Müsü sünüiki wanee karaloukta nashajala na wayuu nnojoliikana anoujüin nünain Maleiwa: «¿Anasüche pukuwaʼipa süka nnojolin punoujüin nünain Maleiwa? Aa, müshii mainma wayuu». Nnojoishii anoujüin naya nünain Maleiwa otta nnojoishi choʼujaain nia sümüin wayuu naashin.

Mainma wayuu anoujaka nünain Maleiwa. Akatsaʼa müin manoulakai naaʼin sutuma mojuin tü nakuwaʼipakat. Salvatore Fisichella, wanee shikiipüʼü tü iküleesia katoolikakat, müshi nia nachiki na wayuu nümaakana: «Neʼrüle mojuin wakuwaʼipa na wayuukana, nnojoleerü nayaawatüin saaʼu wanoujüin, müsü neʼe wakuwaʼipa maʼaka naaʼin na manoujüinsaliikana».

Eeshii na nnojoliikana jülüjüin aaʼin Maleiwa süka matüjüin jimataa naya naashin. Kaʼyatüshi nia noulia naashin. Makalaka nnojolin jülüjüin nia naaʼin. Müshi aka naaʼin wanee piuuna namüin. Nachajaain neʼe wanaa sümaa choʼujaain nia namüin.

Eeshii na nnojoliikana kasajanain amüin tü ekirajünakalü anain naya suluʼu tü iküleesiakat. Naʼakajee poloo shikii wayuu katoolika chaa Alemania, eeshii maʼaka 76 wayuu nnojoliika mojuin amüin kepiajiraain naya sümaa nnojoliin kasaalüin naya. Mojusü tia saashin tü iküleesia kaluʼuka naya otta saashin tü Wiwüliakat (1 Corinto 6:18; Hebreokana 13:4). Nnojoishii nayain neʼe na katoolikakana müin anüiki nachiki na wayuu namaajanakana. Maʼleesia nanüiki na wanee shikiipüʼükana tü iküleesiakalüirua. Naashin nayakana, müshii manoujüinkana naaʼin süka nnojoluin naaʼinrüin tü ekirajünakalü anain naya.

¿Choʼujaashiche chi Maleiwakai wamüin? Kakaliairü asakinnüin anain tüü. Süpüla watüjaainjatüin saaʼu müleka choʼujaale nia wamüin, wekirajaa sünain waneeirua kasa ashajünaka suluʼu tü karalouktakat Génesis.