé sicarú ejemplu bisaana Jesús para ca binnigola, purtiʼ para laabe nabé risaca nga gucheechebe diidxaʼ dxi guyuube lu Guidxilayú. Ne laaca bisiidibe ca discípulo stibe ximodo naquiiñeʼ gúnicaʼ dxiiñaʼ riʼ (Mar. 1:38; Luc. 8:1). Ca dxi stinu riʼ, nabé nga riuulaʼdxiʼ ca xpinni Cristu gucheechenecaʼ ca binnigola diidxaʼ, ne gúʼyacaʼ rúnicabe ni né stale gana ne riuuláʼdxicaʼ guiziidicaʼ modo rúnicabe ni. Ora ruuyaʼ ca xpinni Cristu stipa runi ca binnigola ca para cueecaʼ tiempu chigucheechecaʼ diidxaʼ neca stale dxiiñaʼ nápacaʼ, guiráʼ ca binni ridagulisaa laaca riuuláʼdxicaʼ gúnicaʼ modo rúnicabe ca. Laaca nabé riuu ca xpinni Cristu gana ora gúʼyacaʼ ruundaʼ ca binnigola ca dede ante cani chitiidiʼ lu ca guendaridagulisaa ne ricábicabe lúcani, ne laaca riuucaʼ gana ora gúʼyacaʼ rusiácabe ra Yoo stiʼ Reinu ne gacanécabe ora gaca chaahuiʼ ni (Efes. 5:15, 16; biindaʼ Hebreos 13:7).

15. Bizeeteʼ xiñee naquiiñeʼ chiganna ca binnigola ca ti xpinni Cristu.

¹⁵ Ti pastor ni nadxii ca dendxuʼ stiʼ la? nagueendaca ruyubi xi guni ora gacaná o gaca huará ca dendxuʼ stiʼ. Zacaca nga naquiiñeʼ guni ca binnigola, nagueendaca naquiiñeʼ gacanecaʼ ti xpinni Cristu ora cadiʼdiʼ ra nagana o caquiiñeʼ chuʼ tu gacané laa para chuʼ gaxha de Dios. Ca binni ni maʼ nagola ne cani maʼ huará caquiiñeʼ chuʼ tu gacané laacaʼ, peru ni jma caquiiñecabe nga chuʼ tu uguu gana laacabe para cadi guixélecabe de Dios (1 Tes. 5:14). Ca hombrehuiiniʼ ne ca dxaapahuiiniʼ ni nuu ra ridagulisaanu  laaca cayúnicabe stipa pur guixélecabe de cani «riguba yu» laacabe (2 Tim. 2:22). Nga runi, ca binnigola ca gatigá naquiiñeʼ chigánnacaʼ cada tobi de ca xpinni Cristu ti gánnacaʼ xi guendanagana cadíʼdicabe ne iquiiñecaʼ textu ni zeeda lu Biblia ti uguucaʼ gana laacabe. Pa nagueendaca gacané ca binnigola ca ti xpinni Cristu zanda gaca chaahuiʼ guendanagana stiʼ ante guiroobaʼ ni.

16. Xi caquiiñeʼ guni ca binnigola ca ora gúʼyacaʼ caquiiñeʼ ti xpinni Cristu gacanécabe laa.

¹⁶ Peru xi naquiiñeʼ guni ti xpinni Cristu pa nuu xiixa guendanagana ni cuxheleʼ laa de Dios yaʼ. Discípulo Santiago bicaa ca diidxaʼ riʼ: «Pa nuu tobi de laatu huará la? useenda caa ca hermanu gola de lade cani runi cre, iníʼ né ca Dios pur laabe ne xhubi ca aceite ladi be laga canaba ca lu Señor acané laabe. Ne pa dxandí runi cre ca zuni Dios ni canaba ca la? zalá be, ne zandisa Señor laabe, ne pa huachee be la? zuxhá Señor stonda be» (Sant. 5:14, 15). Neca qué náʼ tuuxa ni maʼ caxeleʼ de Dios gabi ca binnigola ca xi cayaca la? naquiiñeʼ gacanécabe laabe casi gánnacabe ximodo nuube. Ca binnigola ca rusihuínnicaʼ nácacaʼ ti pastor chaahuiʼ ora runi orarnecaʼ ca xpinni Cristu ne rinábacaʼ gacané Dios laacabe, ne racanecaʼ laacabe ora cadiidicabe lu xiixa guendanagana. Biblia na: «¡Biiyaʼ! Ti rey ni zuni mandar para gaca ni jneza, ne ca príncipe ca zuni mandarcaʼ casi príncipe para gaca ca cosa ca casi na ley. Cada tobi de laacaʼ zeeda gácacaʼ casi ti lugar ra zanda chuʼ binni ora cundubi bi ne ra gucaachilú binni ora cayaba dxacha nisaguié, casi nisa ziguxooñeʼ ndaaniʼ ti guidxi ra gastiʼ nisa, casi bandáʼ stiʼ ti guié ngola lu ti desiertu» (Isaías 32:1, 2).

17. Xi ribeendú ca xpinni Cristu ora rinanda ca binnigola ca «pastor ni nandxóʼ».

¹⁷ Ca binnigola rúnicaʼ stipa pur chinándacaʼ ejemplu stiʼ Jesucristu, ni naca «pastor ni nandxóʼ» lu guiráʼ ni rúnicaʼ. Laaca racanécabe ca xpinni Cristu para guiniisicaʼ lu stiidxaʼ Dios. Ni runi ca binnigola riʼ rucaani laanu gudiʼnu xquíxepeʼ Jiobá ne gusisácanu laabe, purtiʼ gástiruʼ sti Pastor casi laabe.