Sẽn nan pa kaoose, tẽng a ye pʋgẽ, wẽnd-kae-rãmb sull n yao tɩ b gʋls taablo sẽn be sor noorẽ woto: “Yãmb pa tagsd tɩ Wẽnnaam sõngr pa tɩlae ne-y sɩda? Neb milyõ-rãmb n tagsd woto.” Yaa vẽeneg tɩ sul-kãngã nebã tẽedame tɩ Wẽnnaam sõngr pa tɩlae ne-b ye.

Neb wʋsg me sẽn yet tɩ b tẽeda Wẽnnaam maanda yɛl hal tɩ yaa wa b pa tẽed t’a beeme ye. A Salvatore Fisichella sẽn yaa katolik tũudmã taoor-soab a ye wã ra wa n gomda a wẽnd-doogã neb yelle, n yeele: “Ned sã n ges tõndo, a pa tõe n bãng tɩ d yaa kiris-neb ye. Bala d sẽn vɩ to-to wã wõnda sẽn pa tẽed-b Wẽnnaamã.”

Neb kẽer pʋd n pa tar sẽk n na n tags Wẽnnaam yell ye. B ninga b yamẽ t’a zãra ne ninsaalbã, n pa kẽesd a toog b vɩɩmã pʋgẽ ye. Yaa b sã n wa tar zu-loɛɛg bɩ n dat bũmb bal la b baood Wẽnnaam. Wa Wẽnnaam yaa bãmb tʋʋm-biiga.

Neb sãnda me getame tɩ tũudmã sẽn zãmsd nebã bũmb ninsã yõod pa waoog ye. B pʋd n pa tũud ye. Ad bũmb sẽn wilgd rẽ. Alemayn tẽngã, katolik-rãmb koabg sʋka, bãmb 76 n tagsd tɩ rao ne pag sã n vɩ ne taab n yaool n nan pa kẽ kãadem, pa wẽng ye. Yaool n pa zems ne b sẽn zãmsd-b bũmb ning b wẽnd-dotẽ wã, la ne Biiblã sẽn yetã ye. (1 Korẽnt dãmba 6:18; Hebre dãmba 13:4) La pa katolik-rãmbã nengẽ bal la nebã pa tũud b sẽn yet-bã ye. Tũudum wʋsg taoor-dãmb sũy sãamdame, bala b wẽnd-dotã neb vɩɩ wa wẽnd-kae-rãmbã.

Yaa woto fãa n kɩt tɩ kẽer sokd b mens Wẽnnaam sõngr sã n sɩd yaa tɩlae ne-dã. La pa sɩng ne bãmb ye. D sã n karem Biiblã pipi sebrã, d yãtame tɩ sɩnga hal dũniyã naaneg poor bilfu. Bɩ d gom yɛl a wãn sẽn zĩnd wakat kãnga, tɩ b gʋls tɩ be Sɩngr sebrã pʋgẽ. Rẽ na n sõng-d lame tɩ d bãng Wẽnnaam sõngr sã n sɩd yaa tɩlae ne-do.