“O kuila u xikina kuila se-ku Nzambi? Mazunda a athu, ka xikina kuila kuene Nzambi.” Kiki kiene kia zuela o kibuka kia athu ka xikina kuila kuene Nzambi. O athu enhá amba kuila, ka bhingi Nzambi.

Maji o athu a xikina kuila kuene Nzambi, a bhanga ima ilondekesa kuila ki kuene Nzambi. O arsebispu ia Katolika, Salvatore Fisichella, uambe ku athu a tokala mu ngeleja iê: “Se athu a tu tala kioso ki tuala lelu, ka-nda xikina kuila tu Jikidistá, mukonda o ukexilu ua muenhu uetu, uene umoxi ni ukexilu ua ió ka xikina kuila kuene Nzambi.”

Saí athu, mukonda dia ikalakalu iâ, kala ni kithangana kia ku banza kua Nzambi. Ene amba kuila Nzambi muthu uala dikanga, ka tena ku a kuatekesa. O athu enhá, a sota ngó Nzambi kioso kia kala ni maka mba kia bhindamena kima—kala mubhika u bhanga ioso ia mu tuma ngana iê.

A mukuá kene mu bhana valolo ku ilongesu ia jingeleja, mba kene mu kumbidila o milongi ia jingeleja. Mu kifika, 76 a pursentu a akua Katolika ku ixi ia Alemanha, a xikina kuila ki kituxi, diiala ni muhatu ku kala kumoxi sé ku kazala—sumbala ki kiene kiene mu longa o ngeleja ni Bibidia. (1 Kolindo 6:18; Jihebeleu 13:4) Maji o akua Katolika, kene ngó a mona kuila kene mu kumbidila o ilongesu ia ngeleja. O atuameni mu ngeleja javulu, a zuela kuila o athu mu ngeleja jâ a bhanga ima ilondekesa kuila a mu kaiela o ukexilu ua athu amba kuila “se-ku Nzambi.”

O ima íii, i tu bhangesa ku dibhudisa: O kuila tua bhingi Nzambi? O maka enhá ki a lelu kana. Tu a sanga mu Bibidia mu divulu dia Dimatekenu. Phala ku sanga o kitambuijilu kia kibhuidisu kiki, tua-nda di longa o maka u tu sanga mu Bibidia, mu divulu dia Dimatekenu.