“¿Diosan jan yanaptʼatajj sumti jakasta? Millón millón jaqenakaw sum jakasipjje” sasaw mä jachʼa letreron uñstäna. Ukjja Diosajj janiw utjkiti sirinakaw uchayapjjatayna. Jupanakajj janis Diosan yanaptʼap munapkaspa ukham amuyasipjje.

Maysa toqetjja, Diosar iyawsirinakajj utjarakiwa, ukampis Diosajj janis utjkaspa ukham sarnaqapjje. Católica Iglesian pʼeqtʼiri mä tatakurajj akham sasaw iglesiapankir jaqenakat säna: “Uñjapkistu ukanakajj janiw cristianöpkiti sapjjestaspawa, kunattejj jan cristianöpki ukanakjamaw sarnaqtanjja” sasa (Salvatore Fisichella).

Yaqhepajj jan tiemponiw sarnaqapjje, ukat Diosats janiw amtasjjapjjeti. Diosajj jaqenakar yanaptʼañatakejj wali jayankkaspas ukham amuyapjje. Ukat kunapachatï sinti jan walinakan jikjjatasipjje ukhakiw Diosar yanap mayipjje, cheqas kunjamtï mä uywatajj uywiripar yanaptʼañatakejj jankʼakïkejja, ukhamwa Diosampejj jankʼak istʼayasiñ munapjje.

Yaqhepasti janiw iglesiapan yatichäwiparjam sarnaqapkiti, kunattejj janis askïkaspa ukat janis wakiskirïkaspa ukhamwa amuyapjje. Amuytʼañataki, Alemaniankir catoliconakatjja, chacha warmjam jan casarasis jakañajj walikïskiwa sasaw sapa patakat paqallq tunka sojjtanejj amuyapjje, ukampis iglesiapan yatichäwiparjamasa ukat Bibliarjamas janiw ukajj walïkiti (1 Corintios 6:18; Hebreos 13:4). Ukat janiw catoliconakakejj kuntï yateqapki ukarjam jan sarnaqapjjatap amuyasipkiti. Jan ukasti yaqha religionanakan pʼeqtʼirinakapasa, iglesiapar sarapki ukanakat akham sapjjewa: ‘Diosajj janis utjkaspa ukhamwa sarnaqäwipampejj uñachtʼayapjje’ sasa.

Ukatwa akham jisktʼasiñajj utji, ¿Diosan yanaptʼap munapuntanti? Janiw jichhak ukham jisktʼasktanti. Jan ukajj kunapachatï Adanamp Evamp jakapkäna ukhatpachaw ukham jisktʼasiñajj utjäna. Uka jisktʼan qhanañchäwip yatiñatakejja, Génesis librot mä qawqha yatjjatañäni.