Kĩbaũ kĩmwe kĩnene kĩa barabara bũrũri-inĩ ũmwe, kĩrĩa kĩarĩhagĩrũo nĩ arĩa matetĩkĩtie nĩ kũrĩ Ngai, kĩandĩkĩtwo ũũ: ‘Hihi ũrĩ ũmwe wa arĩa matetĩkĩtie Ngai? Tũkĩrĩ aingĩ!’ Ũndũ ũcio ũronania biũ atĩ, andũ ta acio matiendaga gũtongorio nĩ Ngai.

O na kũrĩ ũguo, andũ aingĩ arĩa metĩkĩtie nĩ kũrĩ Ngai, matũũraga mũtũũrĩre ũronania atĩ matimwĩtĩkĩtie. Bishobu mũnene wa Gatoreki wĩtagwo Salvatore Fisichella, oigire ũũ igũrũ rĩgiĩ arũmĩrĩri a kanitha ũcio: “Nĩ ũndũ wa mĩtũũrĩre itũ, mũndũ angĩtwĩrorera o na ndangiuga tũrĩ Akristiano, tondũ hatirĩ ngũrani gatagatĩ gaitũ na arĩa matetĩkĩtie Ngai.”

Angĩ nao marĩ na mĩhang’o mĩingĩ mũno nginya makaga gwĩciria ũhoro wĩgiĩ Ngai. Mamuonaga arĩ kũraya mũno nao kana ta atangĩkinyĩrĩka, na kwoguo matiramũbatara ũtũũro-inĩ wao. Andũ ta acio meciragia ũhoro wa Ngai o rĩrĩa marĩ na mathĩna, nĩ ũndũ ũcio, monaga ta akoragwo ho arĩ ndungata yao.

Kũrĩ angĩ matarũmagĩrĩra morutani ma kanitha, tondũ monaga ta matangĩmateithia. Kwa ngerekano, gĩcunjĩ kĩa 76 harĩ igana kĩa arũmĩrĩri a kanitha wa Gatoreki thĩinĩ wa Njĩrĩmani, metĩkĩtie atĩ nĩ wega mũndũrũme na mũtumia maikaranie matambĩte kũhikania; ũrutani ũrĩ mũgarũ mũno na ndini yao o hamwe na ũrutani wa Bibilia. (1 Akorintho 6:18; Ahibirania 13:4) Hatarĩ nganja, o na ndini ingĩ nĩ cionaga atĩ mĩtũũrĩre ya arũmĩrĩri a cio nĩ ngũrani mũno na ũrĩa marutagwo. Atongoria a kanitha nyingĩ moigaga atĩ arũmĩrĩri ao mahaana “o ta andũ matetĩkĩtie nĩ kũrĩ Ngai.”

Ngerekano icio iratũma twĩyũrie kĩũria gĩkĩ: Hihi nĩ tũrabatara gũtongorio nĩ Ngai? Kĩũria kĩu ti kĩgeni. Kĩeyumĩririe rita rĩa mbere mũgũnda-inĩ wa Edeni, ta ũrĩa ibuku rĩa Kĩambĩrĩria rĩonanĩtie. Nĩgetha tuone macokio ma kĩũria kĩu, reke twambe twarĩrĩrie maũndũ marĩa meeyumĩririe thĩinĩ wa Edeni ta ũrĩa mataarĩirio nĩ ibuku rĩa Kĩambĩrĩria