“Ungomunye wabangakholwayo kuNkulunkulu yini? Abanengi banjalo.” Lo ngumbiko owawubhalwe liqembu labantu abangakholwayo kuNkulunkulu ebhakaneni elikhulu. Kuyacaca ukuthi ngokutsho kwabo uNkulunkulu kaqakathekanga ekuphileni kwethu.

Kanti njalo labanengi abathi bakholwa kuNkulunkulu abalandaba laye nxa besenza izinqumo zabo. Umbhishopi omkhulu wamaKatolika uSalvatore Fisichella ekhuluma ngamalunga esonto yakhe wathi: “Nxa abantu besikhangele ngibona angani akula ongananzelela ukuthi singamaKhristu namuhla ngoba indlela esiziphatha ngayo ifanana leyabantu abangakholwayo.”

Abanye abalasikhathi sokucabanga ngoNkulunkulu. Bambona ekhatshana kakhulu okokuthi kangeke enelise ukubanceda ngezinto eziqakathekileyo ekuphileni kwabo. Iqiniso yikuthi abantu laba badinga uNkulunkulu nxa sebesebunzimeni kumbe befuna okuthile, benza angani uNkulunkulu yisisebenzi sabo okumele sibenzele konke abakufunayo.

Abanye abaluboni uncedo lwezimfundiso zenkolo futhi bayehluleka ukulandela lokho abakufundiswayo emasontweni abo. Nansi esinye isibonelo esisodwa nje, amaphesenti angu-76 amaKatolika eGermany akholwa ukuthi kuyavunyelwa ukuthi indoda lomfazi bahlale bonke bengakatshadi. Umbono lo kawuhambelani ngitsho leBhayibhili kanye lemfundiso yesonto labo. (1 KwabaseKhorinte 6:18; KumaHebheru 13:4) AmaKatolika akusiwo wodwa abona umahluko okhona ekuphileni kwawo kanye lalokho akukholwayo. Abafundisi bamasonto amanengi bakhala ngokuthi amalunga amasonto awo aphila “njengabantu abangakholwa kuNkulunkulu.”

Izibonelo lezi zenza kube lengqondo ukubuza umbuzo lo: UNkulunkulu uqakathekile yini ekuphileni kwethu? Sokulesikhathi umbuzo lo ubuzwa. Kwakhulunywa ngawo kudala emakhasini okuqala eBhayibhili. Ukuze sithole impendulo yombuzo lo, asihloleni izindaba ezithile eBhayibhilini kuGenesisi.