Tuk grupë jäˈäy diˈib kyaj tmëbëktë Dios, tpëjtaktë anunsyë mä tuˈugë kartel: “¿Myajtëgoyˈajtypyë Dios? Miyonkˈam jyënäˈändë ko kyaj”. Tyäˈädë jäˈäyëty diˈib kyaj tmëbëktë Dios, jyënäˈändë ko Dios kyaj jyaˈˈaty ets ko kyaj dyajtëgoyˈattë.

Nan ta mayë jäˈäy diˈib jënandëp ko myëbëjktëbë Dios, per duˈun jyukyˈattë extëmxyëp kyaj pënë Dios. Salvatore Fisichella, tuˈugë arzobispo diˈib katolikë, duˈun tnimaytyakyë jyaˈayëty diˈib mä ryelijyonk: “Pënatyëts xyˈijxtëp tsip jyënäˈändët ko Dios mëduundëbëts, pes nanduˈunëts njukyˈattë extëmë jäˈäyëty diˈib kyaj myëbëktë”.

Näägë jäˈäy jantsy tuundëp ets kyaj tmëdattë tiempë parë tjamyatstëdë Dios. Wyinmaytyë ko Dios jantsy jagam yajpääty ets kyaj tiko dyajtëkëdët mä jyukyˈäjtën. Waˈan jaayë tˈëxtäˈäytyë ko dyajtëgoyˈattë naybyudëkë, duˈun tˈixtë extëm tuˈugë mëduumbë diˈib listë ijtp parë pyudëkëdët.

Etsë wiinkpë wyinmaytyë ko kyaj nëgoo pyudëkëdë tijaty yajtukniˈˈijxëdëp mä ryelijyonk o kyaj tpadundë extëm yajtukniˈˈixëdë mä tsyäjptëjk. Extëm nˈokpëjtakëm, ja 76% katolikëtëjk diˈib Alemania kyaj tˈaxëkˈixtë ko tuˈugë yetyëjk mët tuˈugë toxytyëjk tsyëënë ets kyaj të pyëktë, diˈib kubojkp mä tsyäjptëjk ets diˈib yajkubojkypyë Biiblyë (1 Korintʉ 6:18; Ebreeʉsʉty 13:4). Per kyaj yëˈëyëtyë katolikëtëjk diˈib duˈun yˈijxtëp, pes ta mayë jäˈäy diˈib jënandëp ko myëdäjttëbë ryelijyonk, per kyaj tpadundë diˈib yajtukniˈˈijxëdëp. Ets mayë wintsëndëjk diˈib mä relijyonk nan määy täjtëp ko jyaˈayëty, duˈun jyukyˈattë extëmxyëp kyaj tˈixyˈattë Dios.

Päätyë net nnayajtëˈëwëm: ¿njantsy yajtëgoyˈäjtëmë Dios? Taayëmë jäˈäy duˈun nyayajtëwëdë desde ko jukyˈäjtën tsyondaky. Parë nnijäˈäwëm wiˈix yaˈˈatsoojëmbity, min kanäk pëky nˈokˈijxëm diˈib yajmaytyakp mä Génesis.