TOHO YA TABA KANA | LWA TOKWA MULIMU?

Ki Kabakalañi ha lu Swanela ku Ipuza Puzo Yeo?

Taba ye ñwi ya cwanoñu fa ye ne ñozwi ki sikwata sa batu ba ba sa lumeli kuli ku na ni Mulimu, ye ne pahekilwe fo ku pahekiwanga lika za ku fundota, i bala kuli: “Kana mu lumela kuli ha ku na Mulimu? Batu ba bañata-ñata ki mona mo ba ikutwela.” Batu bao ku si na ku kakanya, ba ikutwa kuli ha ba tokwi ku etelelwa ki Mulimu mwa bupilo.

Niteñi, batu ba bañata ba ba ipapata kuli ba lumela ku Mulimu ba ezanga likatulo ze bonisa inge kuli ha ba lumeli kuli Mulimu u teñi. Salvatore Fisichella, yo muñwi wa ba bahulu ba mabishopu mwa Keleke ya Katolika, naa bulezi cwana ka za batu ba mwa Keleke ya habo yena kuli: “Mutu ha nyakisisa mupilelo wa luna kacenu, ha koni ku ziba kuli lu Bakreste bakeñisa kuli mupilelo wa luna wa swana ni wa batu ba ba sa lumeli ku Mulimu.”

Batu ba bañwi ba patehile hahulu kuli mane ha ba na nako ya ku nahana za Mulimu. Ba nahana kuli Mulimu u kwahule hahulu ni bona kuli mane haa na taba ni ze ezahala mwa bupilo bwa bona. Batu ba ba cwalo ba hupulanga feela Mulimu ha ba ziyelehile kamba ha ba tokwa nto ye ñwi, mane ba ezanga inge kuli Mulimu ki mutangaa bona wa ku taluseza za swanela ku eza ka nako kaufela ye ba tabela ku eza cwalo.

Ba bañwi bona ha ba pili ka ku lumelelana ni ze ba itutanga kwa bulapeli bwa bona mwendi kabakala ku nahana kuli ha ku na tuso ye ba kona ku fumana mwa ku eza cwalo. Ka mutala, 76 pesenti ya batu ba mwa Keleke ya Katolika mwa naha ya Germany, ba ikutwa kuli ku lukile muuna ni musali ku pila hamoho ba ka si ka nyalana ili mubonelo o shutanela kwahule ni lituto za Keleke ya bona ni ze i luta Bibele. (1 Makorinte 6:18; Maheberu 13:4) Kwandaa batu ba mwa Keleke ya Katolika, batu ba likeleke ze shutana-shutana ni bona, ba lemuhile kuli nihaike kuli batu ba bañata ba bulela kuli ki balumeli, ha ba pili ka ku lumelelana ni ze ba ituta. Baeteleli ba bulapeli ba likeleke ze shutana-shutana ba bilaela kuli mupilelo wa batu ba ba yanga kwa likeleke za bona wa swana ni wa batu ba ba sa lumeli kuli ku na ni Mulimu.”

Mitala yeo i tahisa feela kuli lu ipuze kuli: Kana luli lwa tokwa Mulimu? Taba yeo haki ye nca. Ne i kile ya ba teñi mi i ñozwi mwa buka ya pili ya Bibele. Kuli lu fumane kalabo kwa puzo yeo, ha lu nyakisiseñi pili litaba li sikai ze bulezwi mwa buka ya Bibele ya Genese.