“Buiti san lidin hun sin Bungiu? Buiti lidin houn saragu míñunu gürigia sin Bungiu.” Fuati uganu le tuagu aban óunwenbu gárada tídangiñe burí to ichugúboun ǘmadarugu, híchugun aban sétanu hani gürigia ha mafiñenbaña anihein lan Bungiu. Furanguti samina hamá gürigia ha luagu úati lan Bungiu ani memegeirúniwa lan.

Luagu amu oubaü, añahein saragu gürigia ariñagutiña afiñe hamá luagu Bungiu, gama lumoun aba hóuserun kamá hamuga úati Bungiu. Ariñagati aban fádiri katóliku gíriti Salvatore Fisichella hawagu lílana lani relihión: “Le arihitiwa, hénrengubei lasaminarun kristiánugu wamá, lugundun aban ligaburi wawinwandun hama ha mámabaña kristiánugu”.

Añahein fiú gíbeti heberesegun darí lun madaani hamá lun hasaminarun luagun Bungiu. Genegeti houn weiri lan lidise hawéi lun gamadagua hamá luma. Ánheindügü háluaha, dánrügüñein le hemegeiruni háluahei; aba harihini Bungiu kamá aban musu le lunti leseriwidun houn le oura habusenrun.

Añahein amu mafiñentiña seriwi lan arufudahani le burí lídanbei relihión saragu, o mawinwandun hamuti le arufudahóubei houn tidan haligilisin. Kei hénpulu, ǘrüwa-wein-disisi hádangiñe kada san katóliku yámani maribanti harihini laganóun aban wügüri tuma aban würi úara sin hamarieidun, aban échuni le múaranti luma arufudahani le tídanbei haligilisin ni luma le tídanbei Bíbülia (1 Korintuna 6:18; Ebüréu 13:4). Ani mámarügüñanu katóliku arihei mawinwandun hamani tílana haligilisin le hafurendeirubei. Íbini tábutigu amu burí ligilisi sarí hamuti dan le harihiniña tílana haligilisin “óusera kei ha mafiñenbaña anihein lan Bungiu”.

Ligía lunti lubéi wálügüdagun woungua: Inarüni san megei wamani Bungiu? Álügüdahani le mama iseriti. Lidan lagumeseha ubóu ligía furumiñe láfuachun álügüdahani le. Lun hasubudiruni óunabagülei, akutiha wamá fiú álügüdahani le akutihóubei tidan furumiñetu líburu tidan Bíbülia, Agumesehani.