“Kọ whọ rọwo nọ Ọghẹnẹ ọ rrọ? Ahwo buobu a rọwo ho.” Ere ahwo jọ nọ a rọwo Ọghẹnẹ hẹ a kere fihọ esabọdo ologbo jọ. A kere eme eyena keme a rọwo nọ Ọghẹnẹ ọ rrọ họ.

Rekọ, ahwo buobu nọ a ta nọ a rọwo Ọghẹnẹ, a rẹ daezọ họ nọ a te bi ru eware jọ. Ibishọpo ichọche Kathọlik jọ nọ a re se Salvatore Fisichella, ọ ta kpahe ahwo ichọche riẹ nọ: “Ohwo ọvo ọ rẹ sai se omai Ileleikristi hi, keme oghẹrẹ uzuazọ ovona mai avọ ahwo nọ a bi kpohọ ichọche he ma bi yeri.”

Ahwo buobu a gbẹ be daezọ sọ Ọghẹnẹ ọ rrọ họ fiki eware nọ e vọ rai abọ nọ a bi ru. A roro nọ Ọghẹnẹ o thabọ hrọ, fikiere ọ sai fi obọ họ kẹ ae evaọ uzuazọ họ. Okenọ a te wo ẹbẹbẹ hayo nọ a tẹ gwọlọ oware jọ ọvo a re ro bo se Ọghẹnẹ wọhọ ẹsenọ ọ rrọ odibo rai nọ a re se vi uwou evaọ oke nọ u je rai.

Amọfa a rẹ daezọ re a fi eware nọ a bi wuhrẹ evaọ obọ egagọ rai họ iruo ho, keme a roro nọ o rẹ sae kẹ ae erere he. Wọhọ oriruo, evaọ obọ Germany, ahwo ichọche Kathọlik nọ a bu te 76 evaọ udevie udhusoi (100) a ta nọ o thọ họ re ọzae avọ aye nọ a re rọo ho a rria kugbe, yọ onana o wọso eware nọ ichọche rai gbe Ebaibol na o wuhrẹ. (1 Ahwo Kọrint 6:18; Ahwo Hibru 13:4) Uzẹme riẹ họ, orọnikọ ahwo ichọche Kathọlik ọvo ẹme nana o kie kpahe he, ahwo egagọ efa dede a bi ru lele eware nọ a bi wuhrẹ ai hi. Isu-egagọ sa-sa a bi bruenu nọ ahwo ichọche rai a wọhọ ahwo nọ “a rọwo Ọghẹnẹ hẹ.”

Eware nana nọ e be via na e tẹ wha onọ jọ ze inọ: Kọ ma ginẹ gwọlọ Ọghẹnẹ? Nẹnẹ ahwo a mu onọ oyena họ ẹnọ họ. Onọ nana o kake romavia evaọ obe ọsosuọ Ebaibol na. Re ma sae kuyo onọ nana, joma kake ta kpahe eware jọ nọ e via evaọ obe Emuhọ nọ o rrọ obe ọsosuọ Ebaibol na.