“Ngöbö ñaka gare mäi yebätä, ¿mätä nüne kwin? Nitre kwati tä jän niere.” Nitre kwati kräke Ngöbö ñaka käkwe kukwe ye mikani gare täräkwata (cartel) yebiti. Erametre niaratre ye kräke, Ngöbö ñaka aune ñaka tö mikai gare jai.

Ne madakäre, nitre kwati tä Ngöbö mike era jai nieta kwetre, akwa Ngöbö ñaka ye kwrere tätre ja ngwen. Salvatore Fisichella, arzobispo católico, käkwe niebare krörö nitre nänkä kukwebätä ben yebätä: “Ni madakwe nun tuadre angwane, ñan raba nun kristiano niere, ñobätä ñan aune nitre ñaka Ngöbö mike täte ye erere nunta ja ngwen arato”.

Nitre ruäre ie jondron nuaindre krubäte yebätä kä ñaka ietre töbikakäre Ngöböbätä. Ngöbö tä mente krubäte bätätre yebätä ñaka raba mike täte nemen ruin ietre. Tätre ja di ribere ye ngwane tätre känene, akwa ni sribikä tä juto niaratre dimikakäre ye kwrere tätre mike tuin jai.

Kukwe mikata täte ye ñaka raba ni dimike nütüta nitre madakwe o iglesia kwetre yete kukwe drieta ietre ye ñaka tätre mike täte. Ñodre, ni brare aune meri ñaka ja mäkäninte nünandre jabe ye ñaka tuin blo nitre católicos nünanka Alemania 76% yei, kukwe ye abokän blo nieta Bibliabätä aune iglesia kwetre yete (1 Corintios 6:18; Hebreos 13:4). Nitre nänkä kukwebätä nitre católicos ben yei kukwe nemen gare ye erere ñaka tätre nuainne ye nitre católicos ñan aibe ie nüke gare. Nitre ji ngwanka kukwe mada madabätä ye tätre niere arato, nitre nänkä kukwebätä bentre ye “tätre ja ngwen nitre kräke Ngöbö ñaka ye erere”.

Yebätä, kukwe ne ngwantarita: ¿Ngöbökwe ni jie ngwandre ribeta metre jai? Kukwe ne ñaka krire ngwantarita. Kukwe namani bare kirabe tikabare tärä Génesis yebätä yekänti kukwe ye kädrieta kena. Kukwe kädrieta jatäri abokän mikata gare tärä Génesis yebätä ye ani ja tötikebätä kukwe ye mikakäre gare jai.