ICIPANDE ICIKALAMBA | BUSHE TULAKABILA LESA?

Mulandu Nshi Bamo Bamwena Ukuti Tabakabila Lesa?

Ku calo cimo, abashasumina muli Lesa balembele pa cipampa ca fyebo ukuti: “Bushe mumona ukuti tamukabila Lesa? Ala te imwe mweka, bengi abashikabila Lesa.” Ifi balembele filanga fye ukuti abantu bamo bamona kwati tabakabila Lesa.

Lelo nangu fye bantu abasumina muli Lesa, bacita ifintu kwati tabaishiba ukuti e ko aba. Salvatore Fisichella, shikofu mukalamba uwa baKatolika, alandile pali baKatolika banankwe ati: “Umuntu nga amona ifyo tulecita, te kuti atile tuli Bena Kristu pantu imicitile yesu tayapusana na bashasumina muli Lesa.”

Bamo tabakwata ne nshita ya kutontonkanya pali Lesa. Bamona kwati munkalwe tapali ifyo engabacitila. Lelo nga bakwata amafya, e lyo batontonkanya fye pali Lesa pa kuti abafwe.

Bambi na bo bamona kwati ifyo basambilila ku mapepo te kuti fibaafwe, ne ci cilenga belacita ifyo basambilila. Ku ca kumwenako, baKatolika abengi mu Germany batontonkanya ukuti caliba fye bwino umwaume no mwanakashi ukwikala pamo nangu ca kutila tabaupana. Lelo ici calipusana ne fisambilisho fya mwi calici lyabo e lyo ne fyo Baibolo ilanda. (1 Abena Korinti 6:18; AbaHebere 13:4) Kwena te baKatolika beka abacita ifi. Intungulushi sha mapepo ishingi shilailishanya ukuti aba mu macalici yabo bacita fye ifintu kwati tabaishiba ukuti Lesa e ko aba.

Ifi twalandapo kuti fyalenga abantu ukwipusha ukuti: Bushe cine cine tulakabila Lesa? Ukutula fye na kale abantu balafwaya ukwishiba nampo nga tulakabila Lesa nelyo iyo. Mwi buuku lya kubalilapo ilya mu Baibolo e mo babalilapo ukulanda pali ici cipusho. Pa kuti twishibe icasuko, natubale tulande pa fintu fyalekanalekana ifyo balandapo mwi buuku lya mu Baibolo ilya Ukutendeka.